Genesi 38:1-30
38 Maʉ̃ ewariɗe Judara idji djabarãnebemada ãyã wãsia. Adulaʉ̃ puruɗe ẽberã Hira abadama ɓaɗe wãsia.
2 Mama Judaba cananeo Súa cauda unusia. Judaba Súa caura edapeɗa idji ume cãĩsia.
3 Dji wẽrãra ɓiogoa ɓepeɗa umaquĩrã warrada tosia. Judaba idjira trʉ̃ ɓʉsia Ere.
4 Dji wẽrãra wayacusa ɓiogoa ɓepeɗa umaquĩrã warrada tosia. Idjira trʉ̃ ɓʉsia Onaʉ̃.
5 Wayacusa ɓiogoa ɓepeɗa umaquĩrã warrada tosia. Idjira trʉ̃ ɓʉsia Sela. Sela tosiɗaɗe Judara Quezib puruɗe ɓasia.*
6 Juda warra iwina Ere cũdra baɗacarea Judaba idji itea wẽrãda jʉrʉsia. Maʉ̃ wẽrãra Tamará abadjiɗaa.
7 Juda warra iwina Erera Ãcõrẽ quĩrãpita dji cadjirua basía. Maʉ̃ carea Ãcõrẽba idjira beubisia.
8 Mãwãnacarea Judaba idji warra Onaʉ̃a jarasia:
–Bʉ djaba quima baɗara edadua dadjia obada quĩrãca.* Mãwã bʉa bʉ djaba ɓasi itea warrada oya.–
9 Baribʉrʉ Onaʉ̃ba cawa ɓasia maʉ̃ warrara idjiɗeaɗa aɗaẽ́da, ãtebʉrʉ idji djaba ɓasiɗeaɗa aɗida. Maʉ̃ carea dji wẽrã ume cãĩ ɓʉɗe wagabadjia wẽrã ɓiogoa ɓerãmãrẽã.* Mãwã idji djaba ɓasi itea warra oẽ́ basía.
10 Idjia mãwã o ɓʉda Ãcõrẽba biẽ́ unusia. Maʉ̃ bẽrã Onaʉ̃ siɗa beubisia.
11 Mãwãnacarea Judaba idji ãĩgu Tamaráa jarasia:
–Mʉ̃ warra Sela waribʉrʉmisa quima edaẽ́ bʉ zeza deɗe ɓaɗe wãdua. Sela drõã baɗacarea idjia bʉra edaya.–
Ara maʉ̃da Tamarára dji zeza deɗe ɓaɗe wãsia. (Idji zezara Timnata puruɗe ɓabadjia.) Baribʉrʉ Judaba wãrãda quĩrĩãẽ́ ɓasia Selaba Tamará edaida. Waya ɓasia Sela siɗa dji djabarã quĩrãca beuida.
12 Dãrã ɓaɗacarea Juda quimara beusia. Idji quimara Súa cau basía. Idji sopua jõnacarea Judara Timnata puruɗaa wãsia idji oveja cara tʉbadamaa. Idji dji bia Hira Adulaʉ̃ puruɗebemara idji ume wãsia.
13 Maʉ̃ne Timnataɗebemarãba Tamaráa jarasiɗaa:
–Bʉ zãwãrẽra namaa zebʉrʉa idji oveja cara tʉbi carea.–
14 Maʉ̃ ũrĩsiɗe Tamarába pẽdrarãba jʉ̃bada jʉ̃ ɓaɗara ẽrãpeɗa idji quĩrãra quẽbʉ daucha wuaba bʉrasia ni aɓaʉba cawarãnamãrẽã. Maʉ̃be Enaiʉ̃ puruɗaa wãsia. Maʉ̃ purura Timnataɗaa wãbada o caita ɓasia. Tamarára dji puruɗe eɗa wãbadama chũmesia wẽrã auɗuaba obada quĩrãca. Idjia mãwã osia Judara idji ume cãĩmãrẽã. Cawa ɓasia Selara cũdra ɓʉmĩna Judaba idjía diaẽ́da idji quima bamãrẽã.
15 Judaba Tamará unubʉrʉɗe wẽrã auɗuada crĩchasia, idji quĩrãra wuaba bʉrá eroɓʉ bẽrã.
16 Judaba adua ɓasia idji ãĩguda mãwã ɓʉda. Maʉ̃ bẽrã Tamarámaa wãpeɗa jarasia:
–¿Bʉra mʉ̃ ume cãĩca?–
Tamarába panusia:
–Mʉ̃da bʉ ume cãĩbʉrʉ, ¿bʉa mʉ̃́a cãrẽda diai?–
17 Judaba jarasia:
–Mʉ̃ animarãnebema chiwatu zaqueda aɓa diabueya.–
Tamarába jarasia:
–Bia ɓʉa, baribʉrʉ maʉ̃ diabuebʉrʉmisa bʉa nebia eroɓʉɗebemada mʉ̃ ume ɓeedua cawai carea bʉa wãrãda diabueida.–
18 Judaba iwiɗisia:
–¿Cãrẽ nebiada mʉ̃a bʉ́a diai?–
Maʉ̃ne Tamarába panusia:
–Mʉ̃ ume ɓeedua bʉa sẽyã obarida dji jʉ̃cara bara, idjaɓa bacuru bʉ jʉwaɗe eroɓʉ siɗa.–
Ara maʉ̃da idjia iwiɗiɗara Judaba diapeɗa idji ume cãĩsia. Mãwã Tamarába Juda warrada ɓiogoa ɓesia.
19 Mãwãnacarea Tamarára diguiɗa wãsia. Idji quĩrã bʉrá eroɓʉ wuara ẽrãpeɗa wayacusa pẽdrarãba jʉ̃badara jʉ̃sia.
20 Maʉ̃be Judaba idji dji bia Hira Adulaʉ̃nebemara diabuesia chiwatu zaquera wẽrã auɗuaa diamãrẽã. Diapeɗa Hiraba Juda nebia ɓeeɗara wayacusa edaida ɓasia. Baribʉrʉ Hiraba dji wẽrãra unuẽ́ basía.
21 Maʉ̃ carea idjia mamabemarãa iwiɗisia:
–Wẽrã auɗua nama Enaiʉ̃ puruɗaa zebada o icawa chũmanara ¿sãma ɓʉ?–
Ãdjirãba panusiɗaa:
–Nama wẽrã auɗuara ni aɓa biɗa neẽ́a.–*
22 Maʉ̃be Hirara Judamaa jẽda zepeɗa jarasia:
–Jãʉ̃ wẽrãra mʉ̃a unuẽ́ basía. Arimabemarãba jarasiɗaa jãma wẽrã auɗuara ni aɓa biɗa neẽ́da.–
23 Maʉ̃ne Judaba jarasia:
–Mʉ̃a nebia ɓeeɗara idjiɗe baya. Mʉ̃a chiwatu zaquera idji itea diabueɗamĩna bʉa idjira unuẽ́ basía. Waa diabueẽ́a jãmabemarãba dadjira ipiɗa jararãnamãrẽã.–
24 Jeɗeco ũbea babʉrʉɗe Judaa nãwã jarasiɗaa:
–Bʉ ãĩgu Tamarába auɗuada oɗa bẽrã ɓiogoa ɓesia.–
Maʉ̃ carea Judaba jĩgua jarasia:
–¡Puruɗeba dajadaa edeɗapeɗa bá beaɗadua!–
25 Ara maʉ̃da Tamará edaɗe wãsiɗaa. Baribʉrʉ dajadaa edebʉdaɗe Tamarába dji zãwãrẽ Judaa nãwã beɗea diabuesia: “Naʉ̃ nebia djibariba mʉ̃ra ɓiogoa osia. Acʉdua za ɓʉ sẽyã obarida dji jʉ̃cara bara, idjaɓa za ɓʉ bacuru siɗa. ¿Caida djibari?”
26 Judaba maʉ̃ nebiara idjiɗeda cawaɗa bẽrã nãwã jarasia:
–Jãʉ̃ wẽrãba oɗara mʉ̃a oɗa cãyãbara jipaara ɓʉa, mʉ̃ warra Selara idjía diaɗaẽ́ bẽrã.–
Idjira ẽdrʉ ɓʉpeɗa Judara idji ume waa cãĩẽ́ basía.
27 Tamará warra toi ewariɗe cawasia mĩguisoda toida.
28 Tobʉrʉɗe jʉwada na odjasia. Maʉ̃ne dji warra careba tobibari wẽrãba maʉ̃ jʉwaɗe jʉ̃cara purruda jʉ̃ ɓʉsia. Jarasia: “Za ɓʉda na odjasia.”
29 Baribʉrʉ jʉwara waya eɗa wãsia. Maʉ̃ne dewarabemada na tosia. Dji careba tobibari wẽrãba jarasia: “Bʉra ¿sãwãbʉrʉ na tosi?” Mãwã idjira trʉ̃ ɓʉsiɗaa Paré.*
30 Mãwãnacarea idji djaba, jʉwaɗe jʉ̃cara purru jʉ̃ ɓʉda tosia. Maʉ̃ carea idjira trʉ̃ ɓʉsiɗaa Zará.*
Beɗea eɗaare
^ 38:5. Judara Quezib puruɗe ɓasia. Hebreo beɗeaɗe mãwã ɓʉa. Griegoɗe jara ɓʉa Juda quimadrʉ Quezib puruɗe ɓasida.
^ 38:8. Maʉ̃ ewariɗe umaquĩrãda warra neẽ́ beusira, dji djababa idji itea warra oida ɓasia dji pẽdra ume. Deuteronomio 25:5-10.
^ 38:9. Wagabadjia wẽrã ɓiogoa ɓerãmãrẽã. Hebreo beɗeaɗe ɓʉ́ ɓʉa: “Umaquĩrã ɓara dajada ɓatabuebadjia.”
^ 38:21. Wẽrã auɗua. Canaaʉ̃ druaɗe ʉ̃cʉrʉ wẽrãrãba ãdji jʉwaba oɗa ãcõrẽ ẽpẽ panʉneba auɗuada obadjiɗaa. Maʉ̃rã ãcõrẽ ẽpẽ ɓeaba crĩchabadjiɗaa maʉ̃neba cuera ariɗe zeida, ãdjia upeɗaɗara bia zauida, idjaɓa ãdji animarã siɗa bia wariɗida.
^ 38:29. Hebreo beɗeaɗe Paré trʉ̃ba jara ɓʉa “ẽdrʉida.”
^ 38:30. Hebreo beɗeaɗe Zará trʉ̃ba jara ɓʉa “purea ɓʉ.”
