Genesi 33:1-20
33 Jacoboba unusia Esaúra idji cuatrociento ẽberãrã ume zebʉrʉda. Maʉ̃ carea Jacoboba idji warrarãra ãdjirã papa ume awara awara ɓʉsia.
2 Dji nezocawẽrãrã umé panʉda ãdji warrarã ume nocoare ɓʉsia. Ãdjirãare Leada idji warrarã ume ɓʉsia. Jĩrũare Raquelda idji warra Jose ume ɓʉsia.
3 Maʉ̃be Jacobora ãdjirã na wãsia. Idji djaba waya ɓʉɗeba chĩrãboroɗe coɓepeɗa ɓarima siete egode ɓarru coɓe eda wãsia aɓa idji djaba caita jũẽbʉrʉɗaa.
4 Baribʉrʉ Esaúra araa pira wãsia Jacobo audiaɓariɗe. Ojũẽpeɗa uridarraɗe isõpeɗa ãdji umena ɓʉsriɗaba jĩãsiɗaa.
5 Mãwã panʉne Esaúba Jacobo wẽrãrãra, jũma idji warrarã siɗa unupeɗa iwiɗisia:
–Za panʉra ¿cai?–
Jacoboba panusia:
–Mʉ̃ boro, naʉ̃gʉrãra mʉ̃ warrarãa, Ãcõrẽba idji biaɗeba mʉ̃́a diaɗaa.–
6 Jacobo nezocawẽrãrãra ãdji warrarã ume Esaúmaa wãnapeɗa wayaaɗeba egode chĩrãboroɗe ɓarru copanesiɗaa.
7 Maʉ̃are Leada idji warrarã siɗa wãnapeɗa chĩrãboroɗe ɓarru copanesiɗaa. Jĩrũare Joseda Raquel siɗa wãnapeɗa chĩrãboroɗe ɓarru copanesiɗaa.
8 Maʉ̃be Esaúba iwiɗisia:
–Mʉ̃a animarã cãbana ota unucuaɗara bʉa ¿cãrẽ crĩchaɗeba jãwã diabuesi?–
Jacoboba panusia:
–Mʉ̃ boro, jãwã osia bʉra mʉ̃ ume bia ɓamãrẽã.–
9 Esaúba jarasia:
–Crĩcharãdua, djaba, mʉ̃a aɗuba eroɓʉa. Bʉdjiɗera wagadua.–
10 Jacoboba jarasia:
–Mãwãẽ́a. Bʉda mʉ̃ ume bia ɓʉbʉrʉ, mʉ̃a dia ɓʉra edadua. Mʉ̃maarã bʉ unubʉrʉra Ãcõrẽ quĩrãdarra unubʉrʉ quĩrãca ɓʉa, bʉa mʉ̃ra bia edaɗa bẽrã.
11 Mʉ̃ quĩrã djuburia, bʉ itea enenara edadua. Ãcõrẽba mʉ̃ra bio careba ɓʉ bẽrã ne jũmada eroɓʉa.–
Jacoboba maʉ̃ra ara pichia jara ɓesia aɓa Esaúba edabʉrʉɗaa.
12 Maʉ̃be Esaúba jarasia:
–Wãna. Mʉ̃ra bʉ na nĩbaya.–
13 Jacoboba jarasia:
–Mãwãẽ́a, mʉ̃ boro. Bʉa unu ɓʉa mʉ̃ warrarãra waɗi caibe queɗeada, idjaɓa mʉ̃ ovejaba, mʉ̃ paca biɗa warra djiwiɗi toɗada eroɓeada. Isabe wãnibʉrʉ jũmawãyã sẽnia. Maʉ̃ba aɓari ewariɗe mʉ̃ animarãra jũma quininia.
14 Maʉ̃ bẽrã, mʉ̃ boro, bʉra mʉ̃ na wãdua. Mʉ̃ra pĩãca caiɗu wãya mʉ̃ animarã, mʉ̃ warrarã nĩbabada quĩrãca. Maʉ̃be Seír druaɗe bʉ ɓabarima dji ununia.–
15 Maʉ̃ne Esaúba jarasia:
–Mʉ̃a ẽberãrã mʉ̃ ume zepeɗaɗada ameya bãrã wagaɗamãrẽã.–
Jacoboba jarasia:
–Mãwãẽ́a, mʉ̃ boro. Bʉra mʉ̃ ume bia ɓeɗa bẽrã ¿cãrẽda waa iwiɗi?–
16 Ara maʉ̃ ewariɗe Esaúra Seír druaɗaa jẽda wãsia.
17 Baribʉrʉ Jacobora Suco puruɗaa wãsia. Mama deda osia idjaɓa de zaquerãda idji animarã itea ocuasia. Maʉ̃ carea mama trʉ̃ ɓʉsia Suco.*
18 Mãwãnacarea Jacobora Siqueʉ̃ puruɗaa wãsia. Mãwã Araʉ̃ druaɗe ɓaɗada jẽda zepeɗa Canaaʉ̃ druaɗe bia jũẽsia. Siqueʉ̃ puru quĩrãpe idji wua dera osia.
19 Dji ẽjũãda Hamo warrarãne basía. Hamora Siqueʉ̃ zeza basía. Jacoboba maʉ̃ ẽjũãra nẽdosia cien parata torrobari. Nẽdopeɗa idji wua deɗe mama ɓesia.
20 Mama Jacoboba mõgarada ʉ̃tʉ pã buesia Ãcõrẽa bia beɗeai carea. Maʉ̃ mõgara ʉ̃tʉ pã bueɗara trʉ̃ ɓʉsia El-Elohe-Israel.*
