Genesi 37:1-36
37 Idji zeza Isa jaiɗaɗacarea Jacobora Canaaʉ̃ druaɗe idji zeza ɓaɗama ɓesia.
2 Nama nẽbʉrʉ ɓʉa Jacobo warrarãba opeɗaɗaɗebemada.
Jacobo warra Jose diecisiete poa ɓasiɗe idji djabarã ume oveja waga ɓabadjia. Idji zezaba quima quĩrãca eroɓʉ wẽrãrã Bilhaba idjaɓa Zilpaba topeɗaɗa ume Josera biara trajabadjia.* Diguiɗa wãbʉrʉɗe Joseba idji zezaa jarabadjia idji djabarãba cadjirua o panʉda.
3 Israelba Joseda waabema warrarã cãyãbara biara quĩrĩã ɓasia Josera idji drõã ɓʉɗe tosiɗa bẽrã. Maʉ̃ carea Israelba Jose itea cacuaɗe jʉ̃bada drasoa bio bia quiruda osia.
4 Jose djabarãba cawasiɗaa ãdji zezaba Josera ãdjirã cãyãbara biara quĩrĩã ɓʉda. Maʉ̃ carea idjira quĩrãma panesiɗaa. Idji ume bia beɗeaɗaca basía.
5 Ewari aɓa Josera cãĩmocarasia. Nurẽma maʉ̃ cãĩmocaraɗara idji djabarãa nẽbʉrʉsia. Maʉ̃ carea ãdjirãba idjira wetara quĩrãmasiɗaa.
6 Idjia nãwã jarasia:
–Ũrĩnadua, mʉ̃a cãĩmocaraɗada nẽbʉrʉya.
7 Mʉ̃a unusia dadjirãba dadji ẽjũãne trigoda tʉɗapeɗa ãbaa cajʉ̃ panʉda. Cawaẽ́ne mʉ̃a trigo cajʉ̃nara ʉ̃ta nũmesia. Maʉ̃ne bãrãba cajʉ̃peɗaɗara mʉ̃re quĩrãpita eɗaa ɓarru copanesiɗaa.–
8 Maʉ̃ carea Jose djabarãba quĩrũbiɗeba nãwã jarasiɗaa:
–Mãwãra ¿bʉra dai boroda ɓeica? ¿Daira bʉ jʉwaeɗa eroɓaica?–
Joseba maʉ̃ cãĩmocaraɗeba ãdjirã boro baida nẽbʉrʉɗa carea dji djabarãba idjira wetara quĩrãmasiɗaa.
9 Mãwãnacarea Josera wayacusa cãĩmocarasia. Maʉ̃ cãĩmocaraɗa siɗa idji djabarãa nẽbʉrʉsia. Nãwã jarasia:
–Ũrĩnadua, mʉ̃a waya cãĩmocarasia. Unusia ʉ̃mãdauda, jeɗecoda, idjaɓa once chĩdauda. Maʉ̃gʉrãra ẽberã quĩrãca mʉ̃ quĩrãpita chĩrãboroɗe ɓarru copanesiɗaa.–
10 Joseba idji djabarãa nẽbʉrʉɗacarea dji zezaa biɗa nẽbʉrʉsia. Maʉ̃ bẽrã idji zezaba idjira nãwã quẽãsia:
–Maʉ̃ cãĩmocaraɗeba bʉa ¿cãrẽda jara ɓʉ? Mãwãra ¿bʉ papara, bʉ djabarãra, mʉ̃ siɗa bʉ quĩrãpita chĩrãboroɗe ɓarru copanenica?–
11 Maʉ̃ carea dji djabarãra idji ume soɗe biẽ́ panesiɗaa baribʉrʉ dji zezaba maʉ̃ cãĩmocaraɗebemada bio crĩcha ɓesia.
Jose djabarãba idji nẽdobuepeɗaɗa
12 Ewari aɓa Jose djabarãba dji zeza ovejara Siqueʉ̃ puru caita põãjãrã cobiɗe edesiɗaa.
13 Maʉ̃ne Israelba Josea nãwã jarasia:
–Warra, bʉ djabarãba Siqueʉ̃ caita mʉ̃ ovejara waga panʉa. Mʉ̃a quĩrĩã ɓʉa bʉa ãdjira acʉɗe wãida.–
Joseba panusia:
–Bia ɓʉa, mʉ̃a ãdjira acʉɗe wãya.–
14 Israelba jarasia:
–Bʉ djabarã, dadji animarã siɗa sãwã panʉ cawaya acʉɗe wãdua. Maʉ̃be mʉ̃́a jaraɗe zedua.–
Mãwã jarapeɗa Israelba Josera Hebroʉ̃ jeweɗaɗeba Siqueʉ̃naa wãbisia. Wãne Josera Siqueʉ̃ne jũẽsia.
15 Joseba idji djabarã jʉrʉ nĩne ẽberãba idjira unupeɗa nãwã iwiɗisia:
–¿Cãrẽda jʉrʉ ɓʉ?–
16 Joseba panusia:
–Mʉ̃ djabarãda jʉrʉ ɓʉa. Ãdjirãba ovejada waga panʉa. ¿Bʉa cawa ɓʉca sãma panʉda?–
17 Ẽberãba panusia:
–Mãẽ, ãdjirãra nama duananapeɗa wãbʉrʉsiɗaa. Mʉ̃a ũrĩsia Dotaʉ̃ ẽjũãnaa wãniana abʉdada.–
Ara maʉ̃da Josera idji djabarã caiɗu wãsia. Wãbʉrʉɗe ãdjirãra Dotaʉ̃ ẽjũãne unune wãsia.
18 Maʉ̃ne ãdjirãba Josera tʉmʉ uruda unusiɗaa. Jose ãdji caita jũẽi naẽna ãdjirãra beɗea ausiɗaa idji beaɗi carea.
19 Nãwã jarasiɗaa:
–Acʉɗadua, cãĩmocarabarira jari bueábʉrʉa.*
20 Idjira beaɗapeɗa baido juebada uriaɗe ɓatabueɗia. Maʉ̃be dadji zezaa jaraɗia animarãba cobuesida. ¡Mãwã osiɗara acʉɗia idjia cãĩmocaraɗara wãrãda mãwãi cawaya!–
21 Maʉ̃ beɗea ũrĩbʉrʉɗe ãdji djaba Rubeʉ̃ba Josera ãdji jʉwaɗebemada ẽdrʉ ɓʉida crĩchasia. Maʉ̃ carea nãwã jarasia:
–Beaɗaẽ́a.
22 Idji oara erozoabiɗaẽ́a. Za ɓʉ baido juebada uriaɗe ɓatabueɗia, baribʉrʉ beaɗaẽ́a.–
Rubeʉ̃ba mãwã jarasia Josera ẽdrʉ ɓʉpeɗa dji zezamaa wayacusa edeida crĩchaɗa bẽrã.
23 Jose idji djabarãma jũẽsiɗe ãdjirãba idjira jidaɗapeɗa idji cacuaɗe jʉ̃ ɓʉ drasoa bio bia quiruda ẽrã edasiɗaa.
24 Maʉ̃be idjira baido juebada uriaɗe ɓatabuesiɗaa. Dji uriara põãsa baido neẽ́ ɓasia.
25 Mãwã oɗapeɗa ne co chũpanesiɗaa. Maʉ̃ne ismaelerãda Gala druaɗeba zebʉdada unusiɗaa. Maʉ̃ ismaelerãba cameyoɗe quera tũãpa ɓeada Egipto druaɗaa nẽdobueɗe edebʉda basía.
26 Maʉ̃ne Judaba idji djabarãa jarasia:
–Dadji djabada beaɗapeɗa mẽrãnibʉrʉ, maʉ̃ba ¿cãrẽ biada edaɗi?
27 Idjira dadjirã djabaa. Maʉ̃ bẽrã idji beaɗi cãyãbara biara ɓʉa jari uda ismaelerãa nẽdobueɗida.–
Juda djabarãba idji crĩchara bia ũrĩsiɗaa.
28 Mãwã panʉne maʉ̃ ismaelerã madianita abadara ãdji caita zebʉda basía. Ãdjirãra ne nẽdoɗapeɗa nẽdobuebadarã basía. Jose djabarãba idjira uriaɗe ɓʉda ʉ̃taa erreɓari edaɗapeɗa maʉ̃ ismaelerãa veinte parata torrobari nẽdobuesiɗaa. Ara maʉ̃da ismaelerãba Josera Egiptoɗaa edesiɗaa.
29 Mãwãnacarea Rubeʉ̃ra ãyã wã ɓaɗada dji uriamaa jẽda zesia. Maʉ̃ne Josera eɗa unuẽ́ bẽrã sopuaɗeba idjia cacuaɗe jʉ̃ ɓʉra cõãtasia.
30 Maʉ̃be idji djabarãmaa wãpeɗa jarasia:
–¡Warrara uriaɗe neẽ́a! Jãʉ̃be mʉ̃a ¿sãwã oi?–
31 Maʉ̃ carea ãdjirãba chiwatu zaqueda beaɗapeɗa Joseba cacuaɗe drasoa jʉ̃ ɓaɗara dji oaba jũma tãũcuasiɗaa.
32 Maʉ̃gʉra ãdji zezamaa diabuesiɗaa. Nãwã jarabisiɗaa: “Dairãba za ɓʉda unusiɗaa. ¿Naʉ̃gʉra bʉ warraba cacuaɗe jʉ̃ ɓaɗaẽ́ca?”
33 Jacoboba maʉ̃ unusiɗe nãwã jarasia:
–Za ɓʉra mʉ̃ warraba cacuaɗe jʉ̃ ɓaɗaa. Animarãba idjira beapeɗa cobuesia.–
34 Maʉ̃ bẽrã sopuaɗeba Jacoboba cacuaɗe jʉ̃ ɓʉra cõãtapeɗa sopua careabema jʉ̃badada jʉ̃sia. Maʉ̃be dji warra carea sopua ewarida dãrã wagasia.
35 Dji warrarãba, dji caurã biɗa obadjiɗaa sobiabiɗi carea, baribʉrʉ idjia iduaribica basía. Nãwã jarabadjia:
–Mʉ̃ sopuara quĩrãdoaẽ́a aɓa mʉ̃ beubʉrʉɗaa.–
Mãwã Jose carea aujĩãsia.
36 Maʉ̃misa madianitarãba Josera ẽberã Potipa abadaa Egiptoɗe nẽdobuesiɗaa. Maʉ̃ Potipara Egiptoɗebema boro wagabadarã dji droma basía.
