Exodo 6:1-30
6 Maʉ̃ne Ãcõrẽba Moisea panusia:
–Iɗibʉrʉ bʉa unuya sãwã mʉ̃a Egiptoɗebema borora cawa oida. Mʉ̃ ʉɓʉaɗeba cawa o ɓʉ carea idjia bãrã israelerãra idu wãbiya. Aɓeɗa bãrãra idji druaɗebemada ãyã jʉrecuaya.–
2 Idjaɓa Ãcõrẽba jarasia:
–Mʉ̃ra Ãcõrẽa.
3 Mʉ̃a Abrahaʉ̃a, Isaa, idjaɓa Jacoboa biɗa cawabisia mʉ̃ra ne jũma poya obari Ãcõrẽda.* Baribʉrʉ mʉ̃ trʉ̃ Jehová abadada ãdjirãa cawabiẽ́ basía.
4 Mʉ̃ra ãdjirã ume beɗea ɓʉsia Canaaʉ̃ druara ãdjirãa diai carea.* Mama ãdjirãra drua ãĩbemarã quĩrãca panasiɗaa.
5 Baribʉrʉ mʉ̃a ũrĩ ɓʉa israelerãra mĩã sopua beɗea panʉda egiptorãba ãdjira õgo trajabi panʉ bẽrã. Maʉ̃ awara mʉ̃a quĩrãdoaẽ́ ɓʉa ãdji drõã naẽnabemarã ume beɗea ɓʉɗara.
6 Jãʉ̃be israelerãa jaradua:
“Mʉ̃ra Ãcõrẽa. Mʉ̃ ʉɓʉaɗeba ne waiɓʉada oya egiptorã cawa oi carea. Mãwã mʉ̃a bãrãra Egiptoɗe bia mĩga traja panʉnebemada ẽdrʉ ɓʉya. Egiptorã jʉwaeɗa panʉnebemada ẽdrʉ ɓʉya.
7 Mʉ̃a bãrãra mʉ̃ puru babiya. Maʉ̃ne mʉ̃ra bãrã Ãcõrẽ baya. Mãwã bãrãba cawaɗia mʉ̃drʉ bãrã Ãcõrẽda, mʉ̃a bãrãra Egiptoɗe bia mĩga traja panʉnebemada ẽdrʉ ɓʉɗa bẽrã.
8 Bãrãra mʉ̃a diai jaraɗa ẽjũãnaa edeya. Maʉ̃ ẽjũãra mʉ̃a Abrahaʉ̃a, Isaa, idjaɓa Jacoboa biɗa wãrãneba diai jarasia. Mʉ̃ra Ãcõrẽ bẽrã maʉ̃ ẽjũãra diaya bãrãne bamãrẽã.”–
9 Jũma maʉ̃gʉra Moiseba israelerãa jarasia. Mãwãmĩna ĩjãnaẽ́ basía. Ãdjirãra sopua panasiɗaa Moiseba naẽna jaraɗa ĩjã panʉ carea wetara mĩga traja panesiɗa bẽrã.
10 Maʉ̃be Ãcõrẽba Moisea jarasia:
12 Baribʉrʉ Moiseba Ãcõrẽa jarasia:
–Israelerãba mʉ̃ beɗeada ĩjãnaẽ́ panʉa. Mʉ̃ra warrá beɗeaca bẽrã ¿Egiptoɗebema boroba mʉ̃ beɗeara ĩjãica?–
13 Moiseba mãwã jaraɗamĩna Ãcõrẽba idjira Aaroʉ̃ siɗa israelerãmaa idjaɓa Egiptoɗebema boromaa diabuesia. Maʉ̃ne jarasiɗaa Ãcõrẽba ãdjira diabuesida israelerã Egiptoɗeba ẽdrʉ edeɗamãrẽã.
Moise idjaɓa Aaroʉ̃ drõã naẽnabemarã trʉ̃
14 Israelɗeba yõpeɗaɗarã bororãda naʉ̃gʉrã basía: Rubeʉ̃ra Israel warra iwina basía. Rubeʉ̃ warrarãra naʉ̃gʉrã basía: Hanoc, Palú, Hezroʉ̃, idjaɓa Carmi. Maʉ̃gʉrãra Rubeʉ̃neba yõpeɗaɗa bororã basía.
15 Simeoʉ̃ warrarãra naʉ̃gʉrã basía: Jemuel, Jamiʉ̃, Ohad, Jaquiʉ̃, Zoha, idjaɓa Saul. Saulora cananeo wẽrãba toɗa basía. Maʉ̃gʉrãra Simeoʉ̃neba yõpeɗaɗa bororã basía.
16 Levi jaiɗasiɗe 137 poa ɓasia. Levi warrarãra dji nabemaneba aɓa dji tẽãbemanaa naʉ̃gʉrã basía: Gersoʉ̃, Coá, idjaɓa Merari.
17 Gersoʉ̃ warrarãra naʉ̃gʉrã basía: Libni idjaɓa Simei. Ãdjira Gersoʉ̃neba yõpeɗaɗa bororã basía.
18 Coá jaiɗasiɗe 133 poa ɓasia. Coá warrarãra naʉ̃gʉrã basía: Amraʉ̃, Izhar, Hebroʉ̃, idjaɓa Uziel.
19 Merari warrarãra naʉ̃gʉrã basía: Mahli idjaɓa Musi. Jũma maʉ̃gʉrãra Levi warrarã basía dji nabemaneba aɓa dji tẽãbemanaa ãdji warrarã bara.
20 Amraʉ̃da idji apipi Jocabé ume dji edasiɗaa. Jocabéba warrada umé tosia. Aɓa Aaroʉ̃ basía, aɓa Moise basía. Amraʉ̃ jaiɗasiɗe 137 poa ɓasia.
21 Izar warrarãra naʉ̃gʉrã basía: Core, Nepeg, idjaɓa Zicri.
22 Uziel warrarãra naʉ̃gʉrã basía: Misael, Elzapaʉ̃, idjaɓa Sitri.
23 Aaroʉ̃ra Elisabe ume dji edasiɗaa. Elisabera Aminadá cau basía, Naasoʉ̃ djabawẽrã basía. Idjia warrada quĩmãrẽ tosia. Ãdjirã trʉ̃ra naʉ̃gʉrã basía: Nadá, Abiu, Eleaza, idjaɓa Itamar.
24 Core warrarãra naʉ̃gʉrã basía: Asir, Elcana, idjaɓa Abiasá. Maʉ̃ ũbeara Coreɗeba yõpeɗaɗa bororã basía.
25 Aaroʉ̃ warra Eleazara Putiel cau ume dji edasiɗaa. Maʉ̃ wẽrãba warrada tosia. Dji warrara trʉ̃ ɓʉsia Piné. Jũma maʉ̃gʉrãra Leviɗeba yõpeɗaɗa bororã basía.
26 Ãcõrẽba maʉ̃ Aaroʉ̃a, Moisea biɗa jarasia israelerã Egiptoɗeba ẽdrʉ edeɗamãrẽã sordaorã djõne wãbada quĩrãca.
27 Ãdjidrʉ Egiptoɗebema boro ume beɗeasiɗaa israelerã Egiptoɗeba ẽdrʉ edeɗi carea.
Moise Aaroʉ̃ siɗa Ãcõrẽba edaɗa
28 6:28-29 Egiptoɗe Ãcõrẽba Moisea jarasia:
–Mʉ̃ra Ãcõrẽa. Mʉ̃a bʉ́a jarabʉrʉda Egiptoɗebema boroa jũma jaradua.–
30 Baribʉrʉ Moiseba Ãcõrẽa jarasia:
–Mʉ̃ra warrá beɗeacaa. ¿Mʉ̃a jarabʉrʉra Egiptoɗebema boroba ũrĩca?–
