Galata 2:1-21
2 Catorce poa baɗacarea mʉ̃ra Bernabe ume wayacusa Jerusaleʉ̃naa wãsia. Tito siɗa wãsia.
2 Mʉ̃ra wãsia Ãcõrẽba cawabiɗa bẽrã mama wãida ɓʉda. Jũẽpeɗa naãrã mʉ̃a aɓabe djabarã dji dromarãa jarasia beɗea bia Critoɗebema mʉ̃a judiorãẽ́a sãwã jaradia ɓʉda. Mãwã osia mʉ̃a o ɓʉra ãdjirãba bia unu panʉ cawaya.*
3 Maʉ̃ne Tito mʉ̃ ume ɓʉra judioẽ́mĩna ãdjia jaraɗaẽ́ basía idji cacuara wẽãgoida ɓʉda.
4 Maʉ̃nebemada beɗeasiɗaa ʉ̃cʉrʉ wãrã djabarãẽ́ba jarabadjiɗa bẽrã jũmarãda cacua wẽãgoɗida panʉda Ãcõrẽ ẽberãrã ɓeaɗi carea. Ãdjirãra djabarã quĩrãca djabarãmaa zeɗapeɗa Jesucritoba ẽdrʉ ɓʉɗada igarabi quĩrĩã panasiɗaa. Ãdjirãba dadjirãa wayacusa judiorã leyda ĩjã obi quĩrĩã panasiɗaa nezoca quĩrãca.
5 Baribʉrʉ ãdjia jarapeɗaɗara daiba ni maãrĩ biɗa ĩjãnaẽ́ basía bãrãba beɗea bia Critoɗebema dji wãrã arada ewariza eroɓeaɗamãrẽã.
6 2:6-7 Djabarã dji dromarãba dewara crĩchada jaraɗaẽ́ basía mʉ̃a jaradiamãrẽã. Ãtebʉrʉ cawasiɗaa Ãcõrẽba mʉ̃ra diabuesida beɗea bia Critoɗebemada judiorãẽ́a jaradiamãrẽã Pedro judiorãmaa diabueɗa quĩrãca. (Ãdjirãra dji dromarãda dãrãbʉdamĩna mʉ̃a quĩrãcuitaẽ́ ɓʉa, Ãcõrẽba dadjira quĩrã awara unuca bẽrã.)
7 –
8 Wãrãda Ãcõrẽba Pedrora edapeɗa judiorãmaa jaradiamãrẽã diabuesia. Ara maʉ̃ Ãcõrẽba mʉ̃ra edapeɗa judiorãẽ́maa diabuesia.
9 Djabarã dji dromarã Santiagoba, Pedroba, Juaʉ̃ biɗa cawasiɗaa Ãcõrẽba idji biaɗeba wãrãda mʉ̃ra judiorãẽ́maa diabuesida. Maʉ̃ne ãdjira mʉ̃ ume, Bernabe ume biɗa jʉwa jidasiɗaa cawabiɗi carea aɓari crĩchada eropanʉda. Ãdjia jarasiɗaa daiba judiorãẽ́ma jaradia pananida, maʉ̃ne ãdjia judiorãma jaradia pananida.
10 Aɓabe daia jarasiɗaa djabarã ne neẽ́ queɗeara carebaɗamãrẽã. Maʉ̃gʉra mʉ̃maarã bio bia ɓasia mãwã o quĩrĩã ɓaɗa bẽrã.
Pauloba Pedro quẽãna
11 Ewari aɓa Pedrora Antioquía puruɗaa djabarã acʉɗe wãsia. Mama mʉ̃a idjira jũmarã djabarã quĩrãpita quẽãsia, idjia wãrãda biẽ́ oɗa bẽrã.
12 Nãwã biẽ́ osia: ʉ̃cʉrʉ djabarã judiorãra Santiago ɓʉmaʉba Antioquía puruɗaa wãsiɗaa. Ãdjirãba jarabadjiɗaa judiorãẽ́ra cacua wẽãgoɗida panʉda Ãcõrẽ ẽberãrã ɓeaɗi carea. Ãdji jũẽni naẽna Pedrora djabarã judiorãẽ́ ume ne cobadjia, baribʉrʉ maʉ̃ djabarã judiorã jũẽpeɗaɗacarea idjira waa djabarã judiorãẽ́ ume ne coẽ́ basía. Ãtebʉrʉ jĩga nĩbaɗe wãsia. Idjia wayasia djabarã judiorãba idjira biẽ́ jaraɗida judiorãẽ́ ume ne co ɓʉ carea.*
13 Idjaɓa dewararã djabarã judiorã biɗa djabarã judiorãẽ́ra igarasiɗaa Pedroba sewaɗeba o ɓʉ quĩrãca. Mãwã o panʉ bẽrã Bernabe biɗa aɓari quĩrãca biẽ́ osia.
14 Baribʉrʉ mʉ̃a unusia ãdjirãra wãrã beɗea bia Critoɗebemaba jara ɓʉ quĩrãca nĩnaẽ́da. Maʉ̃ bẽrã mʉ̃a Pedrora jũmarã djabarã quĩrãpita nãwã quẽãsia: “Bʉra judiomĩna judio quĩrãca ɓacaa. Ãtebʉrʉ judioẽ́ quĩrãca ɓabaria. Maʉ̃da ¿cãrẽ cãrẽã judiorãba obadara bʉa djabarã judiorãẽ́a obi ɓʉ?
15 Ãcõrẽba Moisea diaɗa leyra judiorãẽ́ba neẽ́ panʉ bẽrã dadji judiorãba ãdjirãra cadjirua obadarãana abadaa. Dadjirãra toɗaɗeba judiorã bẽrã maʉ̃ leyra eropanʉa.
16 Baribʉrʉ dadjirãba cawa panʉa maʉ̃ ley ĩjã o ɓʉɗeba ni aɓaʉda Ãcõrẽ quĩrãpita jipa ɓaẽ́da, ãtebʉrʉ Jesucrito ĩjã ɓʉ carea Ãcõrẽba jipa unuya. Dadjirã biɗa Jesucritora ĩjãsiɗaa Ãcõrẽba bia unumãrẽã. Wãrãda Ãcõrẽba Moisea diaɗa ley ĩjã o panʉneba dadjirãra Ãcõrẽ quĩrãpita jipa ɓeaɗaẽ́a, ni aɓaʉda maʉ̃ ley ĩjã o ɓʉɗeba idji quĩrãpita jipa ɓaẽ́ bẽrã.*
17 Ãcõrẽba Moisea ley diaɗa cãyãbara dadjirãba jʉrʉsiɗaa Critoɗeba Ãcõrẽba jipa unumãrẽã. Maʉ̃ bẽrã ʉ̃cʉrʉmaarã dadjirãra cadjirua obadarãa. Mãwãra ¿Critoba dadjirãa cadjiruada obi ɓʉca? ¡Mãwãẽ́a!
18 Mʉ̃a ley naẽna ẽpẽ ɓaɗada wayacusa ẽpẽibʉrʉ, mʉ̃drʉ beɗeaɗe ɓeya.
19 Naẽna mʉ̃ra Ãcõrẽba Moisea diaɗa leyɗeba ɓasia. Baribʉrʉ maʉ̃ leyɗebemada ẽdrʉsia.* Mãwã mʉ̃ra Ãcõrẽ itea zocai ɓesia.
20 Mʉ̃ra Crito ume ãbaa cruɗe cachisiɗaa. Maʉ̃ bẽrã ara mʉ̃djiɗeba ɓʉẽ́a, ãtebʉrʉ Critodrʉ mʉ̃ soɗe ɓʉa. Naʉ̃ djaraɗe zocai ɓʉmisa mʉ̃ra Ãcõrẽ Warra Jesu ĩjã ɓʉɗeba ɓaya. Ara maʉ̃ Jesuba mʉ̃ra quĩrĩãsia idjaɓa mʉ̃ carea ara idjida idu beabisia.
21 Ãcõrẽba idji biaɗeba dadji jipa ɓʉɗada mʉ̃a igaraẽ́a. Ãcõrẽba Moisea diaɗa ley ĩjã o panʉneba idji quĩrãpita poya jipa ɓeaɗibara, Critora idji quĩrĩãbe beucasia.”
Beɗea eɗaare
^ 2:2. Mãwã osia mʉ̃a o ɓʉra ãdjirãba bia unu panʉ cawaya. Griego beɗeaɗe nãwã ɓʉ́ ɓʉa: “Mãwã osia mʉ̃ pira wãnara, pira wãbʉrʉ siɗa ara jãwã ɓerãmãrẽã.”
^ 2:12. Pedrora naẽna biẽ́ jaraɗa bẽrã wayacusa biẽ́ jaraɗida crĩchasia. Hecho 11:1-18.
^ 2:16. Salmo 143:2.
^ 2:19. Maʉ̃ leyɗebemada ẽdrʉsia. Griego beɗeaɗe nãwã ɓʉ́ ɓʉa: “Maʉ̃ leyɗebemada beusia.”
