Galata 3:1-29
3 Djabarã Galacia druaɗebema, ¡bãrãra crĩcha neẽ́ ɓeaa! ¿Caiba bãrãra cũrũgasi wãrã beɗeara idu ɓʉɗamãrẽã? Daiba bãrã quĩrãpita ebuɗa jaradiabadjiɗaa Jesucritora bãrã carea cruɗe cachi beasiɗada.
2 Mʉ̃a naʉ̃da bãrãa iwiɗiya: ¿Ãcõrẽba Moisea diaɗa ley ĩjã o panʉneba bãrãba Ãcõrẽ Jaurera edasiɗaca? ¿Beɗea bia Jesucritoɗebemada ũrĩnapeɗa ĩjãsiɗaɗe edasiɗaẽ́ca?
3 ¡Bãrãra wãrãda crĩcha neẽ́ ɓeaa! Crito ĩjãsiɗaɗe naãrã Ãcõrẽ Jaureɗeba bia nĩbasiɗaa. ¿Iɗira ara bãdjia o panʉneba jũma jipa ɓeaɗica?*
4 Crito ĩjã panʉ carea bãrãra bio bia mĩgasiɗaa. Maʉ̃da Critoda igaraɗibʉrʉ, ¿bãdji quĩrĩãbe bia mĩgasiɗaẽ́ca? Mʉ̃maarã bãdji quĩrĩãbe bia mĩgaɗaẽ́ basía.
5 Ãcõrẽba idji Jaurera bãrãa diasia idjaɓa bãrã tãẽna ne ununacada o ɓʉa. ¿Ãcõrẽba cãrẽ cãrẽã mãwã o ɓʉ? Mãwã o ɓʉa bãrãba beɗea bia Critoɗebemada ũrĩnapeɗa ĩjãsiɗa bẽrã. Ãcõrẽba mãwã oẽ́ ɓʉa idjia Moisea diaɗa leyra bãrãba ĩjã o panʉ bẽrã.
6 Abrahaʉ̃nebemada crĩchaɗadua. “Abrahaʉ̃ba Ãcõrẽra wãrãda ĩjãsia. Maʉ̃ carea Ãcõrẽba idjira jipa unusia.”*
7 Maʉ̃ba cawaɗadua wãrãda Ãcõrẽ ĩjã ɓeadrʉ Abrahaʉ̃ warrarãda.
8 Naẽnaeɗaʉba Ãcõrẽ Beɗeaɗe ɓʉ́ ɓʉa judiorãẽ́ba Ãcõrẽda ĩjãsiɗara idjia ãdjirã siɗa jipa unuida. Maʉ̃ carea naẽnaeɗa Ãcõrẽba Abrahaʉ̃a beɗea bia dadji ẽdrʉɗiɗebemada beɗeasia. Idjia nãwã jarasia: “Bʉɗeba mʉ̃a naʉ̃ ẽjũãne ɓea purura jũma carebaya.”*
9 Maʉ̃ bẽrã Abrahaʉ̃ba ĩjãna quĩrãca ĩjã ɓeara Ãcõrẽba jũma carebaya Abrahaʉ̃ carebaɗa quĩrãca.
10 Ãcõrẽba Moisea diaɗa ley ĩjã o panʉneba jipa ɓeaɗida crĩcha ɓeara Ãcõrẽba biẽ́ ɓʉya. Maʉ̃ leyɗe nãwã ɓʉ́ ɓʉa: “Naʉ̃ ley jũma ĩjã oẽ́ ɓeara Ãcõrẽba biẽ́ ɓʉya.”*
11 Wãrãda ebuɗa ɓʉa Ãcõrẽba Moisea diaɗa ley ĩjã o ɓʉɗeba ni aɓaʉda Ãcõrẽ quĩrãpita jipa ɓaẽ́da. Ãcõrẽ Beɗeaɗe nãwã ɓʉ́ ɓʉa: “Ãcõrẽ quĩrãpita jipa ɓʉ ẽberãra Ãcõrẽ ĩjã ɓʉɗeba ɓaya.”*
12 Baribʉrʉ Ãcõrẽba Moisea diaɗa ley ĩjã o ɓʉɗeba jipa ɓaida crĩcha ɓʉba crĩchacaa Ãcõrẽ ĩjã ɓʉɗeba jipa ɓaida. Ãtebʉrʉ idjiɗebemada nãwã ɓʉ́ ɓʉa: “Naʉ̃ ley ĩjã o ɓʉra maʉ̃gʉɗeba ɓaya.”*
13 Ãcõrẽba Moisea diaɗa leyba biẽ́ ɓʉiɗebemada Jesucritoba dadjirãra ẽdrʉ ɓʉsia. Idjidrʉ Ãcõrẽba dadjirã cacuabari biẽ́ ɓʉsia. Ãcõrẽ leyɗe nãwã ɓʉ́ ɓʉa: “Aɓaʉda bacuruɗe jira ɓʉɗibʉrʉ, Ãcõrẽba idjira biẽ́ ɓʉya.”*
14 Maʉ̃gʉra mãwãsia Ãcõrẽba Jesucritoɗeba judiorãẽ́ siɗa carebamãrẽã idjia naẽna Abrahaʉ̃a carebayaɗa aɗa quĩrãca.* Dadjirãba Jesucritoda ĩjã panʉ bẽrã Ãcõrẽba idji Jaure diai jaraɗara edasiɗaa.
Ãcõrẽba Abrahaʉ̃ ume beɗea ɓʉɗara leyba ãyã ɓʉcaa
15 Djabarã, mʉ̃ra ne jara ɓʉɗeba beɗeaya: ẽberãba dewara ume beɗea ɓʉɗara cartaɗe ɓʉpeɗa idji trʉ̃da maʉ̃ cartaɗe ɓʉsira, ni aɓaʉba maʉ̃ beɗea ɓʉɗara poya ãyã ɓʉɗaẽ́a, idjaɓa dewara crĩchada poya eɗa ɓʉɗaẽ́a. Ara maʉ̃ quĩrãca Ãcõrẽba wãrãneba jaraɗara quĩrã awara oẽ́a.
16 Ãcõrẽba Abrahaʉ̃a, idjiɗeba yõida ɓʉ́a biɗa jarasia idjia jũmarãda carebaida.* Ãcõrẽ Beɗeaɗe ɓʉẽ́ ɓʉa “Abrahaʉ̃neba yõni ẽberãrãda” zocãrã ẽberãrã jara ɓʉ quĩrãca. Ãtebʉrʉ ɓʉ́ ɓʉa Ãcõrẽba Abrahaʉ̃neba yõida ɓʉ́a mãwã jarasida aɓaʉɗebemada beɗea ɓʉ bẽrã. Maʉ̃ra Critoa.
17 Mʉ̃a jara ɓʉra naʉ̃gʉa: Ãcõrẽra Abrahaʉ̃ ume beɗea ɓʉsia.* 430 poa baɗacarea idji leyra Moisea diasia. Baribʉrʉ idjia Abrahaʉ̃ ume naãrã beɗea ɓʉɗara maʉ̃ leyba ãyã ɓʉẽ́ basía. Ãyã ɓʉɗabara idjia carebayaɗa aɗara oẽ́ bacasia.
18 Ãcõrẽba Moisea diaɗa ley ĩjã o panʉ carea idjia dadjirãda carebaibʉrʉ, idjia carebayaɗa aɗa quĩrãca carebaẽ́a. Baribʉrʉ Ãcõrẽba Abrahaʉ̃ra carebayaɗa aɗa bẽrã idji biaɗeba carebasia.
19 Maʉ̃da ¿Ãcõrẽba cãrẽ cãrẽã idji leyra Moisea diasi? Idji leyra diasia ẽberãrãba cadjirua obadada cawaɗamãrẽã. Ẽberãrãra maʉ̃ leyɗeba panasiɗaa aɓa Abrahaʉ̃neba yõida ɓaɗa zebʉrʉɗaa, idjiɗeba Ãcõrẽba carebayaɗa aɗa bẽrã. Ãcõrẽba Moisea maʉ̃ leyra bajãnebema nezocarãneba diasia. Maʉ̃be Moiseba ẽberãrãa diasia.
20 Baribʉrʉ Ãcõrẽba Abrahaʉ̃a carebayaɗa asiɗe ni aɓaʉda maʉ̃ beɗea jaraɗe diabueẽ́ basía, ãtebʉrʉ ara idjiabʉrʉ Abrahaʉ̃a mãwã jarasia.
21 Mãẽteara Ãcõrẽba idji ley Moisea diasiɗe ¿idjia Abrahaʉ̃ ume beɗea ɓʉɗara igarasica? ¡Mãwãẽ́a! Ãcõrẽba Moisea diaɗa leyɗeba dadjirãda ewariza Ãcõrẽ ume poya zocai ɓeaɗibara, maʉ̃ ley ĩjã o panʉneba Ãcõrẽ quĩrãpita jipa panacasiɗaa.
22 Baribʉrʉ Ãcõrẽ Beɗeaɗe ɓʉ́ ɓʉa cadjiruaba jũmarãda preso eroɓʉda. Mãwã Ãcõrẽba Abrahaʉ̃a ẽberãrã carebayaɗa aɗara poya oya. Wãrãda Jesucrito ĩjãbʉdara mãwã careba ɓʉa.
23 Crito zei naẽna dadjirãba idjida poya ĩjãnaẽ́ basía. Maʉ̃ne dadjirãra Ãcõrẽba Moisea diaɗa ley jʉwaeɗa panasiɗaa. Maʉ̃ leyɗebemada poya ẽdrʉɗaẽ́ basía aɓa Ãcõrẽba Crito cawabibʉrʉɗaa.
24 Wãrãda Ãcõrẽba Moisea diaɗa leyba dadjirãra pe eronĩbasia aɓa Crito zebʉrʉɗaa. Crito zeɗacarea idji ĩjã panʉ carea Ãcõrẽba dadjirãra jipa unu ɓʉa.
25 Iɗira dadjirãba Critoda ĩjã panʉ bẽrã Ãcõrẽba Moisea diaɗa leyba pe eronĩẽ́a.
26 Jesucritoda ĩjã panʉ bẽrã jũma bãrãra Ãcõrẽ warrarãa.
27 Bãrã borocuesiɗaɗe unubisiɗaa Crito ume ãbaa panʉda. Maʉ̃ bẽrã idji quĩrãca panesiɗaa.*
28 Jũma bãrãra Jesucrito ume ãbaa panʉ bẽrã Ãcõrẽ quĩrãpita judiora griego ume aɓaria, nezocara nezocaẽ́ ume aɓaria, idjaɓa umaquĩrãra wẽrã ume aɓaria.
29 Bãrãra Critoɗe bẽrã wãrãda Abrahaʉ̃ warrarãa. Maʉ̃ba Ãcõrẽba bãrãra carebasia idjia Abrahaʉ̃a carebayaɗa aɗa bẽrã.
Beɗea eɗaare
^ 3:3. Ara bãdjia o panʉneba. Griego beɗeaɗe ɓʉ́ ɓʉa “naʉ̃ djaraɗeba.”
^ 3:6. Genesi 15:6.
^ 3:8. Genesi 12:3.
^ 3:10. Deuteronomio 27:26.
^ 3:11. Habacuc 2:4.
^ 3:12. Levitico 18:5.
^ 3:13. Bacuruɗe. Griego beɗeaɗe bacuru abʉrʉɗe cru siɗa jara ɓʉa. Deuteronomio 21:23.
^ 3:14. Genesi 12:3.
^ 3:16. Genesi 22:18.
^ 3:17. Griego beɗeaɗe ʉ̃cʉrʉ cartaɗe nãwã ɓʉ́ ɓʉa: “Critoɗeba Ãcõrẽra Abrahaʉ̃ ume beɗea ɓʉsia.”
^ 3:27. Idji quĩrãca panesiɗaa. Griego beɗeaɗe nãwã ɓʉ́ ɓʉa: “Critoba djio panesiɗaa.”
