Exodo 8:1-32
8 Maʉ̃ne Ãcõrẽba Moisea jarasia:
–Egiptoɗebema boroa nãwã jaraɗe wãdua: “Ãcõrẽba nãwã jara ɓʉa: mʉ̃ purura idu wãbidua mʉ̃́a animarã babue diaɗamãrẽã.
2 Baribʉrʉ bʉa mʉ̃ puruda idu wãbiẽ́bʉrʉ mʉ̃a cawa oya. Jũma bʉ druara baujĩãba birabiya.
3 Nilo dora baujĩãba biraya. Maʉ̃ne doeɗaʉba baujĩãra bʉ diguiɗaa wãbʉrʉɗia. Mãwã bʉ cãĩbarima, bʉ cʉɗaɗe, dji dromarã deɗe, bʉ druaɗebemarã deɗe biɗa baujĩãra baraya. Baujĩãra bãrã paʉ̃ ãbubadaɗe, bãrã paʉ̃ bʉratʉbadaɗe biɗa baraya.
4 Bʉ ʉ̃rʉ̃, dji dromarã ʉ̃rʉ̃, bʉ druaɗebemarã ʉ̃rʉ̃ biɗa baujĩãra jʉ̃drʉcuaɗia.”–
5 Maʉ̃be Ãcõrẽba Moisea jarasia:
–Aaroʉ̃a nãwã jaradua: “Bʉ jʉwaɗe eroɓʉ bacurura dojã ʉ̃rʉ̃, do zaque ʉ̃rʉ̃, amene ʉ̃rʉ̃, baido juebada uria ʉ̃rʉ̃ biɗa ʉ̃taa wadua. Mãwã baidoɗeba baujĩãda jũma Egipto druaɗe odjacuaya.”–
6 Ara maʉ̃da Aaroʉ̃ba idji bacurura Egiptoɗebema do ʉ̃rʉ̃ wasia. Maʉ̃ne baujĩãra doeɗaʉba odjacuaɗapeɗa jũma Egipto druara birasiɗaa.
7 Baribʉrʉ Egiptoɗebema daubararãba ãdji necawaaɗeba aɓarica osiɗaa. Ãdjirã biɗa baujĩãda doeɗaʉba Egipto druaɗe odjabisiɗaa.
8 Maʉ̃be Egiptoɗebema boroba Moisera Aaroʉ̃ siɗa trʉ̃bipeɗa ãdjía nãwã jarasia:
–Ãcõrẽa iwiɗiɗadua naʉ̃ baujĩãra mʉ̃nebemada idjaɓa mʉ̃ puruɗebemada ãyã wãbimãrẽã. Maʉ̃bebʉrʉ mʉ̃a bãrã israelerãra idu wãbiya Ãcõrẽa animarã babue diacuaɗamãrẽã.–
9 Moiseba panusia:
–Bia ɓʉa. Jaradua sãʉ̃be bʉa quĩrĩã ɓʉda mʉ̃a Ãcõrẽa iwiɗida bʉ carea, dji dromarã carea, idjaɓa bʉ druaɗebemarã carea biɗa. ¿Sãʉ̃be quĩrĩã ɓʉ mʉ̃a Ãcõrẽa iwiɗida naʉ̃ baujĩãra bʉɗebemada, bʉ diguiɗabema siɗa jõbimãrẽã? Iwiɗisira aɓabe doeɗabʉrʉ baujĩãra baraa baya.–
10 Egiptoɗebema boroba panusia:
–Nu iwiɗidua.–
Moiseba jarasia:
–Bʉa jara ɓʉ quĩrãca oya. Mãwã bʉa cawaya dewara ãcõrẽra neẽ́da dai Boro Ãcõrẽ quĩrãca.
11 Nu bʉ diguiɗa, dji dromarãma, bʉ druaɗebema ẽberãrãma biɗa baujĩãra neẽ́ ɓaya. Baujĩãra aɓabe doeɗabʉrʉ baraa baya.–
12 Maʉ̃be Moisera Aaroʉ̃ siɗa Egiptoɗebema boromaʉba ẽdrʉsiɗaa. Nurẽma Moiseba Ãcõrẽa iwiɗisia baujĩã Egiptoɗebema boromaa diabueɗara jõbimãrẽã.
13 Ara maʉ̃da Ãcõrẽba Moiseba iwiɗiɗa quĩrãca osia. Baujĩãra egiptorã deɗe, uɗa biɗa, ãdji ẽjũãne biɗa jũma quinisiɗaa.
14 Maʉ̃be egiptorãba baujĩã quininara ãbaa boromea bue nũmʉsiɗaa. Maʉ̃ba Egipto druara jũma mĩguia nũmesia.
15 Egiptoɗebema boroba unusia baujĩãba waa mĩã sẽnaẽ́ panʉda. Maʉ̃ bẽrã idjira so zareapeɗa Moiseba Aaroʉ̃ biɗa jarapeɗaɗara ĩjãẽ́ basía Ãcõrẽba jaraɗa quĩrãca.
Ãcõrẽba pochĩdau diabueɗa
16 Maʉ̃be Ãcõrẽba Moisea jarasia:
–Aaroʉ̃a jaradua idji jʉwaɗe eroɓʉ bacuruda ʉ̃taa wapeɗa egoroɗaa umãrẽã. Maʉ̃ne egoro porara pochĩdau baya jũma Egipto druaɗe.–
17 Ara maʉ̃da ãdjia mãwã osiɗaa. Aaroʉ̃ba idji bacurura ʉ̃taa wapeɗa egoroɗaa usía. Maʉ̃ne egoro porara pochĩdau basía jũma Egipto druaɗe. Aɓeɗa ẽberãrãra, animarã siɗa pochĩdauba ca eropanesiɗaa.
18 Maʉ̃be Egiptoɗebema daubararãba ãdji necawaaɗeba aɓari quĩrãca pochĩdauda o quĩrĩãsiɗaa.* Mãwãmĩna poya oɗaẽ́ basía. Mãwã panʉne ẽberãrãra, animarã siɗa pochĩdauba ca eropanasiɗaa.
19 Maʉ̃ bẽrã daubararãba Egiptoɗebema boroa jarasiɗaa:
–Moiseba Aaroʉ̃ ume pochĩdau opeɗaɗara Ãcõrẽ ʉɓʉaɗeba osiɗaa.–
Mãwã jarapeɗaɗamĩna Egiptoɗebema borora so zarea ɓesia. Idjia ĩjãẽ́ basía Moiseba Aaroʉ̃ biɗa jarapeɗaɗara Ãcõrẽba jaraɗa quĩrãca.
Ãcõrẽba ĩganana diabueɗa
20 Maʉ̃be Ãcõrẽba Moisea jarasia:
–Nu diapeɗeɗa piradrʉpeɗa Egiptoɗebema boro doeɗa wãbʉrʉɗe idjimaa wãpeɗa nãwã jaradua: “Ãcõrẽba nãwã jara ɓʉa: mʉ̃ purura idu wãbidua mʉ̃́a animarãda babue diaɗamãrẽã.
21 Baribʉrʉ mʉ̃ puruda idu wãbiẽ́bʉrʉ, mʉ̃a ĩgananada bʉmaa, dji dromarãmaa, bʉ druaɗebemarãmaa biɗa quĩrãtanoa diabueya. Maʉ̃ ĩgananara jũma Egiptoɗebema deɗe, ãdjirã wãbʉdama biɗa powuaga nũmaya.
22 8:22-23 Baribʉrʉ maʉ̃ ewariɗe Goseʉ̃ druaɗe mʉ̃a mãwã oẽ́a. Mʉ̃ ẽberãrãda mama panʉ bẽrã ĩgananara neẽ́ baya. Mʉ̃ purura bʉ puru quĩrãca oẽ́a. Maʉ̃ba bʉa cawaya mʉ̃abʉrʉ naʉ̃ druaɗe mãwã o ɓʉda. Maʉ̃ ne ununacara nu oya.”–
24 Nurẽma Ãcõrẽba mãwã osia. Egiptoɗebema boro dera, dji dromarã dera, idjaɓa jũma Egipto drua siɗa ĩganana quĩrãtanoaba birasia. Aɓeɗa jũma Egipto druara biẽ́ nũmesia ĩgananaba.
25 Maʉ̃be Egiptoɗebema boroba Moisera, Aaroʉ̃ siɗa trʉ̃bipeɗa nãwã jarasia:
–Bãrã Ãcõrẽa animarãda babue diaɗe wãnida panʉa ara naʉ̃ Egipto druaɗe.–
26 Baribʉrʉ Moiseba panusia:
–Dairãba naʉ̃ Egipto druaɗe mãwã poya oɗaẽ́a, animarã dairãba Ãcõrẽa babue diaɗida panʉra bãrã egiptorãba idu babue diabiɗaca bẽrã. Maʉ̃ animarãda bãrã quĩrãpita Ãcõrẽa babue diaɗibʉrʉ, ¿bãrãba dairãra mõgaraba taɓari beaɗaẽ́ca?
27 Maʉ̃ bẽrã dairãra ewari ũbea ẽjũã põãsa ewaraga ɓʉɗe wãnia. Mamabʉrʉ dai Ãcõrẽa animarãda babue diacuaɗia idjia jara ɓʉ quĩrãca.–
28 Maʉ̃be Egiptoɗebema boroba jarasia:
–Mãẽteara bia ɓʉa. Mʉ̃a bãrãra ẽjũã põãsa ewaraga ɓʉɗaa idu wãbiya bãrã Ãcõrẽa animarãda babue diacuaɗamãrẽã. Baribʉrʉ bãrãra tʉmʉ wãcara panʉa. Idjaɓa mʉ̃ carea biɗa Ãcõrẽa iwiɗiɗadua.–
29 Moiseba jarasia:
–Mʉ̃ra namaʉba ẽdrʉpeɗa Ãcõrẽa iwiɗiya. Maʉ̃be nu ĩgananara neẽ́ baya bʉma, dji dromarãma, bʉ druaɗebemarãma biɗa. Baribʉrʉ dairãra waa cũrũgarãdua. Dairãra idu wãbidua Ãcõrẽa animarãda babue diacuaɗamãrẽã.–
30 Moisera Egiptoɗebema boromaʉba ẽdrʉpeɗa Ãcõrẽa iwiɗisia.
31 Ara maʉ̃da Ãcõrẽba Moiseba iwiɗiɗa quĩrãca osia. Idjia ĩgananara jõbisia Egiptoɗebema boroma, dji dromarãma, idjaɓa Egipto druaɗebemarãma biɗa. Ni aɓa biɗa ɓeẽ́ basía.
32 Baribʉrʉ Egiptoɗebema borora waɗibiɗa so zarea ɓeɗa bẽrã israelerãra idu wãbiẽ́ basía.
Beɗea eɗaare
^ 8:18. Pochĩdauda o quĩrĩãsiɗaa. Hebreo beɗeaɗe maʉ̃ba idjaɓa jara ɓʉa: “Pochĩdauda quena quĩrĩãsiɗaa.”
