Genesi 28:1-19
28 Maʉ̃ bẽrã Isaba Jacobora trʉ̃peɗa bia jara ɓʉsia. Idjaɓa nãwã jarasia:
–Canaaʉ̃nebema wẽrãda edarãdua.
2 Padan-Araʉ̃ druaɗaa wãdua bʉ zezadrõã Betuelmaa. Mama bʉ djabadrõã Labaʉ̃ caurãnebemada aɓa edadua.
3 Ãcõrẽ ne jũma poya o ɓʉba bʉra careba ɓaya warra zocãrã unumãrẽã. Mãwã bʉɗeba puruda zocãrã yõnia.
4 Idjaɓa Ãcõrẽba Abrahaʉ̃a diai jaraɗa ẽjũãda idjia bʉ́a, bʉɗeba yõbʉdarãa biɗa diaya.* Mãwã naʉ̃ ẽjũãra bãrãne baya, bʉra nawena nama ãĩbema quĩrãca ɓʉmĩna.–
5 Mãwã Isaba Jacobora wãbisia Padan-Araʉ̃ druaɗaa. Maʉ̃be Jacobora wãsia idji djabadrõã Labaʉ̃ deɗaa. Maʉ̃ Labaʉ̃ra Betuel warra basía. Betuelera arameo basía. Labaʉ̃ra Rebeca djaba basía. Rebecara Jacobo idjaɓa Esaú papa basía.
Esaúba dewara quima edaɗa
6 Jacobo wãi naẽna idji zeza Isaba idjira bia jara ɓʉpeɗa jarasia Canaaʉ̃nebema wẽrãda edarãmãrẽã. Ãtebʉrʉ wãbisia Padan-Araʉ̃ druaɗebema wẽrãda edamãrẽã. Esaúba maʉ̃gʉra jũma unu ɓasia.
7 Maʉ̃ awara unu ɓasia Jacoboba idji zeza beɗea, idji papa beɗea siɗa ĩjã opeɗa Padan-Araʉ̃ druaɗaa wãsida.
8 Maʉ̃gʉɗeba Esaúba cawasia idji zezaba Canaaʉ̃nebema wẽrãrãra quĩrĩãcada.
9 Maʉ̃ carea Esaúra wãsia Abrahaʉ̃ warra Ismaelmaa. Ismaelera Esaú djabadrõã basía. Maʉ̃ne Esaúba Ismael cau Majalada edasia. Majalara Nebayo djabawẽrã basía. Esaúba dewara quimarã pe eroɓʉɗe maʉ̃ wẽrã siɗa edasia.
Jacoboba Betelɗe cãĩmocaraɗa
10 Maʉ̃ne Jacobora Beersebáɗeba Haraʉ̃ puruɗaa wãsia.
11 Wãbʉrʉɗe ota queusia. Mama mõgarada coɓʉsia idji borocaui carea. Maʉ̃be egode taɓepeɗa cãĩsia.
12 Cãĩ ɓʉɗe cãĩmocaraɗe unusia dume drasoga ɓʉda chũ nũmʉda. Maʉ̃ dumera duɗaʉba bajãnaa tẽũ nũmasia. Maʉ̃ne Jacoboba unusia Ãcõrẽ bajãnebema nezocarãda dumene ʉ̃taa wã duanʉda idjaɓa eɗaa ze duanʉda.
13 Idjaɓa unusia Ãcõrẽda dume boroɗe nũmʉda. Mãwã ɓʉɗe Ãcõrẽba jarasia:
–Mʉ̃ra bʉ zezadrõã Abrahaʉ̃ Ãcõrẽa, bʉ zeza Isa Ãcõrẽa. Bʉ cãĩ ɓʉ ẽjũãra mʉ̃a bʉ́a, bʉ warrarãa biɗa diaya.
14 Bʉ warrarãra zocãrã yõnia egoro pora quĩrãca. Ãdjirãra wãbʉrʉɗia ʉ̃mãdau odjabariare, ʉ̃mãdau ɓaebariare, jʉwa araare, jʉwa acʉare biɗa. Idjaɓa bʉɗeba, bʉɗeba yõbʉrʉɗeba biɗa mʉ̃a jũma naʉ̃ ẽjũãne ɓea purura carebaya.
15 Mʉ̃ra bʉ ume ɓʉa. Mʉ̃a bʉra wagaya bʉ wãbʉrʉza, idjaɓa mʉ̃a bʉra naʉ̃ ẽjũãnaa waya eneya. Bʉra igaraẽ́a, ãtebʉrʉ wãrãda mʉ̃a jara ɓʉɗada jũma bʉ itea oya.–
16 Maʉ̃ne Jacobora cãĩ ɓaɗada ʉ̃rʉ̃mapeɗa nãwã crĩchasia: “Wãrãda Ãcõrẽra nama ɓʉa, baribʉrʉ mʉ̃a adua ɓasia.”
17 Ne wayaaɗeba jarasia: “¡Nama bio minijĩchia ɓʉa! Ãcõrẽ dera nama ɓʉa, idjaɓa bajãnaa wãbada o siɗa nama ɓʉa.”
18 Nurẽma diapeɗeɗa Jacobora piraɓaripeɗa borocau eroɓaɗa mõgarara ʉ̃ta nũmʉsia sẽyãda ɓamãrẽã. Maʉ̃ mõgara ʉ̃rʉ̃ nedragada weasia Ãcõrẽra mama ɓʉ bẽrã.
19 28:19-22 Mama Jacoboba wãrãneba nãwã jarasia:
–Ãcõrẽda mʉ̃ ume wãibʉrʉ, mʉ̃ wãbʉrʉma wagaibʉrʉ, ne coi carea diaibʉrʉ, cacuaɗe jʉ̃barida diaibʉrʉ, idjaɓa mʉ̃ zezamaa waya jẽda eneibʉrʉ, mʉ̃a idjidrʉ ĩjã ɓaya. Maʉ̃ carea naʉ̃ mõgara sẽyã ɓʉɗara Ãcõrẽ de baya.–
Mãwã dji mama ɓʉ puru Luz abadara Jacoboba trʉ̃ ɓʉsia Betel.* Idjaɓa Jacoboba Ãcõrẽa jarasia:
–Bʉa mʉ̃́a die diabʉrʉza mʉ̃a bʉ́a aɓa dia ɓaya.–
