Genesi 16:1-16
16 Abraʉ̃ quima Saraira warra toca basía, baribʉrʉ Saraiba Egiptoɗebema nezocawẽrãda eroɓasia. Maʉ̃ nezocawẽrã trʉ̃ra Agara abadjiɗaa.
2 Ewari aɓa Saraiba Abraʉ̃a jarasia:
–Mʉ̃ra Ãcõrẽba warra toca wẽrãda ɓʉɗa bẽrã, mʉ̃a bʉ́a beɗea djuburiaya mʉ̃ nezocawẽrã ume cãĩmãrẽã. Ãĩbẽrã mʉ̃a warrada idjiɗeba eroɓaisicada.–
Saraiba jaraɗara Abraʉ̃ba ĩjãsia.
3 Ara maʉ̃da Saraiba idji Egiptoɗebema nezocawẽrãra Abraʉ̃a quima quĩrãca diasia warrada to diamãrẽã. Mãwã osia ãdji Canaaʉ̃ne die poa panasiɗaɗe.
4 Ara maʉ̃da Abraʉ̃ra Agara ume cãĩsia. Maʉ̃ne Agarara ɓiogoa ɓesia. Maʉ̃ cawaɗacarea Agaraba idji boro Saraira igara ɓesia.
5 Maʉ̃ bẽrã Saraiba Abraʉ̃a jarasia:
–Bʉdrʉ beɗeaɗe ɓʉa Agaraba mʉ̃ igara ɓʉ carea. Mʉ̃a bʉ́a idjira diasia quima quĩrãca. Baribʉrʉ idji ɓiogoa ɓʉ cawasiɗeba ʉ̃taa mʉ̃ra igara ɓʉa. Ãcõrẽbʉrʉ cawa ɓʉa caida beɗeaɗe ɓʉda: mʉ̃da wa bʉda.–
6 Maʉ̃ne Abraʉ̃ba Saraia jarasia:
–Acʉdua, bʉ nezocawẽrãra bʉ jʉwaeɗa ɓʉa. Bʉdjia quĩrĩã ɓʉ quĩrãca odua.–
Ara maʉ̃da Saraiba dji nezocawẽrãra biẽ́ o ɓesia. Maʉ̃ carea dji nezocawẽrãra mĩrũ wãsia.
7 Agara mĩrũ wãne Ãcõrẽ nezoca bajãnebemaba idji acʉɗe zesia.* Idjia Agarara unusia ẽjũã põãsa ewaraga ɓʉɗe egoroɗeba baido ʉ̃ta bogadrʉ ɓʉma. Maʉ̃ baido ʉ̃ta bogadrʉ ɓʉra Sur ẽjũãnaa wãbada oɗe ɓʉa.
8 Maʉ̃ne Ãcõrẽ nezoca bajãnebemaba Agaraa iwiɗisia:
–Agara, Sarai nezocawẽrã, ¿bʉra sãmaʉba zebʉrʉ? ¿Sãmaa wã?–
Agaraba panusia:
–Mʉ̃ra mʉ̃ boro Sarai ume ɓaɗada mĩrũ wãa.–
9 Maʉ̃ne Ãcõrẽ nezoca bajãnebemaba jarasia:
–Bʉ boro Saraimaa jẽda wãdua. Idji beɗeara jũma ĩjã odua.–
10 Maʉ̃ awara jarasia:
–Mʉ̃a bʉɗeba zocãrã yõbiya. Mãwã zocãrã yõni bẽrã poya juachaɗaca baya.–
11 Idjaɓa jarasia:
Bʉ ɓiogoa ɓʉra umaquĩrã warrada toya. Maʉ̃ warrara trʉ̃ ɓʉdua Ismael, mʉ̃a bʉ bia mĩga ɓʉɗebemada ũrĩna bẽrã.*
12 Idjira ni aɓaʉ jʉwaeɗa ɓaẽ́a. Jũmarã ume djõ ɓaya. Idjaɓa jũmarãda idji ume djõ ɓeaɗia. Idji ẽberãrãnebemada jĩga ɓabari baya.*
13 Agaraba cawasia Ãcõrẽdrʉ mãwã beɗea ɓasida. Maʉ̃ bẽrã Agaraba jarasia “Mʉ̃ unubari Ãcõrẽda mʉ̃a unusia.” Maʉ̃ carea Ãcõrẽ trʉ̃ra nãwã jarasia: “Bʉra mʉ̃ unubari Ãcõrẽa.”
14 Maʉ̃ bẽrã dji egoroɗeba baido bogadrʉ ɓʉra trʉ̃ ɓʉsia “baido bogadrʉ ɓʉ Ãcõrẽ zocai ɓʉ mʉ̃ unubariɗe.”* Maʉ̃ baidora Cadé puru idjaɓa Bered puru ẽsi ɓʉa.
15 Agara jẽda wãpeɗa umaquĩrã warrada Abraʉ̃a to diasia. Abraʉ̃ba Agara warrara trʉ̃ ɓʉsia Ismael.
16 Agaraba idji warra Ismael tosiɗe Abraʉ̃ra 86 poa ɓasia.
Beɗea eɗaare
^ 16:7. Ãcõrẽ nezoca bajãnebema. Versículo 13ɗe ebuɗa ɓʉa Ãcõrẽda mãwã ɓʉda.
^ 16:11. Hebreo beɗeaɗe Ismael trʉ̃ba jara ɓʉa “Ãcõrẽba ũrĩbaria.”
^ 16:12. Idji ẽberãrãnebemada jĩga ɓabari baya. Maʉ̃ beɗeaba idjaɓa jara ɓʉa “idji ẽberãrã quĩrãpe ɓabari baya” wa “ara idji ẽberãrã ume biẽ́ ɓaya.” Genesi 25:17-18.
^ 16:14. Hebreo beɗeaɗe maʉ̃ baido bogadrʉ ɓʉra Beer-Lajai-Roi trʉ̃badaa.
