Galata 4:1-31
4 Mʉ̃a jara ɓʉra naʉ̃ quĩrãca ɓʉa: warraba idji zezaɗera jũma edaida ɓʉmĩna caibe ɓʉɗe nezoca quĩrãca ɓʉa.
2 Caibe ɓʉra warra wagabada jʉwaeɗa ɓʉa, idjaɓa idji zezaɗe edaida ɓʉra dewararãba wagabadaa aɓa dji zezaba jaraɗa ewariɗaa.
3 Ara maʉ̃ quĩrãca Crito ĩjãni naẽna dadjirãra warra zaque quĩrãca ɓeasia. Maʉ̃ ewariɗe dadjirãba naʉ̃ ẽjũãnebema crĩchara ĩjã o panasiɗaa nezoca quĩrãca.
4 Baribʉrʉ Ãcõrẽba jaraɗa ewari jũẽsiɗe idji Warrara naʉ̃ ẽjũãnaa diabuesia. Maʉ̃ Warrara wẽrãba tosia, idjaɓa Ãcõrẽba Moisea diaɗa leyra ĩjã oida ɓasia.
5 Ãcõrẽba idjira diabuesia dadjirã maʉ̃ ley jʉwaeɗa ɓeaɗara ẽdrʉ ɓʉpeɗa idji warrarãda ɓʉi carea.
6 Bãrãra Ãcõrẽ warrarã bẽrã idji Warra Jaureda diabuesia bãrã soɗe ɓamãrẽã. Idji Jaure dadjirã soɗe ɓʉba Ãcõrẽa “¡Mʉ̃ Zeza!” abaria cawaɗamãrẽã dadjirãra Ãcõrẽ warrarãda.
7 Maʉ̃ bẽrã iɗira bãrãra nezocarãẽ́a, ãtebʉrʉ Ãcõrẽ warrarãa. Ãcõrẽ warrarã bẽrã idji warrarã itea eroɓʉda edaɗia.*
Pauloba djabarã carea bio crĩcha ɓeɗa
8 Naẽna bãrãba Ãcõrẽ adua panasiɗaɗe wãrãẽ́ ãcõrẽda ẽpẽ panasiɗaa ãdji nezoca quĩrãca.
9 Baribʉrʉ iɗira bãrãba Ãcõrẽra cawa panʉa. Jipa jaraibʉrʉ, Ãcõrẽba bãrãra cawa ɓʉa. Maʉ̃da ¿cãrẽ cãrẽã crĩcha ʉɓʉaẽ́ ɓeada wayacusa ẽpẽ panʉ nezoca quĩrãca? Maʉ̃ba bãrãra carebacaa.
10 Bãrãba quĩrãtanoa ewarida, jeɗecoda, poa siɗa wagabadaa Ãcõrẽba bia unumãrẽã.
11 Maʉ̃ bẽrã mʉ̃a crĩcha ɓʉa mʉ̃dji quĩrĩãbe bãrãa jaradiasida.
12 Djabarã, bãrã judiorãẽ́ quĩrãca ɓai carea mʉ̃ra Ãcõrẽba Moisea diaɗa leyɗebemada ẽdrʉsia. Maʉ̃ bẽrã mʉ̃a bãrãa beɗea djuburiaya mʉ̃ quĩrãca maʉ̃ leyɗe ɓearãnamãrẽã. Naẽna bãrãba mʉ̃ra biẽ́ oɗaẽ́ basía.
13 Bãrãba cawa panʉa mʉ̃a bãrãma beɗea bia Critoɗebemada naãrã jaradiasiɗe cacua biẽ́ ɓʉ bẽrã bãrã druaɗe jaradia ɓesida.
14 Cacua biẽ́ ɓʉmĩna bãrãba mʉ̃ra igaraɗaẽ́ basía idjaɓa jʉretaɗaẽ́ basía.* Ãtebʉrʉ bia edasiɗaa Ãcõrẽ nezoca bajãnebema edabʉda quĩrãca, Jesucrito edabʉda quĩrãca.
15 ¿Sãwãsi bãrã ɓʉsriɗa naẽna eroɓeaɗara? Mʉ̃a wãrãda jaraya bãrãba poya opeɗaɗabara ara bãdji daura nuẽtacasiɗaa mʉ̃́a diaɗi carea.
16 Mʉ̃a wãrã beɗeaɗeba quẽã ɓʉ bẽrã ¿mʉ̃ra bãrã ume dji quĩrũca?
17 Bãrã tãẽna ãĩ jaradia ɓeaba ne jũma o panʉa bãrãba ãdji beɗeara ĩjãnamãrẽã. Baribʉrʉ ãdjia jaradia panʉba bãrãra carebacaa. Bãrãra dai umebemada ãĩ ede quĩrĩã panʉa ãdjidrʉ soɗeba ẽpẽnamãrẽã.
18 Wãrãda bia ɓʉa ewariza crĩcha biada soɗeba ẽpẽ pananida. Baribʉrʉ mãwã ẽpẽniẽ́ panʉa aɓabe mʉ̃ bãrã ume ɓʉɗebʉrʉ. Ãtebʉrʉ mʉ̃ neẽ́ne biɗa ewariza soɗeba ẽpẽ pananida panʉa.
19 Djabarã mʉ̃ warrarãca ɓea, mʉ̃ra wayacusa bãrã carea bia mĩga ɓʉa wẽrã warra pua nũmʉ quĩrãca. Mʉ̃ra mãwã bia mĩga ɓaya aɓa bãrã Crito quĩrãca panebʉdaɗaa.
20 ¡Mʉ̃da ara nawena bãrã ume ɓaɗabara cawacasia sãwã bãrã ume beɗeaida ɓʉda! Mʉ̃a wãrãda adua ɓʉa bãrãnebemada sãwã crĩchaida.
Saraɗeba idjaɓa Agaraɗeba Pauloba cawabiɗa
21 Ãcõrẽba Moisea diaɗa leyɗe ɓa quĩrĩã ɓeaba mʉ̃́a jaraɗadua: ¿Ãcõrẽ leyɗe ɓʉ́ ɓʉra adua panʉca?
22 Nãwã ɓʉ́ ɓʉa: Abrahaʉ̃ba warrada umé eroɓasia. Aɓa nezocawẽrã Agaraba tosia.* Dewarabemara idji quima Saraba tosia.* Sarara nezocawẽrãẽ́ basía.
23 Nezoca wẽrãba warrara tosia Abrahaʉ̃ba naʉ̃ djaraɗeba mãwã quĩrĩãna bẽrã. Baribʉrʉ dji quimaba toɗara Ãcõrẽba diai jaraɗa basía.
24 Maʉ̃gʉba crĩcha dromada dia ɓʉa. Ãcõrẽba beɗea ɓʉɗada umé panʉa. Maʉ̃ beɗea ɓʉɗa umé panʉra Sara idjaɓa Agara quĩrãca panʉa. Ãcõrẽba beɗea ɓʉɗara aɓa Sinai eyaɗe diasia. Maʉ̃ beɗea ɓʉɗara nezocawẽrã Agara quĩrãca ɓʉa, maʉ̃ beɗea ɓʉɗa ẽpẽ ɓeara nezoca quĩrãca panʉ bẽrã.
25 Sinai eya Arabia druaɗe ɓʉra Agara quĩrãca ɓʉa maʉ̃ eyaɗe diaɗa leyɗe ɓeara nezoca quĩrãca panʉ bẽrã. Idjaɓa Jerusaleʉ̃ naʉ̃ ẽjũãne ɓʉra Agara quĩrãca ɓʉa maʉ̃ puruɗebemarãra nezoca quĩrãca panʉ bẽrã. Nezoca quĩrãca panʉa Ãcõrẽba Moisea diaɗa leyɗe panʉ bẽrã.
26 Baribʉrʉ bajãnebema Jerusaleʉ̃ra Sara quĩrãca ɓʉa maʉ̃ puruɗebemarãra nezoca quĩrãca panʉẽ́ bẽrã. Mãwã panʉa Ãcõrẽba Moisea diaɗa leyɗe panʉẽ́ bẽrã. Dadjirãra mamabema bẽrã Sara warrarãca panʉa.
27 Ãcõrẽ Beɗeaɗe nãwã ɓʉ́ ɓʉa:
Wẽrã warra tocara, ɓʉsriɗadua. Warra pua unucara, bio ɓʉsriɗadua.
Wẽrã umaquĩrãba igaraɗaba warrarãda auɗuara eroɓaya wẽrã quima bara ɓʉ cãyãbara.*
28 Djabarã, dadjirãra Isa quĩrãca panʉa. Isara tosiɗaa Ãcõrẽba Abrahaʉ̃a mãwã jaraɗa bẽrã. Ara maʉ̃ quĩrãca dadjirãra Ãcõrẽ warrarãda panesiɗaa idjia mãwã jaraɗa bẽrã.
29 Abrahaʉ̃ ewariɗe Ismael, baridua warra quĩrãca toɗaba Isa, Ãcõrẽ Jaure ʉɓʉaɗeba toɗara biẽ́ obadjia. Ara maʉ̃ quĩrãca iɗi biɗa Ãcõrẽba Moisea diaɗa leyɗe ɓeaba Crito ĩjã ɓeara biẽ́ obadaa.
30 Baribʉrʉ Ãcõrẽ Beɗeaɗe nãwã ɓʉ́ ɓʉa: “Nezoca wẽrãra, idji warra siɗa ãyã jʉretadua. Nezoca wẽrã warraba nezocaẽ́ wẽrã warra ume dji zezaba eroɓʉra poya edaẽ́a.”*
31 Maʉ̃ bẽrã djabarã, dadjirãra nezocawẽrã warrarã quĩrãca panʉẽ́a. Ãtebʉrʉ nezocaẽ́ warrarã quĩrãca panʉa.
