Genesi 6:1-22
6 Naʉ̃ ẽjũãne ẽberãrã yõsiɗaɗe caurãda unucuasiɗaa.
2 Maʉ̃be Ãcõrẽ warrarãba maʉ̃ awẽrãrãra quĩrãwãrẽã unusiɗaa.* Maʉ̃ bẽrã ãdjirãba awuabʉdada edasiɗaa.
3 6:3-4 Edapeɗaɗacarea warrarãda yõsiɗaa. Maʉ̃ warrarãra naʉ̃ ẽjũãne drasoa waiɓʉa warisiɗaa. Ãdjirãra trʉ̃ ɓʉga ɓeasia maʉ̃ drõãenabema ewariɗe, nocoarebema ewariɗe biɗa. Ãdjirã carea Ãcõrẽba jarasia: “Mʉ̃a ẽberãrãa ʉ̃yãba diasia zocai pananamãrẽã baribʉrʉ djara bẽrã beuɗia. Poa ciento veintebe ɓeaɗia.”*
4 –
5 Ãcõrẽba unusia ẽberãrãba jũma naʉ̃ ẽjũãne cadjiruada jũmawãyã o panʉda. Unusia ãdjia aɓabe cadjirua oɗidrʉ ewariza crĩcha panʉda.
6 Maʉ̃ne Ãcõrẽra sopua ɓesia naʉ̃ ẽjũãne ẽberãrã oɗa carea. Idjimaarã biara ɓacasia ãdjira oɗaẽ́bara.
7 Nãwã crĩchasia: “Mʉ̃a ẽberãrãda, animarãda, animarã ãdji jãne wãbadada, ĩbana siɗa jũma jõbiya. Mʉ̃a ãdjira oɗaẽ́bara biara ɓacasia.”
8 Baribʉrʉ Ãcõrẽba Noéda bia unusia.
Ãcõrẽba Noéa jãba droma baurude quĩrãca ɓʉ obiɗa
9 Nama Noéɗebemada nẽbʉrʉ ɓʉa.
Noéra ẽberã jipa ɓasia. Ãcõrẽ ume jipa nĩbabadjia. Idji ewariɗebemarã tãẽna aɓabe idjidrʉ jaraɗi neẽ́ ɓasia.
10 Noéba warrarãda ũbea unusia: Seʉ̃, Caʉ̃, idjaɓa Jape.
11 Maʉ̃ne naʉ̃ ẽjũãne ɓeara Ãcõrẽ quĩrãpita biẽ́ duanesiɗaa baridua cadjiruara jũmawãyã o ɓea bẽrã.
12 Ãcõrẽba naʉ̃ ẽjũã acʉbʉrʉɗe wãrãda jũma biẽ́ ɓʉda unusia jũma ẽberãrãba ne jũmane cadjirua o ɓea bẽrã.
13 Maʉ̃ carea Ãcõrẽba Noéa jarasia:
–Mʉ̃a naʉ̃ ẽjũãne zocai ɓeara jũma jõbiya jũmawãyã cadjiruada o ɓea bẽrã. Idjaɓa naʉ̃ ẽjũã siɗa jũma ãrĩya.
14 6:14-16 Maʉ̃ carea bʉa jãba dromada bacuru biaɗebemada odua.* Opeɗa cãdorronaba soadua eɗaare, dajadaare biɗa. Maʉ̃ jãbara naʉ̃ waiɓʉaɗe odua: dji drasoada setenta y cinco braza, dji jeɗeada doce braza, idjaɓa dji ʉ̃tʉada siete braza. Jãba dromara cʉɗapõ ũbea odua. Cʉɗapõza zocãrã tʉajucuadua. Maʉ̃be cʉɗapõ ʉ̃taarebemane dajadaa acʉbadada odua. Dji ʉ̃tʉara bicaca aɓa ɓaida ɓʉa dji ãquiɗaɗeba eɗaa. Idjaɓa eɗa wãbadada jãba droma orroɗe odua.
17 Pãrãnacarea mʉ̃a dopapada zebiya naʉ̃ ẽjũãra jũma ũ wãmãrẽã. Mãwã jũma zocai ɓeara mʉ̃a jõbiya. Animarã ɓeara, ẽberãrã siɗa jũma quininia.
18 Baribʉrʉ mʉ̃ra bʉ ume beɗea ɓʉya bãrã ẽdrʉ edai carea. Bʉda, bʉ warrarãda, bʉ quimada, bʉ ãĩgurã siɗa jãba dromane ɓadoɗia.
19 Idjaɓa jũma animarãda umé uméa, dji umaquĩrãda dji wẽrãda jãba dromane eɗa wãbiɗia bʉ quĩrãca zocai ɓeaɗamãrẽã.
20 Ĩbanada, dewara animarãda, animarã ãdji jãne wãbada siɗa umé uméa bʉmaa zeɗia bʉa ãdjirã zocai wagamãrẽã.
21 Idjaɓa coɗi careabemada jʉrʉ pepeɗa wagadua bãrãba maʉ̃ animarã biɗa co panani carea.–
22 Ãcõrẽba jaraɗa quĩrãca Noéba jũma osia.
Beɗea eɗaare
^ 6:2. Ʉ̃cʉrʉmaarã maʉ̃ Ãcõrẽ warrarãra bajãnebema nezocarãa. Dewaramaarã Seɗeba yõpeɗaɗarãda mãwã panʉa.
^ 6:3-4. Mʉ̃a ẽberãrãa ʉ̃yãba diasia zocai pananamãrẽã baribʉrʉ djara bẽrã beuɗia. Ʉ̃cʉrʉmaarã maʉ̃ beɗeaba nãwã jara ɓʉa: “Mʉ̃ Jaurera ewariza ẽberãrã ume djõ ɓaẽ́a ãdjirãra djara bẽrã.”
^ 6:14-16. Bacuru bia. Hebreo beɗeaɗe “gofer” ɓʉ́ ɓʉa. Baribʉrʉ hebreo beɗea cawa ɓeaba maʉ̃ gofer bacurura adua panʉa.
