Exodo 9:1-34
9 Maʉ̃be Ãcõrẽba Moisea jarasia:
–Egiptoɗebema boroa nãwã jaraɗe wãdua: “Dai hebreorã Ãcõrẽba nãwã jara ɓʉa: mʉ̃ purura idu wãbidua mʉ̃́a animarãda babue diaɗamãrẽã.
2 9:2-3 Baribʉrʉ bʉa dai israelerãda idu wãbiẽ́bʉrʉ ãtebʉrʉ naʉ̃ druaɗe ɓebibʉrʉ, Ãcõrẽba bãrã animarãra idji ʉɓʉaɗeba quinibiya. Bãrã cawayoda, burroda, cameyoda, pacada, oveja siɗa quininia.
3 –
4 Baribʉrʉ Ãcõrẽba animarã dai israelerãneda mãwã oẽ́a. Dai animarãra ni aɓa biɗa beuɗaẽ́a egiptorã animarã quĩrãca.
5 Ãcõrẽba ewarida ɓʉsia naʉ̃ Egiptoɗe mãwã oi carea. Nubʉrʉ mãwã oya.”–
6 Nurẽma Ãcõrẽba mãwã osia. Jũma egiptorã animarãra quinisiɗaa. Baribʉrʉ israelerã animarãra ni aɓa biɗa beuɗaẽ́ basía.
7 Egiptoɗebema boroba ẽberãrãda israelerã animarã acʉɗe diabuesia. Wãnapeɗa unusiɗaa israelerã animarãra ni aɓa biɗa beuɗaẽ́ basida. Baribʉrʉ Egiptoɗebema boroba maʉ̃da cawasimĩna so zarea ɓesia. Maʉ̃ bẽrã israelerãra idu wãbiẽ́ basía.
Ãcõrẽba cabʉ diabueɗa
8 Maʉ̃be Ãcõrẽba Moisea, Aaroʉ̃a biɗa jarasia:
–Jãʉ̃be tʉbʉ porada jʉwaɗe edaɗapeɗa Egiptoɗebema boro quĩrãpita ʉ̃taa jãmãpoɗadua.*
9 Maʉ̃ tʉbʉ porara jũma Egipto druaɗe cowa nũmaya. Maʉ̃ba Egipto druaɗe ẽberãrãra animarã siɗa jũma cabʉba biracuaya.–
10 Ara maʉ̃da Moiseba Aaroʉ̃ ume tʉbʉ porada edaɗapeɗa Egiptoɗebema boromaa wãsiɗaa. Jũẽnapeɗa Moiseba tʉbʉ porara idji quĩrãpita ʉ̃taa jãmãposia. Ara maʉ̃da ẽberãrãra animarã siɗa jũma cabʉba biracuasia.
11 Maʉ̃ne Egiptoɗebema daubararãra Moise quĩrãpita poya wãnaẽ́ basía ãdjirã siɗa waabemarã quĩrãca cabʉba jũma birapeɗaɗa bẽrã.
12 Baribʉrʉ Ãcõrẽba Egiptoɗebema borora so zarea ɓʉsia. Maʉ̃ bẽrã Moiseba Aaroʉ̃ biɗa jarapeɗaɗara ĩjãẽ́ basía Ãcõrẽba jaraɗa quĩrãca.
Ãcõrẽba hielo jurrubiɗa
13 Maʉ̃be Ãcõrẽba Moisea jarasia:
–Nu diapeɗa Egiptoɗebema boromaa wãpeɗa jaradua: “Dai hebreorã Ãcõrẽba nãwã jara ɓʉa: mʉ̃ purura idu wãbidua mʉ̃́a animarãda babue diaɗamãrẽã.
14 Baribʉrʉ bʉa mãwã oẽ́bʉrʉ mʉ̃ ʉɓʉaɗeba bʉra, dji dromarãra, jũma bʉ druaɗebemarã siɗa wetara mĩgabiya. Mãwã bʉa cawaya mʉ̃a obari quĩrãca naʉ̃ ẽjũãne neẽ́da.
15 Wãrãda naʉ̃ naẽna mʉ̃ ʉɓʉaɗeba bʉra, bʉ druaɗebemarã siɗa jũma quinibida ɓasia ni aɓa biɗa naʉ̃ ẽjũãne ɓerãmãrẽã.
16 Baribʉrʉ mʉ̃a mãwã oẽ́ ɓʉa. Mʉ̃a bʉra zocai ɓʉsia bʉ mĩgabi ɓʉɗeba mʉ̃ ʉɓʉada unubi carea. Mãwã mʉ̃ra jũma naʉ̃ ẽjũãne trʉ̃ ɓʉga ɓaya.
17 Baribʉrʉ bʉa waɗibiɗa mʉ̃ puruda biẽ́ o ɓʉa. Waɗibiɗa ãdjirãra idu wãbiẽ́ ɓʉa.
18 Maʉ̃ carea nu naʉ̃ horaca mʉ̃a hielo waiɓʉada bajãneba jurrubiya. Egipto puru osiɗa ewariɗeba waɗibiɗa hielora maʉ̃ quĩrãca jurrucaa.
19 Maʉ̃ bẽrã jũma bãrã animarãda de edre ɓʉbicuadua. Mãwã oẽ́bʉrʉ hielo waiɓʉa jurrubʉrʉba quenaya. Baridua ẽberãda, animarã siɗa de edre ɓeaɗaẽ́bʉrʉ, hielo waiɓʉa jurrubʉrʉba beaya.”–
20 Ne wayaaba ʉ̃cʉrʉ Egiptoɗebema dji dromarãba Ãcõrẽba jaraɗara ĩjãsiɗaa. Maʉ̃ bẽrã ãdji nezocara, ãdji animarã siɗa de edre isabe ɓʉcuasiɗaa.
21 Baribʉrʉ ʉ̃cʉrʉ Egiptoɗebema dji dromarãba Ãcõrẽba jaraɗara ĩjãnaẽ́ basía. Maʉ̃ bẽrã ãdji nezocara, ãdji animarã siɗa de edre ɓʉcuaɗaẽ́ basía.
22 Maʉ̃be Ãcõrẽba Moisea jarasia:
–Bʉ jʉwara bajãnaa ʉ̃taa wadua. Maʉ̃ne jũma Egipto druaɗe hielora ẽberãrã ʉ̃rʉ̃, animarã ʉ̃rʉ̃, idjaɓa néuɗe biɗa jurruzoaya.–
23 9:23-24 Ara maʉ̃da Moiseba idji bacurura bajãnaa ʉ̃taa wasia. Maʉ̃ne Ãcõrẽba jũma Egipto druaɗe hieloda jurrubisia. Aɓeɗa baa bara ɓae nũmesia. Egipto puru osiɗa ewariɗeba maʉ̃ quĩrãca waɗibiɗa ununaca basía.
25 Maʉ̃ hielo waiɓʉa jurrubʉrʉba Egipto druaɗe jũma de edre ɓeaɗaẽ́ra quenasia. Ẽberãrãda, animarãda, néu ɓea siɗa jũma quenasia. Bacuru siɗa jũma ãrĩsia.
26 Aɓabe Goseʉ̃ druaɗe israelerã duanʉmaa hielora jurruẽ́ basía.
27 Maʉ̃be Egiptoɗebema boroba Moisera, Aaroʉ̃ siɗa trʉ̃bipeɗa ãdjía nãwã jarasia:
–Iɗibʉrʉ mʉ̃a cawasia biẽ́ o ɓʉda. Ãcõrẽbʉrʉ jipa o ɓʉa. Mʉ̃da, mʉ̃ puru siɗa beɗeaɗe panʉa.
28 Maʉ̃ bẽrã Ãcõrẽa iwiɗiɗadua naʉ̃ hielo jurru nũmʉra, baa siɗa jõbimãrẽã. Maʉ̃be mʉ̃a israelerãra idu wãbiya. Waa ãdjirãra Egiptoɗe ɓebiẽ́a.–
29 Moiseba Egiptoɗebema boroa jarasia:
–Naʉ̃ puruɗeba ẽdrʉɗacarea mʉ̃ jʉwara umena ʉ̃taa wapeɗa Ãcõrẽa iwiɗiya. Maʉ̃ne hielo jurru nũmʉra, baa siɗa jõya. Maʉ̃neba bʉa cawaya Ãcõrẽra naʉ̃ ẽjũã djibarida.
30 Baribʉrʉ mʉ̃a cawa ɓʉa dji dromarãba, bʉa biɗa waɗibiɗa Ãcõrẽra wayaɗaẽ́ panʉda.–
31 (Egiptorãba u eropanana linoda põnõ ɓaɗa bẽrã idjaɓa cebadada zau ɓaɗa bẽrã hielo jurrubʉrʉba jũma ãrĩsia.
32 Baribʉrʉ ãdjirãba u eropanana trigora, centeno siɗa waɗi zauẽ́ ɓaɗa bẽrã ãrĩẽ́ basía.)
33 Maʉ̃be Moisera Egiptoɗebema boromaʉba ẽdrʉpeɗa puru dajadaa wãsia. Mama idji jʉwara umena ʉ̃taa wapeɗa Ãcõrẽa iwiɗisia. Ara maʉ̃da hielo jurru nũmanara, baara, cue siɗa Egipto druaɗe cãbasia.
34 9:34-35 Maʉ̃ unusiɗe Egiptoɗebema boroba wayacusa biẽ́ osia. Idjida, dji dromarã siɗa so zarea panena bẽrã israelerãra idu wãbiẽ́ basía Ãcõrẽba Moiseɗeba jaraɗa quĩrãca.
Beɗea eɗaare
^ 9:8. Tʉbʉ pora. Hebreo beɗeaɗe jara ɓʉa egoro caɗa zareabibariɗebema tʉbʉ porada.
