Galata 1:1-24
1 Mʉ̃ra Pauloa, Jesucritoba diabueɗaa.* Ẽberãrãba mʉ̃ra ɓʉɗaẽ́ basía idjaɓa edaɗaẽ́ basía Jesucritoba diabueɗada ɓamãrẽã. Ãtebʉrʉ Jesucritoba idjaɓa idji Zeza Ãcõrẽ, idji beu ɓaɗa ʉ̃rẽbabiɗaba mʉ̃ra mãwã ɓʉsiɗaa.
2 1:2-3 Mʉ̃a naʉ̃ cartara ɓʉbʉrʉa djabarã Galacia druaɗebema itea. Mʉ̃a, jũma djabarã mʉ̃ ume panʉ biɗa quĩrĩã panʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida idjaɓa necai ɓai siɗa bãrãa dia pananida.
3 –
4 Dadjirã Boro Jesucritoba ara idjida dadjirã cadjirua carea idu beabisia naʉ̃ ewari cadjiruaɗebemada ẽdrʉ edai carea. Mãwã osia dadjirã Zeza Ãcõrẽba quĩrĩãna bẽrã.
5 Ewariza idjía bia beɗeaɗida panʉa. Bia ɓʉa mãwã ɓaida.*
Beɗea bia Critoɗebemara aɓabʉrʉ ɓʉa
6 Mʉ̃a cawa crĩchaẽ́a sãwã bãrãra dãrãẽ́ne Ãcõrẽnebemada ãĩ wãbʉdada. Ãcõrẽba bãrãra trʉ̃sia Crito biaɗeba ẽdrʉ edai carea, baribʉrʉ bãrãba biara ẽpẽ panʉa dewararãba beɗea bia quĩrãca jara panʉda.
7 Wãrãda ãdjia jaradia panʉra beɗea biaẽ́a. Baribʉrʉ ʉ̃cʉrʉba bãrãa ãĩ crĩchabibadaa beɗea bia Critoɗebemada ãĩ jaradia panʉ bẽrã.
8 Bariduaba beɗea bia Critoɗebemada daiba bãrãa jaradiapeɗaɗa awara jaradiaibʉrʉ, Ãcõrẽba idjira ewariza biẽ́ ɓʉya; daiba wa bajãnebema nezoca biɗa awara jaradiaɗibʉrʉ, dai siɗa Ãcõrẽba ewariza biẽ́ ɓʉya.
9 Daiba naãrã jarapeɗaɗara mʉ̃a wayacusa jaraya: bãrãba beɗea bia Critoɗebema ĩjãpeɗaɗada bariduaba awara jaradiaibʉrʉ, Ãcõrẽba idjira ewariza biẽ́ ɓʉya.
10 Mãwã jara ɓʉɗeba mʉ̃a jʉrʉẽ́ ɓʉa ẽberãrãba mʉ̃ra bia ununida, ãtebʉrʉ quĩrĩã ɓʉa Ãcõrẽba mʉ̃ra bia unuida. Crito ĩjãi naẽna mʉ̃a jʉrʉ ɓabadjia ẽberãrãba mʉ̃ra bia ununamãrẽã. Waɗibiɗa mãwã o ɓʉbara, mʉ̃ra Crito nezocaẽ́ bacasia.
Jesucritoba Paulo trʉ̃na
11 Djabarã, cawaɗadua beɗea bia Critoɗebema mʉ̃a bãrãa jaradiaɗara ẽberã crĩchaẽ́da.
12 Maʉ̃ beɗeara mʉ̃a ni aɓaʉ ẽberãneba cawaẽ́ basía. Ni aɓaʉ ẽberãba mʉ̃́a jaradiaẽ́ basía. Ãtebʉrʉ Jesucritobʉrʉ mʉ̃́a cawabisia.
13 Bãrãba ũrĩsiɗaa mʉ̃ra sãwã nĩbasida judiorãba jaradiabada jũma ĩjã o ɓasiɗe. Bãrãba cawa panʉa mʉ̃a Ãcõrẽ ẽberãrãra bio biẽ́ obadjida. Aɓeɗa jũma jõbi quĩrĩã ɓasia.
14 Judiorãba jaradiabadara mʉ̃a biara cawabʉrʉ basía mʉ̃ daucharã cãyãbara. Dai drõã naẽnabemaba obadara mʉ̃a bio ĩjã obadjia.
15 1:15-16 Baribʉrʉ mʉ̃ toɗi naẽna Ãcõrẽba mʉ̃ra edasia. Idji biaɗeba mʉ̃ra trʉ̃sia idji nezocada ɓamãrẽã. Idjia crĩchaɗa quĩrãca idji Warrara mʉ̃́a cawabisia judiorãẽ́a idjiɗebemada jaramãrẽã. Maʉ̃ne mʉ̃a ni aɓaʉa iwiɗiẽ́ basía sãwã oida ɓʉ cawaya.
17 Idjaɓa Jesucritoba mʉ̃ naẽna diabueɗarãa Jerusaleʉ̃naa iwiɗiɗe wãẽ́ basía. Ãtebʉrʉ mʉ̃ra Arabia druaɗaa wãsia. Mãwãnacarea Damasco puruɗaa jẽda wãsia.
18 Poa ũbea baɗacarea mʉ̃ra Jerusaleʉ̃naa Pedro cawai carea wãsia. Mama quince ewari idji ume ɓasia.
19 Pedro awara dadji Boro Jesucritoba diabueɗarãnebemada aɓabe idji djaba Santiagoda unusia.* Dewararãra mʉ̃a unuẽ́ basía.
20 Ãcõrẽ quĩrãpita mʉ̃a bãrãa jaraya: mʉ̃nebema ɓʉbʉrʉra sewaẽ́a.
21 Jerusaleʉ̃naa wãnacarea mʉ̃ra Siria druaɗaa idjaɓa Cilicia druaɗaa wãsia.
22 Crito ĩjã ɓea Judea druaɗebemarãba mʉ̃ra ununaca basía.
23 Ãdjirãba aɓabe ũrĩbadjiɗaa djabarãba nãwã jara panʉda: “Dadjirã biẽ́ oi carea ẽpẽ ɓaɗaba iɗira jaradia nĩa jũmarãba Jesu ĩjãnamãrẽã. Naẽna maʉ̃gʉra idjia aɓeɗa jõbi quĩrĩã ɓasia.”
24 Maʉ̃ bẽrã mʉ̃ carea ãdjirãba Ãcõrẽa bia beɗeasiɗaa.
