Genesi 27:1-46
27 Isara drõãda ɓʉ bẽrã dauba unuca basía. Ewari aɓa idji warra nabema Esaúda trʉ̃peɗa jarasia:
–¡Warra!–
Esaúba panusia:
–¿Cãrẽ, zeza?–
2 Maʉ̃ne Isaba jarasia:
–Acʉdua, warra, mʉ̃ra drõãda ɓʉa. Mʉ̃ beui ewarira adua ɓʉa.
3 Maʉ̃ carea mʉ̃ djuburia bʉ enedrʉmada cha siɗa edapeɗa mẽã wãdua.
4 Ne beasira mʉ̃ itea djudua mʉ̃a awua cobari quĩrãca. Maʉ̃da cobisira mʉ̃a bʉra bia jara ɓʉya mʉ̃ beui naẽna.–
5 Isara idji warra Esaú ume beɗea ɓʉda Rebecaba ũrĩ ɓasia. Maʉ̃be Esaúra mẽã wãsia dji zezaa cobi carea.
6 Esaú wãnacarea Rebecaba idji warra Jacoboa jarasia:
–Warra, mʉ̃a ũrĩsia bʉ zezara bʉ djaba Esaú ume beɗea ɓʉda. Bʉ zezaba Esaúa nãwã jarasia:
7 “Mẽã ne beaɗe wãpeɗa mʉ̃ itea djudua. Maʉ̃ djicora copeɗa mʉ̃ beui naẽna bʉda Ãcõrẽ quĩrãpita bia jara ɓʉya.”
8 Jãʉ̃be, warra, mʉ̃a jarabʉrʉda odua.
9 Dadji animarã ɓeamaa wãpeɗa chiwatu zaque boreguea panʉda umé enedua. Maʉ̃be mʉ̃ra bʉ zeza itea ne djuya idjia awua cobari quĩrãca.
10 Maʉ̃da bʉa bʉ zezamaa edeya idjia comãrẽã. Mãwã idji beui naẽna bʉdrʉ bia jara ɓʉya.–
11 Maʉ̃ne Jacoboba dji papa Rebecaa jarasia:
–Mʉ̃ djaba Esaúra caraiɗa ɓʉa, maʉ̃ne mʉ̃ra cara neẽ́ ɓʉa.
12 Mʉ̃ zezaba mʉ̃da tãibʉrʉ, cawaya mʉ̃a idjira cũrũga ɓʉda. Maʉ̃da cawasira idjia mʉ̃ra bia jara ɓʉẽ́a, ãtebʉrʉ biẽ́ jara ɓʉya.–
13 Maʉ̃ne dji papaba panusia:
–Mãwã biẽ́ jara ɓʉsira mʉ̃maabʉrʉ zeya. Warra, odua mʉ̃a jara ɓʉ quĩrãca. Chiwatu zaquera isabe jʉrʉɗe wãdua.–
14 Ara maʉ̃da Jacobora wãpeɗa chiwatu zaquera enesia idji papamaa. Enepeɗa idji papaba djicoda osia Jacobo zezaba awua cobari quĩrãca.
15 Maʉ̃be dji warra nabema Esaúba jʉ̃bari dji biara ɓʉda Rebecaba enesia. Esaúba maʉ̃ jʉ̃barira ãdji deɗe eroɓasia. Maʉ̃da Rebecaba Jacoboa jʉ̃bisia.
16 Maʉ̃ awara Jacobora cara neẽ́ ɓʉ bẽrã Rebecaba chiwatu zaque eda idji jʉwaɗe, ʉ̃rʉ̃mʉsiɗe biɗa caracuasia. Mãwã osia dji zezaba Esaúdrʉ crĩchamãrẽã.
17 Maʉ̃be djico warra djuɗada paʉ̃ siɗa idji warra Jacoboa diasia dji zezamaa edemãrẽã.
18 Idji zezamaa wãpeɗa Jacoboba jarasia:
–¡Zeza!–
Isaba panusia:
–¿Cãrẽ, warra? Bʉra ¿caida mãwã ɓʉ?–
19 Maʉ̃ne Jacoboba idji zezaa jarasia:
–Mʉ̃ra bʉ warra nabema Esaúa. Mʉ̃a osia bʉa jaraɗa quĩrãca. Ʉ̃ta chũmepeɗa ne codua. Maʉ̃be mʉ̃ra bia jara ɓʉdua.–
20 Isaba dji warraa iwiɗisia:
–Mʉ̃ warra, ¿sãwã jãcua isabe ne beasi?–
Jacoboba panusia:
–Bʉ ume ɓʉ Ãcõrẽba mʉ̃́a unubisia.–
21 Maʉ̃ne Isaba jarasia:
–Warra, mʉ̃ caita zedua. Mʉ̃́a idu tãbidua bʉra wãrãda mʉ̃ warra Esaú cawaya.–
22 Ara maʉ̃da Jacobora dji zezaba tãmãrẽã caita wãsia. Maʉ̃ne Isaba jarasia:
–Bʉ beɗeara Jacobo beɗeaca ɓʉa, baribʉrʉ bʉ jʉwara Esaú jʉwaca ɓʉa.–
23 27:23-24 Isaba Jacobora cawaẽ́ basía idji jʉwara Esaú jʉwa quĩrãca caraiɗa ɓʉ bẽrã. Isaba Jacobo bia jara ɓʉbʉrʉɗe wayacusa iwiɗisia:
–¿Bʉra wãrãda mʉ̃ warra Esaúca?–
Jacoboba panusia:
–Mãẽ, zeza. Mʉ̃ra Esaúa.–
25 Maʉ̃ne dji zezaba jarasia:
–Warra, bʉa ne beaɗara diadua mʉ̃a coi carea. Maʉ̃be mʉ̃a bʉra bia jara ɓʉya.–
Ara maʉ̃da Jacoboba diasia. Diaɗacarea Isaba cosia. Mãwã ɓʉɗe Jacoboba uva ɓa siɗa diasia. Maʉ̃gʉ siɗa Isaba dosia.
26 Maʉ̃bebʉrʉ Isaba jarasia:
–Jãʉ̃be warra, mʉ̃ caita chũmepeɗa mʉ̃ uridarraɗe isõdua.–
27 Ara maʉ̃da Jacobora caita chũmepeɗa isõsia. Maʉ̃ne Jacoboba jʉ̃ ɓasia Esaúba jʉ̃barida. Isaba maʉ̃ra ʉ̃peɗa crĩchasia wãrãda Esaúda idji ume ɓʉda. Maʉ̃ bẽrã idjia Jacobodrʉ nãwã bia jara ɓʉsia.
Mʉ̃ warrara tũãpa ɓʉa Ãcõrẽba bia zaubi ɓʉ ẽjũã quĩrãca.
28 Mʉ̃a quĩrĩã ɓʉa Ãcõrẽba bʉ itea bajãneba cue zebi ɓaida bʉa ubʉrʉra bia zaumãrẽã.
Mãwã bʉ trigora aɗuba zauya. Bʉ uva siɗa bia zauya.
29 Mʉ̃a quĩrĩã ɓʉa puruda zocãrã bʉ jʉwaeɗa ɓeaɗida, druazabemada bʉ quĩrãpita wayaaɗeba chĩrãboroɗe coɓeaɗida.
Mʉ̃a quĩrĩã ɓʉa bʉra bʉ djabarã boro baida, bʉ papa warrarãda bʉ quĩrãpita chĩrãboroɗe coɓeaɗida.
Mʉ̃a quĩrĩã ɓʉa bʉ biẽ́ jarabʉdara biẽ́ ɓeaɗida idjaɓa bʉ bia jarabʉdara bia ɓeaɗida.
30 Isaba mãwã bia jara ɓʉɗacarea Jacobora idji zeza ume ɓaɗada ẽdrʉsia. Ara ẽdrʉbʉrʉɗe idji djaba Esaúra mẽã wã ɓaɗada jũẽsia.
31 Idjia biɗa djicoda warra osia. Maʉ̃da dji zezamaa edepeɗa jarasia:
–Zeza, mʉ̃ra ne beasia. Ʉ̃ta chũmepeɗa codua. Maʉ̃be mʉ̃ra bia jara ɓʉdua.–
32 Maʉ̃ne Isaba Esaúa jarasia:
–Bʉra ¿caida mãwã ɓʉ?–
Esaúba panusia:
–Mʉ̃ra bʉ warra iwina Esaúa.–
33 Isaba maʉ̃ ũrĩbʉrʉɗe dauperapeɗa ure nũmesia. Maʉ̃ne jarasia:
–Mãẽteara ¿caida bʉ na ze ɓasi? Idjia beaɗara mʉ̃́a diasia. Maʉ̃da mʉ̃a jũma cosia bʉ zei naẽna. Mʉ̃a idjira bia jara ɓʉsia. Maʉ̃ bẽrã idjidrʉ bia ɓaya.–
34 Esaúba dji zeza beɗea ũrĩsiɗe aɓeɗa bio sopuasia. Maʉ̃ne jĩã ɓʉba jĩgua jarasia:
–¡Zeza, mʉ̃ siɗa bia jara ɓʉdua!–
35 Maʉ̃ne dji zezaba panusia:
–Bʉ djababa mʉ̃ra cũrũgaɗe ze ɓasia. Mãwã mʉ̃a bʉ bia jara ɓʉi baɗara idjiabʉrʉ edasia.–
36 Maʉ̃ne Esaúba jarasia:
–¡Bãrãba jãʉ̃ cũrũgabari Jacobora ariɗe trʉ̃ ɓʉsiɗaa!* ¡Idjia mʉ̃ra ɓarima umé cũrũgabʉrʉa! Mʉ̃a warra iwinaba edaida ɓaɗara idjia edasia. Jãʉ̃be iɗi bʉa mʉ̃ bia jara ɓʉi baɗara idjia jãrĩsia.–
Maʉ̃ne Esaúba wayacusa iwiɗisia:
–¿Bʉa mʉ̃ siɗa poya bia jara ɓʉẽ́ca?–
37 Isaba panusia:
–Mʉ̃a Jacobora bʉ boroda ɓʉsia. Bʉ ẽberãrãra, bʉɗeba yõbʉda siɗa idji jʉwaeɗa ɓʉsia. Idjaɓa mʉ̃a jara ɓʉsia idji trigora uva siɗa aɗuba zaumãrẽã. Maʉ̃ba, warra, mʉ̃a bʉ́a ¿cãrẽda poya diai?–
38 Maʉ̃ne Esaúba dji zezaa ɓia iwiɗisia:
–Zeza, bʉa ¿aɓabe idjidrʉ poya bia jara ɓʉica? ¡Ay, zeza, mʉ̃ siɗa bia jara ɓʉdua!–
Mãwã jara ɓʉɗe Esaúra bio jĩã nũmasia.
39 Mãwã ɓʉɗe dji zeza Isaba jarasia:
Bʉra ẽjũã biaɗebemada, cue zebarimabemada jĩga ɓaya.
40 Bʉra dewara ẽberãrã ume djõ ɓaya, idjaɓa bʉ djaba jʉwaeɗa ɓaya.
Baribʉrʉ bʉa ĩjã o ama ɓebʉrʉɗe idji jʉwaeɗa ɓaɗada ẽdrʉya.*
Rebecaba Jacoboa mĩrũ wãduaɗa aɗa
41 Ãdji zeza Isaba Jacoboda bia jara ɓʉɗa bẽrã Esaúba Jacobora bio quĩrãma ɓesia. Maʉ̃ carea nãwã crĩchasia: “Mʉ̃ zeza beuɗacarea mʉ̃a sopua ewarida wagaya. Maʉ̃bebʉrʉ mʉ̃ djaba Jacobora beaya.”
42 Esaúba oi crĩcha ɓʉra dji papa Rebecaba cawasia. Maʉ̃ carea idji warra tẽãbema Jacobora trʉ̃peɗa jarasia:
–Ũrĩdua, bʉa oɗa carea bʉ djaba Esaúba bʉra bea quĩrĩã ɓʉa.
43 27:43-45 Idjia bʉda beaibʉrʉ, idji siɗa beaɗida panʉa. Mãwãra mʉ̃a aɓari ewariɗe bãrã umena aduaya. Maʉ̃ carea, warra, mʉ̃a jarabʉrʉda ĩjã odua. Isabe Haraʉ̃ puruɗaa mĩrũ wãdua mʉ̃ djaba Labaʉ̃maa. Jãma idji ume dãrã ɓadua aɓa bʉ djaba quĩrũbi jõbʉrʉɗaa. Bʉa oɗada idjia quĩrãdoasira mʉ̃a bʉ́a beɗeada diabueya waya zemãrẽã.–
46 Jacobo wãi naẽna Rebecaba dji quima Isaa jarasia:
–Mʉ̃ra sẽ ɓʉa Esaú quima hititarã carea. Jacobo biɗa naʉ̃ druaɗebema hitita wẽrãda edaibʉrʉ, biara ɓʉa mʉ̃ra beuida.–
