Galata 6:1-18
6 Djabarã, djabada cawaẽ́ne cadjiruaɗe ɓaesira, bãrã dji Ãcõrẽ Jaureɗeba nĩnaba biaɗeba carebaɗida panʉa wayacusa jipa nĩbamãrẽã. Baribʉrʉ quĩrãcuita ɓeaɗadua bãrã siɗa aɓari quĩrãca cadjiruaɗe ɓaeɗa amaaba.
2 Bia mĩga panʉne dji carebaɗadua. Mãwãbʉrʉ Critoba obi ɓʉra bãrãba jũma oɗia.
3 Dji dromaẽ́ ɓʉba idjida dji dromada crĩcha ɓʉbʉrʉ, ara idjiduɓa cũrũga ɓʉa.
4 Djãrãba o ɓʉ acʉi cãyãbara ara dadjia o ɓʉdrʉ acʉida ɓʉa jipa o ɓʉ cawaya. Mãwã ara dadjia o ɓʉ carea ɓʉsriɗa ɓaya.
5 Dadjiza oɗida panʉra jũma jipa oɗida panʉa.
6 Ãcõrẽ beɗea cawabʉrʉba dji jaradiabaría ne jũma bia idjia eroɓʉɗebemada diaida ɓʉa.
7 Ara bãduɓa cũrũgarãnadua. Ni aɓaʉba Ãcõrẽra poya cũrũgaẽ́a. Quĩrãnebaɗadua: ne u ɓʉba idjia ubʉrʉ quĩrãca ewaya.
8 Maʉ̃ carea naʉ̃ djaraba cadjirua o quĩrĩã ɓʉda aɓaʉba o ɓʉbʉrʉ, Ãcõrẽba maʉ̃ ẽberãra biẽ́ ɓʉya. Baribʉrʉ Ãcõrẽ Jaureba quĩrĩã ɓʉda aɓaʉba o ɓʉbʉrʉ, Ãcõrẽba maʉ̃ ẽberãra ewariza idji ume zocai ɓʉya.
9 Maʉ̃ bẽrã sẽnaẽ́ ne biada o pananadua. Sẽnaẽ́bʉrʉ, Ãcõrẽba ɓʉɗa ewariɗe dadjirãba biada edaɗia.
10 Maʉ̃ carea dadjirãba poya obʉdaza jũmarãda bia carebaɗida panʉa. Biara Jesu ĩjã ɓeada mãwã carebaɗida panʉa.
Pauloba naʉ̃ cartaɗe jĩrũare ɓʉɗa
11 Acʉɗadua, ara mʉ̃dji jʉwaba letra waiɓʉaba naʉ̃ cartara ɓʉbʉrʉa.
12 Bãrã cacua wẽãgobi quĩrĩã ɓeaba Crito cruɗe beuɗaɗebemada jaradiabadaa baribʉrʉ cacua wẽãgobi panʉa judiorãba bia ununamãrẽã idjaɓa ãdjia jaradia panʉ carea biẽ́ orãnamãrẽã.
13 Baribʉrʉ dji cacua wẽãgopeɗaɗaba Ãcõrẽba Moisea diaɗa leyra jũma ĩjã oɗacaa. Mãwãmĩna ãdjirãba bãrã cacuada wẽãgobi quĩrĩã panʉa, bãrãba mãwã osiɗara ara ãdjiɗebemada bia beɗeaɗi carea.
14 Baribʉrʉ mʉ̃ra mãwã ɓʉẽ́a. Mʉ̃nebemada ni maãrĩ biɗa bia beɗeaẽ́a. Ãtebʉrʉ aɓabe dadjirã Boro Jesucrito cruɗe beuɗaɗebemada bia beɗeaya. Critora cruɗe beuɗa bẽrã naʉ̃ ẽjũãnebemaba bia unubadara mʉ̃maarã jũma beusia. Idjaɓa naʉ̃ ẽjũãne ɓeamaarã mʉ̃ra beusia.
15 Ãcõrẽmaarã cacua wẽãgo ɓaida wa cacua wẽãgoẽ́ ɓai siɗa biara ɓʉẽ́a. Idjia ẽberã djiwiɗi oɗadrʉ bia unu ɓʉa.
16 Mʉ̃a quĩrĩã ɓʉa jũma mʉ̃a jara ɓʉ quĩrãca ĩjã ɓeara Ãcõrẽba quĩrã djuburia ɓaida, necai ɓai siɗa ãdjirãa dia ɓaida. Maʉ̃gʉrãra Ãcõrẽ ẽberãrã araa.*
17 Iɗiba ʉ̃taa mʉ̃a quĩrĩãẽ́a aɓaʉba mʉ̃ra mĩã sẽida. Jesuɗebema jaradia ɓʉ carea ẽberãrãba mʉ̃ra biẽ́ osiɗaa. Mʉ̃ djara cõãcuaɗa aninada eroɓʉa unubi carea mʉ̃ra idjiɗeda.
18 Djabarã, mʉ̃a quĩrĩã ɓʉa dadjirã Boro Jesucritoba idji biaɗeba jũma bãrãra careba ɓaida. Bia ɓʉa mãwã ɓaida.
Beɗea eɗaare
^ 6:16. Maʉg̃ʉrãra Ãcõrẽ ẽberãrã araa. Griego beɗeaɗe ɓʉ́ ɓʉa: “Maʉ̃gʉrãra Ãcõrẽ israelerãa.”
