Exodo 7:1-25
7 Maʉ̃ne Ãcõrẽba Moisea jarasia:
–Ũrĩdua. Mʉ̃a Egiptoɗebema boroa bʉra ãcõrẽ quĩrãca unubiya. Maʉ̃ne bʉ djaba Aaroʉ̃ra bʉɗeba beɗeabarida ɓaya.
2 Mʉ̃a jarabi ɓʉda bʉ djaba Aaroʉ̃a jũma jaradua. Maʉ̃gʉra idjia Egiptoɗebema boroa jaraya bãrã israelerãra idji druaɗeba idu ẽdrʉbimãrẽã.
3 Baribʉrʉ mʉ̃a Egiptoɗebema borora so zarea ɓʉya. Maʉ̃be Egiptoɗe mʉ̃a ne ununacada zocãrã ocuaya cawabi carea mʉ̃drʉ dji dromaara ɓʉda.
4 Baribʉrʉ bãrãba jara panʉra Egiptoɗebema boroba ĩjãẽ́a. Maʉ̃ bẽrã mʉ̃ ʉɓʉaɗeba mʉ̃a ne ununaca waiɓʉa ɓeada oya egiptorã cawa oi carea. Mãwã mʉ̃ puru Israelera Egipto druaɗeba ẽdrʉ edeya sordaorã djõne wãbada quĩrãca.
5 Mʉ̃ ʉɓʉaɗeba mʉ̃a egiptorã cawa obʉrʉɗe idjaɓa israelerã Egiptoɗeba ẽdrʉ edebʉrʉɗe egiptorãba cawaɗia mʉ̃drʉ Ãcõrẽda.–
6 Maʉ̃be Moiseba Aaroʉ̃ biɗa osiɗaa Ãcõrẽba jaraɗa quĩrãca.
7 Egiptoɗebema boro ume beɗeaɗe wãsiɗaɗe Moisera 80 poa ɓasia. Aaroʉ̃ra 83 poa ɓasia.
Aaroʉ̃ bacuru dama baɗa
8 Ãcõrẽba Moisea Aaroʉ̃a biɗa jarasia:
9 –Egiptoɗebema boroba jaraya ne ununacada oɗamãrẽã bãrãba jara panʉra ĩjãi carea. Ne ununacada oɗaduaɗa abʉrʉɗe Aaroʉ̃a jaradua idji bacurura dji boro quĩrãpita egode ɓaebimãrẽã. Maʉ̃ne bacurura dama ba dogoya.–
10 Ara maʉ̃da Moisera Aaroʉ̃ siɗa Egiptoɗebema boromaa wãnapeɗa Ãcõrẽba jaraɗa quĩrãca osiɗaa. Aaroʉ̃ba idji bacurura egode ɓaebisia Egiptoɗebema boro quĩrãpita, Egiptoɗebema dji dromarã quĩrãpita biɗa. Ara maʉ̃da bacurura dama ba dogosia.
11 Baribʉrʉ Egiptoɗebema boroba idji druaɗebema ne cawa ɓeada, daubararã siɗa trʉ̃cuasia. Maʉ̃ne ãdjia biɗa necawaaɗeba Aaroʉ̃ba oɗa quĩrãca osiɗaa.
12 Ãdji bacurura egode ɓaebibʉdaɗe dama bacuasiɗaa. Baribʉrʉ Aaroʉ̃ bacuru dama baɗaba ãdji bacuru dama bacuaɗara mĩcuasia.
13 Mãwã ununamĩna Egiptoɗebema borora so zarea ɓesia Ãcõrẽba jaraɗa quĩrãca. Maʉ̃ bẽrã Moiseba Aaroʉ̃ biɗa jarapeɗaɗara ĩjãẽ́ basía.
Ãcõrẽba baido oa babiɗa
14 Maʉ̃be Ãcõrẽba Moisea jarasia:
–Egiptoɗebema borora so zarea ɓʉa. Maʉ̃ bẽrã israelerãra ẽdrʉbueẽ́a.
15 7:15-16 Jãʉ̃be nu diapeɗa Egiptoɗebema boro doeɗa wãbʉrʉɗe idjimaa wãdua. Dama baɗa bacurura bʉ jʉwaɗe ededua. Do icawa Egiptoɗebema boro quĩrãpita nũmepeɗa jaradua:
“Dai hebreorã Ãcõrẽba mʉ̃ra bʉmaa diabuesia. Idjia nãwã jara ɓʉa: mʉ̃ puru Israelera idu wãbidua ẽjũã põãsa ewaraga ɓʉɗaa. Mama ãdjirãba mʉ̃́a animarãda babue diaɗida panʉa. Mʉ̃a mãwã jara ɓʉmĩna bʉa waɗibiɗa ĩjãẽ́ ɓʉa.
17 Maʉ̃ bẽrã Ãcõrẽba nãwã jara ɓʉa: naʉ̃gʉɗeba bʉa cawaya mʉ̃drʉ Ãcõrẽda; Moiseba jʉwaɗe eroɓʉ bacuruba mʉ̃a Nilo doɗe tawebiya. Maʉ̃ne dora aɓeɗa oa baya.
18 Maʉ̃ba ɓedara jũma quininia. Dora aɓeɗa mĩguia ɓai bẽrã, bãrã egiptorãba baidora poya doɗaẽ́a.”–
19 Idjaɓa Ãcõrẽba Moisea jarasia:
–Aaroʉ̃a jaradua bʉ bacuruda edamãrẽã. Idjia maʉ̃ bacuru ʉ̃taa wabʉrʉɗe jũma Egiptoɗe ɓʉ baidora oa baya. Dora, do zaquera, amenera, baido juebada uriaɗe ɓʉra, zoco waiɓʉaɗe jue eroɓeara, jiadoɗe jue eroɓea siɗa jũma oa baya.–
20 Moiseba Aaroʉ̃ biɗa Ãcõrẽba jaraɗa quĩrãca osiɗaa. Moise jʉwaɗe ɓaɗa bacuruda Aaroʉ̃ba edapeɗa ʉ̃taa wasia. Ʉ̃taa wapeɗa Nilo doɗe tawesia Egiptoɗebema boro quĩrãpita, Egiptoɗebema dji dromarã quĩrãpita biɗa. Ara maʉ̃da dora oa basía.
21 Maʉ̃ba ɓedara jũma quinisiɗaa. Dora mĩguia ɓeɗa bẽrã egiptorãba baidora poya doɗaẽ́ basía. Aɓeɗa jũma Egipto druaɗe baidora oa basía.
22 Baribʉrʉ Egiptoɗebema daubararãba ãdji necawaaɗeba aɓarica baidora oa babisiɗaa. Maʉ̃ bẽrã Egiptoɗebema borora so zarea ɓesia. Moiseba Aaroʉ̃ ume jarapeɗaɗara idjia ĩjãẽ́ basía Ãcõrẽba jaraɗa quĩrãca.
23 Maʉ̃ ne ununacara ununamĩna ne crĩchaẽ́ diguiɗaa wãsia.
24 Maʉ̃be egiptorãba do icawa corosiɗaa baido biada ununi carea. Mãwã osiɗaa doeɗabema baidora poya doɗaẽ́ bẽrã.
Ãcõrẽba baujĩã diabueɗa
25 Ãcõrẽba Nilo do oa babiɗacarea siete ewari ɓasia.
