Genesi 3:1-24
3 Jũma Ãcõrẽba ocuaɗa animarã cãyãbara damada crĩcha cawaara ɓasia djãrã cũrũgai carea. Maʉ̃ damaba wẽrãa jarasia:
–¿Ãcõrẽba wãrãda jarasica jũma naʉ̃ néuɗe ɓea nejõra bãrãba jõcara panʉda?–
2 Wẽrãba panusia:
–Mãwãẽ́a. Naʉ̃ néuɗebema nejõra daiba jõnida panʉa.
3 Baribʉrʉ bacuru néu ẽsi nũmʉnebemada Ãcõrẽba jarasia: “Jãʉ̃gʉ nejõra jõrãnadua idjaɓa jidarãnadua. Mãwã oɗibʉrʉ beuɗia.”–
4 Maʉ̃ne damaba wẽrãa jarasia:
–Bãrãra beuɗaẽ́a.
5 Ãtebʉrʉ maʉ̃ nejõ jõbʉda ewariɗe bãrãba aɓeɗa jũma cawaɗia biada, cadjirua siɗa. Mãwã Ãcõrẽ quĩrãca crĩcha cawa panania. Maʉ̃gʉra idjia cawa ɓʉa, maʉ̃ carea bãrãa jõbi ama ɓʉa.–
6 Maʉ̃ne wẽrãba unusia bacuru néu ẽsi nũmʉ nejõra biya purea jira ɓʉda idjaɓa jõi biya quiruda. Ara maʉ̃da jõ quĩrĩãsia crĩcha cawa ɓai carea. Maʉ̃be ɓa edapeɗa jõsia. Jõpeɗa dji quimaa diasia. Maʉ̃ne idjia biɗa jõsia.
7 Ara maʉ̃da ãdjia umena aɓeɗa cawasiɗaa ãdjira ãcaɗa panʉda.* Maʉ̃ carea higojõ queduada ĩguɗapeɗa jʉ̃siɗaa.
8 Quewara cũrãdrʉbʉrʉɗe Ãcõrẽra néu ẽjũãne nĩbasia. Adaʉ̃ba dji wẽrã biɗa maʉ̃ ũrĩsiɗaɗe néuɗe mĩrũsiɗaa.
9 Maʉ̃ bẽrã Ãcõrẽba Adaʉ̃ra nãwã trʉ̃sia:
–¿Bʉra sãma ɓʉ?–
10 Adaʉ̃ba panusia:
–Bʉ zebʉrʉda ũrĩsiɗe ne wayaaba mʉ̃ra mĩrũsia ãcaɗa ɓʉ bẽrã.–
11 Maʉ̃ne Ãcõrẽba iwiɗisia:
–¿Caiba jarasi bʉra ãcaɗa ɓʉda? ¿Bʉa jõsica mʉ̃a jõrãduaɗa nejõra?–
12 Adaʉ̃ba panusia:
–Bʉa mʉ̃́a wẽrã diaɗaba jõbisia.–
13 Maʉ̃ bẽrã Ãcõrẽba wẽrãa iwiɗisia:
–¿Bʉa cãrẽ cãrẽã jãwã osi?–
Wẽrãba panusia:
–Damaba mʉ̃ra cũrũgasia. Maʉ̃ bẽrã mʉ̃a jõsia.–
14 Maʉ̃ bẽrã Ãcõrẽba damara nãwã biẽ́ jara ɓʉsia:
Bʉa jãwã cũrũgaɗa bẽrã, mʉ̃a bʉra daupẽbada animarã idjaɓa mẽãbema animarã cãyãbara biẽ́ara ɓʉya.
Nãwã ɓaya: iɗiba ʉ̃taa bʉdji jãne nĩbaya idjaɓa ewariza bʉ itera egoro pora caita ɓaya aɓa beubʉrʉɗaa.*
15 Idjaɓa mʉ̃a bʉra wẽrã ume dji quĩrũda ɓʉya. Iɗiba ʉ̃taa bʉ warrara wẽrã warra ume dji quĩrũ baya.
Bʉa wẽrã warrara jĩrũgarronane caya. Baribʉrʉ idjia bʉ borora berradʉgaya.*
16 Maʉ̃ne Ãcõrẽba wẽrãa jarasia:
Bʉ ɓiogoa ɓʉɗe mʉ̃a bʉra bia mĩgabiya. Warra tobʉrʉɗe puaɗeba toya.
Mãwã bia mĩga ɓaimĩna bʉ quima ume ɓa quĩrĩã ɓaya,* baribʉrʉ idjia bʉra idji jʉwaeɗa eroɓaya.
17 1:17-18 Maʉ̃ne Ãcõrẽba umaquĩrãa jarasia:
Mʉ̃a bʉ́a jarasia jãʉ̃ nejõra jõrãmãrẽã. Mãwãmĩna bʉ wẽrã beɗeada ĩjãsia.
Maʉ̃ bẽrã mʉ̃a naʉ̃ ẽjũãra jũma biẽ́ ɓʉya. Ʉrʉda, jũĩchichi siɗa odjacuaya.
Bʉra bio bia mĩga ɓaya bʉ néuɗebemada coi carea. Idjaɓa bʉa chiruada co ɓaya.
19 Ne coi carea traja ɓʉɗe bʉ dratuɗe jʉa zowua nũmaya aɓa beubʉrʉɗaa.
Bʉra egoro poraɗebemaa. Maʉ̃ carea bʉra wayacusa egoro pora baya.
20 Adaʉ̃ba idji wẽrãra trʉ̃ ɓʉsia Eva, idjira jũma dadji zocai ɓea papa bẽrã.*
21 Maʉ̃be Ãcõrẽba animarã eɗebema wuada opeɗa ãdjía jʉ̃bisia.
22 Mãwãnacarea Ãcõrẽba jarasia:
–Naʉ̃ ẽberãba jãʉ̃ nejõra jõna bẽrã biada cadjirua siɗa jũma cawa ɓʉa. Mãwã dadji quĩrãca ɓesia. Maʉ̃ bẽrã zocai ɓai diabari nejõda idjía idu jõbiɗaẽ́a. Maʉ̃da jõsira beuca baya.–
23 Ara maʉ̃da Ãcõrẽba ẽberãra Edeʉ̃ néu ẽjũãnebemada ãyã jʉretasia ẽjũã o ɓamãrẽã. Ãcõrẽba idjira egoroɗeba osia. Maʉ̃ bẽrã idjira ɓʉsia egoroɗe ne u ɓamãrẽã.
24 Ãcõrẽba ẽberãra ãyã jʉretapeɗa Edeʉ̃ néu ẽjũã ʉ̃mãdau odjabariare bajãnebema nezocarã i bara panʉda ɓʉsia. Idjaɓa ɓʉsia djõbada neco urua ɓʉda, iduɓa pʉrrʉga tucua jira ɓʉda. Maʉ̃gʉrãba zocai ɓai diabari nejõra waga panesiɗaa ni aɓaʉba jõrãmãrẽã.
Beɗea eɗaare
^ 3:7. Cawasiɗaa. Hebreo beɗeaɗe ɓʉ́ ɓʉa: “Dau uruasiɗaa.”
^ 3:14. Bʉ itera egoro pora caita ɓaya. Hebreo beɗeaɗe ɓʉ́ ɓʉa: “Egoro porada co nĩbaya.”
^ 3:15. Romano 16:20; Apocalipsi 12:17
^ 3:16. Bʉ quima ume ɓa quĩrĩã ɓaya. Maʉ̃ra hebreo beɗeaɗe ebuɗa ɓʉẽ́a. Ʉ̃cʉrʉmaarã jara ɓʉa “bʉ quimara bʉ jʉwaeɗa eroɓa quĩrĩã ɓaya.”
^ 3:20. Hebreo beɗeaɗe Eva trʉ̃ra zocai ɓʉaɗa abʉrʉ quĩrãca jĩguabaria.
