Genesi 43:1-34
43 Mãwã panʉne Canaaʉ̃ druaɗe jarrabara wetara zesia.
2 Maʉ̃ne ãdjia trigo Egipto druaɗe nẽdopeɗaɗara jũma cosiɗaa. Maʉ̃ bẽrã ãdji zeza Jacoboba jarasia:
–Wayacusa Egiptoɗaa trigo nẽdoɗe wãnadua.–
3 Baribʉrʉ Judaba panusia:
–Jãʉ̃ ẽberãba daia ebuɗa jarasia: “Bãrãra mʉ̃maa zecara panʉa, bãrã djaba tẽãbemada enenaẽ́bʉrʉ.”
4 Maʉ̃ba, zeza, dai djaba tẽãbemara bʉa dai ume diabueibʉrʉ, daira trigo nẽdoɗe wãnia.
5 Baribʉrʉ dai ume diabueẽ́bʉrʉ, poya wãnaẽ́a jãʉ̃ ẽberãba jaraɗa bẽrã: “Bãrãra mʉ̃maa zecara panʉa, bãrã djabada enenaẽ́bʉrʉ.”–
6 Maʉ̃ne Jacobo Israel abadaba iwiɗisia:
–Bãrãba ¿cãrẽ cãrẽã maʉ̃ ẽberãa jarasiɗa dewara djabada eropanʉda? Maʉ̃ jarapeɗaɗaba mʉ̃ra biẽ́ osiɗaa.–
7 Ãdjirãba panusiɗaa:
–Jãʉ̃ ẽberãba daia bio iwiɗisia daiɗebemada, dai ẽberãrãnebema siɗa. Nãwã iwiɗisia: “Bãrã zezara ¿waɗi ɓʉca? Bãrãba ¿dewara djabada eropanʉca?” Maʉ̃ bẽrã daiba idjía wãrãda jarasiɗaa. Daiba adua panasiɗaa idjia jaraida dai djaba edeɗamãrẽã.–
8 Maʉ̃ne Judaba idji zeza Israelea jarasia:
–Bʉa Benjamiʉ̃da mʉ̃ ume diabueibʉrʉ, daira ara nawena trigo nẽdoɗe wãbʉrʉɗia. Wãnaẽ́bʉrʉ bʉda, daida, dai warrarã siɗa jũma quininia.
9 Mʉ̃abʉrʉ Benjamiʉ̃ra wagaya. Mʉ̃a idjira enepeɗa wayacusa bʉ quĩrãpita ɓʉẽ́bʉrʉ, mʉ̃da beɗeaɗe ɓeya aɓa mʉ̃ beubʉrʉɗaa.
10 Daida nama jãcua dãrãnaẽ́ pananabara, Egiptoɗaa ɓarima umé wãnoacasiɗaa.–
11 Maʉ̃ne dji zeza Israelba panusia:
–Wãrãda Benjamiʉ̃da edeɗida panʉbʉrʉ, nãwã oɗadua. Dadjirã ẽjũãnebema ne biara ɓeada bãrã sacoɗe ɓʉɗapeɗa maʉ̃ ẽberãa diaɗe wãnadua. Balsamo nẽãrãda, urrajõda, mirra querada, dewara quera tũãpa ɓeada, pistacho bacuru tada, almendra siɗa maãrĩ diaɗadua.
12 Parata siɗa waiɓʉara edeɗadua dji parata bãrã sacoɗe zeɗara jẽda diaɗi carea. Ãĩbẽrã quĩrãdoa eɗa ɓʉsiɗaa.
13 Bãrã djaba tẽãbema siɗa maʉ̃ ẽberãmaa isabe edeɗadua.
14 Mʉ̃a quĩrĩã ɓʉa Ãcõrẽ ne jũma poya obariba bãrãra quĩrã djuburiaida maʉ̃ ẽberãba bãrã djaba jãma preso ɓʉra, Benjamiʉ̃ siɗa idu jẽda zebimãrẽã. Baribʉrʉ idu zebiẽ́bʉrʉ mʉ̃ra warra neẽ́ ɓeya. Mãwã warra neẽ́ ɓeibʉrʉ, mãwã ɓaya.–
15 Ara maʉ̃da ãdjirãba nebiada peɗapeɗa Egiptoɗaa wãbʉrʉsiɗaa. Ãdjia parata naẽna edepeɗaɗa cãyãbara waiɓʉara edesiɗaa. Benjamiʉ̃ siɗa edesiɗaa. Jũẽnapeɗa Josemaa wãsiɗaa.
16 Joseba Benjamiʉ̃ ãdji ume unusiɗe idji nezocarã boroa jarasia:
–Naʉ̃ ẽberãrãra mʉ̃ diguiɗaa ededua. Maʉ̃be pacada beapeɗa ne djudua ãdjirãra nane umatipa mʉ̃ ume ne coɗi bẽrã.–
17 Ara maʉ̃da dji nezocarã boroba Joseba jaraɗa quĩrãca osia. Dji djabarãra Jose deɗaa edesia.
18 Wãbʉdaɗe Jose djabarãra daupera panʉ bẽrã nãwã jara panasiɗaa:
–Naãrã zesiɗaɗe parata dadji sacoɗe ɓʉpeɗaɗa carea jãwã idji diguiɗaa edebibʉrʉa. Idjia jaraya dadjia maʉ̃ paratara drʉasiɗada. Maʉ̃ carea dadjira jidabiya idji nezocarãda ɓeaɗamãrẽã. Dadjirã burro siɗa jãrĩya.–
19 Jose deɗe eɗa wãbadaɗe dji nezocarã boro caita wãnapeɗa idji ume beɗeasiɗaa.
20 Ãdjia nãwã jarasiɗaa:
–Dai boro, dairã naãrã ze panasiɗaɗe wãrã arada trigo nẽdoɗe ze panasiɗaa.
21 43:21-22 Dai jẽda wãsiɗaɗe ota cãĩnima jũẽsiɗaa. Mama dai saco ewabʉdaɗe trigo nẽdopeɗaɗa paratada jũma daucha dairã sacoza eɗa ɓʉda unusiɗaa. Dairãba adua panʉa caiba maʉ̃ paratara eɗa ɓʉsida. Jũma maʉ̃ paratara daiba jẽda enesiɗaa diaɗi carea. Maʉ̃ awara daiba paratara enesiɗaa wayacusa trigo nẽdoɗi carea.–
23 Dji nezocarã boroba panusia:
–Jũmawãyã crĩcharãnadua. Dauperarãnadua. Bãrãba parata diapeɗaɗara mʉ̃a edapeɗa mʉ̃ boroa diasia. Bãrãba, bãrã zezaba ĩjã ɓʉ Ãcõrẽba maʉ̃ paratara bãrã sacoɗe ɓʉsia.–
Maʉ̃be idjia Simeoʉ̃ preso ɓaɗada ãdjimaa enesia.
24 Enepeɗa ãdjirãra Jose deɗe eɗa edesia. Idjia baidoda diasia ãdji jĩrũ sʉgʉɗamãrẽã. Ãdji burro siɗa ne cobigasia.
25 Mãwã panʉne cawasiɗaa ãdjira Jose deɗe ne coɗida. Jose umatipa zeida jʉ̃ã panʉmisa ãdjia nebia enepeɗaɗara edasiɗaa Josea diaɗi carea.
26 Jose diguiɗa jũẽnacarea ãdjirãba nebia enepeɗaɗara idjía diasiɗaa. Maʉ̃ne wayaaɗeba idji quĩrãpita egode ɓarru copanesiɗaa.
27 Joseba ãdjía iwiɗisia sãwã panʉ cawaya. Maʉ̃ awara iwiɗisia:
–Bãrã zezara ¿bia ɓʉca? ¿Drõãra waɗi ɓʉca?–
28 Ãdjirãba panusiɗaa:
–Dairã zeza bʉ nezocara bia ɓʉa. Idjira waɗi ɓʉa.–
Maʉ̃ne wayaaɗeba ãdjira ɓarru copanesiɗaa.
29 Joseba acʉbʉrʉɗe idji djaba ara Benjamiʉ̃da unupeɗa nãwã jarasia:
–Bãrã djaba tẽãbema mʉ̃́a jarapeɗaɗara ¿naʉ̃gʉca?–
Maʉ̃be Benjamiʉ̃a jarasia:
–Mʉ̃ warra, Ãcõrẽba bʉra carebaya.–
30 Idji djaba arada ununa bẽrã Josera ɓʉsriɗaba so borequeasia. Ara maʉ̃da dji eɗaara ɓʉ dejãne iduɓa jĩãne wãsia.
31 Jĩã ɓapeɗa so zareaɗacarea quĩrã sʉgʉpeɗa waya ãdjimaa zesia. Maʉ̃be jarasia:
–Daiba coɗira enenadua.–
32 Ara maʉ̃da dji nezocarãba enesiɗaa. Joseba coira awara ɓʉsiɗaa, dji djabarãba coɗi siɗa awara ɓʉsiɗaa, idjaɓa Josema ne cobada egiptorãba coɗi siɗa awara ɓʉsiɗaa. Mãwã osiɗaa egiptorãra hebreorã ume ãbaa ne cocara panʉ bẽrã. Egiptorãmaarã maʉ̃ra cadjiruaa.
33 Maʉ̃ne Joseba idji djabarãra chũmebisia dji nabemaneba aɓa dji tẽãbemanaa. Maʉ̃ carea idji djabarãba cawa crĩchaɗaẽ́ panʉba aɓarica dji quĩrã acʉ duanesiɗaa.
34 Maʉ̃ne Jose itea diapeɗaɗa djicoɗebemada ãdjiza jeɗecabisia, baribʉrʉ Benjamiʉ̃a waiɓʉara diabisia. Mãwã jeɗecaɗapeɗa ãdjira Jose ume ɓʉsriɗa ne codruasiɗaa.
