Genesi 18:1-33
18 Abrahaʉ̃ Mamre ẽjũã bacuru dromaiɗa ɓʉma ɓasiɗe Ãcõrẽra idjima nãwã odjasia: Abrahaʉ̃ra idji wua deɗe eɗa wãbadama umatipa chũmasia.
2 Acʉbʉrʉɗe ẽberãda ũbea caita nũpanʉda unusia.* Maʉ̃ ẽberãrã unubʉrʉɗe araa pira wãsia audiaɓariɗe. Chĩrãboroɗe coɓepeɗa idji dratura egoroɗaa ɓarru tẽũ coɓesia.
3 Maʉ̃be jarasia:
–Mʉ̃ Boro, mʉ̃ quĩrã djuburia wãyã wãrãdua.
4 Bʉmaa bia ɓʉbʉrʉ, mʉ̃a baidoda enebiya bãrã jĩrũ sʉgʉɗamãrẽã.* Maʉ̃be bacuru edre ʉ̃nãũnida panʉa.
5 Mʉ̃maa ze panʉ bẽrã mʉ̃a bãrã itea ne djubiya ne coɗapeɗa cacua ʉɓʉaɗamãrẽã. Mãwãnacarea wãnida panʉa.–
Ãdjia panusiɗaa:
–Bia ɓʉa, odua bʉa jara ɓʉ quĩrãca.–
6 Ara maʉ̃da Abrahaʉ̃ra idji deɗe isabe eɗaa wãpeɗa Saraa jarasia:
–Harinada cuarenta libra edapeɗa isabe bʉrachiradua. Maʉ̃be ãbucuadua jari panʉ ẽberãba coɗamãrẽã.–
7 Maʉ̃be Abrahaʉ̃ra idji pacamaa pira wãpeɗa paca zaque boreguea ɓʉda aɓa edapeɗa idji nezocaa diasia isabe beapeɗa omãrẽã.
8 Opeɗa Abrahaʉ̃ba dji paca zaque djarara ãdjía cobisia. Idjaɓa paca juɓada diasia. Paca juɓaɗeba ne oɗa siɗa diasia.* Ãdji ne co panʉne Abrahaʉ̃ra bacuru edre nũmasia.
9 Mãwã panʉne ãdjirãba iwiɗisiɗaa:
–¿Bʉ quima Sarara sãma ɓʉ?–
Abrahaʉ̃ba panusia:
–Nama wua deɗe eɗa ɓʉa.–
10 Maʉ̃ne ãdjirãnebema aɓaʉba jarasia:
–Za zei poaɗe mʉ̃ra wayacusa bʉ acʉɗe zeya. Maʉ̃ne bʉ quimaba umaquĩrã warrada to eroɓaya.–
Mãwã beɗea panʉda Saraba Abrahaʉ̃ ẽcarraare ãdji deɗe eɗaa wãbadaɗeba jũma ũrĩ ɓasia.
11 Abrahaʉ̃ra Sara siɗa drõãda panasiɗaa. Maʉ̃ bẽrã Saraba idji jeɗeco unuca basía.
12 Maʉ̃ carea Saraba nãwã crĩchasia: “Mʉ̃ jãwã djora ɓʉba, mʉ̃ quima siɗa drõã ɓʉba ¿sãwã warrada oɗi?” Mãwã crĩchapeɗa iduɓa ipiɗasia.
13 Maʉ̃ bẽrã Ãcõrẽba Abrahaʉ̃a jarasia:
–¿Cãrẽ cãrẽã Sarara ipiɗasi? ¿Cãrẽ cãrẽã crĩcha ɓʉ idji djora ɓʉba warrara poya toẽ́da?
14 ¿Mʉ̃a ne jũma poya o ɓʉẽ́ca? Mʉ̃a jaraɗa quĩrãca za zei poaɗe mʉ̃ra bʉmaa wayacusa zeya. Maʉ̃ ewariɗe Saraba umaquĩrã warrada to eroɓaya.–
15 Maʉ̃ne Sara dauperabʉrʉba jarasia:
–Mʉ̃ra ipiɗaẽ́ basía.–
Baribʉrʉ Ãcõrẽba jarasia:
–Mãwãẽ́a. Mʉ̃a cawa ɓʉa bʉra ipiɗasida.–
Abrahaʉ̃ba Sodoma puru carea Ãcõrẽa beɗea djuburiaɗa
16 Maʉ̃be maʉ̃ ẽberãrã ũbea panʉra piradrʉɗapeɗa Sodoma puruɗaa wãbʉda basía. Abrahaʉ̃ra ãdji ume wãsia bia wãnaduaɗa ai carea.
17 18:17-19 Maʉ̃ne Ãcõrẽba nãwã crĩchasia: “Abrahaʉ̃neba yõbʉdara puru droma baya, idjaɓa idjiɗeba mʉ̃a jũma naʉ̃ ẽjũãne ɓea purura carebaya. Mʉ̃a idjira edasia idji warrarãa, ãdjirãneba yõbʉdarãa biɗa jaradiamãrẽã. Idjia ãdjirãa jaradiaya mʉ̃ oɗe nĩbaɗamãrẽã idjaɓa jipa oɗamãrẽã. Mãwã oɗibʉrʉ mʉ̃a Abrahaʉ̃ ume beɗea ɓʉɗara jũma oya. Maʉ̃ bẽrã mʉ̃a idjía jaraya mʉ̃a Sodoma purura sãwã oida.”
20 Maʉ̃be Ãcõrẽba Abrahaʉ̃a jarasia:
–Mʉ̃a ũrĩ ɓʉa Sodoma puruɗebemarãba, Gomorraɗebemarã biɗa cadjiruada jũmawãyã o panʉda.
21 Maʉ̃ bẽrã mʉ̃ra eɗaa wãya ãdjirãba wãrãda jũmawãyã cadjiruada o panʉ cawaya.–
22 Maʉ̃be ãdjiɗebemada umé Sodomanaa wãsiɗaa, baribʉrʉ Abrahaʉ̃ra Ãcõrẽ ume ɓesia.
23 Abrahaʉ̃ra Ãcõrẽ caitaara wãpeɗa jarasia:
–Bʉa Sodomanebemarã cawa obʉrʉɗe, ¿ẽberã jipa ɓeada dji cadjiruarã ume ãbaa quinibica?
24 Jãʉ̃ puruɗe ẽberã jipa ɓeada cincuenta panʉbʉrʉ, ¿bʉa ãdji purura jũma ãrĩca? Bʉa maʉ̃ cincuenta ẽberã jipa ɓea carea ¿ãdji puru ãrĩ crĩcha ɓʉra idu ɓʉẽ́ca?
25 Bʉa ẽberã jipa ɓeara ẽberã cadjiruarã ume ãbaa quinibicaa. Bʉra jũma naʉ̃ ẽjũãne ɓea cawa obaria. Mãwãra ¿bʉa jipa cawa oẽ́ca?–
26 Maʉ̃ne Ãcõrẽba panusia:
–Mʉ̃a Sodoma puruɗe jipa ɓeada cincuenta unuibʉrʉ, maʉ̃ cincuenta ẽberãrã carea jãʉ̃ purura ãrĩẽ́a.–
27 Wayacusa Abrahaʉ̃ba jarasia:
–Mʉ̃ Boro, mʉ̃ra ne wayaa neẽ́ ɓʉ quĩrãca bʉ ume beɗea ɓʉa. Mʉ̃ra ẽberãda quirumĩna, egoro quĩrãca ɓʉmĩna, tʉbʉ pora quĩrãca ɓʉmĩna, mʉ̃ra bʉ ume waɗi idu beɗeabidua.
28 Ãĩbẽrã cincuenta jipa ɓeaɗebemarãda bʉa juesuma unuẽ́sicada. Maʉ̃ juesuma unuẽ́ carea ¿ãdji purura jũma ãrĩca?–
Maʉ̃ne Ãcõrẽba panusia:
–Mʉ̃a jipa ɓeada 45 unuibʉrʉ, ãdji purura ãrĩẽ́a.–
29 Abrahaʉ̃ba wayacusa jarasia:
–Ãĩbẽrã cuarentabe unuisicada.–
Maʉ̃ne Ãcõrẽba jarasia:
–Jipa ɓeada cuarenta panʉbʉrʉ, ãrĩẽ́a.–
30 Abrahaʉ̃ba jarasia:
–Mʉ̃ Boro, quĩrũrãdua mʉ̃a bʉ́a waya iwiɗibʉrʉ carea. Ãĩbẽrã treintabe panʉsicada.–
Maʉ̃ne Ãcõrẽba panusia:
–Mʉ̃a treinta unuibʉrʉ, ãrĩẽ́a.–
31 Abrahaʉ̃ba jarasia:
–Mʉ̃ Boro, mʉ̃ra ne wayaa neẽ́ ɓʉ quĩrãca bʉ ume beɗea ɓʉa. Ãĩbẽrã arima veintebe panʉsicada.–
Ãcõrẽba panusia:
–Jipa ɓeada veinte panʉbʉrʉ, ãrĩẽ́a.–
32 Abrahaʉ̃ba wayacusa jarasia:
–Mʉ̃ Boro, mʉ̃a beɗeada aɓabe jaraya. Quĩrũrãdua. Mʉ̃a maʉ̃ beɗeara jarasira waa jaraẽ́a. Ãĩbẽrã arima diebe panʉsicada.–
Maʉ̃ne Ãcõrẽba jarasia:
–Jipa ɓeada die panʉbʉrʉ, ãrĩẽ́a.–
33 Ãcõrẽra Abrahaʉ̃ ume mãwã beɗeapeɗa wãsia. Maʉ̃ne Abrahaʉ̃ra jẽda wãsia idji ɓabarimaa.
