Genesi 34:1-31
34 Jacoboba Lea ume cauda aɓa eropanasiɗaa Dina abadada. Ewari aɓa Dinara maʉ̃ druaɗebema awẽrãrãmaa pʉrrʉaɗe wãsia.
2 Maʉ̃ druaɗebema borora Hamo abadjiɗaa. Idjira heveo basía. Hamoba warrada eroɓasia Siqueʉ̃ abadada. Maʉ̃ Siqueʉ̃ba Dina unubʉrʉɗe awuasia. Maʉ̃ bẽrã jidapeɗa idji ume cãĩsia. Mãwã Dinara biẽ́ osia.
3 Baribʉrʉ idji soɗe Siqueʉ̃ba Lea cau Dinara wãrãda quĩrĩã ɓʉ bẽrã ijara o ɓabadjia.
4 Maʉ̃ ewariɗe Siqueʉ̃ba idji zeza Hamoa jarasia:
–Zeza, jãʉ̃ wẽrãra mʉ̃ itea iwiɗiɗe wãdua.–
5 34:5-6 Ara maʉ̃da Siqueʉ̃ zeza Hamora Jacobo ume beɗeaɗe wãsia. Idji jũẽi naẽna Jacoboba ũrĩsia Siqueʉ̃ba Dinara biẽ́ osida. Baribʉrʉ idji warrarãba idji animarãra acʉɗe wã panʉ bẽrã Jacobora chupea ɓesia aɓa ãdji zebʉdaɗaa.
6 –
7 Jũẽsiɗaɗe ũrĩsiɗaa Siqueʉ̃ba ãdji djabawẽrãra biẽ́ osida. Maʉ̃ carea sopuasiɗaa. Bio quĩrũsiɗaa Siqueʉ̃ba mãwã israelerãda bio cadjirua oɗa bẽrã. Israelerãba maʉ̃ra aɓeɗa quĩrĩãnacaa.
8 Siqueʉ̃ zeza Hamo jũẽsiɗe ãdjía nãwã jarasia:
–Mʉ̃ warra Siqueʉ̃ba bãrã djabawẽrãda bio quĩrĩã ɓʉa. Mʉ̃ quĩrã djuburia, idjira mʉ̃ warraa diaɗadua.
9 Mãwã bãrãra dai ẽberãrã baya. Dairã caurã ume poya dji edaɗia, dairã siɗa bãrã caurã ume poya dji edaɗia.
10 Nama dairã ume pananadua. Naʉ̃ druara bãrã itea ɓʉa. Naʉ̃ ẽjũãne bãdjia awuabʉdama pananadua. Ne nẽdoɗida panʉa idjaɓa nẽdobueɗida panʉa.* Ẽjũã siɗa nẽdoɗida panʉa.–
11 Maʉ̃ne Siqueʉ̃ba Dina zezaa, idji djabarãa biɗa jarasia:
–Mʉ̃ quĩrã djuburia, jãʉ̃ wẽrãda mʉ̃́a diaɗadua. Bãrãba iwiɗibʉdada mʉ̃a diaya.
12 Bãrãba idji carea waiɓʉa iwiɗiɗibʉrʉ, mʉ̃a diaya. Baribʉrʉ mʉ̃ quĩrã djuburia jãʉ̃ wẽrãra mʉ̃́a diaɗadua.–
13 34:13-14 Siqueʉ̃ba Dinara biẽ́ oɗa bẽrã Jacobo warrarãba Siqueʉ̃ zezaa, Siqueʉ̃a biɗa sewaɗeba nãwã jarasiɗaa:
–Dai djabawẽrãra umaquĩrã cacua wẽãgoẽ́ ɓʉ́a poya diaɗaẽ́a. Mãwã diaɗibʉrʉ, daimaarã cadjiruada o panʉa.
15 Baribʉrʉ jũma bãrã umaquĩrãrãda dai quĩrãca cacua wẽãgoɗibʉrʉ, dairãba idjira diaɗia.
16 Mãwãbʉrʉ bãrãra dai caurã ume poya dji edaɗia idjaɓa dairã siɗa bãrã caurã ume poya dji edaɗia. Mãwã dairãra bãrã tãẽna panania. Dadjirãra puru aɓabe ɓeya.
17 Baribʉrʉ daiba jara panʉ quĩrãca bãrãda cacua wẽãgoɗaẽ́bʉrʉ, daiba dai djabawẽrãra namabemada ãyã edeɗia.–
18 Maʉ̃ra Hamoba, idji warra Siqueʉ̃ biɗa bia ũrĩsiɗaa.
19 Ara maʉ̃da Siqueʉ̃ra cacua wẽãgosia Jacobo caura quĩrĩã ɓʉ bẽrã.
Hamo ẽberãrã tãẽna jũmarãba Siqueʉ̃ra biara waya panasiɗaa.
20 Maʉ̃ bẽrã idjira dji zeza Hamo ume puruɗe eɗa wãbadamaa wãnapeɗa puruɗebemarãa nãwã jarasiɗaa:
22 Baribʉrʉ dadjirãra ãdjirã ume puru aɓa ɓei carea ãdjirãba jara panʉa jũma dadjirã umaquĩrã cacuara wẽãgoɗida panʉda ãdjia obada quĩrãca.
23 Mãwã oɗibʉrʉ ãdjiɗera, ãdji animarã eroɓea siɗa jũma dadjirãne baya. Dadjirãba aɓabe maʉ̃ obi panʉda ĩjã oɗida panʉa. Mãwãra ãdjirãra dadjirã ume panenia.–
24 Hamoba, Siqueʉ̃ biɗa jarapeɗaɗara jũma maʉ̃ puruɗe eɗa wãbadama panʉba ĩjãsiɗaa.* Ara maʉ̃da jũmarãda cacua wẽãgosiɗaa.
25 Ewari ũbea babʉrʉɗe ãdjirã cacuara waɗi bio pua panasiɗaa. Maʉ̃ne Dina djabarã Simeoʉ̃ba, Levi biɗa ãdji djõbada necora edaɗapeɗa Siqueʉ̃ puruɗaa wãsiɗaa. Ãdji quenane zebʉdara puruba adua ɓasia. Ara maʉ̃da Jacobo warrarã Simeoʉ̃ba, Levi biɗa jũma dji umaquĩrãrãra quenasiɗaa.
26 Hamora dji warra Siqueʉ̃ siɗa necoba beasiɗaa. Maʉ̃be Dinara Siqueʉ̃ deɗe ɓaɗada edaɗapeɗa wãsiɗaa.
27 Maʉ̃be Jacobo warrarã waabemarã siɗa ãdji djabarãba beapeɗaɗa ẽberãrãmaa zeɗapeɗa deza eɗaa wãsiɗaa. Mama ne jũma pesiɗaa. Mãwã osiɗaa Siqueʉ̃ba ãdji djabawẽrã biẽ́ oɗa carea.
28 Siqueʉ̃nebema ovejada, pacada, burro siɗa pesiɗaa. Ne jũma puruɗe ɓeara, ãdji ẽjũãne ɓea siɗa jũma pesiɗaa.
29 Ãdji nebiada jũma pesiɗaa. Ãdjia diguiɗa eroɓeaɗa siɗa jũma peɗapeɗa ãdji warrarãda, wẽrãrã siɗa jũma jida edesiɗaa.
30 Mãwãnacarea Jacoboba Simeoʉ̃a, Levia biɗa jarasia:
–Bãrãba biẽ́ opeɗaɗa bẽrã mʉ̃ra nẽbʉraɗe ɓʉsiɗaa. Naʉ̃ druaɗebema cananeorãba, perezeorã biɗa mʉ̃ra quĩrãma panesiɗaa. Ãdjirãda beɗea auɗapeɗa mʉ̃ ume djõne zeɗibʉrʉ, dadjira zocãrãẽ́be panʉ bẽrã mʉ̃ra jũma mʉ̃ ẽberãrã siɗa beaɗia.–
31 Maʉ̃ne ãdjia panusiɗaa:
–¿Mãwãra idjia dai djabawẽrãra wẽrã auɗua quĩrãca oida ɓasica?–
Beɗea eɗaare
^ 34:10. Ne nẽdoɗida panʉa idjaɓa nẽdobueɗida panʉa. Hebreo beɗeaɗe maʉ̃ba idjaɓa jara ɓʉa: “Naʉ̃ druaɗe pʉrrʉaɗida panʉa.”
^ 34:24. Jũma maʉ̃ puruɗe eɗa wãbadama panʉba. Hebreo beɗeaɗe nãwã ɓʉ́ ɓʉa: “Maʉ̃ puruɗe eɗa wãbadaɗeba dajadaa wãbadarã.” Maʉ̃ crĩchara ebuɗa ɓʉẽ́a. Ʉ̃cʉrʉmaarã nãwã jara ɓʉa: “Jũma maʉ̃ puruɗebema djõ cawa ɓeaba.”
