Genesi 46:1-33
46 Ara maʉ̃da Jacobo Israel abadara wãsia jũma idjia eroɓʉ bara. Wãbʉrʉɗe Beersebáɗe jũẽsia. Mama idjia animarãda idji zeza Isaba ĩjã ɓaɗa Ãcõrẽa babue diacuasia.
2 Maʉ̃ diamasi Israelba cãĩmocara quĩrãca ũrĩsia Ãcõrẽra idji ume beɗea ɓʉda. Ãcõrẽba trʉ̃ jarasia:
–Jacobo, Jacobo.–
Jacoboba panusia:
–Mʉ̃ra nama ɓʉa.–
3 Ãcõrẽba jarasia:
–Mʉ̃ra bʉ zezaba ĩjã ɓaɗa Ãcõrẽa. Wayarãdua Egiptoɗaa wãi carea. Jãma mʉ̃a puru waiɓʉada bʉɗeba yõbiya.
4 Mʉ̃ra bʉ ume Egiptoɗaa wãya. Maʉ̃be bʉɗeba yõbʉdarãra jẽda eneya. Idjaɓa bʉ beubʉrʉɗe Josera arima ɓaya.–
5 Ara maʉ̃da Jacobora Beersebáɗeba wãsia. Egiptoɗebema boroba carreta diabuecuaɗaɗe Jacobo warrarãba idjira, ãdji warrarãra, ãdji quimarã siɗa edesiɗaa.
6 Jacoboba idji warrarã biɗa ãdji animarã ɓeara idjaɓa jũma ãdjia Canaaʉ̃ druaɗe edapeɗaɗa siɗa Egiptoɗaa edesiɗaa.
7 Jacoboba idji warrarãra, idji caurãra, idji wiuzaquerãra, idji ãĩzaquerã siɗa Egiptoɗaa jũma edesia.
Jacobo ẽberãrã Egiptoɗaa wãpeɗaɗa
8 Jacobo Israel abada warrarã Egiptoɗaa wãpeɗaɗara naʉ̃gʉrã basía:
Jacobo warra iwina Rubeʉ̃da wãsia.
9 Rubeʉ̃ba edesia idji warrarã Hanoc, Palú, Hezroʉ̃, Carmi siɗa.
10 Jacobo warra Simeoʉ̃ siɗa wãsia. Simeoʉ̃ba edesia idji warrarã Jemuel, Jamiʉ̃, Ohad, Jaquiʉ̃, Zohar, Saul siɗa. Saulora cananeo wẽrãba toɗa basía.
11 Jacobo warra Levi siɗa wãsia. Leviba edesia idji warrarã Gersoʉ̃, Coá, Merari siɗa.
12 Jacobo warra Juda siɗa wãsia. Judaba edesia idji warrarã Sela, Paré, Zará siɗa. Idji warrarã Erera, Onaʉ̃ siɗa Canaaʉ̃ druaɗe beusiɗaa. Paréba idji warrarã Hezroʉ̃da, Hamul siɗa edesia.
13 Jacobo warra Isacar siɗa wãsia. Isacarba idji warrarã Tola, Puvá, Job, Simroʉ̃ siɗa edesia.
14 Jacobo warra Zabuloʉ̃ siɗa wãsia. Zabuloʉ̃ba idji warrarã Sered, Eloʉ̃, Jahleel siɗa edesia.
15 Maʉ̃ warrarã sei panʉra Leaba Jacoboa Araʉ̃ druaɗe to diasia. Leaba Jacobo cau Dina siɗa tosia. Ãdjiɗeba yõpeɗaɗara 33 wãsiɗaa dji umaquĩrãrã, dji wẽrãrã ãbaa.
16 46:16-18 Jacoboba Lea edasiɗe dji zãwãrẽ Labaʉ̃ba nezocawẽrã Zilpara Leaa diasia. Zilpaba warrarãda Jacoboa to diasia. Maʉ̃gʉrã siɗa Egiptoɗaa wãsiɗaa ãdji warrarã bara. Jũma ãbaa diecisei wãsiɗaa.
Ãdji warra Gaba idji warrarã Zipioʉ̃, Hagui, Ezboʉ̃, Suni, Eri, Arodi, Areli siɗa edesia.
Ãdji warra Aserba edesia idji warrarã Imna, Isúa, Isúi, Beria, dji cau Será siɗa. Beria warrarãra Hebere idjaɓa Malquiel basía.
19 Jacobo quima Raquel warrarãra Jose idjaɓa Benjamiʉ̃ basía.
20 Jose warrarã Egiptoɗe topeɗaɗara Manase idjaɓa Epraiʉ̃ basía. Ãdji papara Asena basía. Asena zezara Potipera basía. Idjira Oʉ̃ puruɗe ʉ̃mãdaúa bia beɗeabadarã sacerdote basía.
21 Benjamiʉ̃ warrarãra naʉ̃gʉrã basía: Bela, Bequer, Asbel, Gera, Naamaʉ̃, Ehi, Ros, Mupiʉ̃, Hupiʉ̃, idjaɓa Ard.
22 Jũma maʉ̃gʉrãra Raquelɗeba Jacobo ume yõsiɗaa. Jũma ãbaa catorce wãsiɗaa.
23 46:23-25 Jacoboba Raquel edasiɗe dji zãwãrẽ Labaʉ̃ba nezocawẽrã Bilhara Raquelea diasia. Bilhaba warrarãda Jacoboa to diasia. Maʉ̃gʉrã siɗa Egiptoɗaa wãsiɗaa ãdji warrarã bara. Ãdji warra Daʉ̃ba idji warra Husiʉ̃ edesia. Ãdji warra Neptaliba edesia idji warrarã Jahzeel, Guni, Jezer, Sileʉ̃ siɗa. Jũma ãbaa siete wãsiɗaa.
26 Jũma Jacoboɗeba yõpeɗaɗarãra idji ume Egiptoɗaa wãsiɗaa. Idji ãĩgurã juachaẽ́, jũma ãbaa 66 wãsiɗaa.
27 Maʉ̃gʉ awara Jose warrarã Egiptoɗe topeɗaɗada umé panasiɗaa. Jũma ãbaa Jacobo ẽberãrã Egiptoɗe jũẽpeɗaɗara setenta panasiɗaa.
Jacoboba waya Jose ununa
28 Jacobo Israel abadaba Judada Josemaa na wãbisia ãdjira Goseʉ̃ ẽjũãne acʉɗe zemãrẽã. Maʉ̃misa ãdjirãra Goseʉ̃ ẽjũãne jũẽsiɗaa.
29 Ãdji jũẽsiɗaɗe Joseba idji nezocaa jarasia idji carreta enemãrẽã. Ara maʉ̃da Goseʉ̃naa idji zeza Israel audiaɓariɗe wãsia. Idji zeza unusiɗe ojũẽpeɗa dãrã jĩãsia.
30 Mãwã ɓʉɗe Israelba Josea jarasia:
–Mʉ̃a bʉ quĩrãra unubʉrʉ bẽrã cawa ɓʉa bʉra waɗi zocai ɓʉda. Jãʉ̃be mʉ̃ra necai beuya.–
Joseba idji djabarã Egiptoɗebema boromaa edeɗa
31 Maʉ̃be Joseba idji djabarãa, jũma idji zeza ẽberãrãa biɗa jarasia:
–Egiptoɗebema boromaa mʉ̃a jaraɗe wãya bãrãra jũẽsiɗada. Mʉ̃a idjía jaraya: “Mʉ̃ djabarãra, mʉ̃ zeza ẽberãrã Canaaʉ̃ druaɗe duananara jũma mʉ̃maa zesiɗaa.
32 Ãdjirãra animarã wagabada bẽrã ãdji ovejada, paca siɗa enesiɗaa. Jũma ãdjirãba eroɓea siɗa enesiɗaa.”
33 46:33-34 Maʉ̃be dji boroba bãrã trʉ̃peɗa iwiɗibʉrʉɗe “¿Bãrãba cãrẽda obada?”, nãwã jaraɗadua: “Daira warra eɗaʉba animarã daupẽ cawa ɓeaa, dai drõã naẽnabemarãba obadapeɗaɗa quĩrãca.” Mãwã jarasiɗara dji boroba bãrãra jĩga Goseʉ̃ ẽjũãne idu ɓebiya, egiptorãmaarã oveja wagabadara dji biaẽ́ bẽrã.–
