Genesi 12:1-20
12 Ewari aɓa Ãcõrẽba Abraʉ̃a jarasia:
–Bʉ druara, bʉ ẽberãra, bʉ zeza deɗebemarã siɗa amepeɗa wãdua. Mʉ̃a druada bʉ́a acʉbiya mamaa wãmãrẽã.
2 Bʉɗeba puru dromada mʉ̃a yõbiya, bʉra bia ɓʉya, trʉ̃ ɓʉga ɓʉya, idjaɓa bʉɗeba dewararãda bia duanania.
3 Bʉ carebabʉdara mʉ̃a carebaya. Bʉ biẽ́ obʉdara mʉ̃a biẽ́ ɓʉya. Bʉɗeba mʉ̃a naʉ̃ ẽjũãne ɓea purura jũma carebaya.–
4 Ara maʉ̃da Abraʉ̃ra wãsia Ãcõrẽba jaraɗa quĩrãca. Lo siɗa idji ume wãsia. Haraʉ̃ puruɗeba ẽdrʉsiɗe Abraʉ̃ra 75 poa ɓasia.
5 Abraʉ̃ba idji quima Saraida, idji tẽãbea Loda, ne jũma idjia eroɓʉ siɗa edesia. Idji nezocarã Haraʉ̃ne edaɗa siɗa edesia. Haraʉ̃neba ẽdrʉɗapeɗa wãsiɗaa. Wãbʉdaɗe Canaaʉ̃ druaɗe jũẽsiɗaa.
6 Maʉ̃ ewariɗe cananeorãda maʉ̃ druaɗe duanasiɗaa. Abraʉ̃ra Canaaʉ̃ druaɗe nĩne Siqueʉ̃ puruɗe jũẽne wãsia, Moré bacuru droma nũmʉma.
7 Mama Ãcõrẽra Abraʉ̃ma odjapeɗa nãwã jarasia: “Mʉ̃a naʉ̃ ẽjũãra bʉɗeba yõbʉdarãa diaya.”
Maʉ̃be Abraʉ̃ba mõgarada ʉ̃tʉ pã buesia ara maʉ̃ Ãcõrẽ idjima odjaɗaa bia beɗeai carea.
8 Mãwãnacarea Abraʉ̃ra Betelɗeba ʉ̃mãdau odjabariare ɓʉ eyaɗaa wãsia. Mama idji wua dera osia. Idji wua demaʉba Betelera ʉ̃mãdau ɓaebariare ɓasia. Ʉ̃mãdau odjabariare Hai puruda ɓasia. Idji wua de caita wayacusa mõgarada ʉ̃tʉ pã buesia Ãcõrẽa ewari iwiɗi carea.
9 Mamaʉba Abraʉ̃ra ʉ̃nãũ eda wãsia aɓa Negue abada ẽjũãnaa.
Abraʉ̃ Egipto druaɗe ɓaɗa
10 Maʉ̃ ewariɗe jũma Canaaʉ̃ druaɗe jarrabada zesia. Maʉ̃ne Abraʉ̃ra Egiptoɗaa ɓaɗe wãsia coɗira aɓeɗa neẽ́ bẽrã.
11 Egiptoɗe jũẽboɗoɗe Abraʉ̃ba dji quima Saraia jarasia:
–Bʉra wãrãda wẽrã quĩrãwãrẽã ɓʉa.
12 Egiptoɗebemarãba bʉ unubʉdaɗe jaraɗia: “Jãʉ̃ra idji quimaa.” Maʉ̃ bẽrã mʉ̃ra beaɗia. Baribʉrʉ bʉra zocai ɓʉɗia edaɗi carea.
13 Maʉ̃ba mʉ̃ quĩrã djuburia jaradua bʉra mʉ̃ djabawẽrãda. Mãwãra mʉ̃ra beaɗaẽ́a, ãtebʉrʉ bʉɗeba mʉ̃ra bia ɓeya.–
14 Abraʉ̃ jũẽnacarea Egiptoɗebemarãba unusiɗaa idji quima Saraira quĩrãwãrẽã ɓʉda.
15 Dji dromarã biɗa unusiɗaa Saraira wãrãda bio quĩrãwãrẽã ɓʉda. Maʉ̃ bẽrã ãdjia Egiptoɗebema boroa Saraiɗebemada bia jarasiɗaa. Ara maʉ̃da ãdji boroba Saraira idji deɗaa edebisia.
16 Sarai carea Egiptoɗebema boroba Abraʉ̃ra bia osia. Abraʉ̃a diacuasia ovejada, pacada, burroda, nezoca umaquĩrãda, nezoca wẽrãda, cameyo siɗa.
17 Baribʉrʉ Abraʉ̃ quima Sarai carea Ãcõrẽba dji borora, idji de dromane panabada siɗa cacua biẽ́ ɓʉcuasia.
18 12:18-19 Maʉ̃neba dji boroba cawasia Saraira Abraʉ̃ quimada. Maʉ̃ bẽrã Abraʉ̃ra trʉ̃bipeɗa jarasia:
–¿Cãrẽ cãrẽã mʉ̃́a jaraẽ́ basi Saraira bʉ quimada? ¿Cãrẽ cãrẽã bʉ djabawẽrãana asi? Mʉ̃a bʉ quimara berara edasia. ¿Cãrẽ cãrẽã mʉ̃ra jãwã osi? Za ɓʉa bʉ quimara. Edapeɗa isabe wãdua.–
20 Maʉ̃ bẽrã dji boroba idji zarrarãa jarasia Abraʉ̃ra idji quima ume ãyã edeɗamãrẽã. Jũma ãdjia eropanʉ siɗa edebisia.
