Genesi 14:1-24
14 Maʉ̃ ewariɗe Quedorlaóme abadada Elaʉ̃ druaɗebema boro basía. Idjiare naʉ̃ bororãda panasiɗaa: Amrapel, Sinar ẽjũãnebemada; Ario, Elasar puruɗebemada; idjaɓa Tidale, Goiʉ̃ druaɗebemada.
2 Maʉ̃ Quedorlaómeare ɓeara Berá abada ume djõ panasiɗaa. Maʉ̃ Berára Sodoma puruɗebema boro basía. Idjiare naʉ̃ bororãda panasiɗaa: Birsa, Gomorra puruɗebemada; Sinabo, Admá puruɗebemada; Semebé, Zeboiʉ̃ puruɗebemada; idjaɓa Bela puruɗebema boro siɗa. Bela purura Zoar abadaa.
3 Maʉ̃gʉrãra Sidim jeweɗaɗe jũma ãbaa dji jʉresiɗaa Pusa Beuɗa abada icawa Quedorlaómeare ɓea ume djõni carea.
4 Maʉ̃ Quedorlaómeba Sodomanebema boroare panʉra idji jʉwaeɗa doce poa eroɓasia. Baribʉrʉ trecebema poaɗe maʉ̃gʉrãba Quedorlaómera waa ĩjãnaẽ́ basía.
5 Maʉ̃ carea poa catorcebemane Quedorlaómera idjiare panʉ bororã siɗa wãsiɗaa ãdjirã ume djõni carea.
Wãbʉdaɗe naãrã Astarot-carnaim puruɗe jũẽsiɗaa. Mama repairãda poyasiɗaa. Mamaʉba Ham puruɗaa wãnapeɗa zuzirãda poyasiɗaa. Mamaʉba Quiriataim jeweɗaɗe jũẽne wãnapeɗa emirãda poyasiɗaa.
6 Maʉ̃be Seír eyaɗe jũẽnapeɗa horeorãda quena wãsiɗaa aɓa Paraʉ̃ ẽjũã ewara ɓʉmaa.
7 Jẽda zebʉdaɗe En-mispat puruɗe jũẽsiɗaa. Maʉ̃ purura idjaɓa Cadé abadaa. Mama amalecitarãda poyaɗapeɗa jũma ãdjia eropanʉra ãrĩsiɗaa. Amorreorãda ara maʉ̃ quĩrãca osiɗaa Hazezon-tamar puruɗe.
8 14:8-9 Quedorlaómeare panʉba maʉ̃ puru ɓeara jũma poyaɗapeɗa Sidim jeweɗaɗaa wãsiɗaa. Mama Sodomanebema boroare panʉra ãbaa dji jʉre panasiɗaa ãdjirã ume djõni carea. Sodomanebema boroare panʉra naʉ̃gʉrã basía: Gomorraɗebema boroda, Admánebema boroda, Zeboiʉ̃nebema boroda, idjaɓa Belaɗebema boro siɗa. Bela purura Zoar abadaa. Maʉ̃ bororãra juesuma panasiɗaa. Maʉ̃ne Elaʉ̃nebema boro Quedorlaómeare panʉra naʉ̃gʉrã basía: Goiʉ̃nebema boro Tidaleda, Sinarɗebema boro Amrapelda, Elasarɗebema boro Ario siɗa. Ãdjira quĩmãrẽ panasiɗaa.
9 –
10 Djõbʉdaɗe Quedorlaómeare panʉba poyasiɗaa. Maʉ̃ carea Sodomanebema boroare ɓeara mĩrũ wãbʉrʉsiɗaa. Maʉ̃ Sidim jeweɗara egoroɗebema cãdorrona susuaiɗa ɓasia. Maʉ̃ bẽrã mĩrũ wãbʉdaɗe ʉ̃cʉrʉ maʉ̃ susuaɗe eɗa ɓaesiɗaa. Waabemarãra eyaɗaa mĩrũ wãsiɗaa.
11 14:11-12 Maʉ̃ne Quedorlaómeare panʉba Sodomanebema nebiada, cobada siɗa jũma jãrĩsiɗaa. Aɓarica osiɗaa Gomorraɗe. Maʉ̃ne Abraʉ̃ tẽãbea Lora Sodomane ɓaɗa bẽrã Quedorlaómeare panʉba jida edesiɗaa. Ne jũma jãrĩnapeɗa wãsiɗaa.
13 Mãwãnacarea mĩrũ wãna aɓaʉba Abraʉ̃a jũma nẽbʉrʉsia. Maʉ̃ ewariɗe Abraʉ̃ “hebreo” abadara bacuruiɗa ɓʉ ẽjũãne ɓabadjia. Maʉ̃ ẽjũãra Mamre abadjiɗaa Mamrera djibari bẽrã. Idji djabarãra Escol idjaɓa Aner basía. Maʉ̃gʉ amorreorãra Abraʉ̃are panasiɗaa.
14 Maʉ̃ne Abraʉ̃ba ũrĩsia Quedorlaómeare panʉba idji tẽãbeara jida eropanʉda. Maʉ̃ carea Abraʉ̃ba idji deɗe tocuaɗa mẽsrã ɓeada 318 jʉresia. Maʉ̃be Quedorlaómeare panʉ caiɗu ẽpẽ wãsiɗaa Daʉ̃ puruɗaa.
15 Mama diamasi Abraʉ̃ba dji mẽsrã ɓeara zocãrã awara awara wãbipeɗa djõsiɗaa. Maʉ̃ne Quedorlaómeare panʉra poyaɗapeɗa dji mĩrũ wãbʉda caiɗu wãsiɗaa Hobá puruɗaa, Damasco wagaa.
16 Maʉ̃be Quedorlaómeare panʉba nebia jãrĩpeɗaɗara Abraʉ̃ba jũma jãrĩsia. Loɗe siɗa jãrĩsia. Maʉ̃ne idji tẽãbea Lora, wẽrãrãda, dewara ẽberãrã siɗa ẽdrʉ edasia.
Melquisedéba Abraʉ̃ bia jara ɓʉɗa
17 Abraʉ̃ba Quedorlaómera dji bororã idjiare djõ panʉ siɗa poyapeɗa idji druaɗaa jẽda zesia. Savé jeweɗa “Ẽberãrã Boro Jeweɗa” abadaɗe wãbʉrʉɗe Sodomanebema boroda Abraʉ̃ audiaɓariɗe zesia.
18 Mãwã ɓʉɗe Saleʉ̃nebema boro Melquisedéda zesia.* Maʉ̃ Melquisedéba paʉ̃da uva ɓa siɗa enesia. Melquisedéra Ãcõrẽ dji Dromaara ɓʉ sacerdote basía.
19 Maʉ̃ne idjia Abraʉ̃ra nãwã bia jara ɓʉsia:
Abraʉ̃, Ãcõrẽ dji Dromaara ɓʉba, bajã idjaɓa naʉ̃ ẽjũã oɗaba bʉra carebaya.
20 Ãcõrẽ dji Dromaara ɓʉra bio biya quirua. Idjia bʉ dji quĩrũrãra bʉ́a poyabisia.
Maʉ̃ne Abraʉ̃ba ne jũma jãrĩnanebemada die juachabʉrʉza Melquisedéa aɓa dia wãsia.
21 Mãwãnacarea Sodomanebema boroba Abraʉ̃a jarasia:
–Mʉ̃́a diadua mʉ̃ ẽberãrã ẽdrʉ edaɗada. Baribʉrʉ bʉa nebia waya jãrĩnara edadua, mʉ̃re siɗa edadua.–
22 14:22-23 Maʉ̃ne Abraʉ̃ba Sodomanebema boroa jarasia:
–Edaẽ́a. Mʉ̃a wãrã arada Ãcõrẽ dji Dromaara ɓʉ, naʉ̃ ẽjũã idjaɓa bajã oɗa ume nãwã beɗea ɓʉsia: mʉ̃a bʉrera edaẽ́a. Ni maãrĩara quiru siɗa edaẽ́a. Bʉ jĩrũne jʉ̃bari jʉ̃cara siɗa edaẽ́a. Mãwã edaẽ́a bʉa jararãmãrẽã mʉ̃ra ne bara ɓʉsida.
24 Mʉ̃ nezocarãba copeɗaɗa awara mʉ̃a waa quĩrĩãẽ́a. Baribʉrʉ mʉ̃are djõ panana Anerba, Escolba, Mamre biɗa ara ãdjia quĩrĩãbʉdada edaɗia.–
Beɗea eɗaare
^ 14:18. Saleʉ̃ purura idjaɓa Jerusaleʉ̃ abadaa.
