Genesi 2:1-25
2 Mãwã Ãcõrẽba bajãra, naʉ̃ ẽjũã siɗa jũma pãrãsia. Jũma bajãne ɓeara, naʉ̃ ẽjũãne ɓea siɗa pãrãsia.
2 Sietebema ewariɗe jũma pãrã eroɓasia. Maʉ̃ bẽrã sietebema ewariɗe ʉ̃nãũsia.
3 Jũma pãrãpeɗa ʉ̃nãũna bẽrã, sietebema ewarira dji biara ɓʉda ɓʉsia jũmarãba idjía bia beɗea pananamãrẽã idjaɓa ʉ̃nãũ pananamãrẽã.
4 Mãwã Ãcõrẽba bajãra, naʉ̃ ẽjũã siɗa jũma osia.
Ãcõrẽba naãrãbema ẽberã oɗa
Ãcõrẽba naʉ̃ ẽjũã, bajã siɗa osi ewariɗe,
5 2:5-6 chiruada põãjãrã siɗa neẽ́ basía Ãcõrẽba naʉ̃ ẽjũãne waɗibiɗa cueda zebica baɗa bẽrã. Baribʉrʉ egoroɗeba ʉ̃taa towaada odjabadjia naʉ̃ ẽjũã jũma ɓeguea oi carea.* Idjaɓa ẽberãda neẽ́ basía ẽjũã oi carea.
6 –
7 Maʉ̃ne Ãcõrẽba egoro poraɗeba ẽberãda osia. Maʉ̃ ẽberã quẽbʉɗe Ãcõrẽba jãrãpuasia ʉ̃yãba edamãrẽã. Mãwã ẽberãra zocai ɓesia.
8 Mãwãnacarea Ãcõrẽba néu ẽjũãda ʉ̃mãdau odjabariare osia.* Maʉ̃ néu ẽjũãra Edeʉ̃ abadaa. Ãcõrẽba ẽberã oɗara néu ẽjũãne ɓʉsia.
9 Mama quĩrãtanoa bacuru bia queɗeada nejõ bia zaubadada waribisia. Maʉ̃ ẽjũã ẽsi úsia nejõ zocai ɓai diabarida. Idjaɓa úsia nejõ crĩcha bia, crĩcha cadjirua cawabibari siɗa.
10 Edeʉ̃ ẽjũãne doda ɓasia maʉ̃ néu ẽjũãra jũma cũrãsa eroɓamãrẽã. Maʉ̃ dora dji taeɗaa quĩmãrẽ nẽrã ɓasia.
11 Do nẽrã ɓʉra aɓa Pisoʉ̃ basía. Pisoʉ̃ra Havila druaɗe ɓʉa. Havila druara oro bara ɓʉa.
12 Dji orora bio bia ɓʉa. Idjaɓa ónice mõgara siɗa bara ɓʉa. Bacuru ɓa tũãpa ɓʉ bedelio abada siɗa bara ɓʉa.
13 Dewarabema dora Gihoʉ̃ abadaa. Gihoʉ̃ra Cus druaɗe ɓʉa.
14 Maʉ̃arebema dora Tigri abadaa.* Maʉ̃ dora Asiria puruɗeba ʉ̃mãdau odjabariare ɓʉa. Jĩrũarebema dora Euprate abadaa.
15 Maʉ̃ne Ãcõrẽba ẽberãra edapeɗa Edeʉ̃ néu ẽjũãne ɓʉsia acʉ ɓamãrẽã.
16 Maʉ̃be Ãcõrẽba ẽberãa jara ɓʉsia:
–Jũma naʉ̃ néu ẽjũãne ɓea nejõra bʉa jõida ɓʉa.
17 Baribʉrʉ crĩcha bia, crĩcha cadjirua cawabibari nejõra jõcara ɓʉa. Maʉ̃da jõsira ara maʉ̃ ewariɗe bʉra wãrãda beuya.–
18 Maʉ̃be Ãcõrẽba jarasia:
–Bia ɓʉẽ́a ẽberã iduɓa ɓaida. Carebabari biada idji itea oya.–
19 Maʉ̃ne Ãcõrẽba egoroɗeba jũma animarã druabemada, jũma ĩbana siɗa osia. Maʉ̃ animarã ɓeara ẽberãmaa enesia cãrẽ trʉ̃da ãdjiza ɓʉcuai cawaya. Ara maʉ̃da ẽberã Adaʉ̃ba animarã ɓeara trʉ̃ ɓʉcuasia. Animarã trʉ̃ra ãdjiza ɓesia Adaʉ̃ba trʉ̃ ɓʉcuaɗa quĩrãca.
20 Mãwã Adaʉ̃ba daupẽbada animarãra, ĩbana bajãne wãɓaribadara, mẽãbema animarã siɗa jũma trʉ̃ ɓʉcuasia. Mãwãmĩna Adaʉ̃ itea carebabari biada waɗi neẽ́ basía.
21 Maʉ̃ carea Ãcõrẽba Adaʉ̃ra bio cãĩbisia. Adaʉ̃ cãĩ ɓʉɗe Ãcõrẽba idji orro ɓʉwʉrʉda aɓa edasia. Edapeɗa waya dji djarara cara ɓʉsia.
22 Maʉ̃be Ãcõrẽba Adaʉ̃ orro ɓʉwʉrʉ edaɗara wẽrãda osia. Opeɗa Adaʉ̃maa enesia.
23 Maʉ̃ne Adaʉ̃ba jarasia:
¡Iɗibʉrʉ naʉ̃ra mʉ̃ orroa! Idjidrʉ wãrãda mʉ̃ djaraɗeba oɗaa.*
Mʉ̃a trʉ̃ ɓʉya “wẽrã”, Ãcõrẽba idjira umaquĩrãneba oɗa bẽrã.*
24 Maʉ̃ carea umaquĩrãba dji zezara, dji papa siɗa amepeɗa idji quima ume ãbaa ɓeya. Mãwã cacua aɓa ɓʉ quĩrãca panania.
25 Maʉ̃ne Adaʉ̃ra, dji wẽrã siɗa ãcaɗa panasiɗaa baribʉrʉ peraɗaca basía.
Beɗea eɗaare
^ 2:5-6. Egoroɗeba ʉ̃taa towaada odjabadjia. Ʉ̃cʉrʉmaarã maʉ̃ beɗeaba jara ɓʉa: “Baidoda egoroɗeba ʉ̃ta zebadjia.”
^ 2:8. Ʉ̃mãdau odjabariare. Maʉ̃ba jara ɓʉa maʉ̃ ẽjũãra Israel druaɗeba ʉ̃mãdau odjabariare ɓʉda wa Jordaʉ̃ doɗeba ʉ̃mãdau odjabariare ɓʉda.
^ 2:14. Tigri. Hebreo beɗeaɗe “Hidekel” ɓʉ́ ɓʉa.
^ 2:23. Idjidrʉ wãrãda mʉ̃ djaraɗeba oɗaa. Hebreo beɗeaɗe nãwã ɓʉ́ ɓʉa: “Naʉ̃ra ɓʉwʉrʉ mʉ̃ ɓʉwʉrʉɗebemaa idjaɓa djara mʉ̃ djaraɗebemaa.”
^ 2:23. Wẽrã. Hebreo beɗeaɗe beɗea “wẽrã” idjaɓa beɗea “umaquĩrã” aɓari quĩrãca jĩguabaria.
