Genesi 44:1-34
44 Mãwãnacarea Joseba idji nezocarã boroa jarasia:
–Naʉ̃ ẽberãrã sacora trigoba biracuadua. Ãdji parata siɗa ãdji sacoza eɗa ɓʉcuadua.
2 Maʉ̃be mʉ̃ taza parata oɗada dji tẽãbema sacoɗe trigo nẽdoɗa parata ume ɓʉdua.–
Ara maʉ̃da dji nezocarã boroba Joseba jaraɗa quĩrãca osia.
3 Nurẽma ãsaboɗoɗe Jose djabarãra ãdji burroɗe idu wãbisiɗaa.
4 Ãdjira puruɗeba waɗi tʉmʉ wãẽ́ panʉne Joseba idji nezocarã boroa jarasia:
–Jãʉ̃ ẽberãrã caiɗu wãdua. Jidaɗe wãsira nãwã jaradua: “¿Cãrẽneba mʉ̃ boroba bãrãra biẽ́ oɗa bẽrã bãrãba jãwã idjira biẽ́ osiɗa? ¿Cãrẽ cãrẽã bãrãba idji taza parata oɗara drʉasiɗa?
5 Jãʉ̃ tazaɗe mʉ̃ borora ne dobaria. Idjaɓa aɓari tazaɗeba ne cawaiẽ́ ɓeara cawabaria. Bãrãba opeɗaɗara biẽ́ ɓʉa.”–
6 Ara maʉ̃da caiɗu wãsia. Jidaɗe wãpeɗa Joseba jarabiɗara jarasia.
7 Maʉ̃ne dji djabarãba jarasiɗaa:
–¿Cãrẽ cãrẽã dadji boroba mãwã jara ɓʉ? Dairãra ne drʉaɗacaa.
8 Acʉdua, parata dai sacoɗe ɓaɗada daiba ununapeɗa Canaaʉ̃ druaɗeba jẽda enesiɗaa. Mãwã daiba jipa osiɗabʉrʉ ¿cãrẽ cãrẽã bʉ boro paratara wa oro siɗa drʉaɗi?
9 Bʉa maʉ̃ tazada dairã sacoɗe unuibʉrʉ dji eroɓʉra beuida ɓʉa. Maʉ̃ awara dairãra bʉ boro nezocarãda ɓeaɗia.–
10 Maʉ̃ne Jose nezocarã boroba jarasia:
–Bia ɓʉa, mãẽteara bãrãba jara panʉ quĩrãca oya. Dji ne drʉaɗara mʉ̃ nezoca baya, baribʉrʉ waabemara beɗea neẽ́ ɓeaɗia.–
11 Ara maʉ̃da ãdji sacora burroɗe jʉ̃ ɓeada ẽrãnapeɗa egode ɓʉsiɗaa. Maʉ̃be ãdjiza ewacuasiɗaa.
12 Ewacuapeɗaɗacarea Jose nezocarã boroba jʉrʉ wãsia dji nabema djaba sacoɗeba aɓa dji tẽãbema sacoɗaa. Maʉ̃ne tazara dji tẽãbema Benjamiʉ̃ sacoɗe unusia.
13 Ara maʉ̃da sopuaɗeba dji djabarãba cacuaɗe jʉ̃ panʉra cũẽtacuasiɗaa. Maʉ̃be ãdji sacora wayacusa ãdji burroɗe ɓʉcuaɗapeɗa jẽda puruɗaa wãsiɗaa.
14 Jose waɗi diguiɗa ɓʉɗe Judara dji djabarã siɗa idjima jũẽsiɗaa. Ãdjirãra ne wayaaɗeba idji quĩrãpita egode ɓarru copanesiɗaa.
15 Maʉ̃be Joseba ãdjirãa jarasia:
–Bãrãba ¿cãrẽ cãrẽã mʉ̃ tazara jãwã drʉasiɗa? ¿Bãrãba adua panʉca ne cawaiẽ́ ɓeada mʉ̃a cawabarida?–
16 Judaba panusia:
–Dai boro, ¿cãrẽda jaraɗi? ¿Sãwã jaraɗi daira beɗeaɗe panʉẽ́da? Jũma daiba biẽ́ opeɗaɗa carea Ãcõrẽba cawa obʉrʉa. Dairãra bʉ jʉwaeɗa panʉa. Bʉ nezocarã baɗia, idjaɓa bʉ taza drʉa eroɓaɗa siɗa bʉ nezoca baya.–
17 Maʉ̃ne Joseba jarasia:
–Mʉ̃a mãwã oẽ́a. Dji taza drʉa eroɓaɗadrʉ mʉ̃ nezoca baya. Waabemara necai wãnadua bãrã zezamaa.–
18 Maʉ̃be Judara Jose caita wãpeɗa jarasia:
–Mʉ̃ boro, mʉ̃ ume quĩrũrãdua. Bʉra Egiptoɗebema boro quĩrãca ɓʉmĩna mʉ̃ quĩrã djuburia bʉ ume idu beɗeabidua.
19 Dai naãrã zesiɗaɗe bʉa iwiɗisia daira zeza bara panʉ cawaya idjaɓa djaba bara panʉ cawaya.
20 Maʉ̃ne daiba panusiɗaa zeza drõã quiruda eropanʉda idjaɓa djaba cũdra ɓʉda aɓa eropanʉda. Maʉ̃ warrara dai zezaba drõã ɓʉɗe unusia. Idji djaba arada beusia. Ãdji papaɗebemara aɓabe idjidrʉ ɓʉa. Idjira dai zezaba bio quĩrĩã ɓʉa.
21 Idjaɓa bʉa daia jarasia, “Maʉ̃ warrara enenadua mʉ̃a unui carea.”
22 Baribʉrʉ daiba bʉ́a jarasiɗaa maʉ̃ warrara dji zeza ɓʉmaʉba ãyã wãcara ɓʉda. Ãyã wãibʉrʉ dji zezara sopuaba beuyaɗa asiɗaa.
23 Maʉ̃ne bʉa daia jarasia: “Bãrã djaba tẽãbemada bãrã ume zeẽ́bʉrʉ, bãrãra mʉ̃maa wayacusa zecara panʉda.”
24 Maʉ̃be dairãra dai zezama jũẽnapeɗa bʉa jaraɗara jũma nẽbʉrʉsiɗaa.
25 Dãrãbʉrʉɗe dai zezaba jarasia: “Waya trigo nẽdoɗe wãnadua.”
26 Maʉ̃ne dairãba idjía jarasiɗaa: “Dairãra poya wãnaẽ́a. Aɓabe dai djaba tẽãbemada dai ume wãibʉrʉ wãnia. Idjida dai ume wãẽ́bʉrʉ, jãʉ̃ ẽberãmaa wãcara panʉa.”
27 Maʉ̃ne mʉ̃ zeza bʉ nezocaba daia jarasia: “Bãrãba cawa panʉa mʉ̃ wẽrãba warra umébe mʉ̃́a to diasida.
28 Aɓara nẽbasia. Maʉ̃ ewariɗeba ʉ̃taa waa unuẽ́ ɓʉ bẽrã mʉ̃maarã animarãba beapeɗa cobuesia.
29 Maʉ̃ bẽrã idji djaba arada edeɗapeɗa beuibʉrʉ, bãrãba mʉ̃ra sopuaba beaɗia.”
30 44:30-31 Dairã boro, dji cũdra carea dai zezara waɗi ɓʉa. Maʉ̃ bẽrã mʉ̃ra dji cũdra neẽ́ mʉ̃ zezamaa wãsira maʉ̃ne idji warrada unuẽ́bʉrʉ mʉ̃ zezara beuya. Mãwã dai bʉ nezocarãba dai zeza drõã ɓʉra sopuaba beaɗia.
32 Mʉ̃ bʉ nezocaba mʉ̃ zezaa wãrãneba jarasia dji cũdrara waya eneida. Mʉ̃a jarasia: “Zeza, mʉ̃a waya bʉmaa eneẽ́bʉrʉ, bʉ quĩrãpita mʉ̃ra beɗeaɗe ɓaya aɓa mʉ̃ beubʉrʉɗaa.”
33 Maʉ̃ bẽrã mʉ̃a bʉ́a beɗea djuburiaya dji cũdrabari mʉ̃drʉ nama eroɓemãrẽã bʉ nezoca bai carea. Maʉ̃ne dji cũdrara idji djabarã ume idu wãbidua.
34 ¿Sãwã mʉ̃da dji cũdra neẽ́ mʉ̃ zezamaa wãi? Mʉ̃ zeza sopuaba biẽ́ ɓʉda unu quĩrĩãẽ́ ɓʉa.–
