Genesi 24:1-67
24 Abrahaʉ̃ra bio drõãda ɓasia idjaɓa Ãcõrẽba idjira ne jũmane careba ɓasia.
2 Ewari aɓa Abrahaʉ̃ba idji nezoca dji dromada trʉ̃sia. Abrahaʉ̃ba ne eroɓʉra maʉ̃ nezocaba jũma wagabadjia. Abrahaʉ̃ba idjía jarasia:
–Bʉ jʉwara mʉ̃ ɓacara edre ɓʉdua mʉ̃́a wãrãneba jarai carea.
3 Maʉ̃be bajãne idjaɓa naʉ̃ ẽjũãne ɓʉ Ãcõrẽ quĩrãpita mʉ̃́a jaradua bʉa mʉ̃ warra itea naʉ̃ Canaaʉ̃ druaɗebema wẽrãda jʉrʉẽ́da.
4 Ãtebʉrʉ wãdua mʉ̃ ɓaɗa druaɗaa mʉ̃ ẽberãrãmaa. Wãrãneba jaradua mamabema wẽrãda mʉ̃ warra Isa itea eneida.–
5 Maʉ̃ne dji nezocaba panusia:
–Baribʉrʉ dji wẽrãda mʉ̃ ume naʉ̃ druaɗaa ze quĩrĩãẽ́bʉrʉ ¿mʉ̃a bʉ warrara bʉ ɓaɗa druaɗaa edeica?–
6 Abrahaʉ̃ba panusia:
–¡Mʉ̃ warrara jãmaa ederãdua!
7 Ãcõrẽ bajãne ɓʉba mʉ̃ra nama enesia mʉ̃ zeza deɗebemada, mʉ̃ ẽberãrã druaɗebemada. Ãcõrẽba mʉ̃́a wãrãneba jarasia idjia mʉ̃ warrarãa naʉ̃gʉ druada diaida. Ara maʉ̃ Ãcõrẽba idji bajãnebema nezocada bʉ na diabueya bʉa mʉ̃ warra itea mamabema wẽrãda enemãrẽã.
8 Dji wẽrãda bʉ ume ze quĩrĩãẽ́bʉrʉ, bʉra naʉ̃ wãrãneba jaraɗaɗebemada ẽdrʉya. Baribʉrʉ mʉ̃ warrara jãmaa ederãdua.–
9 Ara maʉ̃da dji nezocaba idji jʉwara Abrahaʉ̃ ɓacara edre ɓʉsia. Maʉ̃ne wãrãneba jarasia Abrahaʉ̃ba jaraɗara idjia oida.
10 Maʉ̃be dji nezocaba Abrahaʉ̃ nebiaɗebemada quĩrãtanoa pesia dji wẽrã ẽberãrãa diai carea. Idjaɓa Abrahaʉ̃ cameyoda die edapeɗa Naco puruɗaa wãsia Mesopotamia druaɗe.*
11 Wãbʉrʉɗe Naco puru caita baido juebada uria coroɗama jũẽne wãsia. Quewara jũẽna bẽrã dji nezocaba cameyora ʉ̃nãũnamãrẽã egode chũmebigasia. Maʉ̃ne wẽrãrãra baido jueɗe zesesiɗaa ãdjia ewariza obada quĩrãca.
12 Mãwã ɓʉɗe dji nezocaba Ãcõrẽa jarasia:
–Mʉ̃ Ãcõrẽ, mʉ̃ boro Abrahaʉ̃ Ãcõrẽ, mʉ̃a bʉ́a beɗea djuburiaya nane bʉa quĩrĩãneba mʉ̃ boro Abrahaʉ̃ra quĩrã djuburiamãrẽã idjaɓa mʉ̃ siɗa carebamãrẽã.
13 Mʉ̃ra naʉ̃ baidoma ɓʉa. Naʉ̃ puruɗebema awẽrãra namaa baido jueɗe zebadaa.
14 Mʉ̃a aɓaʉ awẽrãa jaraya: “Mʉ̃ quĩrã djuburia bʉ zocora egode ɓʉpeɗa mʉ̃́a baidoda diadua.” Maʉ̃ne dji awẽrãba mʉ̃́a doduaɗa aibʉrʉ, idjaɓa bʉ cameyoa biɗa baidora diayaɗa aibʉrʉ, mʉ̃a cawaya bʉa maʉ̃ awẽrãra bʉ nezoca Isa itea eroɓʉda. Mãwãbʉrʉ mʉ̃a cawaya bʉa mʉ̃ borora quĩrĩãneba careba ɓʉda.–
15 Waɗi Ãcõrẽa iwiɗi ɓʉɗe unusia awẽrãda zebʉrʉda. Idjia zocoda equiaɗe eroɓasia. Maʉ̃ awẽrãra Rebeca abadjiɗaa. Idjira Betuel cau basía. Betuelera Abrahaʉ̃ djaba Naco warra basía. Betuel papara Milca basía.
16 Rebecara bio quĩrãwãrẽã ɓasia idjaɓa waɗi umaquĩrã adua ɓasia. Idjira baido juebada uriama jũẽsia. Maʉ̃be idji zocoɗe baidora tʉpeɗa diguiɗaa wãbʉrʉ basía.
17 Maʉ̃ne Abrahaʉ̃ nezocara Rebecamaa pira wãpeɗa jarasia:
–Mʉ̃ quĩrã djuburia, bʉ zocoɗebema baidoda mʉ̃́a maãrĩ diadua.–
18 Maʉ̃ne Rebecaba jarasia:
–Dodua, mʉ̃ boro.–
Ara maʉ̃da idji zocora eɗa edapeɗa idji jʉwaɗe eroɓʉɗe Abrahaʉ̃ nezocaa dobisia.
19 Dobiɗacarea jarasia:
–Bʉ cameyo itea biɗa mʉ̃a baidoda jueya ãdjia do quĩrĩãbʉda quĩrãca doɗamãrẽã.–
20 Ara maʉ̃da baido idji zocoɗe ɓʉra animarãba dobadaɗe weasia. Weapeɗa ɓarima zocãrã baidora juesia jũmarã cameyoba doɗamãrẽã.
21 Mãwã jue ɓʉɗe Abrahaʉ̃ nezocaba chupea acʉ ɓesia Ãcõrẽba maʉ̃ awẽrãra Isa itea wãrãda eroɓʉ cawaya.
22 Cameyo baido dopeɗaɗacarea dji nezocaba Rebecaa pĩrũ oro oɗa bio nẽbʉa ɓʉda quẽbʉɗe jʉ̃mãrẽã diasia. Idjaɓa mania oro oɗa nẽbʉa ɓeada bio zʉgʉa ɓeada umé diasia.
23 Maʉ̃ne iwiɗisia:
–¿Bʉra cai cau? Mʉ̃ djuburia jaradua, ¿bʉ zeza dera bari ɓʉca dai cãĩni carea?–
24 Rebecaba panusia:
–Mʉ̃ra Betuel caua. Betuelera Naco warraa. Idji papara Milcaa.
25 Dai dera bari ɓʉa bãrã cãĩnamãrẽã, idjaɓa bʉ cameyoba coɗamãrẽã baraa.–
26 Maʉ̃ carea dji nezocara chĩrãboroɗe coɓepeɗa Ãcõrẽa bia beɗeasia.
27 Nãwã jarasia:
–Bia quirua Ãcõrẽ, mʉ̃ boro Abrahaʉ̃ Ãcõrẽ. Bʉa mʉ̃ boro Abrahaʉ̃ra quĩrã djuburiaɗeba wãrãda careba ɓʉa. Mʉ̃ra oɗe jipa enesia idji ẽberãrãmaa.–
28 Maʉ̃ne Rebecara dji papa diguiɗaa pira wãsia. Jũẽpeɗa Abrahaʉ̃ nezocaba jaraɗara jũma nẽbʉrʉsia.
29 24:29-30 Rebecaba djabada eroɓasia Labaʉ̃ abadada. Maʉ̃ Labaʉ̃ba ũrĩsia idji djabawẽrãba nẽbʉrʉ ɓʉda. Idjaɓa unusia idji djabawẽrãba pĩrũda quẽbʉɗe jʉ̃ ɓʉda, mania siɗa jʉwaza jʉ̃ ɓʉda. Maʉ̃ carea baido juebadamaa pira wãsia Abrahaʉ̃ nezoca jʉrʉɗe. Jũẽbʉrʉɗe unusia dji nezocara idji cameyo ume baido juebadama panʉda.
31 Maʉ̃ne Labaʉ̃ba jarasia:
–Ãcõrẽba careba ɓʉ ẽberã, mʉ̃ diguiɗaa zedua. Bʉra ¿cãrẽ cãrẽã puru dajada ɓʉ? Mʉ̃ dera ɓʉa bʉ cãĩmãrẽã idjaɓa bʉ cameyo panani siɗa ɓʉa.–
32 Ara maʉ̃da dji nezocara Labaʉ̃ diguiɗaa wãsia. Jũẽnapeɗa Labaʉ̃ba cameyo ʉ̃rʉ̃ jʉ̃ ɓeaɗara jũma ẽrãcuapeɗa ne cobigasia. Maʉ̃ awara baidoda jue diasia Abrahaʉ̃ nezoca ume zepeɗaɗara jĩrũ sʉgʉɗamãrẽã.
33 Maʉ̃be Labaʉ̃ba ne coɗamãrẽã diabisia baribʉrʉ Abrahaʉ̃ nezocaba jarasia:
–Mʉ̃ra poya ne coẽ́a mʉ̃a beɗea enena jarai naẽna.–
Labaʉ̃ba jarasia:
–Mãẽteara jaradua.–
34 Ara maʉ̃da dji nezocaba jarasia:
–Mʉ̃ra Abrahaʉ̃ nezocaa.
35 Mʉ̃ borora Ãcõrẽba bio careba ɓʉ bẽrã idjira bio ne bara ɓʉa. Ãcõrẽba idjía ovejada, pacada, parata torroda, oroda, nezoca umaquĩrãda, nezoca wẽrãda, cameyoda, burro siɗa zocãrã diasia.
36 Maʉ̃ awara mʉ̃ boro quima Sara djora ɓʉba umaquĩrã warrada tosia. Mʉ̃ boroba eroɓʉra maʉ̃ warraa jũma diasia.
37 Idjaɓa mʉ̃ boroba mʉ̃́a wãrãneba jarabisia. Idjia nãwã jarasia: “Mʉ̃ra naʉ̃ Canaaʉ̃ druaɗe ɓabaria, baribʉrʉ mʉ̃ warra itea Canaaʉ̃nebema wẽrãda jʉrʉrãdua.
38 Ãtebʉrʉ mʉ̃ zeza druaɗaa wãdua. Mama wẽrã mʉ̃ ẽberãrãnebemada mʉ̃ warra itea jʉrʉɗe wãdua.”
39 Maʉ̃ne mʉ̃a jarasia: “Dji wẽrãda mʉ̃ ume ze quĩrĩãẽ́bʉrʉ ¿mʉ̃a sãwã oi?”
40 Mʉ̃ boroba jarasia: “Mʉ̃ra Ãcõrẽ ume ewariza nĩbabaria. Ara maʉ̃ Ãcõrẽba idji bajãnebema nezocada bʉ ume diabueya bʉ wãbʉrʉma carebamãrẽã. Mãwã bʉa wẽrã mʉ̃ zeza ɓasi ẽberãrãnebemada mʉ̃ warra itea poya eneya.
41 Mʉ̃ ẽberãrãma jũẽnacarea ãdjirãba wẽrãda diaɗaẽ́bʉrʉ, naʉ̃ wãrãneba jaraɗaɗebemada bʉra ẽdrʉya.”
42 Maʉ̃da iɗi mʉ̃ra baido juebadama jũẽpeɗa Ãcõrẽa nãwã iwiɗisia: Ãcõrẽ, mʉ̃ boro Abrahaʉ̃ Ãcõrẽ, carebadua mʉ̃a oɗe zeɗara bia odjamãrẽã.
43 Mʉ̃ra naʉ̃ baidoma ɓʉa. Awẽrãda baido jueɗe zebʉrʉɗe mʉ̃a idjía jaraya: “Mʉ̃ quĩrã djuburia, bʉ zocoɗebema baidoda maãrĩ diadua.”
44 Maʉ̃ awẽrãba mʉ̃́a doduaɗa aibʉrʉ, idjaɓa bʉ cameyoa biɗa baidora diayaɗa aibʉrʉ, mʉ̃a cawaya bʉa maʉ̃ wẽrãra mʉ̃ boro warra Isa itea eroɓʉda.
45 Waɗi mʉ̃ soɗe beɗea ɓʉɗe unusia Rebecaba idji zocora equiaɗe eronĩda. Idjira baido juebadamaa zepeɗa baidora juesia. Maʉ̃ne mʉ̃a idjía jarasia: “Mʉ̃ quĩrã djuburia baidoda diadua.”
46 Ara maʉ̃da zoco equiaɗe eroɓaɗara eɗaa edapeɗa mʉ̃́a jarasia: “Dodua, idjaɓa bʉ cameyoa biɗa baidora diaya.” Ara maʉ̃da mʉ̃a dosia. Idjaɓa mʉ̃ cameyoa biɗa idjia baidora dobigasia.
47 Maʉ̃be mʉ̃a iwiɗisia: “¿Bʉra cai cau?” Idjia panusia: “Mʉ̃ra Betuel caua. Betuelera Naco warraa. Idji papara Milcaa.” Maʉ̃ carea mʉ̃a pĩrũda idji quẽbʉɗe jʉ̃ ɓʉsia. Mania siɗa idji jʉwaɗe jʉ̃ ɓʉsia.
48 Maʉ̃be mʉ̃ra chĩrãboroɗe coɓepeɗa Ãcõrẽa bia beɗeasia. Mʉ̃ boro Abrahaʉ̃ Ãcõrẽa bia quiruaɗa asia. Idjia mʉ̃ra bia enesia mʉ̃ boro djaba ãĩzaqueda idji warra itea edemãrẽã.
49 Bãrãba mʉ̃ boroda wãrãda quĩrã djuburiaɗeba carebaɗibʉrʉ, mʉ̃́a jaraɗadua Rebecara mʉ̃ ume diabueɗida. Baribʉrʉ diabueɗaẽ́bʉrʉ jaraɗadua mʉ̃a cawa crĩchai carea.–
50 Maʉ̃ ũrĩnapeɗa Labaʉ̃ba Betuel biɗa panusiɗaa:
–Maʉ̃gʉra wãrãda Ãcõrẽneba ze ɓʉa. Maʉ̃ bẽrã daiba poya jaraɗaẽ́a bia ɓʉda wa biẽ́ ɓʉda.
51 Rebecara nama bʉ quĩrãpita ɓʉa. Ededua idjira bʉ boro warra quima bamãrẽã Ãcõrẽba jaraɗa quĩrãca.–
52 Maʉ̃ beɗea carea Abrahaʉ̃ nezocara chĩrãboroɗe coɓepeɗa Ãcõrẽa bia beɗeasia.
53 Maʉ̃be oro oɗada, parata oɗada, cacuaɗe jʉ̃bada siɗa Rebecaa diasia. Idjaɓa nebia nẽbʉa ɓeada Rebeca djabaa, dji papaa biɗa diasia.
54 Maʉ̃bebʉrʉ dji nezocara, idji ume zepeɗaɗa siɗa ne cosiɗaa. Ne coɗapeɗa cãĩsiɗaa. Nurẽma piraɓaripeɗa dji nezocaba jarasia:
–Mʉ̃ra idu wãbiɗadua mʉ̃ boromaa.–
55 Baribʉrʉ Rebeca djababa, dji papa biɗa panusiɗaa:
–Rebecara waɗibiɗa die ewari dai ume ɓaida ɓʉa. Mãwãnacarea bʉ ume wãida ɓʉa.–
56 Maʉ̃ne dji nezocaba jarasia:
–Ãcõrẽba mʉ̃́a dji wẽrãda unubiɗa bẽrã mʉ̃ra nama dãrãbirãnadua. Mʉ̃ra idu wãbiɗadua mʉ̃ boromaa.–
57 Baribʉrʉ Rebeca djababa, dji papa biɗa panusiɗaa:
–Mãwã baibʉrʉ, Rebecara trʉ̃nia cãrẽda jarai cawaya.–
58 Ara maʉ̃da Rebecara trʉ̃napeɗa iwiɗisiɗaa:
–¿Bʉra naʉ̃ ẽberã ume nawena wãica?–
Maʉ̃ne Rebecaba panusia:
–Mãẽ, mʉ̃ra wãya.–
59 Ara maʉ̃da Rebecara idji wagabari wẽrã ume idu wãbisiɗaa. Idjaɓa Abrahaʉ̃ nezocara, idji ume zepeɗaɗa siɗa idu wãbisiɗaa.
60 Maʉ̃ne Rebeca djabarãba idjira nãwã bia jarasiɗaa:
Djabawẽrã, daiba quĩrĩã panʉa bʉa warrarãra zocãrã unuida.
Idjaɓa quĩrĩã panʉa bʉ warrarãba ãdji dji quĩrũrãda poyaɗida.
61 Maʉ̃be Rebecara idji nezocawẽrãrã siɗa cameyo ʉ̃rʉ̃ chũmenapeɗa Abrahaʉ̃ nezoca ume wãsiɗaa. Mãwã Abrahaʉ̃ nezocaba Rebecara edesia.
62 Maʉ̃misa Abrahaʉ̃ warra Isara Beer-Lajai-Roiɗeba zeɗada Negue druaɗe ɓasia.
63 Ewari aɓa quewara babʉrʉɗe idjira drua pʉrrʉa nĩbasia.* Maʉ̃ne cameyoda zesebʉdada unusia.
64 24:64-65 Ara maʉ̃ne Rebeca cameyo ʉ̃rʉ̃ chũmʉba Isara unusia. Maʉ̃ bẽrã Rebecaba Abrahaʉ̃ nezocaa iwiɗisia:
–¿Cai awuá dadjirãmaa zebʉrʉra?–
Nezocaba panusia:
–Jãʉ̃ra mʉ̃ boro Isaa.–
Maʉ̃ beɗea ũrĩpeɗa Rebecara cameyoɗeba uɗaa ɓadosia. Mãwãpeɗa idji quĩrãdarrara quẽbʉ daucha wuaba bʉrasia, Isa quima baida beɗea ɓʉɗa bẽrã.
66 Maʉ̃ne Abrahaʉ̃ nezocaba oɗara jũma Isaa nẽbʉrʉsia.
67 Ara maʉ̃da Isaba Rebecara idji papa querasi wua demaa edesia. Mãwã Isaba Rebecara edapeɗa bio quĩrĩã ɓesia. Idjaɓa idji papa jaiɗaɗa carea sopuara jõsia.
Beɗea eɗaare
^ 24:10. Naco. Genesi 11:27-31; 22:20-24. Mesopotamia. Maʉ̃ druara hebreo beɗeaɗe Aram Najaraím abadaa. Genesi 25:20.
^ 24:63. Drua pʉrrʉa nĩbasia. Hebreo beɗeaɗe maʉ̃ra ebuɗa ɓʉẽ́a. Naʉ̃gʉrã crĩchada diaisicada: “Crĩcha jʉrʉɗe wãsia”, “Ãcõrẽa ewari iwiɗiɗe wãsia”, “aujĩãne wãsia”, “idji achirã ume nẽbʉrʉɗe wãsia” wa “bacuru zaqueda uɗe wãsia.”
