Genesi 13:1-18
13 Mãwãnacarea Abraʉ̃ra dji quima ume Egiptoɗeba jẽda wãsia Negue ẽjũãnaa. Jũma idjia eroɓʉra edesia. Idji tẽãbea Lo siɗa idji ume wãsia.
2 Maʉ̃ne Abraʉ̃ba paratada, oro siɗa waiɓʉa eroɓasia. Animarã siɗa zocãrã eroɓasia.
3 Maʉ̃be Negueɗeba jẽda ʉ̃nãũ eda wãsia idji wua de eroɓaɗamaa, Betel puru idjaɓa Hai puru ẽsi.
4 Idjia mõgara ʉ̃tʉ pã bueɗama jũẽpeɗa Ãcõrẽa ewari iwiɗisia.
5 Maʉ̃ne Lora Abraʉ̃ ume ɓasia. Idjia biɗa ovejada, paca siɗa zocãrã eroɓasia. Wua deda zocãrã eroɓasia idji ẽberãrã itea, idji nezocarã itea biɗa.
6 Baribʉrʉ Abraʉ̃ra Lo siɗa bio bara panʉ bẽrã ẽjũãba araẽ́ basía. Maʉ̃ carea aɓari ẽjũãne ãbaa poya pananaẽ́ basía.
7 Maʉ̃ awara Abraʉ̃ animarã wagabadada Lo animarã wagabada ume ijarabadjiɗaa. Idjaɓa cananeorãda, perezeorã siɗa mama ɓeasia.
8 Maʉ̃ bẽrã Abraʉ̃ba Loa jarasia:
–Dadjira aɓari ẽberãrã bẽrã bia ɓʉẽ́a ijaraɗida; bia ɓʉẽ́a bʉ animarã wagabadara mʉ̃ animarã wagabada ume ijara pananida.
9 Maʉ̃ bẽrã mʉ̃a beɗea djuburiaya bʉra awara wãmãrẽã. Naʉ̃ druaɗe ẽjũã baraa. Bʉabʉrʉ cawa ɓʉa sãmaa wãida. Bʉda jʉwa acʉɗaa wãibʉrʉ, mʉ̃ra jʉwa araɗaa wãya. Bʉda jʉwa araɗaa wãibʉrʉ, mʉ̃ra jʉwa acʉɗaa wãya.–
10 Maʉ̃ne Loba Jordaʉ̃ do jeweɗada jũma unusia aɓa Zoar puruɗaa. Maʉ̃ jeweɗaɗe dji ẽjũãra bia ɓasia Ãcõrẽ néu ɓaɗa quĩrãca idjaɓa Egipto drua quĩrãca. Maʉ̃ jeweɗara mãwã ɓasia Ãcõrẽba Sodoma puruda Gomorra puru siɗa babuei naẽna.
11 13:11-12 Maʉ̃ bẽrã Loba Jordaʉ̃ do jeweɗara jũma edasia. Maʉ̃be ʉ̃mãdau odjabariare eɗaa wãsia. Abraʉ̃ra Canaaʉ̃ eyaiɗa ɓʉ ẽjũãne ɓesia. Mãwã ãdjira awara wãsiɗaa. Maʉ̃ne Lora puru jeweɗaɗe ɓea caita ɓesia. Idji wua dera osia Sodoma puru caita.
13 Sodomanebemarãra dji cadjiruarã basía. Ãdjirãba Ãcõrẽ quĩrãpita cadjiruada awua obadjiɗaa.
14 Lo Abraʉ̃ umebemada awara wãnacarea Ãcõrẽba Abraʉ̃a jarasia:
–Jãʉ̃be bʉdji ɓʉmaʉba acʉdua jʉwa acʉɗaa, jʉwa araɗaa, ʉ̃mãdau odjabariɗaa idjaɓa ʉ̃mãdau ɓaebariɗaa biɗa.
15 Jũma naʉ̃ ẽjũãra mʉ̃a bʉ́a, bʉɗeba yõbʉdarãa biɗa diaya ewariza bãrãne bamãrẽã.
16 Mʉ̃a bʉ warrarãra zocãrã yõbiya. Egoro pora poya juachaɗaca quĩrãca bʉ warrarã siɗa poya juachaɗaca baya.
17 Mʉ̃a bʉ́a naʉ̃ ẽjũãra diai bẽrã dji drasoara dji jeɗea siɗa acʉɗe wãdua.–
18 Ara maʉ̃da Abraʉ̃ba idji wua dera ẽrãpeɗa Mamre abada ẽjũãne ɓaɗe wãsia. Mamre ẽjũãra bacuru dromaiɗa ɓʉa idjaɓa Hebroʉ̃ puru caita ɓʉa. Mama Abraʉ̃ba mõgarada ʉ̃tʉ pã buesia Ãcõrẽa ewari iwiɗi carea.
