Genesi 19:1-38
19 Queuboɗoɗe bajãnebema nezoca umébemara Sodoma puruɗe jũẽsiɗaa. Maʉ̃ne Abrahaʉ̃ tẽãbea Lora dji puru eɗa wãbadama chũmasia. Mãwã ɓʉɗe Loba maʉ̃ bajãnebema nezocarãra unusia. Ara maʉ̃da ãdji audiaɓariɗe wãsia. Wayaaɗeba chĩrãboroɗe coɓepeɗa idji dratura egoroɗaa ɓarru tẽũ coɓesia.
2 Maʉ̃be Loba ãdjía jarasia:
–Mʉ̃ bororã, mʉ̃a bãrãa beɗea djuburiaya naʉ̃ diamasi mʉ̃ deɗe cãĩne zeɗamãrẽã. Mama bãrã jĩrũra sʉgʉɗida panʉa. Nu diapeɗa wãnadua bãdji wãbʉdamaa.–
Maʉ̃ne bajãnebema nezocarãba panusiɗaa:
–Mãwãẽ́a. Naʉ̃ diamasi daira puru jãne cãĩnia.–
3 Baribʉrʉ Loba mĩã sẽ jara ɓesia idji diguiɗaa wãnamãrẽã. Maʉ̃ carea Lo ume wãsiɗaa. Jũẽnacarea Loba djico biada osia idjaɓa paʉ̃ dji ẽsãbari neẽ́ ɓʉda ocuasia. Maʉ̃da cosiɗaa.
4 Waɗi cãĩni naẽna jũma puruɗebema umaquĩrãrãba Lo dera jũrã edasiɗaa. Cũdrarãda, drõãrã siɗa duanasiɗaa.
5 Maʉ̃be dajadaareba Loa ɓia iwiɗisiɗaa:
–Naʉ̃ diamasi ẽberã bʉmaa zepeɗaɗara ¿sãma panʉ? Dajadaa enedua dairãra ãdji ume cãĩni carea.–
6 Maʉ̃ne Lora dajadaa ãdjirã ume beɗeaɗe wãpeɗa dji eɗa wãbadara bio jũãtrʉ nũmʉsia.
7 Maʉ̃be jarasia:
–Achirã, mʉ̃a bãrãa beɗea djuburiaya maʉ̃ cadjiruara orãnamãrẽã.
8 Baribʉrʉ mʉ̃a caurã umaquĩrã adua panʉda umé eroɓʉa. Mʉ̃a ãdjira dajada ɓʉya bãdjia quĩrĩã panʉ quĩrãca oɗamãrẽã. Baribʉrʉ naʉ̃ ẽberãrãra mʉ̃ diguiɗaa ze panʉ bẽrã mʉ̃a wagaida ɓʉa. Maʉ̃ bẽrã ãdjira biẽ́ orãnadua.–
9 Maʉ̃ne puruɗebemarãba jarasiɗaa:
–Bʉra drua ãĩba dai puruɗe ɓaɗe zesia. Maʉ̃ba iɗira ¿dairãra jãwã quẽã ɓʉca? ¡Ãyã wãdua! Bʉda ãyã wãẽ́bʉrʉ, daiba ãdji cãyãbara bʉda cadjiruaara oɗia.–
Ara maʉ̃da Lora chãtaɗapeɗa dji eɗa wãbada ãrĩni carea panasiɗaa.
10 Baribʉrʉ bajãnebema nezocarã Lo diguiɗaa panʉba Lora ãdji jʉwaba eɗa edaɗapeɗa dji eɗa wãbadara jũãtrʉ nũmʉsiɗaa.
11 Ara maʉ̃da ãdjia dji eɗa wãbadama duanʉra jũma dauɓerreabisiɗaa, cũdrarãra drõãrã siɗa. Maʉ̃ne ãdjirãra dji eɗa wãbada jʉrʉ panʉba sẽsiɗaa.
12 Maʉ̃be bajãnebema nezocarã Lo deɗe panʉba idjía jarasiɗaa:
–Naʉ̃ puruɗe ¿bʉa ẽberãrãda dewara eroɓʉca? Bʉ warrarã, bʉ caurã, bʉ wigurã, idjaɓa jũma naʉ̃ puruɗe eroɓʉ siɗa namabemada ãyã ededua.
13 Daiba naʉ̃ purura jũma ãrĩnia. Ãcõrẽba ũrĩ ɓʉa naʉ̃ puruɗebemarãba bio cadjirua obadada. Maʉ̃ bẽrã Ãcõrẽba daira diabuesia ãdjirã cawa oɗamãrẽã.–
14 Ara maʉ̃da Lora cũdra idji caurã ume beɗea bia panʉrã acʉɗe wãpeɗa jarasia:
–Piraɓariɗapeɗa namabemada isabe ãyã wãnadua. Ãcõrẽba naʉ̃ purura ãrĩya.–
Mãwãmĩna cũdrarãba crĩchasiɗaa Loba ijaramiada o ɓʉda.
15 Ʉ̃nadrʉboɗoɗe bajãnebema nezocarãba Loa jarasiɗaa:
–Bʉ quimada, bʉ caurã umé panʉ siɗa isabe ãyã ededua daiba naʉ̃ puru ãrĩbʉdaɗe beurãnamãrẽã.–
16 Mãwãmĩna Lora isabe wãẽ́ ɓasia. Maʉ̃ bẽrã bajãnebema nezocarãba idjida, idji quimada, idji caurã siɗa jʉwaɗe jidaɗapeɗa puru dajadaa erreɓari edesiɗaa ẽdrʉ ɓʉɗi carea. Mãwã Ãcõrẽba Lora idji ẽberãrã siɗa quĩrã djuburiasia.
17 Puru dajada baɗacarea bajãnebema nezocarãba Loa jarasiɗaa:*
–Ẽdrʉi carea pira wãdua. Jẽda acʉrãdua idjaɓa ni maãrĩ biɗa naʉ̃ jeweɗaɗe nũmerãdua. Beu amaaba eya baramaa wãdua.–
18 Baribʉrʉ Loba jarasia:
–Mãwãẽ́a, mʉ̃ bororã. Mʉ̃ quĩrã djuburia jãʉ̃ eyaɗaa wãbirãdua.
19 Bãrãba mʉ̃ra bio quĩrã djuburiasiɗaa puruɗebemada ẽdrʉ enepeɗaɗa bẽrã. Baribʉrʉ mʉ̃ra eya barama poya jũẽẽ́a. Pĩãca wãbʉrʉɗe bãrãba dji puru ãrĩbʉdaba mʉ̃ra ota jidaisicada. Maʉ̃ba mʉ̃ra beaya.
20 Nama caita puru zaqueda ɓʉa. ¿Mʉ̃ra mamaa mĩrũ wãida ɓʉca? Dji purura wãrãda caibe quirua. ¿Bãrãba maʉ̃gʉra ãrĩnaẽ́ame? Mʉ̃ra mamaa idu wãbiɗadua beu amaaba.–
21 Maʉ̃ne Ãcõrẽ nezoca aɓaʉba jarasia:
–Mãẽteara bia ɓʉa. Bʉa jara ɓʉ quĩrãca mʉ̃a iduaribiya. Bʉa jara ɓʉ purura mʉ̃a ãrĩẽ́a.
22 Baribʉrʉ isabe wãdua jãma jũẽi carea. Mʉ̃a ni cãrẽ siɗa poya oẽ́a bʉ jãma jũẽi naẽna.–
Loba maʉ̃ purura wãrãda caibe quiruaɗa aɗa bẽrã dji puru trʉ̃ra ɓesia Zoar.*
23 Lo Zoarɗe jũẽbʉrʉbara ʉ̃mãdaura odjabʉrʉ basía.
24 Maʉ̃bebʉrʉ Ãcõrẽba azupre uruada Sodomane, Gomorraɗe biɗa bajãneba jurrubisia.
25 Maʉ̃ba puru umé panʉra, maʉ̃ puruɗe eɗa duanʉra, idjaɓa chirua maʉ̃ jeweɗaɗe ɓʉ siɗa jũma bá wãsia.
26 Baribʉrʉ Lo quima caiɗu nĩba jẽda acʉsia. Ara maʉ̃da idjira aɓeɗa zarea tã ba nũmesia.
27 Nurẽma diapeɗa Abrahaʉ̃ra wãsia Ãcõrẽ ume beɗea ɓaɗamaa.
28 Mamaʉba Sodomara, Gomorrara, jũma dji jeweɗa siɗa acʉsia. Maʉ̃ne unusia dji ẽjũãra ʉ̃ta cowaga nũmʉda pea baɗa cowabari quĩrãca.*
29 Ãcõrẽba puru maʉ̃ jeweɗaɗe panʉra ãrĩnamĩna Abrahaʉ̃ra quĩrãdoaẽ́ ɓasia. Maʉ̃ carea Abrahaʉ̃ tẽãbea Lora Sodoma ãrĩbʉrʉɗebemada ãyã ẽdrʉ edesia.
Lo caurãba warrarã topeɗaɗa
30 Mãwãnacarea Lora Zoar puruɗe ɓaida wayasia. Maʉ̃ carea idji caurã ume ẽjũã eyaiɗa ɓʉmaa wãsia. Mama ãdjira eya uriaɗe panesiɗaa.
31 Ewari aɓa dji cau nabemaba dji tẽãbemaa jarasia:
–Dadji zezara drõãda quirua. Maʉ̃ awara nama naʉ̃ ẽjũãne ni aɓaʉ umaquĩrãda neẽ́a dadji edaɗamãrẽã jũmarãda quima edabada quĩrãca.
32 Maʉ̃ carea dadji zezaa uva ɓa aseada dobiɗia beu ɓemãrẽã. Mãwã osiɗara idji ume poya cãĩnia idji warrada eropanani carea.–
33 Ara maʉ̃ diamasi ãdji zeza Loa uva ɓa aseara dobisiɗaa. Lora beu ɓepeɗa idji cau nabemada araa wãpeɗa idji ume cãĩsia. Baribʉrʉ Lora beu ɓʉ bẽrã cawaẽ́ basía idji caura cãĩ ɓapeɗa ãyã wãnada.
34 Nurẽma dji nabemaba dji tẽãbemaa jarasia:
–Mʉ̃ra nuena diamasi dadji zeza ume cãĩsia. Nane biɗa uva ɓa aseada dobiɗia bʉ siɗa idji ume cãĩmãrẽã. Mãwã dadji zeza warrarãda eropanania.–
35 Ara maʉ̃ diamasi uva ɓa aseara ãdji zezaa dobisiɗaa. Maʉ̃be dji tẽãbemara idji ume cãĩsia. Baribʉrʉ Loba cawaẽ́ basía dji caura cãĩ ɓapeɗa ãyã wãnada.
36 Mãwã Lo caura umena ɓiogoa panesiɗaa ara ãdji zezaɗeda.
37 Maʉ̃be dji nabemaba umaquĩrã warrada tosia. Dji trʉ̃ra ɓʉsia Moab.* Moab abadaɗeba moabitarãda yõsiɗaa.
38 Dji tẽãbema biɗa umaquĩrã warrada tosia. Dji trʉ̃ra ɓʉsia Benamí. Benamíneba amonitarãda yõsiɗaa.*
Beɗea eɗaare
^ 19:17. Bajãnebema nezocarãba Loa jarasiɗaa. Griego beɗeaɗe mãwã ɓʉ́ ɓʉa. Hebreo beɗeaɗe nãwã ɓʉa: “Idjia jarasia.”
^ 19:22. Hebreo beɗeaɗe Zoar trʉ̃ba jara ɓʉa “caibe quiru.”
^ 19:28. Pea baɗa cowa quĩrãca. Hebreo beɗeaɗe nãwã ɓʉ́ ɓʉa: “Egoro caɗa zareabibari tʉbʉ urua cowabari quĩrãca.”
^ 19:37. Hebreo beɗeaɗe Moab trʉ̃ba jara ɓʉa “zezaɗeba.”
^ 19:38. Benamí trʉ̃ba jara ɓʉa “mʉ̃ ẽberãrã warra.” Hebreorãba amonitarãra “benijamon” abadjiɗaa.
