Genesi 49:1-33
49 49:1-2 Maʉ̃be Jacoboba jũma idji warrarã trʉ̃bigapeɗa jarasia:
–Mʉ̃ warrarã, mʉ̃ beɗea ũrĩne caita zeɗadua. Mʉ̃a jaraya nocoarebema ewariɗe bãrãra sãwãnida.
2 –
3 Rubeʉ̃, bʉra mʉ̃ warra iwinaa. Mʉ̃ drõã baɗacarea bʉdrʉ naãrã unusia.
Mʉ̃ ʉɓʉara bʉɗeba unubi ɓʉa. Bʉdrʉ biara wayabadaa. Bʉra dji dromaara ɓʉa.
4 Baribʉrʉ do zebʉrʉɗe poyaɗaca quĩrãca bʉa ara bʉdji cacuara poyaẽ́ basía. Bʉra mʉ̃ wẽrã ume cãĩsia.
Mʉ̃ cʉɗaɗe cadjiruada osia.* Maʉ̃ carea bʉra bʉ djabarãnebemada dji dromaara ɓaẽ́a.
5 Simeoʉ̃, Levi, bãrãba aɓari crĩchada jʉrʉbadaa. Bãrãra beɗea ausiɗaa biẽ́ oɗi carea.
6 Quĩrũbiɗeba bãrãba ẽberãrãra quenasiɗaa.* Bãdji quĩrĩãã paca jĩrũ quẽgura necoba tʉcuasiɗaa.
Bãrã ãbaa dji jʉrebʉdaɗe mʉ̃ra eɗa ɓaẽ́a. Bãrãba crĩcha panʉ quĩrãca mʉ̃a oẽ́a.
7 Bãrãra cadrʉa panʉ bẽrã djãrãra jũmawãyã biẽ́ obadaa. Maʉ̃ carea bio biẽ́ panania. Mʉ̃a bãrã ẽberãrãra jũma israelerã tãẽna wãbiya.
8 Juda, bʉ dji quĩrũrãda bʉ jʉwaeɗa eroɓaya. Bʉ djabarãba wayaaɗeba bʉ quĩrãpita ɓarru copanenapeɗa bia jaraɗia.
9 Juda, bʉra imama quĩrãca ɓʉa. Imamara ne beapeɗa, ne copeɗa jãwũãbaria. Maʉ̃be egode chũmepeɗa ʉ̃nãũbaria.
¿Caiba idjira mĩã sẽi? Ara maʉ̃ quĩrãca bʉa ẽberãrãra poyapeɗa ʉ̃nãũya, dewararãba wayaɗi bẽrã.
10 Ni aɓaʉba dji boro bacuru Juda jʉwaɗe ɓʉra jãrĩnaẽ́a. Idjiɗeba yõbʉdarãba maʉ̃ bacurura ewariza eroɓeaɗia.
Maʉ̃ bacuru djibari zebʉrʉɗe jũmarãba idji beɗeara ĩjã o duanania.*
11 Juda ẽberãrãra bio bara panania. Ãdji uvara bio zaui bẽrã ãdji burro zaquera uva jʉ̃carama jʉ̃nia jõnamãrẽã.
Uva ɓa siɗa bio barai bẽrã ãdjirãba quĩrĩã panʉbara ãdji wuara uva ɓaɗe tãtocasiɗaa.
12 Ãdjirã daura uva ɓa cãyãbara purea pãĩmaara ɓeaɗia. Ãdjirã quiɗara totroa ɓeaɗia paca juɓa quĩrãca.
13 Zabuloʉ̃, bʉ ẽberãrãda pusa icawa duanania. Ãdji druaɗe barcora necai wiɓariɗia. Ãdji ẽjũãra aɓa Sidoʉ̃ drua daucha ɓaya.
14 Isacar, bʉra burro quĩrãca zarea ɓʉa. Baribʉrʉ bʉa atau ɓʉ edre taɓabaria.
15 Bʉ ẽberãrãba ẽjũã biada ʉ̃nãũni carea unubʉdaɗe ãdjirãra nezocarãda duanenia. Maʉ̃ne eɗaa jũrã tʉɗia ne atauɗi carea.
16 Daʉ̃, bʉ purura jipa pe eroɓaya waabema israelerãba ãdji puru obada quĩrãca.
17 Daʉ̃, bʉ ẽberãrãra minijĩchia panania dama o icawa ɓʉ quĩrãca.
Damaba cawayora jĩrũne capeɗa dji cawayo ʉ̃rʉ̃ chũmʉra uɗu ɓaebibaria.
Aɓari quĩrãca bʉ ẽberãrãra zocãrãẽ́ panʉmĩna mẽsrã panania.
18 ¡Ay Ãcõrẽ, mʉ̃a jʉ̃ã ɓʉa bʉa mʉ̃ra ẽdrʉ ɓʉmãrẽã!
19 Ga, dewararãba bʉ purura uraɗe zeɗimĩna bʉ ẽberãrãba ãdjirãra poyaɗia.
20 Aser, bʉ ẽberãrãba coɗira dji bia baya. Maʉ̃da ẽberãrã bororãa cobigaɗia.
21 Neptali, bʉ ẽberãrãra ɓegui mẽã nĩbabari quĩrãca duanʉa. Ãdji warrarãra quĩrãwãrẽã queɗeaa.
22 Jose, bʉra bacuru do icawa ɓʉ quĩrãca ɓʉa. Dji jʉwatera bia zaubaria, mõgara puru auɗu jũrã ca ɓʉ cãyãbara ʉ̃tʉara waribaria.
23 Cha drʉ cawa ɓeaba bʉra bariduaareba chaba drʉ panesiɗaa. Bʉra quĩrãma panasiɗaa.
24 Baribʉrʉ bʉ enedrʉmara bio enatʉ eronũmasia jʉwa wẽsa ãdjimaa drʉi carea.
Bʉa ãdjirãra poyasia mʉ̃ Ãcõrẽ ne jũma poya ɓʉba bʉra carebaɗa bẽrã, dadji israelerã wagabari Ãcõrẽba bʉra waga ɓʉ bẽrã, dadji israelerã Ãcõrẽ mõgara droma quĩrãca ɓʉba bʉra jũãtrʉ eroɓʉ bẽrã.
25 Bʉ zezaba ĩjã ɓʉ Ãcõrẽneba bʉa poyasia. Ara maʉ̃ Ãcõrẽba bʉra carebaya.
Ãcõrẽ ne jũma poya o ɓʉba bʉ ẽberãrãa bajãneba cueda diaya. Idjaɓa naʉ̃ ẽjũãne baidoda diaya.
Bʉɗeba yõbʉda wẽrãrãba, bʉ animarã ɓea biɗa warrarãda zocãrã to ɓeaɗia idjaɓa ju dawa ɓeaɗia.
26 Jose, mʉ̃a bʉra biara jara ɓʉsia mʉ̃ djibarirãba mʉ̃ bia jara ɓʉpeɗaɗa cãyãbara.*
Eya jõca quĩrãca bʉ bia jara ɓʉɗara jõca baya, bʉ djabarã cãyãbara bʉdrʉ Ãcõrẽba biara ɓʉɗa bẽrã.
27 Benjamiʉ̃, bʉra usa cadrʉa quĩrãca ɓʉa. Usa cadrʉaba diapeɗa beaɗara copeɗa dji aɗubaɗada quewara jeɗecabaria.
Ara maʉ̃ quĩrãca bʉa dji quĩrũra poyapeɗa ãdji nebiada jeɗecaya.–
28 Mãwã Jacoboba idji warrarãra bia jara ɓʉsia. Ãdjiza idjia ariɗe jarasia. Idji warrarã doce panʉneba yõpeɗaɗara Israel puru doce panasiɗaa.
Jacobo jaiɗaɗa
29 49:29-32 Maʉ̃be Jacoboba idji warrarãa jarasia:
–Mʉ̃ra beubʉrʉa. Mʉ̃ra tʉɓariɗadua mʉ̃ drõãenabemarã tʉɓaripeɗaɗama Macpela ẽjũã uriaɗe. Macpelara Canaaʉ̃ne ɓʉa Mamreɗeba ʉ̃mãdau odjabariare. Abrahaʉ̃ba maʉ̃ ẽjũãra dji uria siɗa hitita Eproʉ̃ne ɓaɗada nẽdosia idji quima tʉɓari carea.* Mama Abrahaʉ̃ siɗa tʉɓarisiɗaa. Mʉ̃ zeza Isara, dji quima Rebeca siɗa mama tʉɓarisiɗaa. Mʉ̃a Lea siɗa mama tʉɓarisia.–
33 Jacoboba idji warrarãa mãwã jarapeɗa idji cʉɗaɗe wayacusa taɓesia. Taɓepeɗa jaiɗasia.
