Galata 5:1-26
5 Critoba dadjirãra ẽdrʉ ɓʉsia maʉ̃ ẽdrʉ ɓʉɗaɗe nĩbaɗamãrẽã. Maʉ̃gʉra bio ĩjã pananadua. Wayacusa nezoca quĩrãca ɓearãnadua.
2 ¡Ũrĩnadua! Mʉ̃ra Pauloa. Mʉ̃a naʉ̃gʉda bãrãa jaraya: Ãcõrẽ quĩrãpita jipa ɓeaɗi carea bãrã cacuada wẽãgoɗida panʉda crĩcha panʉbʉrʉ, Critoba bãrã carea oɗaba carebaẽ́a.
3 Wayacusa mʉ̃a jaraya: baridua umaquĩrãba idji cacuada wẽãgobibʉrʉ, Ãcõrẽba Moisea diaɗa leyra jũma ĩjã o ɓaida ɓʉa.
4 Maʉ̃ ley ĩjã o panʉneba Ãcõrẽ quĩrãpita jipa ɓeaɗida crĩcha ɓeara Crito jĩga wãsiɗaa. Idji biaɗeba jipa ɓʉɗara ãdjirãba igarasiɗaa.
5 Baribʉrʉ dadjirãba Critoda ĩjã panʉ bẽrã Ãcõrẽ Jaureɗeba wãrãda cawa panʉa Ãcõrẽba dadjirãra jipa unuida.
6 Cacua wẽãgo ɓʉɗeba dadjira Jesucrito ume ãbaa ɓacaa idjaɓa cacua wẽãgoẽ́ ɓʉɗeba idji ume ãbaa ɓacaa. Ãtebʉrʉ idji ĩjã ɓʉɗeba idji ume ãbaa ɓʉa. Mãwã ĩjã ɓʉba djãrãra quĩrĩã ɓʉa.
7 Bãrãba wãrã beɗeara bia ẽpẽ panasiɗaa. ¿Caiba mĩã sẽsi bãrãba maʉ̃ beɗeara igaraɗamãrẽã?
8 Ãdjia jaradia panʉra Bãrã Trʉ̃naneba zeẽ́ ɓʉa.
9 Quĩrãnebaɗadua: harina ẽsãbibari maãrĩ ɓʉba harinara jũma ẽsãbibaria. Ara maʉ̃ quĩrãca maãrĩ ãĩ jaradia ɓʉba aɓeɗa jũma ãĩ crĩchabibaria.
10 Mãwãmĩna dadjirã Boro Jesucritoɗeba mʉ̃a cawa ɓʉa bãrãba mʉ̃a jara ɓʉ awara crĩchaɗaẽ́da. Baribʉrʉ bariduaba bãrãda mãwã mĩã sẽibʉrʉ Ãcõrẽba cawa oya.
11 Djabarã, Ãcõrẽ quĩrãpita jipa ɓeaɗi carea cacua wẽãgoɗida panʉda mʉ̃a waɗi jaradia ɓʉbara, dji mãwã jaradia ɓeaba mʉ̃ra biẽ́ oɗi carea ẽpẽnaẽ́ bacasia. Mʉ̃a mãwã jaradia ɓʉbara ãdjirãba Jesu cruɗe beuɗaɗebemada biẽ́ crĩchaɗaẽ́ bacasia.
12 Mʉ̃maarã biara ɓacasia bãrã mãwã mĩã sẽ ɓeaba ãdji umaquĩrã cacuara aɓeɗa jũma tʉtaɗida.
13 Djabarã, Ãcõrẽba bãrãra trʉ̃sia idjia ẽdrʉ ɓʉɗaɗe nĩbaɗamãrẽã. Baribʉrʉ ẽdrʉpeɗaɗa bẽrã crĩcharãnadua bãdji cacuaba quĩrĩã ɓʉ quĩrãca oɗida panʉda. Ãtebʉrʉ wãrã quĩrĩãneba dji carebaɗadua.
14 Ãcõrẽba Moisea diaɗa leyra naʉ̃ beɗea aɓaʉba jũma jara ɓʉa: “Djãrãra quĩrĩãdua ara bʉdji quĩrĩã ɓʉ quĩrãca.”*
15 Quĩrãcuita ɓeaɗadua. Ijara duananibʉrʉ, djõ duananibʉrʉ, ara bãduɓa jũma ãrĩnia.*
Ãcõrẽ Jaureɗeba nĩbaɗadua
16 Maʉ̃ carea mʉ̃a jaraya: Ãcõrẽ Jaureɗeba nĩbaɗadua. Mãwãbʉrʉ bãrã cacuaba cadjirua o quĩrĩã ɓʉra oɗaẽ́a.
17 Naʉ̃ djaraba cadjirua o quĩrĩã ɓʉra Ãcõrẽ Jaureba quĩrĩãcaa. Idjaɓa Ãcõrẽ Jaureba obi quĩrĩã ɓʉra naʉ̃ djaraba quĩrĩãcaa. Ãdjira ãbaa bia pananaca bẽrã bãrãba o quĩrĩã panʉra poya oɗaẽ́a.
18 Baribʉrʉ Ãcõrẽ Jaureba bãrãda eronĩbʉrʉ, Ãcõrẽba Moisea diaɗa leyɗe panʉẽ́a.
19 Naʉ̃ cacuaba cadjirua obarira ebuɗa ɓʉa. Maʉ̃ra naʉ̃gʉa: daunemabadara, auɗua nĩbabadara, baridua ume auɗua o quĩrĩãbadara,
20 jʉwaba oɗa ãcõrẽa iwiɗibadara, jãĩbanaba obadara, djãrã quĩrãmabadara, ijarabadara, djãrãne awuabadara, maãrĩã carea quĩrũbadara, ara ãdji bia ɓaidrʉ jʉrʉbadara, caicayabadara, Ãcõrẽ beɗea quĩrã awara jaradia panʉneba awara wãbadara,
21 djãrãba eroɓʉ carea biẽ́ crĩchabadara, mĩã beabadara, beu nĩbabadara, ɓʉsriɗa ewari o panʉne jũmawãyã cadjirua obadara, idjaɓa ne jũma cadjirua maʉ̃ quĩrãca ɓea siɗa.* Mʉ̃a bãrãa naẽna jaraɗa quĩrãca wayacusa jaraya: maʉ̃ cadjirua o ɓeara Ãcõrẽ puruɗe ɓeaɗaẽ́a.
22 5:22-23 Baribʉrʉ Ãcõrẽ Jaureba naʉ̃gʉda diabaria: djãrã quĩrĩã ɓeaɗida, ɓʉsriɗaada, necai ɓeaɗida, jũma droa ɓeaɗida, ẽberã biada ɓeaɗida, sobiada, beɗea aɓa ɓeaɗida, jũmarã ume aduá ɓeaɗida, idjaɓa dadji cacua jipa eroɓeaɗi siɗa. Jũma maʉ̃gʉra ni aɓaʉ leyba cadjiruaɗa acaa.
24 Naʉ̃ djaraba ne jũma cadjirua o quĩrĩã ɓabarira Critoɗerãba cruɗe cachi beasiɗaa.
25 Dadjirãra Ãcõrẽ Jaureɗeba zocai panʉ bẽrã idjiɗeba nĩbaɗida panʉa.
26 Djãrã cãyãbara biara ɓeada crĩchaɗiẽ́ panʉa, caicaya duananiẽ́ panʉa, idjaɓa djãrãba eroɓʉ carea biẽ́ crĩchaɗiẽ́ panʉa.
