Genesi 15:1-21
15 Mãwãnacarea Abraʉ̃ba cãĩmocara quĩrãca Ãcõrẽba idjía nãwã beɗeabʉrʉda unusia:
–Abraʉ̃, wayarãdua. Mʉ̃ra bʉ wagabaria. Mʉ̃a bʉra auɗuara ne bara ɓʉya.–
2 Maʉ̃ne Abraʉ̃ba jarasia:
–Ay, Ãcõrẽ, ¿cãrẽ cãrẽã mʉ̃ra ne bara ɓʉi? Mʉ̃ra warra siɗa neẽ́ ɓʉa. Mʉ̃ beuɗacarea mʉ̃a eroɓʉra mʉ̃ nezoca Elieze Damasco puruɗebemaba jũma edaya.–
3 Idjaɓa Abraʉ̃ba jarasia:
–Bʉa mʉ̃́a warra unubiẽ́ ɓʉ bẽrã mʉ̃a eroɓʉra nezoca mʉ̃ deɗe toɗaba jũma edaya.–
4 Maʉ̃ne Ãcõrẽba Abraʉ̃a jarasia:
–Eliezeba bʉa eroɓʉra edaẽ́a, ãtebʉrʉ bʉ warra araba edaya.–
5 Maʉ̃be dajadaa edepeɗa Ãcõrẽba jarasia:
–Bajãnaa acʉdua, maʉ̃be chĩdauda jũma poya juachaibʉrʉ, juachadua. Jãʉ̃ chĩdau zocãrã ɓʉ quĩrãca bʉɗeba yõbʉdarã siɗa zocãrã duanania.–
6 Abraʉ̃ba Ãcõrẽra wãrãda ĩjãsia. Maʉ̃ carea Ãcõrẽba idjira jipa unusia.*
7 Maʉ̃be Ãcõrẽba jarasia:
–Mʉ̃ra Ãcõrẽa. Mʉ̃abʉrʉ bʉra caldeorã puru Urɗeba ẽdrʉ enesia naʉ̃ Canaaʉ̃ ẽjũãra diai carea.–
8 Maʉ̃ne Abraʉ̃ba jarasia:
–Mʉ̃ Boro Ãcõrẽ, ¿sãwã cawai mʉ̃a naʉ̃ ẽjũãra wãrãda edaida?–
9 Ãcõrẽba panusia:
–Mʉ̃a nãwã unubiya naʉ̃ ẽjũãra diaida: enedua paca zaque poa ũbea ɓʉda, chiwatu poa ũbea ɓʉda, oveja umaquĩrã poa ũbea ɓʉda, puchirãda, putuju siɗa.–
10 Ara maʉ̃da Abraʉ̃ba maʉ̃ animarã ɓeara jũma enesia. Enepeɗa, beapeɗa, ẽsidra drapetapeɗa, orro aɓa dewara orro ume quĩrã djica coɓʉsia. Ĩbanara drapetaẽ́ basía.
11 Maʉ̃ne ãgosora zesesiɗaa animarã beaɗa coɗi carea. Zesebʉdaɗe Abraʉ̃ba ãyã jʉrecuabadjia.
12 Queubʉrʉɗe Abraʉ̃ra bio cãĩ nũmesia. Cãĩ ɓʉɗe unusia bio pãĩsosoa minijĩchia nũmʉda. Maʉ̃ bẽrã bio ne wayasia.
13 15:13-15 Mãwã ɓʉɗe Ãcõrẽba Abraʉ̃a jarasia:
–Bʉra drõã ɓeɗacarea necai waraga jaiɗapeɗa tʉɓariɗia. Baribʉrʉ cawa ɓadua bʉɗeba yõi purura djãrã druaɗe ɓaida. Maʉ̃ druaɗebemarãba ãdjirãra nezocarãda ɓʉɗapeɗa cuatrociento poa bia mĩga eropanania.* Baribʉrʉ ãdjirã biẽ́ o panʉra mʉ̃a biẽ́ ɓʉya. Maʉ̃be bʉɗeba yõi purura mamaʉba ne bara ẽdrʉya.
16 Maʉ̃ cuatrociento poa baɗacarea bʉɗeba yõi purura namaa jẽda zeya. Maʉ̃ ewariɗe mʉ̃a amorreorã naʉ̃ ẽjũãne duanʉra cawa opeɗa naʉ̃ ẽjũãra bʉɗeba yõi purua diaya. Bʉ zocai ɓʉ ewariɗe mʉ̃a ãdjirãra cawa oẽ́a ãdjia cadjirua oɗida panʉra waɗi jũma oɗaẽ́ panʉ bẽrã.–
17 Queuɗacarea pãĩma nũmesia. Mãwã ɓʉɗe cawaẽ́ne cuguru waiɓʉa cowa nũmʉda idjaɓa cãdorrona ĩbĩrã urua nũmʉ siɗa odjaɗapeɗa dji animarã drapetaɗa ẽsi wãsiɗaa.
18 Ara maʉ̃ba Ãcõrẽba Abraʉ̃ ume nãwã beɗea ɓʉsia:*
–Wãrãda mʉ̃a bʉɗeba yõi purua naʉ̃gʉ ẽjũãra diaya Egipto quĩrãpe ɓʉ doɗeba aɓa do waiɓʉa Euprate abadaɗaa.
19 Quenitarã, quenizirã, cadmoneorã,
20 hititarã, perezeorã, repairã,
21 amorreorã, cananeorã, gergeseorã, jebuseorã ẽjũã siɗa mʉ̃a bʉɗeba yõbʉdarãa jũma diaya.–
Beɗea eɗaare
^ 15:6. Hebreo beɗeaɗe Abraʉ̃ trʉ̃ba jara ɓʉa “zeza jipa ɓʉ.”
^ 15:13-15. Exodo 1:1-7; 12:40-41.
^ 15:17-18. Maʉ̃ ewariɗe ẽberãba dewara ume beɗea ɓʉbʉrʉɗe Abraʉ̃ba oɗa quĩrãca animarãda beabadjiɗaa. Beaɗapeɗa, drapetaɗapeɗa, orro aɓa dewara orro ume quĩrã djica coɓʉbadjiɗaa. Maʉ̃be dji beɗea ɓʉ panʉ ẽberãrãra animarã ẽsi wãbadjiɗaa. Ẽsi wãbʉdaɗe jarabadjiɗaa ãdjia beɗea ɓʉpeɗaɗara wãrãda oɗida. Maʉ̃ awara jarabadjiɗaa aɓaʉba maʉ̃ beɗea ɓʉɗara oẽ́bʉrʉ, beuida ɓʉda dji animarã beuɗa quĩrãca. Jeremia 34:18-19.
