Genesi 25:1-34
25 Abrahaʉ̃ra waya quima edasia. Dji wẽrã trʉ̃ra Queturá basía.
2 Maʉ̃ Queturába tosia Zimraʉ̃, Jocsaʉ̃, Medaʉ̃, Madiaʉ̃, Isbac, Súa siɗa.
3 Jocsaʉ̃ warrarãra naʉ̃gʉrã basía: Sebá, Dedaʉ̃ siɗa. Dedaʉ̃neba yõsiɗaa asureorã, letuseorã, leumeorã siɗa.
4 Madiaʉ̃ warrarãra naʉ̃gʉrã basía: Epá, Eper, Hanoc, Abidá, Eldá siɗa. Jũma maʉ̃gʉrãda Queturáɗeba yõsiɗaa.
5 25:5-6 Abrahaʉ̃ waɗi zocai ɓʉɗe Queturába toɗa warrarãa, Agaraba toɗa warraa biɗa Abrahaʉ̃ba nebiada diacuasia. Maʉ̃be ãdjirãra Isa ɓʉmaʉba ʉ̃mãdau odjabariare tʉmʉ wãbigasia. Maʉ̃bebʉrʉ Abrahaʉ̃ba idjia eroɓʉra jũma Isaa diasia.
6 –
Abrahaʉ̃ jaiɗaɗa
7 Abrahaʉ̃ra 175 poa ɓasia.
8 Maʉ̃ne bio drõãda quiruda waraga jaiɗasia.
9 25:9-10 Dji warrarã Isaba, Ismael biɗa idjira tʉɓarisiɗaa bẽwãrã joubada uria Macpela abadaɗe Sara tʉɓaripeɗaɗama. Maʉ̃ uriara Mamre ẽjũãneba ʉ̃mãdau odjabariare ɓʉa. Dji ẽjũãra Abrahaʉ̃ba hitita Zohar warra Eproʉ̃neda nẽdosia.*
11 Abrahaʉ̃ jaiɗaɗacarea Ãcõrẽba dji warra Isara bia ɓʉsia. Isara baido juebada uria caita ɓabadjia. Dji baido juebada uriara Beer-Lajai-Roi abadjiɗaa.*
Ismaelɗeba yõpeɗaɗarã
12 Nama ɓʉ́ ɓʉa Ismaelɗeba yõpeɗaɗaɗebemada. Maʉ̃ Ismaelera Abrahaʉ̃ba unusia Agaraɗeba. Agarara Sara nezocawẽrã Egiptoɗebema basía.
13 Ismael warrarã trʉ̃ra naʉ̃gʉrã basía: dji iwinada Nebayo basía. Idjiare Cedar basía. Maʉ̃are Adbeel basía. Maʉ̃are Mibsaʉ̃ basía.
14 Maʉ̃are Mismá basía. Maʉ̃are Dumá basía. Maʉ̃are Masá basía.
15 Maʉ̃are Hadar basía. Maʉ̃are Temá basía. Maʉ̃are Jetu basía. Maʉ̃are Napi basía. Dji jĩrũarebemara Cedemá basía.
16 Maʉ̃gʉrã docera Ismael warrarã basía. Ãdjirãneba puruda doce yõsiɗaa. Ãdjira maʉ̃ puru bororãda ɓeasia. Maʉ̃ doce purura ara ãdji trʉ̃da ɓʉcuasiɗaa. Dji ẽberãrã siɗa ara maʉ̃ trʉ̃ra eropanesiɗaa.*
17 Ismaelera 137 poa ɓasiɗe jaiɗasia.
18 Idji warrarãba birasiɗaa Sur ẽjũãneba aɓa Havila ẽjũãnaa. Sur ẽjũãra Egipto drua caita ɓʉa. Havilara Asiria druaɗaa wãbada oɗe ɓʉa. Ãdji ẽberãrãnebemada jĩga panabadjiɗaa.*
Isa warrarã topeɗaɗa
19 Nama ɓʉ́ ɓʉa Isa warrarãnebemada. Isara Abrahaʉ̃ warra basía.
20 Isa cuarenta poa ɓasiɗe idji quima Rebecara edasia. Rebecara Betuel cau basía idjaɓa Labaʉ̃ djabawẽrã basía. Ãdjirãra arameorã basía. Padan-Araʉ̃ druaɗebemarã basía.
21 Isa quima Rebecara warra toca basía. Maʉ̃ carea Isaba Ãcõrẽa iwiɗisia Rebeca ɓiogoamãrẽã. Idjia iwiɗiɗara Ãcõrẽba bia ũrĩsia. Mãwã Rebecara mĩguisoda ɓiogoa ɓesia.
22 Maʉ̃ne warrarãra idji ɓiteɗa djõ panʉ bẽrã idjia crĩchasia: “¿Sãwãẽrã mʉ̃ra jãwã mĩga ɓʉ?”* Maʉ̃ carea Ãcõrẽa iwiɗiɗe wãsia.
23 Maʉ̃ne Ãcõrẽba panusia:
Bʉ ɓiteɗa warrada umé djõ panʉ bẽrã bʉra jãwã ɓʉa. Ãdjiɗeba puruda umé odjaɗia.
Aɓaʉda dewarabema cãyãbara mẽsrãara ɓaya. Dji nabemada dji tẽãbema jʉwaeɗa ɓaya.
24 Dji toi ewari jũẽsiɗe Rebecaba umé tosia.
25 Dji nabemara bio caraiɗa ɓasia. Idjira cara purea ɓasia. Maʉ̃ carea dji trʉ̃ra ɓʉsiɗaa Esaú.*
26 Esaú tobʉrʉɗe dji tẽãbemaba idji jĩrũgarronane jida to ɓaesia. Maʉ̃ carea idjira trʉ̃ ɓʉsiɗaa Jacobo.* Rebeca warra tosiɗe Isara sesenta poa ɓasia.
Esaúba edaida ɓaɗara Jacoboa nẽdobueɗa
27 Maʉ̃ warrarãra warisiɗaa. Esaúra mẽã wã cawa ɓasia. Baribʉrʉ Jacobora diguiɗa necai ɓabadjia.
28 Esaúba animarã beapeɗa dji zezaa cobibadjia. Maʉ̃ bẽrã Isaba Esaúra bio quĩrĩã ɓasia. Maʉ̃ne Rebecaba biara Jacoboda quĩrĩã ɓasia.
29 Ewari aɓa Jacobora ne dju ɓasia. Maʉ̃ne Esaúra mẽã nĩbaɗada jarra jũẽsia.
30 Esaúba jarasia:
–Mʉ̃ djuburia, bʉa lenteja purea dju ɓʉda mʉ̃́a cobidua. Mʉ̃ra cacua ʉɓʉaẽ́ ɓʉa, ne coẽ́ ɓʉ bẽrã.–
Lenteja purea ɓʉ carea Esaúra idjaɓa trʉ̃ ɓʉsiɗaa “Edoʉ̃.”*
31 Maʉ̃ne Jacoboba jarasia:
–Bʉra dji warra iwina bẽrã dadji zezaba eroɓʉɗebemada bʉa waiɓʉara edaya. Bʉa edaida ɓʉra za ɓʉ lentejabari mʉ̃́a nẽdobuedua.–
32 Esaúba jarasia:
–Mʉ̃ra jarrababa beuboɗoa. Mʉ̃da beuibʉrʉ, dadji zezaɗe edaida ɓʉra ¿sãwã edai?–
33 Maʉ̃ne Jacoboba jarasia:
–Naãrã wãrãneba jaradua bʉa dadji zezaɗe edaida ɓʉra mʉ̃́a diaida.–
Ara maʉ̃da Esaúba wãrãneba jarasia. Mãwã dji warra iwinaba edaida ɓʉra Esaúba Jacoboa nẽdobuesia.
34 Maʉ̃bebʉrʉ Jacoboba lentejara paʉ̃ siɗa Esaúa diasia. Esaúba copeɗa baido do ɓapeɗa wãsia. Mãwã dji warra iwinaba edaida ɓaɗara Esaúba igarasia.
Beɗea eɗaare
^ 25:9-10. Genesi capítulo 23.
^ 25:11. Beer-Lajai-Roi. Hebreo beɗeaɗe maʉ̃ trʉ̃ba jara ɓʉa: “Baido bogadrʉ ɓʉ Ãcõrẽ zocai ɓʉ mʉ̃ unubariɗe.” Genesi 16:13-14.
^ 25:16. Genesi 17:20.
^ 25:18. Ãdji ẽberãrãnebemada jĩga panabadjiɗaa. Maʉ̃ beɗeaba idjaɓa jara ɓʉa “ãdji ẽberãrã quĩrãpe panesiɗaa” wa “ara ãdji ẽberãrã ume biẽ́ panesiɗaa.” Genesi 16:12.
^ 25:22. ¿Sãwãẽrã mʉ̃ra jãwã mĩga ɓʉ? Maʉ̃ra hebreo beɗeaɗe ebuɗa ɓʉẽ́a. Ʉ̃cʉrʉmaarã jara ɓʉa: “Mʉ̃ra jãwã ɓaibʉrʉ, ¿cãrẽ cãrẽã zocai ɓai?” Dewararãmaarã jara ɓʉa: “Mʉ̃a ¿cãrẽ cãrẽã naʉ̃ warrara jãwã iwiɗisi?”
^ 25:25. Esaúra trʉ̃ jarabadaa Edoʉ̃ idjaɓa Seír. Hebreo beɗeaɗe Edoʉ̃ trʉ̃ba jara ɓʉa “purea ɓʉ.” Seír trʉ̃ba jara ɓʉa “caraiɗa ɓʉ.” Edoʉ̃ba biara jara ɓʉa Esaúɗeba yõna puruda. Seírba biara jara ɓʉa Esaúɗeba yõpeɗaɗarã ẽjũãda. Genesi 36:9.
^ 25:26. Jacobo trʉ̃ba jara ɓʉa “jĩrũgarrona.” Maʉ̃ awara cũrũgabariaɗa abʉrʉ quĩrãca jĩguabaria. Genesi 27:36.
^ 25:30. Hebreo beɗeaɗe Edoʉ̃ trʉ̃ba jara ɓʉa purea ɓʉda.
