Genesi 21:1-34
21 Mãwãnacarea Ãcõrẽba Sarara carebasia idjia wãrãneba jaraɗa quĩrãca.
2 Abrahaʉ̃ra bio drõãda ɓʉmĩna Sarara ɓiogoa ɓepeɗa Ãcõrẽba jaraɗa ewariɗe warrada tosia.*
3 Saraba warra toɗara Abrahaʉ̃ba trʉ̃ ɓʉsia Isa.*
4 Idji warra Isa ocho ewari ɓʉɗe Abrahaʉ̃ba Isa cacuara wẽãgosia Ãcõrẽba jara ɓʉɗa quĩrãca.
5 Abrahaʉ̃ra cien poa ɓasia idji warra Isa tosiɗaɗe.
6 Maʉ̃ne Saraba crĩchasia: “Ãcõrẽba mʉ̃ra ipiɗabi ɓʉa. Bariduaba mʉ̃ warra toɗaɗebemada ũrĩnibʉrʉ mʉ̃ carea ɓʉsriɗaba ipiɗaɗia.”
7 Idjaɓa jarasia: “Ni aɓaʉba crĩchaɗaca basía mʉ̃ra warra toida. Abrahaʉ̃ra drõãda ɓʉmĩna mʉ̃a idjía warrada to diasia.”
Abrahaʉ̃ba Ismael, Agara siɗa wãbiɗa
8 Ãdji warra Isara warisia. Ju amasiɗe Abrahaʉ̃ba ɓʉsriɗa ewari waiɓʉada osia.
9 Mama ɓasia Ismael, Egiptoɗebema nezocawẽrã Agara warrada. Mãwã ɓʉɗe Saraba unusia Ismaelba idji warra Isara biẽ́ ipiɗa jara ɓʉda.*
10 Maʉ̃ carea Saraba Abrahaʉ̃a jarasia:
–Jãʉ̃ nezocawẽrãra, idji warra siɗa jʉretadua. Bʉ beuɗacarea bʉa eroɓʉɗebemara jãʉ̃ Ismaelba mʉ̃ warra ume edaiẽ́ ɓʉa.–
11 Maʉ̃ beɗea ũrĩbʉrʉɗe Abrahaʉ̃ra bio sopua ɓesia Ismael siɗa idji warra bẽrã.
12 Maʉ̃ carea Ãcõrẽba Abrahaʉ̃a jarasia:
–Bʉ warra Ismael carea, bʉ nezocawẽrã carea biɗa sopuarãdua. Saraba jara ɓʉra jũma odua, mʉ̃a warrarã diai jaraɗara Isaɗebabʉrʉ zeɗi bẽrã.
13 Baribʉrʉ bʉ nezocawẽrã warraɗeba mʉ̃a puru dromada yõbiya, idjira bʉ warra bẽrã.–
14 Nurẽma diapeɗeɗa Abrahaʉ̃ra piraɓarisia. Maʉ̃be baidoda animarã e oɗaɗe tʉpeɗa maʉ̃ baidora paʉ̃ siɗa Agaraa diasia. Agara equiaɗe ɓʉpeɗa dji warra Ismael siɗa diasia. Maʉ̃bebʉrʉ ãdjira wãbisia. Maʉ̃ wãbʉdaɗe baridua nĩbasiɗaa Beersebá ẽjũã ewaraga ɓʉɗe.
15 Mãwã nĩnane ãdji baidora jõsia. Maʉ̃ carea Agaraba idji warrara bacuru zaque edrecare ɓeesia.
16 Nãwã crĩchasia: “Mʉ̃a unu quĩrĩãẽ́ ɓʉa mʉ̃ warrara beubʉrʉda.” Maʉ̃ bẽrã tʉmʉa ariɗe chũmane wãsia. Mama chũmʉne idji warrara jĩgua jĩã nũmesia.*
17 Mãwã ɓʉɗe Ãcõrẽba dji warrara jĩã ɓʉda ũrĩsia. Maʉ̃ne bajãneba Ãcõrẽ nezocaba Agarada trʉ̃ jarasia:
–Agara, ¿sãwãsi? Wayarãdua. Ãcõrẽba bʉ warra jĩã ɓʉda ũrĩ ɓʉa.
18 Piradrʉdua. Bʉ warrara piradrʉ edapeɗa sobiabidua. Mʉ̃a idjiɗeba puru dromada yõbiya.–
19 Maʉ̃be Ãcõrẽba Agaraa unubisia egoroɗeba baidoda ʉ̃taa bogadrʉ nũmʉda. Ara maʉ̃da wãpeɗa animarã e oɗara bira tʉ edasia. Maʉ̃be Ismaelea dawasia.
20 Ãcõrẽba Ismaelera carebabadjia. Maʉ̃ba Ismaelera waripeɗa bio cha drʉ cawa ɓesia idjaɓa ẽjũã põãsa ewaraga ɓʉɗe ɓabadjia.
21 Maʉ̃ ẽjũãra Paraʉ̃ abadjiɗaa. Mãwã ɓʉɗe dji papaba Egiptoɗebema wẽrãda diasia idji quima bamãrẽã.
Abrahaʉ̃ba Abimele ume beɗea ɓʉɗa
22 Maʉ̃ ewariɗe Abimelera idji djõbadarã boro Picol ume wãsia Abrahaʉ̃ ume beɗeaɗe. Abimeleba Abrahaʉ̃a jarasia:
–Bʉa ne jũma obʉrʉza Ãcõrẽba bʉra carebabaria.
23 Maʉ̃ carea mʉ̃a quĩrĩã ɓʉa bʉa Ãcõrẽ quĩrãpita wãrãneba jaraida bʉa mʉ̃ra, mʉ̃ warrarãra, ãdjirãneba yõbʉdarã siɗa cũrũgaẽ́da. Bʉra drua ãĩbemamĩna mʉ̃a bʉra bia o ɓʉa. Maʉ̃ bẽrã wãrãneba jaradua bʉa biɗa mʉ̃ra idjaɓa mʉ̃ druaɗebemarã siɗa bia o ɓaida.–
24 Abrahaʉ̃ba panusia:
–Mʉ̃a wãrãneba jaraya bãrãra bia o ɓaida.–
25 Maʉ̃ ewariɗe Abrahaʉ̃ba baido juebada uriada coro eroɓasia. Baribʉrʉ maʉ̃gʉra Abimele nezocarãba jãrĩsiɗaa. Maʉ̃nebemada Abrahaʉ̃ba Abimelea jarasia.
26 Maʉ̃ne Abimeleba panusia:
–Mʉ̃a adua ɓʉa caiba mãwã osida. Iɗibe mʉ̃a maʉ̃nebemada ũrĩbʉrʉa, bʉa mʉ̃́a jaraẽ́ ɓaɗa bẽrã.–
27 Maʉ̃ ewariɗe ãdji umérãba beɗea ɓʉsiɗaa. Maʉ̃ne Abrahaʉ̃ba ovejada, paca siɗa zocãrã enepeɗa Abimelea diasia.
28 Maʉ̃be oveja wẽrãda siete awara ɓʉsia.
29 Maʉ̃ carea Abimeleba Abrahaʉ̃a iwiɗisia:
–¿Cãrẽ cãrẽã za panʉ oveja wẽrãra siete awara ɓʉsi?–
30 Abrahaʉ̃ba panusia:
–Naʉ̃ siete oveja mʉ̃a diabʉrʉda bʉa edaibʉrʉ, cawabiya mʉ̃abʉrʉ maʉ̃ baido juebada uriara corosida.–
31 Umérãba beɗea ɓʉpeɗaɗa bẽrã maʉ̃ baido juebada uria trʉ̃ra Beersebá ɓesia.*
32 Beersebáɗe beɗea ɓʉpeɗaɗacarea Abimelera idji djõbadarã boro Picol ume jẽda wãsiɗaa ãdji panabadamaa pilisteorã druaɗe.
33 Maʉ̃be Beersebáɗe Abrahaʉ̃ba tamarisco bacuruda u ɓʉsia. Mama Ãcõrẽ beucaa ewari iwiɗisia.
34 Abrahaʉ̃ra pilisteorã druaɗe dãrã ɓesia.
Beɗea eɗaare
^ 21:1-2. Genesi 17:15-21.
^ 21:3. Hebreo beɗeaɗe Isa trʉ̃ba jara ɓʉa “ipiɗabʉrʉa.” Genesi 21:6; 18:10-15.
^ 21:9. Ismaelba idji warra Isara biẽ́ ipiɗa jara ɓʉda. Griego beɗeaɗe mãwã ɓʉ́ ɓʉa. Hebreo beɗeaɗe jara ɓʉa “Ismaelera jemene ɓʉda” baribʉrʉ ebuɗa ɓʉẽ́a.
^ 21:16. Idji warrara jĩgua jĩã nũmesia. Griego beɗeaɗe mãwã ɓʉ́ ɓʉa. Hebreo beɗeaɗe jara ɓʉa Agaradrʉ jĩãsida.
^ 21:31. Hebreo beɗeaɗe Beersebá trʉ̃ba jara ɓʉa “wãrã beɗea ɓʉpeɗaɗa” idjaɓa “siete panʉnebema.”
