Genesi 41:1-57
41 Jose poa umé preso ɓaɗacarea Egiptoɗebema borora cãĩmocarasia. Maʉ̃ cãĩmocaraɗe unusia idjira Nilo do icawa nũmʉda.
2 Maʉ̃ne siete paca biya boreguea queɗeada doeɗaʉba odjaɗapeɗa põãjãrã co duanasiɗaa.
3 Ãdji caiɗu dewara siete paca mititia caya ɓeada doeɗaʉba odjasiɗaa. Maʉ̃ caya ɓeara dji boreguea ɓea caita do icawa nũpanesiɗaa.
4 Maʉ̃ne dji mititia caya ɓeaba dji biya boreguea queɗeara cocuasiɗaa.
Maʉ̃ne Egiptoɗebema borora ʉ̃rʉ̃masia.
5 Baribʉrʉ wayacusa cãĩpeɗa cãĩmocaraɗe unusia trigo ɓʉwʉrʉ aɓaʉɗe siete cʉmʉ biya uga ɓeada.
6 Maʉ̃be unusia dewara trigo ɓʉwʉrʉɗe siete cʉmʉ ugaẽ́ ɓeada. Maʉ̃gʉra nãũrã jʉ̃wʉ̃rʉ̃ã ʉ̃mãdau odjabariareba tʉ nũmʉba jãrãzaza ɓeasia.
7 Maʉ̃ne cʉmʉ ugaẽ́ ɓeaba dji biya uga queɗeara cocuasiɗaa.
Mãwã ɓʉɗe Egiptoɗebema borora ʉ̃rʉ̃masia. Maʉ̃ne cawasia idjia ununara cãĩmocara basida.
8 Nurẽma diapeɗa idjia cãĩmocaraɗa carea cawa crĩchaẽ́ ɓesia. Maʉ̃ bẽrã Egiptoɗebema daubararãda, ne cawa ɓea siɗa trʉ̃cuabipeɗa idjia cãĩmocaraɗara ãdjía nẽbʉrʉsia cawa jaraɗamãrẽã.* Mãwãmĩna ni aɓaʉba poya cawa jaraɗaẽ́ basía.
9 Mãwã panʉne uva ɓa jue diabada boroba Egiptoɗebema boroa jarasia:
–Mʉ̃ boro, mʉ̃a biẽ́ osia. Mʉ̃a ne jaraida ɓaɗara quĩrãdoa ɓasia. Iɗibe quĩrãnebabʉrʉa.
10 Bʉ paʉ̃ obada boro ume, mʉ̃ ume biɗa quĩrũpeɗa daira preso ɓʉbisia bʉ wagabadarã boro deɗe.
11 Dai preso panasiɗaɗe aɓari diamasi daira cãĩmocarasiɗaa. Cãĩmocaraza ne jara awara ɓeasia.
12 Maʉ̃ne hebreo cũdrada dai ume ɓasia. Maʉ̃ hebreora bʉ wagabada boro nezoca basía. Daiba cãĩmocarapeɗaɗara idjía nẽbʉrʉsiɗaa. Maʉ̃ne idjia dai cãĩmocarara umena cawa jarasia.
13 Idjia daia jaraɗa quĩrãca wãrãda mãwãsia. Bʉa mʉ̃ra wayacusa ɓʉsia mʉ̃a naẽna bʉ itea o ɓaɗa quĩrãca o ɓamãrẽã. Maʉ̃ne dewarabemara bʉa beabipeɗa bacuru cũmiane ʉ̃tʉ su jira ɓʉbisia.–
14 Maʉ̃ carea Egiptoɗebema boroba Josera trʉ̃bisia. Ara maʉ̃da preso ɓaɗada isabe ẽdrʉ ɓʉsiɗaa. Josera icara wẽpeɗa, buɗa tʉpeɗa, bia djiopeɗa Egiptoɗebema boromaa wãsia.
15 Maʉ̃be dji boroba Josea jarasia:
–Mʉ̃ra cãĩmocarasia, mãwãmĩna ni aɓaʉba poya cawa jaraɗaẽ́ panʉa. Baribʉrʉ mʉ̃a ũrĩsia bʉa cãĩmocarara cawa jarabarida.–
16 Joseba jarasia:
–Mʉ̃ boro, maʉ̃gʉra mʉ̃duɓa poya oẽ́a. Bʉa cãĩmocaraɗara Ãcõrẽbʉrʉ cawa jarabiya necai ɓamãrẽã.–
17 Egiptoɗebema boroba Josea jarasia:
–Mʉ̃a cãĩmocarasia mʉ̃ra Nilo do icawa nũmʉda.
18 Maʉ̃ne siete paca biya boreguea queɗeada doeɗaʉba odjaɗapeɗa põãjãrã co duanasiɗaa.
19 Ãdji caiɗu dewara siete paca mititia caya ɓeada doeɗaʉba odjasiɗaa. Naʉ̃ Egipto druaɗe mʉ̃a unucaa paca jãcua mititia ɓeada.
20 Maʉ̃ paca mititia caya ɓeaba dji naãrã odjapeɗaɗa boreguea ɓeara cocuasiɗaa.
21 Dji caya ɓeaba dji boreguea queɗeara cocuapeɗaɗamĩna ara mãwã bio caya panesiɗaa ãdji naãrã panana quĩrãca.
Maʉ̃ne mʉ̃ra ʉ̃rʉ̃masia.
22 Baribʉrʉ mʉ̃ra waya cãĩmocarasia. Unusia trigo ɓʉwʉrʉ aɓaʉɗe siete cʉmʉ biya uga ɓeada.
23 Maʉ̃are unusia trigo ɓʉwʉrʉɗe siete cʉmʉ ugaẽ́ ɓeada. Maʉ̃gʉra nãũrã jʉ̃wʉ̃rʉ̃ã ʉ̃mãdau odjabariareba tʉ nũmʉba jãrãzaza ɓeasia.
24 Maʉ̃ne ugaẽ́ ɓeaba dji uga queɗeara jũma cosiɗaa. Mʉ̃a maʉ̃ cãĩmocaraɗara daubararãa jarasia. Mãwãmĩna poya cawa jaraɗaẽ́ basía.–
25 Maʉ̃ne Joseba Egiptoɗebema boroa jarasia:
–Mʉ̃ boro, maʉ̃ cãĩmocara uméba aɓarida jara ɓʉa. Ãcõrẽba sãwã oida bʉ́a unubisia.
26 Dji siete paca bia queɗeaba jara ɓʉa siete poa coɗiɗebema aɗuba eropananida. Dji siete trigo cʉmʉ uga queɗea biɗa aɓari quĩrãca jara ɓʉa siete poa coɗiɗebema aɗuba eropananida.
27 Baribʉrʉ dji siete paca mititia caya ɓea ãdji caiɗu odjapeɗaɗaba jara ɓʉa siete poa jarrabada zeida. Dji siete trigo cʉmʉ ugaẽ́ ɓeaba aɓarida jara ɓʉa. Maʉ̃ cʉmʉra nãũrã jʉ̃wʉ̃rʉ̃ã ʉ̃mãdau odjabariareba tʉ nũmʉba jãrãzaza ɓeasia. Maʉ̃ba jara ɓʉa siete poa jarrabada zeida.
28 Mʉ̃ boro, Ãcõrẽba bʉ́a unubisia idjia oida mʉ̃a jara ɓʉ quĩrãca.
29 Siete poa naʉ̃ Egipto druaɗe coɗiɗebemara aɗuba eropanania.
30 41:30-31 Maʉ̃are siete poa naʉ̃ Egiptoɗe jarrabada zeya. Maʉ̃ jarrabara bio dãrãi bẽrã egiptorãba dji aɗuba eropanana ewarira aɓeɗa quĩrãdoaɗia. Maʉ̃ne coɗiɗebema naʉ̃ druaɗe ɓʉra jõya. Dji aɗuba eropanananebemada ni maãrĩ biɗa neẽ́ ɓaya.
32 Bʉa ɓarima umé cãĩmocaraɗaba jara ɓʉa Ãcõrẽba dãrãẽ́ne wãrãda mãwã oida.
33 Maʉ̃ bẽrã, mʉ̃ boro, bʉa ẽberã crĩcha cawa ɓʉda jʉrʉpeɗa ɓʉida ɓʉa naʉ̃ Egipto druara acʉ ɓamãrẽã.
34 41:34-35 Maʉ̃are jũma naʉ̃ Egipto druaɗe trigo wagabada bororãda ɓʉcuaida ɓʉa. Siete poa aɗuba eropanʉne ẽberãrãba ewabʉdaɗebemada maʉ̃ bororãba maãrĩ wagaɗida panʉa. Ẽ juesuma ewabʉdaza aɓa wagaɗida panʉa. Mãwã oɗida panʉa puru ɓeaza. Ãdjia wagapeɗaɗara bʉabʉrʉ cawa jaraya sãwã jeɗeida.
36 Mãwã osira siete poa jarraba zebʉrʉɗe trigora waga eropanania naʉ̃ Egipto druaɗebemarã quinirãnamãrẽã.–
Jose Egiptoɗebema boroare ɓeɗa
37 Maʉ̃ crĩchara Egiptoɗebema boroba, dji dromarã biɗa bio bia ũrĩsiɗaa.
38 Dji boroba ãdjirãa jarasia:
–Ãcõrẽ Jaureda naʉ̃ ẽberã ume ɓʉa. Dadjirãba dewara ẽberãda idji quĩrãca ununaẽ́a.–
39 Ara maʉ̃da idjia Josea jarasia:
–Ãcõrẽba bʉ́a maʉ̃ra cawabisia. Bʉ quĩrãca crĩcha cawa ɓʉra neẽ́a.
40 Maʉ̃ carea mʉ̃a bʉra dji dromarã boroda ɓʉya. Bʉa jarabʉrʉra jũmarãba ĩjã oɗia. Aɓabe mʉ̃drʉ bʉ cãyãbara dji dromara ɓaya.
41 Mʉ̃a jũma naʉ̃ druaɗebemara bʉ jʉwaeɗa ɓʉbʉrʉa.–
42 Maʉ̃ne Egiptoɗebema boroba idji sẽyã bara ɓʉ sortijada Jose jʉwaɗe wẽãju ɓʉsia Joseba dji boro trʉ̃neba jũma poya o ɓamãrẽã. Dji biara ɓʉ lino oɗa djioda, oro oɗa carena siɗa Josea jʉ̃bisia.
43 Maʉ̃be idji carretaɗe ɓadopeɗa Josera idjiare dewara carretaɗe pʉrrʉa edesia. Wãbʉdaɗe idji wagabadarãda Jose na wãbibadjia nãwã jĩgua jaraɗamãrẽã: “¡Chĩrãne coɓeaɗadua!”* Mãwã Egiptoɗebema boroba jũma Egipto druara Jose jʉwaeɗa ɓʉsia.
44 Maʉ̃be idjia Josea jarasia:
–Mʉ̃ra jũmarã boroa, baribʉrʉ jũma naʉ̃ druaɗebemarãra bʉ jʉwaeɗa ɓeaɗia. Ãdjirãba bʉ́a iwiɗiɗaẽ́ ni cãrẽ siɗa ocara panʉa.–
45 Egiptoɗebema boroba Jose trʉ̃ra ɓʉsia Zapnat-panea.* Maʉ̃ awara wẽrã Asena abadada Josea diasia idji quima bamãrẽã. Maʉ̃ Asenara Potipera cau basía. Potiperara Oʉ̃ puruɗe ʉ̃mãdaúa bia beɗeabadarã sacerdote basía. Mãwã Josera jũma Egipto druaɗe dji dromada ɓesia.
46 Egiptoɗebema boroba Josera dji dromada ɓʉsiɗe idjira treinta poa ɓasia. Josera dji boroma ɓaɗada jũma Egipto druaɗe pʉrrʉa wãsia.
47 Maʉ̃be siete poa ne jũmada bia zauɗa bẽrã coɗiɗebemara aɗuba nũmasia.
48 Maʉ̃ siete poaɗe Egipto druaɗe ewapeɗaɗaɗebemada Joseba waga ɓʉbisia. Puruza dji puru caita ewapeɗaɗara maãrĩ waga ɓʉbisia.
49 Mãwã trigora waiɓʉa waga ɓʉsiɗaa. Pusa ĩbʉ quĩrãca ãdjirãba waiɓʉa waga eropanasiɗaa. Maʉ̃ bẽrã juacha pananada idu ɓʉsiɗaa.
50 Jarraba ewari zei naẽna Joseba idji quima Asena ume warrarãda umé unusia. Asena zeza Potiperara Oʉ̃ puruɗe ʉ̃mãdaúa bia beɗeabadarã sacerdote basía.
51 Idji warra iwina tosiɗaɗe Joseba nãwã crĩchasia: “Ãcõrẽba jũma mʉ̃ bia mĩga ɓaɗara, mʉ̃ ẽberãrã siɗa quĩrãdoabisia.” Mãwã idji warra iwinara trʉ̃ ɓʉsia Manase.*
52 Dewarabema warra tosiɗaɗe Joseba nãwã crĩchasia: “Mʉ̃ biẽ́ ɓaɗa druaɗe Ãcõrẽba mʉ̃́a warrarãra unubisia.” Mãwã dji warrara trʉ̃ ɓʉsia Epraiʉ̃.*
53 41:53-54 Siete poa Egipto druaɗe aɗuba zau nũmana jõnacarea siete poa jarrabada zesia Joseba jaraɗa quĩrãca. Druaza jarrabara wãsia. Baribʉrʉ egiptorãba coɗira eropanasiɗaa.
55 Mãwã ɓʉɗe egiptorãba coɗi carea eroɓeaɗa siɗa jõsia. Maʉ̃ bẽrã ãdji boromaa coɗira iwiɗiɗe wãsiɗaa. Ãdji boroba jũmarãa jarasia:
–Josemaa wãnadua. Idjia jarabʉrʉ quĩrãca oɗadua.–
56 Jarraba Egipto druaɗe zesiɗe Joseba trigo wagabada dera jũma ewabicuasia. Maʉ̃be trigora egiptorãa nẽdobuebadjia, jarrabara wãrãda jũma Egipto druaɗe zeɗa bẽrã.
57 Maʉ̃ awara druazabemada Josemaa trigo nẽdoɗe zebadjiɗaa jarrabara jũma druaza wãna bẽrã.
Beɗea eɗaare
^ 41:8. Daubara. Egiptoɗe daubararãra ne cawa ɓeasia. Beɗea cawa ɓeasia, ne ununacada obadjiɗaa, cacua biẽ́ ɓeara biabibadjiɗaa, dau ẽsã ɓeasia, idjaɓa egiptorãba ãcõrẽ quĩrãca ĩjãbada sacerdoterã basía. Aɓeɗa dji dromarãda ɓeasia.
^ 41:43. Chĩrãne coɓeaɗadua. Maʉ̃gʉra hebreo beɗea cawa ɓeaba cawaɗaẽ́ panʉa. Ʉ̃cʉrʉmaarã egiptorã beɗeaa. Naʉ̃gʉrã crĩchada jaraisicada: “¡Ãyã wãnadua dadjirã boro zebʉrʉ bẽrã!” wa “¡dadjirã boro nezoca dromada zebʉrʉa!” wa “¡Quĩrãcuita ũrĩnadua!”
^ 41:45. Zapnat-panea. Maʉ̃ trʉ̃ba egiptorã beɗeaɗe jara ɓʉa “Ãcõrẽra beɗeabaria; idjira zocai ɓʉa.”
^ 41:51. Hebreo beɗeaɗe Manase trʉ̃ba jara ɓʉa “quĩrãdoabi.”
^ 41:52. Hebreo beɗeaɗe Epraiʉ̃ trʉ̃ba jara ɓʉa “warra unubiɗa.”
