Genesi 17:1-27
17 Abraʉ̃ 99 poa ɓasiɗe Ãcõrẽra idjima odjapeɗa nãwã jarasia:
–Mʉ̃ra ne jũma poya obari Ãcõrẽa. Bʉra mʉ̃ quĩrãpita jipa nĩbadua.
2 Mʉ̃a bʉ ume beɗea ɓʉɗara wãrãda oya. Mãwã bʉɗeba zocãrã yõbiya.–
3 Ara maʉ̃da Abraʉ̃ba Ãcõrẽra bio waya ɓʉ bẽrã chĩrãboroɗe coɓepeɗa idji dratura egoroɗaa ɓarru tẽũ coɓesia. Maʉ̃ne Ãcõrẽba jarasia:
4 –Mʉ̃a bʉ ume beɗea ɓʉɗara naʉ̃gʉa: bʉra zocãrã puru zeza baya.
5 Maʉ̃ bẽrã bʉra waa Abraʉ̃ aɗaẽ́a. Iɗiba ʉ̃taa bʉ trʉ̃ra Abrahaʉ̃ aɗia, mʉ̃a bʉra zocãrã puru zezada ɓʉbʉrʉ bẽrã.*
6 Mʉ̃a bʉɗeba zocãrã yõbiya; bʉɗeba mʉ̃a puruda zocãrã ocuaya. Idjaɓa bʉɗeba ẽberãrã bororãda odjaɗia.
7 Mʉ̃a bʉ ume, bʉɗeba yõbʉda ume biɗa beɗea ɓʉɗara naʉ̃gʉa: mʉ̃ra ewariza bʉ Ãcõrẽa idjaɓa ãdjirã Ãcõrẽ baya. Mʉ̃a bãrãra waga ɓaya idjaɓa bãrãba mʉ̃ra ẽpẽ panania.
8 Idjaɓa bʉ ɓabari ẽjũãra bʉ́a, bʉɗeba yõbʉdarãa biɗa mʉ̃a diaya. Mʉ̃a bãrãa jũma Canaaʉ̃ druara diaya ewariza bãrãne bamãrẽã. Maʉ̃ne mʉ̃drʉ bãrã Ãcõrẽ baya.–
9 17:9-10 Idjaɓa Ãcõrẽba Abrahaʉ̃a jarasia:
–Mʉ̃a bʉ ume beɗea ɓʉɗa bẽrã, bʉa ne oida ɓʉa. Idjaɓa iɗiba ʉ̃taa bʉ warrarãba, ãdjiɗeba yõbʉdarã biɗa aɓarica oɗida panʉa. Bãrãba nãwã oɗida panʉa: bãrã tãẽnabema umaquĩrãrã jũmarãba ãdji cacuara wẽãgoɗida panʉa.
11 Bãrã umaquĩrã cacua wẽãgoɗara mʉ̃a bãrã ume beɗea ɓʉɗa sẽyã baya.
12 9:12-13 Iɗiba ʉ̃taa umaquĩrã warrada toɗibʉrʉ, ocho ewari ɓʉɗe idji cacuara wẽãgoɗida panʉa. Maʉ̃ awara nezoca warrarã bãrã deɗe tobʉdarãda idjaɓa ãĩbema nẽdoɗa nezocarã siɗa cacua wẽãgoɗida panʉa. Mãwã mʉ̃a bãrã ume beɗea ɓʉɗa sẽyãra ara bãdji cacuaɗe eroɓeaɗia. Mʉ̃a beɗea ɓʉɗara ewariza mãwã ɓaya.
14 Maʉ̃ carea baridua umaquĩrãba idji cacuada wẽãgoẽ́bʉrʉ, maʉ̃ ẽberãra bãrãnebemada ãyã ɓʉɗida panʉa, mʉ̃a bãrã ume beɗea ɓʉɗara igara ɓʉ bẽrã.–
15 9:15-16 Maʉ̃ awara Ãcõrẽba Abrahaʉ̃a jarasia:
–Mʉ̃a bʉ quima Saraira nãwã bia ɓʉya: idjiɗeba mʉ̃a bʉ́a warrada wãrãda diaya. Maʉ̃ awara idjiɗeba puruda zocãrã yõnia idjaɓa idjiɗeba ẽberãrã bororãda odjaɗia. Maʉ̃ carea bʉ quimara waa Sarai arãdua, ãtebʉrʉ idji trʉ̃ra Sara adua.–*
17 Maʉ̃be Abrahaʉ̃ba Ãcõrẽra waya ɓʉ bẽrã chĩrãboroɗe coɓepeɗa idji dratura egoroɗe ɓarru tẽũ coɓesia. Baribʉrʉ ipiɗasia. Idji soɗe crĩchasia: “Ẽberã cien poa ɓʉba ¿sãwã warrada oi? Sara noventa poa ɓʉda ¿sãwã mãwã ɓiogoa ɓei?”
18 Maʉ̃ne Abrahaʉ̃ba Ismaelɗebemada crĩchasia. Maʉ̃ bẽrã Abrahaʉ̃ba Ãcõrẽa jarasia:
–¡Ismaelda bʉ quĩrãpita bia ɓʉbara bia ɓacasia!–
19 Maʉ̃ne Ãcõrẽba panusia:
–Mãwãẽ́a. Bʉ quima Sarabʉrʉ umaquĩrã warrada bʉ́a to diaya. Bʉa idji trʉ̃ra ɓʉdua Isa. Mʉ̃a bʉ ume beɗea ɓʉɗara jõca baya. Maʉ̃ bẽrã maʉ̃ beɗeara idjaɓa Isa itea ɓaya, idjiɗeba yõbʉdarã itea biɗa.
20 Idjaɓa bʉ warra Ismaelɗebema jaraɗara mʉ̃a ũrĩsia. Mʉ̃a idji siɗa bia ɓʉya. Maʉ̃ bẽrã warra zocãrã unubiya. Mãwã idjiɗeba ẽberãrã zocãrã yõnia. Idjia doce warra dji dromarãda unuya. Mãwã mʉ̃a idjiɗeba puru waiɓʉada oya.*
21 Baribʉrʉ mʉ̃a bʉ ume beɗea ɓʉɗara Isa itea ɓaya. Iɗiba poa aɓa babʉrʉɗe Isara Saraba bʉ́a to diaya.–
22 Ãcõrẽra Abrahaʉ̃ ume beɗea ɓapeɗa wãsia.
23 Ara maʉ̃ ewariɗe Abrahaʉ̃ba idji warra Ismaelda, nezocarã idji deɗe topeɗaɗarãda, idjia nẽdoɗa nezocarã siɗa trʉ̃cuapeɗa Ãcõrẽba jaraɗa quĩrãca jũmarãda cacua wẽãgocuasia.
24 Abrahaʉ̃ra 99 poa ɓasia idji cacua wẽãgosiɗe.
25 Dji warra Ismaelera trece poa ɓasia idji cacua wẽãgosiɗe.
26 Abrahaʉ̃ cacua wẽãgosiɗe aɓari ewariɗe dji warra Ismael siɗa cacua wẽãgosia.
27 Jũma umaquĩrãrã idji deɗe panabadada, nezocarã idji deɗe topeɗaɗada, ãĩbemarã nẽdoɗarã siɗa aɓari ewariɗe cacua wẽãgosiɗaa.
