Genesi 8:1-22
8 8:1-2 Naʉ̃ ẽjũã ũ nũmasiɗe Ãcõrẽba Noéra jũma animarã jãba dromane duanʉ siɗa quĩrãdoaẽ́ ɓasia. Maʉ̃ bẽrã Ãcõrẽba nãũrãda jũma naʉ̃ ẽjũãne tʉbisia, pusa edrebema baidora tʉdrʉbisia, idjaɓa cue siɗa poabisia.
2 –
3 8:3-4 Maʉ̃ bẽrã dora pĩãca eɗaa erru wãsia. Cue zesi ewariɗeba ciento cincuenta ewari baɗacarea jãba dromara Ararat eyaiɗa ɓʉ druaɗe poa ɓesia. Cue zesi poaɗe sei jeɗeco auɗu diecisiete ewari ɓʉɗe mãwã poasia.
4 –
5 Baribʉrʉ waɗibiɗa dora erru ɓasia. Pĩãca erru wãne diebema jeɗeco nabema ewariɗe waabema eya borora odjacuasia.
6 Cuarenta ewari baɗacarea Noéba jãba dromane dajadaa acʉbada oɗara ewasia.
7 Ewapeɗa ĩbana ne mĩguia cobarida ẽdrʉbisia egoro põãsada unui cawaya.* Maʉ̃ ĩbanara wãpeɗa waa zeẽ́ basía, ãtebʉrʉ pʉrrʉa wãɓari nĩbabadjia do errubʉrʉmisa.
8 Mãwã ɓʉɗe Noéba puchirãda wãbisia dora errusi cawaya.
9 Maʉ̃ puchirãra jãba dromanaa waya jẽda zesia sãma ɓarida unuẽ́ bẽrã. Maʉ̃be Noéba puchirãra idji jʉwaba edapeɗa jãba dromane eɗa ɓʉsia.
10 Siete ewari jʉ̃ãpeɗa Noéba wayacusa puchirãra jãba dromaneba wãbisia.
11 Queubʉrʉɗe puchirãra waya jẽda zesia. Maʉ̃ne dji quiɗaɗe olivo bacuru queduada enesia. Maʉ̃neba Noéba cawasia ẽjũã ũ nũmanara wãrãda errubʉrʉda.
12 Waya siete ewari jʉ̃ãpeɗa Noéba wayacusa puchirãra wãbisia. Maʉ̃ne puchirãra waa Noémaa zeẽ́ basía.
13 Noé 601 poa ɓasiɗe naʉ̃ ẽjũãne dora jũma errusia. Ara maʉ̃ poaɗe dji nabema jeɗecoɗe nabema ewariɗe Noéba jãba droma de ẽcarrara ogapetasia. Maʉ̃ne ẽjũãra põãsa ɓʉda unusia.
14 Jeɗeco aɓa auɗu veintisiete ewari ɓʉɗe ẽjũãra wãrãda bio põãsa ɓasia.
15 Maʉ̃bebʉrʉ Ãcõrẽba Noéa jarasia:
17 Idjaɓa ẽdrʉbigadua jũma animarã bʉ ume duanʉra: ĩbanada, animarã daupẽbadada, animarã ãdji jãne wãbada siɗa jũma naʉ̃ ẽjũãne wãnapeɗa yõnamãrẽã.–
18 Ara maʉ̃da Noéra, dji quima, dji warrarã, dji ãĩgurã siɗa ẽdrʉsiɗaa.
19 Idjaɓa jãba dromaneba ẽdrʉsiɗaa jũma animarã daupẽbadada, mẽãbemada, ãdji jãne wãbadada idjaɓa wãɓaribada siɗa.
20 Maʉ̃be Noéba mõgarada ʉ̃tʉ pã buesia animarã Ãcõrẽa babue diai carea. Mãwã opeɗa Ãcõrẽa babue diaida ɓʉ animarãda, ĩbana siɗa aɓa aɓa beacuasia. Beacuapeɗa mõgara ʉ̃tʉ pã bueɗa ʉ̃rʉ̃ Ãcõrẽa babue diasia.
21 Maʉ̃ babue diaɗara Ãcõrẽba bia unusia. Maʉ̃ne jarasia:
–Iɗiba ʉ̃taa mʉ̃a naʉ̃ ẽjũãra waa biẽ́ ɓʉẽ́a, ẽberãrãba caibe eɗaʉba ãdji soɗe cadjirua oɗidrʉ crĩcha ɓeamĩna. Idjaɓa mʉ̃a jũma zocai ɓeara waa quinibiẽ́a mʉ̃a oɗa quĩrãca.
22 Naʉ̃ ẽjũã ɓʉmisa ẽberãrãra ne u panania, ne ewa panania. Ewari jʉ̃wʉ̃rʉ̃ãra, ewari cũrãsa siɗa ɓaya. Doiɗaada, poa siɗa ɓaya. Ãsa, diamasi siɗa ɓaya.–
Beɗea eɗaare
^ 8:7. Ĩbana ne mĩguia cobarida. Cãpũrĩã beɗeaɗe ɓʉ́ ɓʉa “cuervo.” Baribʉrʉ dopeda jaraẽ́ ɓʉa. Idjaɓa ãgoso siɗa jaraẽ́ ɓʉa ne mĩguiada cobarimĩna.
