Genesi 1:1-31
1 Naãrãeɗa Ãcõrẽba bajãda idjaɓa naʉ̃ ẽjũãda osia.
2 Maʉ̃ne naʉ̃ ẽjũãra mĩã cawaiẽ́ ɓasia idjaɓa ne neẽ́ ɓasia. Pusa nãbuada pãĩmaba pãĩsosoa ũmasia. Maʉ̃ne Ãcõrẽ Jaureda pusa ʉ̃rʉ̃ domica ɓabadjia.*
3 Maʉ̃be Ãcõrẽba jarasia:
–Ʉ̃nadua.–
Ara maʉ̃da ʉ̃nasia.
4 Maʉ̃ ʉ̃naara Ãcõrẽba bia unusia. Maʉ̃be Ãcõrẽba ʉ̃naara pãĩma umebemada awara ɓʉsia.
5 Ʉ̃naara trʉ̃ ɓʉsia “ãsa.” Pãĩmara trʉ̃ ɓʉsia “diamasi.” Ãcõrẽba nabema ewariɗe mãwã osia.*
6 Maʉ̃be Ãcõrẽba jarasia:
–Baido ẽsi deɗaada ɓaya baido aɓa ʉ̃taa wãmãrẽã, aɓa edre ɓemãrẽã.–
7 Ara mãwã jarabʉrʉba Ãcõrẽba maʉ̃ deɗaara osia. Maʉ̃ne baidora aɓa ʉ̃taa wãsia. Aɓa edre ɓesia.
8 Ãcõrẽba maʉ̃ deɗaara trʉ̃ ɓʉsia “bajã.” Umébema ewariɗe mãwã osia.
9 Maʉ̃be Ãcõrẽba jarasia:
–Deɗaa edrebema baidora jũma ãbaa ũmedua ẽjũã põãsada odjamãrẽã.–
Ara maʉ̃da ẽjũã põãsada odjasia.
10 Maʉ̃ra Ãcõrẽba bia unusia. Ẽjũã põãsara Ãcõrẽba trʉ̃ ɓʉsia “egoro.” Baido ãbaa ũmenada trʉ̃ ɓʉsia “pusa.”
11 1:11-12 Maʉ̃be Ãcõrẽba jarasia:
–Egoroɗe ne quĩrãtanoa tununadua; chirua ta zaubari ɓeada idjaɓa nejõ bacuru siɗa. Jũma maʉ̃ra ta zauɗia ara ãdji ɓea quĩrãca tununamãrẽã.–
Ara maʉ̃da egoroɗe ne quĩrãtanoa tunusiɗaa. Jũma chirua ta diabari ɓeara idjaɓa bacuru nejõ zaubari ɓea siɗa ãdji ta bara tunusiɗaa ara ãdji ɓea quĩrãca tununamãrẽã. Maʉ̃ra Ãcõrẽba bia unusia.
13 Ũbeabema ewariɗe mãwã osia.
14 1:14-15 Maʉ̃be Ãcõrẽba jarasia:
–Urua ɓeada bajãne ɓeaɗadua naʉ̃ ẽjũã ʉ̃na ɓamãrẽã idjaɓa ãsara, diamasi ume quĩrã awara ɓamãrẽã. Maʉ̃gʉba cawabi ɓaya ewarida, poada idjaɓa sãʉ̃be ewari dromada oɗida panʉda.–
16 Ara mãwã jarabʉrʉba Ãcõrẽba ʉ̃mãdauda ãsabema carea osia. Jeɗecoda diamasibema carea osia. Idjaɓa chĩdau siɗa ocuasia.
17 1:17-18 Ãcõrẽba maʉ̃ra jũma bajãne ɓʉcuasia naʉ̃ ẽjũã ʉ̃na ɓamãrẽã, ãsa beseamãrẽã, diamasi ʉ̃na ɓamãrẽã, idjaɓa ãsara diamasi ume quĩrã awara ɓamãrẽã. Maʉ̃ra idjia bia unusia.
19 Quĩmãrẽbema ewariɗe mãwã osia.
20 Maʉ̃be Ãcõrẽba jarasia:
–Dojãne ne jũma zocai ɓeada baraa baya. Idjaɓa ʉ̃tʉ wãɓaribada siɗa baraa baya.–
21 Ara mãwã jarabʉrʉba Ãcõrẽba ɓeda waiɓʉga ɓeada ocuasia. Dojãne zocai ɓeada quĩrãtanoa ocuasia. Idjaɓa i bara ɓeada quĩrãtanoa ocuasia. Maʉ̃ra idjia bia unusia.
22 Maʉ̃be ãdjirãra nãwã bia jarasia:
–Zocãrã yõnadua. Pusara, do siɗa biraɗadua. Idjaɓa ĩbana siɗa naʉ̃ ẽjũãne zocãrã yõnadua.–
23 Ãcõrẽba juesumabema ewariɗe mãwã osia.
24 1:24-25 Maʉ̃be Ãcõrẽba jarasia:
–Animarã quĩrãtanoa ɓeada naʉ̃ ẽjũãne baraa baya: daupẽbada animarãda, ãdji jãne wãbada animarãda, mẽãbema animarã siɗa baraa baya.–
Ara mãwã jarabʉrʉba Ãcõrẽba mẽãbema animarãda, daupẽbada animarãda, animarã ãdji jãne wãbada siɗa quĩrãtanoa ocuasia. Maʉ̃ra idjia bia unusia.
26 Maʉ̃be Ãcõrẽba jarasia:
–Jãʉ̃be ẽberãda oɗadrʉ dadji quĩrãca. Maʉ̃ ẽberãba ĩbana ɓeada, animarã pusaɗe ɓeada, daupẽbada ɓeada, mẽãbema ɓeada, idjaɓa jũma ãdji jãne wãbada siɗa poya eroɓaya.–
27 Ara mãwã jarabʉrʉba Ãcõrẽba ẽberãda osia idji quĩrãca. Wãrãda idji quĩrãca osia. Dji umaquĩrã, dji wẽrã siɗa osia.
28 Maʉ̃be Ãcõrẽba ãdjira nãwã bia jarasia:
–Warra zocãrã ununadua. Naʉ̃ ẽjũãra biraɗadua idjaɓa jũma naʉ̃ ẽjũãne ɓeara bãrã jʉwaeɗa eroɓeaɗadua. Ɓeda ɓeara, ĩbana ɓeara, druabema animarã siɗa jũma poya eroɓeaɗadua.–
29 Maʉ̃ awara Ãcõrẽba ãdjía jarasia:
–Acʉɗadua, mʉ̃a bãrãa diaya jũma naʉ̃ ẽjũãne chirua ta bara ɓeada, jũma bacuru nejõ ta bara ɓea siɗa. Maʉ̃nebemada bãrãba jũma coɗida panʉa.
30 Idjaɓa animarã druabemaa, ĩbana ɓeaa, jũma animarã ãdji jãne wãbada ɓeaa biɗa mʉ̃a chiruara diaya coɗamãrẽã.–
Ara maʉ̃da mãwã ɓesia.
31 Maʉ̃be Ãcõrẽba idjia oɗara jũma bio bia unusia. Seibema ewariɗe mãwã osia.
