Genesi 7:1-24
7 Mãwãnacarea Ãcõrẽba Noéa jarasia:
–Naʉ̃ ẽjũãnebema ẽberãrã tãẽna mʉ̃a aɓabe bʉdrʉ jipa unu ɓʉa. Maʉ̃ bẽrã bʉra jũma bʉ ẽberãrã siɗa jãba dromane eɗa wãnadua.
2 Dji mʉ̃́a babue diaida ɓʉ animarãnebemada dji umaquĩrãrãda siete idjaɓa dji wẽrãrãda siete edadua, baribʉrʉ animarã mʉ̃́a babue diacara panʉnebemada aɓa dji umaquĩrãda, aɓa dji wẽrãda edadua.
3 Ara maʉ̃ quĩrãca ĩbanaza dji umaquĩrãrãda siete, dji wẽrãrãda siete edadua naʉ̃ ẽjũãne zocai ɓeaɗamãrẽã.
4 Siete ewari baɗacarea mʉ̃a cuarenta ewari ãsa diamasi biɗa cueda zebiya. Maʉ̃ba mʉ̃a naʉ̃ ẽjũãne zocai ɓea oɗara jũma jõbiya.–
5 Ara maʉ̃da Noéba jũma osia Ãcõrẽba jaraɗa quĩrãca.
6 Noé seisciento poa ɓasiɗe dopapaba naʉ̃ ẽjũãra jũma ũ wãsia.
7 Dopapa carea Noéra jãba dromane eɗa wãsia. Dji warrarãda, dji quimada, dji ãĩgurã siɗa eɗa wãsiɗaa.
8 Jãba dromane eɗa wãsiɗaa Ãcõrẽa babue diabada animarãda, Ãcõrẽa babue diacara panʉ animarã siɗa. Ĩbana ɓeada, jũma ãdji jãne wãbada animarã siɗa eɗa wãsiɗaa.
9 Umé uméa dji umaquĩrãda dji wẽrãrã siɗa jãba dromane eɗa wãsiɗaa Ãcõrẽba Noéa jaraɗa quĩrãca.
10 Siete ewari baɗacarea dopapaba ẽjũãra ũ wãsia.
11 Noé seisciento poa ɓasiɗe ara maʉ̃ poaɗe jeɗeco aɓa auɗu diecisiete ewari ɓʉɗe ũ wãsia. Ara maʉ̃ ewariɗe pusa edrebema baidora ʉ̃taa bogadrʉ ze nũmesia, idjaɓa cue siɗa bio ze nũmesia.
12 Naʉ̃ ẽjũãne cue ze nũmasia cuarenta ewari ãsa, diamasi biɗa.
13 Cue ze nũmesiɗe Noéra idji warrarã Seʉ̃, Caʉ̃, idjaɓa Jape siɗa jãba dromane eɗa wãsiɗaa. Noé quimada, dji ãĩgurã siɗa eɗa wãsiɗaa.
14 Ãdjirã ume quĩrãtanoa animarã mẽãbemada, daupẽbadada, ãdji jãne wãbadada, ĩbana siɗa jãba dromane eɗa wãsiɗaa.
15 Animarã ɓeara jũma umé uméa Noémaa zeseɗapeɗa jãba dromane eɗa wãsiɗaa.
16 Animarã ɓeaza eɗa wãsiɗaa dji umaquĩrãda dji wẽrãda, Ãcõrẽba Noéa jaraɗa quĩrãca. Noé eɗa wãnacarea Ãcõrẽba dji eɗa wãbadara jũãtrʉ nũmʉsia wagai carea.
17 Cuarenta ewariɗe dopapaba jũma ũ wãbʉrʉ basía. Ʉ̃taa ũ wãbʉrʉɗe jãba dromara baido ʉ̃rʉ̃ ũmesia.
18 Dora ewariza ʉ̃taa ũ wãsia. Waiɓʉa ũ wãsia. Maʉ̃ bẽrã jãba dromara baido ʉ̃rʉ̃ pʉrrʉga ũmesia.
19 Mãwã ɓʉɗe doba naʉ̃ ẽjũãra jũma ũ wãsia. Eya ʉ̃tʉara ɓea siɗa jũma ũ wãsia.
20 Eyara jũma ũ nũmepeɗa waɗi braza quĩmãrẽ auɗu ũ wãsia.
21 Maʉ̃ bẽrã naʉ̃ ẽjũãne zocai ɓeara jũma quinisiɗaa. Ĩbana ɓeada, daupẽbada animarãda, mẽãbemada, jũma animarã ãdji jãne wãbada siɗa quinisiɗaa. Idjaɓa ẽberãrã siɗa jũma quinisiɗaa.
22 Jũma druabema ʉ̃yãbabada ɓeara quinisiɗaa.
23 Wãrãda jũma druabema zocai ɓeara quinisiɗaa. Ẽberãrãda, animarãda, ãdji jãne wãbadada, ĩbana siɗa quinisiɗaa. Mãwã Ãcõrẽba naʉ̃ ẽjũãne ɓeaɗara jũma jõbisia. Maʉ̃ne aɓabe panesiɗaa Noéda, idji ume jãba dromane eɗa wãpeɗaɗa siɗa.
24 Naʉ̃ ẽjũãra dopapaba ciento cincuenta ewari ũ nũmasia.
