Genesi 29:1-35
29 Mãwãnacarea Jacobora nocoɗaa wãsia. Wãne ʉ̃mãdau odjabariarebema ẽberãrã druaɗe jũẽne wãsia.
2 Mama baido juebada uria coroɗada unusia. Maʉ̃ caita ovejada zocãrã panasiɗaa. Maʉ̃ ovejara ãdji djibarirã ũbea panʉ caita awara awara ʉ̃nãũ duanasiɗaa. Djibarirãba maʉ̃ baidora ãdji ovejaa jue diabadjiɗaa. Dji baido juebada uria ʉ̃rʉ̃ mõgara waiɓʉada coɓasia.
3 Ewariza oveja jũma enepeɗaɗacarea dji oveja wagabadaba maʉ̃ mõgarara ãyã ɓʉbadjiɗaa ãdji ovejaa baido jue diaɗi carea. Jue diapeɗaɗacarea wayacusa mõgarara dji uria ʉ̃rʉ̃ coɓʉbadjiɗaa.
4 Maʉ̃ne Jacoboba dji oveja wagabadaa iwiɗisia:
–Djabarã, ¿bãrãra sãmabema?–
Ãdjia panusiɗaa:
–Daira Haraʉ̃ puruɗebemaa.–
5 Jacoboba iwiɗisia:
–¿Bãrãba Naco warra Labaʉ̃ra unubadaca?–
Ãdjia panusiɗaa:
–Mãẽ, daiba unubadaa.–
6 Jacoboba waya iwiɗisia:
–¿Idjira bia ɓʉca?–
Ãdjia panusiɗaa:
–Idjira bia ɓʉa. Acʉdua, jari urua dji cau Raquelda. Idji zeza ovejada pe enebʉrʉa.–
7 Maʉ̃ne Jacoboba jarasia:
–Acʉɗadua, waɗi ãsa nũmʉ bẽrã animarãra cãĩne edeɗiẽ́ panʉa. Ovejara baido dobigaɗapeɗa waya põãjãrã cobiɗe edeɗadua.–
8 Ãdjirãba panusiɗaa:
–Waɗibiɗa poya baido dobiɗaẽ́a. Daiba jʉ̃ãbadaa jũmarãba ãdji ovejara enenamãrẽã. Maʉ̃bebʉrʉ mõgara baido juebada uria ʉ̃rʉ̃ coɓʉra ãyã ɓʉbadaa ovejara baido dobigaɗi carea.–
9 Jacobo ãdjirã ume beɗea ɓʉɗe Raquelba idji zeza ovejara pe enesia. Idjira dji oveja wagabari basía.
10 Raquel zeza Labaʉ̃ra Jacobo papa Rebeca ume dji djaba basía. Jacoboba Raquel, Labaʉ̃ oveja siɗa unusiɗe baido juebada uriamaa wãpeɗa dji mõgara uria ʉ̃rʉ̃ coɓʉra ãyã ɓʉsia. Ãyã ɓʉpeɗa idji djabadrõã Labaʉ̃ ovejara baido dobigasia.
11 Maʉ̃ne Jacobora ɓʉsriɗasia idji papa ẽberãrãma jũẽna bẽrã. Maʉ̃ carea Raquel uridarraɗe isõpeɗa jĩãsia.
12 Maʉ̃be Jacoboba jarasia:
–Mʉ̃ra bʉ zeza Labaʉ̃ tẽãbeaa. Mʉ̃ papa Rebecara bʉ apipia.–
Ara maʉ̃da Raquelera diguiɗaa pira wãsia idji zeza jaraɗe.
13 Labaʉ̃ba maʉ̃ ũrĩpeɗa pira wãsia idji djabawẽrã warra Jacobo audiaɓariɗe. Jacobo ɓʉmaa wãpeɗa ojũẽ edapeɗa uridarraɗe isõsia. Maʉ̃be diguiɗaa edesia. Diguiɗa jũẽnapeɗa Jacoboba Labaʉ̃a idji sãwãnanebemada jũma nẽbʉrʉsia.
14 Maʉ̃ne Labaʉ̃ba Jacoboa jarasia:
–Wãrãda bʉra mʉ̃ ẽberãrãa.–
Mãwãnacarea Jacobora Labaʉ̃ ume jeɗeco aɓa ɓesia.
Jacoboba Labaʉ̃ caurã edaɗa
15 Jeɗeco aɓa ɓaɗacarea Labaʉ̃ba Jacoboa jarasia:
–Bʉra mʉ̃ tẽãbeamĩna mʉ̃ itea bari trajaiẽ́ ɓʉa. Mʉ̃́a jaradua jũmasãwã diaida ɓʉda bʉ trajubari.–
16 Labaʉ̃ba cauda umé eroɓasia. Dji nabema trʉ̃da Lea basía. Raquelera dji tẽãbema basía.
17 Leara mãcua quĩrãwãrẽãẽ́ ɓasia.* Baribʉrʉ Raquelera bio quĩrãwãrẽã ɓasia.
18 Maʉ̃ne Jacoboba Raquelda bio quĩrĩã ɓasia. Maʉ̃ carea Labaʉ̃a jarasia:
–Bʉ cau tẽãbema Raquel edai carea mʉ̃ra siete poa bʉ itea bari traja ɓaya.–
19 Maʉ̃ne Labaʉ̃ba panusia:
–Biara ɓʉa mʉ̃ caura bʉ́a diaida dewara ẽberãa diai cãyãbara. Mãẽteara mʉ̃ itea bari traja ɓedua.–
20 Ara maʉ̃da Jacobora Raquel edai carea Labaʉ̃ itea siete poa bari trajasia. Jacoboba Raquelera bio quĩrĩã ɓʉ bẽrã idjimaarã maʉ̃ siete poara dãrãẽ́ basía.
21 Siete poa baɗacarea Jacoboba Labaʉ̃a jarasia:
–Dadjia ɓʉpeɗaɗa ewarira jũẽna bẽrã bʉ caura diadua mʉ̃ quima bamãrẽã.–
22 Ara maʉ̃da Labaʉ̃ba mamabemarãra jũma trʉ̃bigasia dji cau quima edabʉrʉ ɓʉsriɗada oi carea.
23 29:23-24 Baribʉrʉ diamasi maʉ̃ ɓʉsriɗa o panasiɗaɗe Labaʉ̃ba idji cau nabema Leada Jacoboa diasia. Idjaɓa idji nezocawẽrã Zilpa abadada Leaa diasia nezoca bara ɓamãrẽã. Maʉ̃ne Jacoboba Leada mãwã ɓʉda adua ɓasia, diamasi nũmʉ bẽrã. Ara maʉ̃da Jacobora Lea ume cãĩsia.
25 Nurẽma Jacoboba unusia Leadrʉ idji cʉɗaɗe ɓʉda. Maʉ̃ carea Labaʉ̃maa wãpeɗa jarasia:
–¿Cãrẽ cãrẽã bʉa mʉ̃ra jãwã osi? ¿Mʉ̃ra Raquel carea bʉ itea bari trajaẽ́ basica? ¿Cãrẽ cãrẽã mʉ̃ra cũrũgasi?–
26 Maʉ̃ne Labaʉ̃ba panusia:
–Nama dai druaɗe dji nabemadrʉ na quima diabadaa.
27 Lea edabʉrʉ ɓʉsriɗara domia aɓa odua. Mãwãnacarea mʉ̃a dewarabema siɗa diaya baribʉrʉ bʉra wayacusa siete poa idji carea mʉ̃ itea bari trajaida ɓʉa.–
28 Jacoboba bia ɓʉaɗa asia. Maʉ̃ bẽrã ɓʉsriɗara domia aɓa osia. Maʉ̃be Labaʉ̃ba idji cau Raquelera Jacoboa diasia dji quima bamãrẽã.
29 Labaʉ̃ba idji nezocawẽrã Bilha abadada idji cau Raquelea diasia nezoca bara ɓamãrẽã.
30 Ara maʉ̃da Jacobora Raquel ume cãĩsia idjaɓa idjira Lea cãyãbara quĩrĩãra eroɓesia. Maʉ̃be Jacobora waɗi siete poa bari traja ɓesia Labaʉ̃ itea.
Jacoboba warrarã ununa
31 Maʉ̃ne Ãcõrẽba unusia Jacoboba Leara quĩrĩãẽ́ ɓʉda. Maʉ̃ carea Ãcõrẽba Leaa warrarãda diasia, baribʉrʉ Raquelera warra toca basía.
32 Leara ɓiogoa ɓepeɗa umaquĩrã warrada tosia. Maʉ̃ne crĩchasia: “Mʉ̃ mĩga ɓʉra Ãcõrẽba acʉsia. Iɗibʉrʉ mʉ̃ quimaba mʉ̃ra biara quĩrĩãya.” Mãwã dji warrara trʉ̃ ɓʉsia Rubeʉ̃.*
33 Leara wayacusa ɓiogoa ɓepeɗa umaquĩrã warrada tosia. Maʉ̃ne crĩchasia: “Ãcõrẽba mʉ̃́a naʉ̃ warra siɗa diasia mʉ̃ quimaba mʉ̃ quĩrĩãẽ́ ɓʉ ũrĩna bẽrã.” Mãwã dji warrara trʉ̃ ɓʉsia Simeoʉ̃.*
34 Wayacusa ɓiogoa ɓepeɗa umaquĩrã warrada tosia. Maʉ̃ne crĩchasia: “Iɗibʉrʉ mʉ̃ quimara mʉ̃ ume ãbaa ɓaya, mʉ̃a idji warrada ũbea tobʉrʉ bẽrã.” Mãwã dji warrara trʉ̃ ɓʉsia Levi.*
35 Wayacusa ɓiogoa ɓepeɗa umaquĩrã warrada tosia. Maʉ̃ne crĩchasia: “Naʉ̃ne mʉ̃a Ãcõrẽa bia beɗeaya.” Mãwã dji warrara trʉ̃ ɓʉsia Juda.*
Maʉ̃are Leara dãrãsia warra toẽ́ ɓʉda.
Beɗea eɗaare
^ 29:17. Leara mãcua quĩrãwãrẽãẽ́ ɓasia. Hebreo beɗeaɗe ɓʉ́ ɓʉa: “Lea daura ʉɓʉaẽ́ ɓasia.” Baribʉrʉ maʉ̃ba jara ɓʉra ebuɗa ɓʉẽ́a.
^ 29:32. Hebreo beɗeaɗe Rubeʉ̃ trʉ̃ba jara ɓʉa: “Acʉdua warrada jãwã quiru.”
^ 29:33. Hebreo beɗeaɗe Simeoʉ̃ trʉ̃ba jara ɓʉa: “Ũrĩna.”
^ 29:34. Hebreo beɗeaɗe Levi trʉ̃ba jara ɓʉa: “Ãbaa ɓaida.”
^ 29:35. Hebreo beɗeaɗe Juda trʉ̃ba jara ɓʉa: “Bia beɗeaida.”
