Genesi 35:1-29
35 Mãwãnacarea Ãcõrẽba Jacoboa jarasia:
–Piradrʉpeɗa Betelɗaa ɓaɗe wãdua, bʉ djaba Esaú wayaaɗeba mĩrũ wãsiɗe mʉ̃ bʉma odjaɗamaa.* Mama mõgarada pã buedua mʉ̃́a bia beɗeai carea.–
2 Ara maʉ̃da Jacoboba idji ẽberãrãa, waabema idji ume duanʉ́a biɗa jarasia:
–Bãrãba jʉwaba oɗa ãcõrẽda eropanʉbʉrʉ, jũma ɓatacuaɗadua. Maʉ̃be cuiɗapeɗa cacuaɗe jʉ̃bada tãtoɗada jʉ̃nadua Ãcõrẽ quĩrãpita bia ɓeaɗi carea.
3 Maʉ̃bebʉrʉ Betelɗaa wãnia. Mama mʉ̃a mõgarada pã bueya Ãcõrẽa bia beɗeai carea. Mʉ̃ nẽbʉraɗe ɓasiɗe idjia mʉ̃ra carebasia idjaɓa mʉ̃ wãbʉrʉza mʉ̃ ume ɓabaria.–
4 Ara maʉ̃da jũma ãdji jʉwaba oɗa ãcõrẽra Jacoboa diasiɗaa. Ãdji cʉwʉrʉɗe pĩrũ jʉ̃ panʉ siɗa ẽrãnapeɗa Jacoboa diasiɗaa.* Jũma maʉ̃gʉra Jacoboba Siqueʉ̃ puru caita bacuru droma nũmʉ edre jou ɓʉsia.
5 Mãwãnacarea Jacobora, ẽberãrã idji ume panʉ siɗa wãsiɗaa. Wãbʉdaɗe Ãcõrẽba jũma mama ɓea purua ãdjirãra bio wayabisia. Maʉ̃ bẽrã ãdjirãba Jacobo ẽberãrã biẽ́ oɗi carea caiɗu ẽpẽnaẽ́ basía.
6 Canaaʉ̃ druaɗe nĩne Jacobora jũma idji ẽberãrã ume Luz puruɗe jũẽsiɗaa. Luz purura idjaɓa Betel abadjiɗaa.
7 Mama Jacoboba mõgarada pã buesia Ãcõrẽa bia beɗeai carea. Maʉ̃ mõgara pã bueɗara trʉ̃ ɓʉsia El-Betel, idji djaba carea mĩrũ wãsiɗe mama Ãcõrẽra idjima odjaɗa bẽrã.*
8 Maʉ̃ Betelɗe Deboráda jaiɗasia. Deborára Jacobo papa Rebeca wagabari basía. Jacoboba Deborára tʉɓarisia Betel caita, bacuru droma nũmʉ edre. Maʉ̃ bacurura trʉ̃ ɓʉsia Alon-Bacut.*
9 35:9-10 Jacobo Padan-Araʉ̃ druaɗeba jẽda zesi ewariɗe Ãcõrẽra idjimaa waya zesia. Maʉ̃ ewariɗe Ãcõrẽba idjira nãwã bia jara ɓʉsia:
–Bʉ trʉ̃ra Jacobo abadaa baribʉrʉ bʉra waa Jacobo aɗaẽ́a.* Ãtebʉrʉ bʉ trʉ̃ra Israel aɗia.–
Mãwã Ãcõrẽba Jacobora trʉ̃ ɓʉsia Israel.
11 Ãcõrẽba mãwã trʉ̃ ɓʉpeɗa jarasia:
–Mʉ̃ra ne jũma poya ɓʉ Ãcõrẽa. Warrada zocãrã yõdua. Bʉɗeba puruda zocãrã yõnia. Idjaɓa bʉɗeba ẽberãrã bororãda yõnia.
12 Mʉ̃a naʉ̃ druara Abrahaʉ̃a, Isaa biɗa diasia. Idjaɓa mʉ̃a bʉ́a, bʉɗeba yõbʉdarãa biɗa diaya.–
13 Mãwãpeɗa Ãcõrẽra Jacobo ume beɗea ɓaɗada wãsia.
14 Mãwãnacarea Jacoboba Ãcõrẽ ume beɗea ɓaɗama mõgarada ʉ̃ta nũmʉsia. Maʉ̃ mõgara ʉ̃rʉ̃ uva ɓada, nedraga siɗa Ãcõrẽa wea diasia.
15 Maʉ̃ne Jacoboba Ãcõrẽ ume beɗea ɓaɗama trʉ̃ ɓʉsia Betel.*
Raquel jaiɗaɗa
16 Mãwãnacarea Betelɗeba wãsiɗaa. Waɗi Eprata puruɗe jũẽni naẽna Jacobo quima Raquelera warra pua nũmesia. Poya tocara nũmʉ bẽrã bia mĩga ɓasia.
17 Wetara pua nũmebʉrʉɗe dji warra careba tobibari wẽrãba Raquelea jarasia:
–Wayarãdua, bʉa umaquĩrã warrada tobʉrʉa.–
18 Baribʉrʉ Raquelera beubʉrʉ basía. Waɗi beui naẽna idji warrara trʉ̃ ɓʉsia Benoní.* Baribʉrʉ Jacoboba trʉ̃ ɓʉsia Benjamiʉ̃.*
19 Raquelera mãwã jaiɗasia. Idjira tʉɓarisia Eprata puruɗaa wãbada o icawa. Maʉ̃ Eprata purura Beleʉ̃ abadaa.
20 Jacoboba dji quima tʉɓariɗama mõgarada ʉ̃ta nũmʉsia. Iɗi ewariɗe maʉ̃ mõgarara waɗibiɗa nũmʉa.
21 Jacobo, Israel abadara mamaʉba wãpeɗa idji wua dera Migdal-edar puru zaque wagaa osia.
22 Israel maʉ̃ druaɗe ɓasiɗe idji warra iwina Rubeʉ̃ra idji zeza nezocawẽrã Bilha ume cãĩsia. Maʉ̃ra Israelba cawapeɗa bio quĩrũsia.*
Jacobo warrarã
Israel warrarãra doce panasiɗaa:
23 Leaba toɗara naʉ̃gʉrã basía: dji iwinada Rubeʉ̃, idjiare Simeoʉ̃, Levi, Juda, Isacar, Zabuloʉ̃ siɗa.
24 Raquelba toɗara naʉ̃gʉrã basía: Jose idjaɓa Benjamiʉ̃.
25 Raquel nezocawẽrã Bilhaba toɗara naʉ̃gʉrã basía: Daʉ̃ idjaɓa Neptali.
26 Lea nezocawẽrã Zilpaba toɗara naʉ̃gʉrã basía: Ga idjaɓa Aser.
Jũma maʉ̃gʉrã basía Jacobo warrarã Padan-Araʉ̃ druaɗe topeɗaɗada.
Isa jaiɗaɗa
27 Maʉ̃ ewariɗe Jacobora Mamre ẽjũãnaa idji zeza Isa acʉɗe wãsia. Mamrera idjaɓa Arbá wa Hebroʉ̃ abadaa. Mama Abrahaʉ̃ra, Isa siɗa panabadjiɗaa.
28 Isara 180 poa ɓasia.
29 Mãwã idjira bio waraga jaiɗasia. Idji warrarã Esaúba, Jacobo biɗa tʉɓarisiɗaa.
Beɗea eɗaare
^ 35:1. Genesi 28:10-22.
^ 35:4. Ãdjia crĩchabadjiɗaa maʉ̃ pĩrũba ãdjira wagabarida idjaɓa carebabarida. Maʉ̃ bẽrã ãdji cʉwʉrʉɗe jʉ̃badjiɗaa.
^ 35:7. Hebreo beɗeaɗe El-Betel trʉ̃ba jara ɓʉa “Betel Ãcõrẽ.”
^ 35:8. Alon-Bacut trʉ̃ba jara ɓʉa: “Bacuru droma nũmʉma jĩãna.”
^ 35:9-10. Genesi 32:28.
^ 35:15. Genesi 28:18.
^ 35:18. Hebreo beɗeaɗe Benoní trʉ̃ba jara ɓʉa: “Warra mʉ̃ bia mĩga ɓʉɗebema.”
^ 35:18. Benjamiʉ̃ trʉ̃ba jara ɓʉa: “Mʉ̃ jʉwa araarebema warra.” Idji trʉ̃ba naʉ̃gʉrã crĩcha siɗa dia ɓʉa: “Mʉ̃ drõã ɓʉba ununa warra”, “mʉ̃a eroɓʉ jũma edaida ɓʉ warra”, idjaɓa “boro biasi warra.”
^ 35:22. Bio quĩrũsia. Griego beɗeaɗe mãwã ɓʉ́ ɓʉa. Hebreo beɗeaɗe neẽ́a. Genesi 49:3-4.
