Genesi 5:1-32
5 Nama ɓʉ́ ɓʉa Adaʉ̃neba yõpeɗaɗaɗebemada. Ãcõrẽba ẽberãrã osiɗe ara idji quĩrãca osia.
2 Dji umaquĩrã, dji wẽrã siɗa osia. Maʉ̃ne Ãcõrẽba ãdjira yõnamãrẽã bia jara ɓʉsia.* Ãdji osi ewariɗe ãdjira trʉ̃ ɓʉsia “ẽberãrã.”
3 Adaʉ̃ ciento treinta poa ɓasiɗe warrada unusia ara idji quĩrãca ɓʉda. Idjira trʉ̃ ɓʉsia Se.
4 Se ununacarea Adaʉ̃ra ochociento poa ɓasia. Maʉ̃ne warrarã, wẽrãcaurã siɗa unusia.
5 Jũma ãbaa Adaʉ̃ba noveciento treinta poa unusia. Mãwã ɓʉda jaiɗasia.
6 Sera ciento cinco poa ɓasiɗe Enóda unusia.
7 Enó ununacarea Sera ochociento siete poa ɓasia. Maʉ̃ne warrarã, wẽrãcaurã siɗa unusia.
8 Jũma ãbaa Seba noveciento doce poa unusia. Mãwã ɓʉda jaiɗasia.
9 Enó noventa poa ɓasiɗe idji warra Cainaʉ̃da unusia.
10 Cainaʉ̃ ununacarea Enóra ochociento quince poa ɓasia. Maʉ̃ne warrarã, wẽrãcaurã siɗa unusia.
11 Jũma ãbaa Enóba noveciento cinco poa unusia. Mãwã ɓʉda jaiɗasia.
12 Cainaʉ̃ setenta poa ɓasiɗe idji warra Majalaleelda unusia.
13 Majalaleel ununacarea Cainaʉ̃ra ochociento cuarenta poa ɓasia. Maʉ̃ne warrarã, wẽrãcaurã siɗa unusia.
14 Jũma ãbaa Cainaʉ̃ba noveciento die poa unusia. Mãwã ɓʉda jaiɗasia.
15 Majalaleel sesenta y cinco poa ɓasiɗe idji warra Jaréda unusia.
16 Jaré ununacarea Majalaleelera ochociento treinta poa ɓasia. Maʉ̃ne warrarã, wẽrãcaurã siɗa unusia.
17 Jũma ãbaa ochociento noventa y cinco poa unusia. Mãwã ɓʉda jaiɗasia.
18 Jaré ciento sesenta y dos poa ɓasiɗe idji warra Enocoda unusia.
19 Maʉ̃ Enoco ununacarea Jaréra ochociento poa ɓasia. Maʉ̃ne warrarã, wẽrãcaurã siɗa unusia.
20 Jũma ãbaa Jaréba noveciento sesenta y dos poa unusia. Mãwã ɓʉda jaiɗasia.
21 Enoco sesenta y cinco poa ɓasiɗe idji warra Matusaleʉ̃da unusia.
22 Matusaleʉ̃ ununacarea Enocora tresciento poa Ãcõrẽ ume jipa nĩbasia. Maʉ̃ne warrarã, wẽrãcaurã siɗa unusia.
23 Jũma ãbaa tresciento sesenta y cinco poa unusia.
24 Enocora ewariza Ãcõrẽ ume jipa nĩbasia. Mãwã ɓʉɗe nẽbasia Ãcõrẽba zocai edeɗa bẽrã.
25 Matusaleʉ̃ ciento ochenta y siete poa ɓasiɗe idji warra Lameda unusia.
26 Maʉ̃ Lame ununacarea Matusaleʉ̃ra seteciento ochenta y dos poa ɓasia. Maʉ̃ne warrarã, wẽrãcaurã siɗa unusia.
27 Jũma ãbaa noveciento sesenta y nueve poa unusia. Mãwã ɓʉda jaiɗasia.
28 Lame ciento ochenta y dos poa ɓasiɗe warrada unusia.
29 Maʉ̃ne Lameba jarasia: “Ãcõrẽba naʉ̃ ẽjũãra biẽ́ ɓʉsia. Maʉ̃ bẽrã dadjirã jʉwaba ẽjũã o panʉra zarea ɓʉa, baribʉrʉ naʉ̃ warrabʉrʉ dadjirãra ʉ̃nãũbiya.” Mãwã dji warrara trʉ̃ ɓʉsia Noé.*
30 Maʉ̃ Noé ununacarea Lamera quiniento noventa y cinco poa ɓasia. Maʉ̃ne warrarã, wẽrãcaurã siɗa unusia.
31 Jũma ãbaa seteciento setenta y siete poa unusia. Mãwã ɓʉda jaiɗasia.
32 Noé quiniento poa ɓasiɗe dji warrarã Seʉ̃da, Caʉ̃da, Jape siɗa unusia.
