Genesi 26:1-35
26 Maʉ̃ ewariɗe Isa druaɗe jarrabada zesia Abrahaʉ̃ ewariɗe zeɗa quĩrãca.* Maʉ̃ carea Isara Guerar puruɗaa wãsia pilisteorã boro Abimelemaa.
2 Isa mama ɓʉɗe Ãcõrẽra idjimaa zepeɗa jarasia:
–Egipto druaɗaa wãrãdua, ãtebʉrʉ mʉ̃a jarabʉrʉ druaɗe ɓedua.
3 Bʉra drua ãĩbemamĩna nama ɓedua. Mʉ̃ra bʉ ume ɓaya. Mʉ̃a bʉra carebaya: mʉ̃a bʉ́a, bʉ warrarãa biɗa naʉ̃ druara diaya. Mãwã mʉ̃a bʉ zeza Abrahaʉ̃a wãrãneba jaraɗara oya.
4 Mʉ̃a bʉ warrarãra zocãrã yõbiya bajãne chĩdau zocãrã panʉ quĩrãca. Mʉ̃a jũma naʉ̃ druara bʉɗeba yõbʉdarãa diaya idjaɓa mʉ̃a bʉɗeba yõbʉrʉɗeba naʉ̃ ẽjũãne ɓea purura jũma carebaya.
5 Mʉ̃a mãwã oya Abrahaʉ̃ba mʉ̃ beɗeara jũma ĩjã oɗa bẽrã; mʉ̃a obiɗada, mʉ̃a jara ɓʉɗada, mʉ̃a jaradiaɗada, mʉ̃ ley siɗa idjia jũma ĩjã osia.–
6 Maʉ̃ bẽrã Isara Guerar puruɗe ɓesia.
7 Maʉ̃ne Guerarɗebemarãba Isaa dji quima Rebecaɗebemada iwiɗisiɗaa, idjira quĩrãwãrẽã ɓʉ bẽrã. Maʉ̃ carea Isara ne wayasia. Iduɓa crĩcha ɓesia mʉ̃ quimaana aibʉrʉ, mʉ̃ra beaɗisicada edaɗi carea. Maʉ̃ carea ãdjia iwiɗibʉdaɗe panubadjia: “Idjira mʉ̃ djabawẽrãa.”
8 Isa mama dãrã ɓʉɗe pilisteorã boro Abimeleba dajadaa acʉbadaɗeba unusia Isaba idji quima Rebecara yãga nũmʉda.
9 Maʉ̃ bẽrã Abimeleba Isara trʉ̃bipeɗa jarasia:
–Jãʉ̃ wẽrãra wãrãda bʉ quimaa. ¿Cãrẽ cãrẽã bʉa jarasi bʉ djabawẽrãda?–
Isaba panusia:
–Mʉ̃a crĩchasia bãrãba mʉ̃ra beaɗida mʉ̃ quima edaɗi carea.–
10 Abimeleba jarasia:
–¿Cãrẽ cãrẽã jãwã osi? Mʉ̃ puruɗebemarã aɓaʉda bʉ quima ume cãĩnabara, bʉabʉrʉ daia maʉ̃ cadjiruara obicasia.–
11 Maʉ̃ bẽrã Abimeleba idji ẽberãrãa jarasia:
–Bariduaba Isada mĩã sẽibʉrʉ wa dji quimada mĩã sẽibʉrʉ, maʉ̃ ẽberãra beuida ɓʉa.–
12 Maʉ̃ druaɗe Isara ne úsia. Aɓari poaɗe idjia waiɓʉa ewasia, Ãcõrẽba idjira ne jũmane careba ɓaɗa bẽrã.
13 Mãwã idjira bio bara ɓesia.
14 Ovejada, pacada, nezocarã siɗa zocãrã eroɓesia. Maʉ̃ carea pilisteorãra idji ume biẽ́ panesiɗaa.
15 Idji zeza Abrahaʉ̃ zocai ɓasiɗe Abrahaʉ̃ nezocarãba baido juebada uriada corocuasiɗaa. Baribʉrʉ pilisteorãra Isa ume biẽ́ panʉ bẽrã maʉ̃ baido juebada uriara jũma egoroba ãnãcuasiɗaa.
16 Maʉ̃be dji boro Abimeleba Isaa jarasia:
–Dai tãẽnabemada ãyã wãdua, bʉra dairã cãyãbara dji dromaara ɓebʉrʉ bẽrã.–
17 Ara maʉ̃da Isara Guerar puruɗe ɓaɗada ãyã wãsia. Guerar jeweɗaɗe jũẽpeɗa idji wua dera opeɗa mama ɓesia.
18 Abrahaʉ̃ waɗi zocai ɓasiɗe idjia baido juebada uriada mama corobicuasia.* Idji beuɗacarea pilisteorãba maʉ̃ baido juebada uriara egoroba jũma ãnãcuasiɗaa. Baribʉrʉ Isa mama ɓaɗe zesiɗe waya corobicuapeɗa aɓari trʉ̃da ɓʉcuasia dji zezaba naẽna ɓʉɗada.
19 Ewari aɓa Isa nezocarãba dji jeweɗaɗe coro panasiɗaa. Coro panʉne baido ʉ̃taa bogadrʉ ɓʉda unusiɗaa.
20 Baribʉrʉ maʉ̃ baido carea Guerarɗebema oveja wagabadada Isa oveja wagabada ume ijarasiɗaa. Guerarɗebemarãba jarasiɗaa:
–Naʉ̃ baidora dairãnea.–
Maʉ̃ carea ijarapeɗaɗa bẽrã Isaba baido juebada uriara trʉ̃ ɓʉsia Esec.*
21 Mãwãnacarea Isa nezocarãba dewara baido juebada uriada corosiɗaa. Baribʉrʉ maʉ̃ carea biɗa ijarasiɗaa. Maʉ̃ baido juebada uriara trʉ̃ ɓʉsia Sitna.*
22 Maʉ̃be Isara mamabemada ãyã ɓaɗe wãsia. Mama dewara baido juebada uriada corosia. Maʉ̃ baido carea ijaraɗaẽ́ basía. Maʉ̃ne Isaba jarasia:
–Ʉ̃rãbʉrʉ Ãcõrẽba dadjirãra bia ɓʉsia naʉ̃gʉ ẽjũãne ne bara paneni carea.–
Mãwã dji baido juebada uriara trʉ̃ ɓʉsia Rehobo.*
23 Mamaʉba Beersebáɗaa wãsia.
24 Maʉ̃ diamasi Ãcõrẽra Isama odjapeɗa nãwã jarasia:
Mʉ̃ra bʉ zeza Abrahaʉ̃ba ĩjã ɓaɗa Ãcõrẽa. Ne wayarãdua. Mʉ̃ra bʉ ume ɓʉa.
Mʉ̃a bʉra nãwã careba ɓaya: bʉ warrarãra mʉ̃a zocãrã yõbiya mʉ̃ nezoca Abrahaʉ̃ra carebayaɗa aɗa bẽrã.
25 Ãcõrẽda mama odjaɗa bẽrã Isaba mõgarada ʉ̃tʉ pã buepeɗa idjía ewari iwiɗisia. Maʉ̃be idji wua dera osia mama dãrã ɓai carea. Idjaɓa idji nezocarãba mama baido juebada uriada corosiɗaa.
Isaba Abimele ume beɗea ɓʉɗa
26 Ewari aɓa Guerar puruɗebema boro Abimelera Isamaa zesia. Abimelera zesia idji crĩcha diabari Ahuzat ume, idji djõbadarã boro Picol ume biɗa.
27 Maʉ̃ne Isaba Abimelea jarasia:
–Bãrãba mʉ̃ra unu ama panana bẽrã, bãrã tãẽnabemada ãyã jʉretasiɗaa. Maʉ̃da ¿cãrẽ cãrẽã mʉ̃maa ze panʉ?–
28 26:28-29 Maʉ̃ne ãdjia panusiɗaa:
–Daiba unu panʉa Ãcõrẽra bʉ ume ɓʉda. Maʉ̃ carea daiba crĩcha panʉa bʉ ume necai panani carea beɗeada ɓʉɗida. Daiba bʉra necai wãbisiɗaa idjaɓa bʉ ume aɓabe biada osiɗaa. Maʉ̃ bẽrã wãrãneba nãwã beɗea ɓʉɗia: daiba bʉ mĩã sẽnaẽ́ panʉ quĩrãca bʉa biɗa daira mĩã sẽẽ́da. Wãrãda Ãcõrẽba bʉra bio careba ɓʉa.–
30 Maʉ̃ carea Isaba ɓʉsriɗa ne cobada waiɓʉada opeɗa ãdjirãra ne codruasiɗaa.
31 Nurẽma piraɓariɗapeɗa wãrãneba beɗea ɓʉsiɗaa necai panani carea. Maʉ̃be Isaba ãdjía bia wãnaduaɗa asia. Ãdjirã biɗa bia ɓeduaɗa aɗapeɗa wãsiɗaa.
32 26:32-33 Maʉ̃misa Isa nezocarãba egoro coro panʉne baidoda unusiɗaa. Ununapeɗa Isamaa jaraɗe zesiɗaa. Idjia maʉ̃gʉ ewariɗe beɗea ɓʉɗa carea maʉ̃ baido juebada uriara trʉ̃ ɓʉsia Sebá.* Maʉ̃ carea mamabema purura waɗibiɗa Beersebá abadaa.
34 Isa warra Esaú cuarenta poa ɓasiɗe Beerí cau Judida edasia. Maʉ̃ awara edasia Eloʉ̃ cau Basemá siɗa. Maʉ̃ Judira, Basemá siɗa hitita wẽrãrã basía.
35 Maʉ̃ne ãdji umena Isa ume Rebeca ume biɗa bia pananaca basía.
Beɗea eɗaare
^ 26:1. Genesi 12:10.
^ 26:18. Genesi 21:25-31.
^ 26:20. Hebreo beɗeaɗe esec trʉ̃ba jara ɓʉa: “Ijara panʉ.”
^ 26:21. Hebreo beɗeaɗe Sitna trʉ̃ba jara ɓʉa: “Dji quĩrũ panʉ.”
^ 26:22. Hebreo beɗeaɗe Rehobo trʉ̃ba jara ɓʉa: “Ẽjũã baraa.”
^ 26:32-33. Hebreo beɗeaɗe Sebá trʉ̃ba jara ɓʉa: “Beɗea ɓʉpeɗaɗa.” Genesi 21:30-31.
