Genesi 11:1-32
11 Ẽberãrã druaza wãbʉrʉɗi naẽna jũmarãda aɓari beɗeaɗe beɗeabadjiɗaa.
2 Ãdjirãra arima pananaca basía. Maʉ̃ba ʉ̃mãdau odjabariare pʉrrʉa nĩnane Sinar ẽjũãne jũẽne wãsiɗaa. Maʉ̃ ẽjũãne jeweɗada ununapeɗa mama panesiɗaa.
3 Ewari aɓa ãbaa nãwã beɗeadruasiɗaa: “Egoroda mõgara quĩrãca oɗapeɗa tʉbʉɗe báɗadrʉ de oɗi carea.” Ara maʉ̃da egorora mõgara quĩrãca oɗapeɗa básiɗaa mõgarara neẽ́ baɗa bẽrã. Maʉ̃be cãdorronada edasiɗaa maʉ̃ mõgara quĩrãca oɗara caraɗi carea.
4 Maʉ̃be jarasiɗaa:
–Jãʉ̃be puruda oɗadrʉ. Idjaɓa de ʉ̃tʉ drasoga ɓʉda oɗia. Dji de borora aɓeɗa bajãnaa tẽũbiɗia. Mãwã osiɗara dadjirãra trʉ̃ ɓʉga ɓeaɗia idjaɓa ni aɓaʉba dadjirãra namabemada ãyã memenebiɗaẽ́a druaza wãnamãrẽã.–
5 Ẽberãrãba puru idjaɓa de ʉ̃tʉ drasoga ɓʉ o panʉra Ãcõrẽba bajãneba acʉɗe zesia.
6 Maʉ̃ne Ãcõrẽba jarasia:
–Ãdjirãra jũma ãbaa duanʉa idjaɓa aɓari beɗeaɗe beɗeabadaa. Maʉ̃ bẽrã jʉwa ɓʉsiɗaa jãʉ̃ de drasoga ɓʉra oɗi carea. Maʉ̃ba bariduada o quĩrĩã panʉbʉrʉ poya oɗia. Dadjia mãwã iduaribiɗaẽ́a.
7 Biara ɓʉa dadjira wãnapeɗa ãdji beɗeara quĩrãtanoa beɗeabiɗida ara ãduɓa cawa ũrĩnaẽ́ duanenamãrẽã.–
8 11:8-9 Ara maʉ̃da Ãcõrẽba jũma naʉ̃ ẽjũãne ɓea ẽberãrãra quĩrãtanoa beɗeabisia cawa ũrĩrãnamãrẽã. Mãwã dji puru trʉ̃ra ɓesia Babel.* Maʉ̃ bẽrã ẽberãrãba puru o pananara idu ɓʉsiɗaa. Mãwã Ãcõrẽba ãdjirãra mamaʉba druaza wãbʉrʉbigasia.
9 –
Noé warra Seʉ̃neba yõpeɗaɗa
10 Nama ɓʉ́ ɓʉa Seʉ̃neba yõpeɗaɗaɗebemada. Dopapa wãnacarea poa umé ɓʉɗe, Seʉ̃ 100 poa ɓasiɗe, dji warra Arpaxada unusia.
11 Maʉ̃ Arpaxa ununacarea Seʉ̃ra 500 poa ɓasia. Maʉ̃ne warrarã, wẽrãcaurã siɗa unusia.
12 Arpaxa 35 poa ɓasiɗe dji warra Salada unusia.
13 Maʉ̃ Sala ununacarea Arpaxara 403 poa ɓasia. Maʉ̃ne warrarã, wẽrãcaurã siɗa unusia.
14 Sala 30 poa ɓasiɗe dji warra Hebereda unusia.
15 Maʉ̃ Hebere ununacarea Salara 403 poa ɓasia. Maʉ̃ne warrarã, wẽrãcaurã siɗa unusia.
16 Hebere 34 poa ɓasiɗe dji warra Peleda unusia.
17 Maʉ̃ Pele ununacarea Heberera 430 poa ɓasia. Maʉ̃ne warrarã, wẽrãcaurã siɗa unusia.
18 Pele 30 poa ɓasiɗe dji warra Reúda unusia.
19 Maʉ̃ Reú ununacarea Pelera 209 poa ɓasia. Maʉ̃ne warrarã, wẽrãcaurã siɗa unusia.
20 Reú 32 poa ɓasiɗe dji warra Seruda unusia.
21 Maʉ̃ Seru ununacarea Reúra 207 poa ɓasia. Maʉ̃ne warrarã, wẽrãcaurã siɗa unusia.
22 Seru 30 poa ɓasiɗe dji warra Nacoda unusia.
23 Maʉ̃ Naco ununacarea Serura 200 poa ɓasia. Maʉ̃ne warrarã, wẽrãcaurã siɗa unusia.
24 Naco 29 poa ɓasiɗe dji warra Tareda unusia.
25 Maʉ̃ Tare ununacarea Nacora 119 poa ɓasia. Maʉ̃ne warrarã, wẽrãcaurã siɗa unusia.
26 Tare 70 poa ɓasiɗe dji warrarã Abraʉ̃da, dewarabema Nacoda, Haraʉ̃ siɗa unusia.
Abraʉ̃ zeza Tare ẽberãrãnebema
27 Nama ɓʉ́ ɓʉa Tareɗeba yõpeɗaɗaɗebemada. Tareba naʉ̃ warrarãda unusia: Abraʉ̃da, Nacoda, Haraʉ̃ siɗa. Maʉ̃ Haraʉ̃ra Lo zeza basía.
28 Haraʉ̃ra idji topeɗaɗa puru Ur abadaɗe Caldea druaɗe dji zeza na jaiɗasia.
29 Abraʉ̃ra Naco siɗa quima barasiɗaa. Nacoba Milcada edasia. Milcara Haraʉ̃ cau basía, Iscá djabawẽrã basía. Maʉ̃ne Abraʉ̃ba Saraida edasia.
30 Maʉ̃ Saraira warra neẽ́ ɓasia warra toca bẽrã.
31 Abraʉ̃ zeza Tarera caldeorã puru Urɗeba ẽdrʉsia Canaaʉ̃ druaɗaa wãi carea. Idji warra Abraʉ̃da, idji wiuzaque Loda, idji ãĩgu Sarai siɗa edesia. Baribʉrʉ Haraʉ̃ puruɗe jũẽne wãnapeɗa mama panesiɗaa.
32 Tare 205 poa ɓasiɗe Haraʉ̃ puruɗe jaiɗasia.
Beɗea eɗaare
^ 11:8-9. Babel trʉ̃ba jara ɓʉa “dji cawa ũrĩnacaa.” Hebreorãba Babilonia purura Babel abadjiɗaa.
