Genesi 23:1-20
23 Abrahaʉ̃ quima Sarara 127 poa ɓasia.
2 Maʉ̃ne Arbá puruɗe Canaaʉ̃ druaɗe jaiɗasia. Arbá purura idjaɓa Hebroʉ̃ abadaa. Abrahaʉ̃ra Sara carea jĩã ɓʉba sopua ewarira wagasia.
3 Mãwã ɓʉɗe Abrahaʉ̃ra idji quima jaiɗaɗamaʉba hititarãmaa beɗeaɗe wãsia. Ãdjirãa nãwã jarasia:
4 –Mʉ̃ra drua ãĩbema bẽrã bãrã tãẽna ẽjũã neẽ́ ɓʉa. Mʉ̃a quĩrĩã ɓʉa bãrãba mʉ̃́a ẽjũãda nẽdobueɗida mʉ̃ quima tʉɓari carea.–
5 Maʉ̃ne hititarãba Abrahaʉ̃a panusiɗaa:
6 –Dai boro, ũrĩdua dai beɗeara. Ãcõrẽba bʉra dairã tãẽna dji dromada ɓʉsia. Maʉ̃ bẽrã bʉ quimara tʉɓaridua daiba coro eropanʉ uria dji biara ɓʉɗe. Dairãba wãgaɗaẽ́a.–
7 Maʉ̃ne Abrahaʉ̃ra ʉ̃ta nũmepeɗa quĩrã eɗaa ɓarrusia hititarã quĩrãpita bia quiruaɗa ai carea.
8 Maʉ̃be jarasia:
–Bãrãmaa mʉ̃ quimara nama tʉɓarida wãrãda bia ɓʉbʉrʉ, mʉ̃ djuburia Zohar warra Eproʉ̃ ume beɗeaɗadua.
9 Iwiɗiɗadua bẽwãrã joubada uria Macpela abadara mʉ̃́a nẽdobuemãrẽã. Maʉ̃ uriara idji ẽjũã icawa ɓʉa. Maʉ̃ uria carea mʉ̃a diaya idjia iwiɗibʉrʉ quĩrãca. Mãwãra naʉ̃ druaɗe ẽjũãda eroɓaya mʉ̃ ẽberãrã tʉɓari carea.–
10 Maʉ̃ Eproʉ̃ra hitita basía. Idjira arima chũmasia. Maʉ̃ne idji ẽberãrã quĩrãpita, puruɗe eɗa wãbʉdarã quĩrãpita biɗa idjia Abrahaʉ̃a nãwã jĩgua jarasia:
12 Maʉ̃ne Abrahaʉ̃ra hititarã quĩrãpita waya quĩrã eɗaa ɓarrusia.
13 Ɓarrupeɗa jũmarã quĩrãpita Eproʉ̃a nãwã jĩgua jarasia:
–Mʉ̃ quĩrã djuburia waya ũrĩdua. Dji ẽjũãbari bʉa parata iwiɗibʉrʉ quĩrãca mʉ̃a diaya. Mʉ̃a jara ɓʉra ĩjãdua. Mãwãbʉrʉ mʉ̃ quimara maʉ̃ ẽjũãne tʉɓariya.–
14 Eproʉ̃ba panusia:
16 Eproʉ̃ba jaraɗara Abrahaʉ̃ba bia ũrĩsia. Ara maʉ̃da hititarã quĩrãpita cuatrociento parata torroda juachapeɗa Eproʉ̃a jũma daucha diasia.
17 23:17-18 Maʉ̃ juachaɗara hititarãba, puruɗe eɗa wãbʉdarã biɗa unusiɗaa. Mãwã cawasiɗaa Abrahaʉ̃ba Eproʉ̃ ẽjũã Macpela abadara nẽdosida. Maʉ̃ ẽjũãra Mamreɗeba ʉ̃mãdau odjabariare ɓʉa. Abrahaʉ̃ba nẽdosia dji ẽjũãra, dji joubada uriara, bacuru dji ẽjũãne ɓea siɗa.
19 Mãwãnacarea Abrahaʉ̃ba idji quima Sarara idjia nẽdoɗa uriaɗe tʉɓarisia. Maʉ̃ uriara ẽjũã Macpela abadaɗe ɓʉa. Maʉ̃ ẽjũãra Mamreɗeba ʉ̃mãdau odjabariare ɓʉa. Mamrera idjaɓa Hebroʉ̃ abadaa. Hebroʉ̃ra Canaaʉ̃ druaɗe ɓʉa.
20 Mãwã Macpela ẽjũã, dji uria siɗa hititarãne baɗada Abrahaʉ̃ba jũma edasia.
