Genesi 20:1-17
20 Mãwãnacarea Abrahaʉ̃ra idji ɓaɗamaʉba Negue ẽjũãnaa wãpeɗa Guerar puruɗe ɓesia. Maʉ̃ purura Cadé puru idjaɓa Sur ẽjũã ẽsi ɓʉa.
2 Mama ɓasiɗe Abrahaʉ̃ba jarabadjia idji quima Sarara idji djabawẽrãda. Maʉ̃ bẽrã Guerarɗebema boro Abimele abadaba Sarara idji deɗaa edebisia edai carea.
3 Mãwãmĩna diamasi Ãcõrẽba Abimelea cãĩmocaraɗe nãwã jarasia: “Bʉra beuya bʉa edebiɗa wẽrãra quima bara ɓʉ bẽrã.”
4 20:4-5 Baribʉrʉ Abimelera waɗi Sara ume cãĩẽ́ ɓasia. Maʉ̃ bẽrã idjia Ãcõrẽa jarasia:
–Mʉ̃ Boro, Abrahaʉ̃ba mʉ̃́a jarasia jãʉ̃gʉ wẽrãra idji djabawẽrãda. Dji wẽrã biɗa jarasia Abrahaʉ̃ra idji djabada. Maʉ̃ bẽrã mʉ̃a crĩcha biaɗeba edai carea enebisia. Mʉ̃ra beɗeaɗe ɓʉẽ́a. ¿Bʉa nẽbʉra neẽ́ ɓʉda cawa oica?–
5 –
6 Maʉ̃ne Ãcõrẽba cãĩmocaraɗe panusia:
–Mʉ̃a bio cawa ɓʉa bʉa crĩcha biaɗeba mãwã osida. Maʉ̃ bẽrã mʉ̃a bʉra mʉ̃ quĩrãpita idu cadjirua obiẽ́ basía. Mʉ̃a bʉra maʉ̃ wẽrã ume idu cãĩbiẽ́ basía.
7 Jãʉ̃be idjira Abrahaʉ̃a jẽda diadua. Abrahaʉ̃ra mʉ̃neba beɗeabaria. Idjia mʉ̃́a iwiɗida ɓʉa bʉ beurãmãrẽã. Baribʉrʉ bʉa jẽda diaẽ́bʉrʉ, bʉra bʉ ẽberãrã siɗa aɓeɗa jũma quininia.–
8 Nurẽma diapeɗa Abimelera piraɓaripeɗa idjiare dji droma ɓeara jũma trʉ̃sia. Maʉ̃be Ãcõrẽba jaraɗara ãdjirãa jũma jarasia. Maʉ̃ beɗea ũrĩbʉdaɗe ãdjirãra bio dauperasiɗaa.
9 Mãwãnacarea Abimeleba Abrahaʉ̃ra trʉ̃peɗa jarasia:
–¡Bʉa mʉ̃ra, mʉ̃ druaɗebemarã siɗa Ãcõrẽ quĩrãpita beɗeaɗe ɓʉsia! Mʉ̃a bʉra biẽ́ oẽ́ basía. Baribʉrʉ bʉa mʉ̃ ume osia mĩã oiẽ́ ɓʉda.
10 Bʉa ¿cãrẽ crĩchaɗeba jãwã osi?–
11 Maʉ̃ne Abrahaʉ̃ba panusia:
–Mʉ̃a crĩchasia namabemarãba Ãcõrẽra wayaɗacada. Maʉ̃ bẽrã crĩchasia mʉ̃ra beaɗida mʉ̃ quima edaɗi carea.
12 Idjira wãrãda mʉ̃ djabawẽrãa mʉ̃ zeza cau bẽrã, baribʉrʉ mʉ̃ papa cauẽ́a. Maʉ̃ bẽrã mʉ̃a edasia.
13 Ãcõrẽba mʉ̃ra mʉ̃ zeza diguiɗabemada ãyã wãbisiɗe mʉ̃a mʉ̃ quimaa nãwã jarasia: “Bʉa wãrãda mʉ̃da quĩrĩã ɓʉbʉrʉ, dadji wãbʉdama ẽberãrãa jaradua mʉ̃ra bʉ djabada.”–
14 Maʉ̃be Abimeleba Abrahaʉ̃ quima Sarara jẽda diasia. Idjaɓa ovejada, pacada, nezoca umaquĩrãda, nezoca wẽrã siɗa zocãrã diacuasia.
15 Diacuapeɗa jarasia:
–Acʉdua, mʉ̃ druara ɓʉa. Bʉdjia ẽjũã awuabʉrʉmaa ɓaɗe wãdua.–
16 Maʉ̃ne Abimeleba Saraa jarasia:
–Mʉ̃a bʉ djabamanaa parata torroda mil diasia bʉ ume ɓeaba cawaɗamãrẽã bʉra daunemaẽ́ basida. Bʉra beɗeaɗe ɓʉẽ́a.–
17 20:17-18 Abimeleba Abrahaʉ̃ quima Sara edai basiɗe Ãcõrẽba wẽrãrã Abimele deɗe panabadada idu ɓiogoabigaẽ́ basía. Maʉ̃ carea Abrahaʉ̃ba Ãcõrẽa iwiɗisia. Maʉ̃be Ãcõrẽba Abimele cacua biẽ́ ɓaɗada biabisia. Maʉ̃ awara dji quimada, nezocawẽrãrã siɗa biabisia warra ununamãrẽã.
