Genesi 39:1-23
39 Ismaelerãba Josera Egipto druaɗaa nẽdobueɗe edesiɗaa. Mama ẽberã Potipa abadaba idjira nẽdosia idji nezocada ɓamãrẽã. Potipara Egiptoɗebema basía. Idjira maʉ̃ druaɗebema boro wagabadarã dji droma basía.
2 Ãcõrẽda Jose ume ɓʉ bẽrã idjia o ɓʉra jũma bia odjabadjia. Maʉ̃ carea idji boro deɗe traja ɓesia.
3 Joseba o ɓʉra Ãcõrẽba jũma bia odjabibadjia. Mãwã Jose boro Potipaba cawasia Ãcõrẽra Jose ume ɓʉda.
4 Maʉ̃ bẽrã idjia Josera bia unupeɗa idji nezocarã boroda ɓʉsia. Idjaɓa jũma idjia eroɓʉra Jose jʉwaeɗa ɓʉsia.
5 Maʉ̃ ewariɗeba ʉ̃taa Ãcõrẽba Potipaba idji deɗe, idji ẽjũãne eroɓʉ siɗa Joseɗeba auɗuara waribisia.
6 Potipaba jũma idjiɗeda Jose jʉwaeɗa ɓʉɗa bẽrã jũmawãyã crĩchaca basía. Aɓabe idjia coiɗebemadrʉ crĩchabadjia.*
Josera jũma quĩrãwãrẽã ɓasia.
7 Maʉ̃ bẽrã Potipa quimaba idjira awua nũmesia. Ewari aɓa maʉ̃ wẽrãba Josea jarasia:
–Wãnaa cãĩne.–
8 Maʉ̃ne Joseba quĩrĩãẽ́ bẽrã Potipa quimaa jarasia:
–Mʉ̃ra bʉ ume cãĩẽ́a. Mʉ̃ boroba idjiɗera jũma mʉ̃ jʉwaeɗa ɓʉsia. Maʉ̃ bẽrã idjia eroɓʉɗebemada jũmawãyã crĩcha ɓacaa.
9 Naʉ̃ deɗe nezoca mʉ̃ cãyãbara dji dromaara ɓʉra neẽ́a. Mʉ̃ boroba jũma naʉ̃ deɗe ɓʉra mʉ̃ jʉwaɗe ɓʉsia. Aɓabe bʉdrʉ mʉ̃ jʉwaɗe ɓʉẽ́ ɓʉa, idji quima bẽrã. Maʉ̃ cadjirua waiɓʉada mʉ̃a ¿cãrẽã oi? ¡Mãwã oibʉrʉ Ãcõrẽ quĩrãpita cadjiruada oya!–
10 Potipa quimaba nurẽmaza Josea jara ɓabadjia idji ume cãĩmãrẽã wa idji ume nẽbʉrʉ ɓamãrẽã. Mãwãmĩna Joseba idji beɗeara ĩjãca basía.
11 Ewari aɓa Josera Potipa deɗe trajaɗe wãsiɗe ni aɓaʉ nezocada neẽ́ basía.
12 Maʉ̃ne Joseba jʉ̃ ɓʉra Potipa quimaba jida dogopeɗa nãwã jarasia:
–¡Mʉ̃ ume cãĩdua!–
Baribʉrʉ Joseba jʉ̃ ɓʉra wẽãtapeɗa dajadaa pira wãsia. Mãwã idjia jʉ̃ ɓaɗara dji wẽrã jʉwaɗe ɓesia.
13 Dji wẽrãba unusia Josera pira wãbʉrʉda idjaɓa Joseba jʉ̃ ɓaɗara idji jʉwaɗe ɓʉda.
14 Maʉ̃ bẽrã idji deɗebema nezocarãda trʉ̃peɗa nãwã jarasia:
–Acʉɗadua, mʉ̃ quimaba jãʉ̃ hebreora dadjirãmaa enesia. Baribʉrʉ jãʉ̃ ẽberãba dadjirãra biẽ́ oya ɓʉa. Idjira nama zepeɗa mʉ̃ ume cãĩ quĩrĩã nũmasia. Maʉ̃ carea mʉ̃ra jĩgua ɓiasia.
15 Mʉ̃ ɓiabʉrʉ carea idjira dajadaa mĩrũ pira wãsia. Acʉɗadua, idjia jʉ̃ ɓaɗara nama ɓeesia.–
16 Maʉ̃be Joseba jʉ̃ ɓaɗara dji wẽrãba wagasia aɓa idji quima Potipa diguiɗaa zebʉrʉɗaa.
17 Idji quima jũẽsiɗe idjia aɓarida jarasia:
–Bʉa dadji itea enena hebreo nezocara nama zepeɗa mʉ̃ra biẽ́ o quĩrĩã ɓasia.
18 Baribʉrʉ mʉ̃ jĩgua ɓiabʉrʉ carea idjira dajadaa mĩrũ pira wãsia. Acʉdua, idjia jʉ̃ ɓaɗara nama ɓeesia.
19 Bʉ nezocaba mʉ̃ra jãwã osia.–
Idji quimaba jara ɓʉ ũrĩsiɗe Potipara bio quĩrũsia.
20 39:20-21 Maʉ̃ carea Josera jidabipeɗa preso ɓʉbisia Egiptoɗebema boroba preso ɓʉbari deɗe.
Baribʉrʉ Jose mama preso ɓʉɗe biɗa Ãcõrẽra idji ume ɓasia. Idjira bio careba ɓasia. Maʉ̃ carea dji preso ɓʉbada boroba Josera bia unusia.
22 Maʉ̃ bẽrã idjia preso ɓeara Jose jʉwaeɗa jũma ɓʉsia wagamãrẽã. Mãwã jũma mama oida ɓʉra Josebʉrʉ obibadjia.
23 Joseba jũma bia o ɓʉ bẽrã dji preso ɓʉbada boroba idjia o ɓʉra quĩrãcuitaca basía. Mãwã ɓasia Ãcõrẽra Jose ume ɓʉ bẽrã. Jũma Joseba o ɓʉra Ãcõrẽba bia odjabisia.
Beɗea eɗaare
^ 39:6. Aɓabe idjia coiɗebemadrʉ crĩchabadjia. Josera Egiptoɗebemaẽ́ bẽrã Potipa itea ne djucara ɓasia idjaɓa idji ume ne cocara ɓasia. Acʉdua Genesi 43:32.
