Genesi 9:1-29
9 Maʉ̃be Ãcõrẽba Noéa, dji warrarãa biɗa nãwã bia jarasia:
–Warra zocãrã yõnadua. Naʉ̃ ẽjũãra jũma biraɗadua.
2 Jũma animarã naʉ̃ ẽjũãne ɓeaba bãrãra wayaɗia. Ĩbanara, animarã druabemara, pusaɗebema siɗa jũma bãrã jʉwaeɗa ɓeaɗia.
3 Mʉ̃a naẽna chiruada, nejõ siɗa coɗamãrẽã diasia.* Ara maʉ̃ quĩrãca iɗi mʉ̃a jũma animarã ɓea siɗa diabʉrʉa coɗamãrẽã.
4 Baribʉrʉ animarã oara cocara panʉa, oaɗeba jũmarãda zocai duanʉ bẽrã.
5 Ẽberãba wa animarãba ẽberãda beaibʉrʉ, mʉ̃a cawa oya.
6 Mʉ̃a ẽberãra ara mʉ̃dji quĩrãca osia. Maʉ̃ carea bariduada mĩã beaibʉrʉ, bãrã bororãba maʉ̃ ẽberãra beabiɗida panʉa.
7 Mʉ̃a bãrãa jaraya: warra zocãrã yõnadua. Naʉ̃ ẽjũãra jũma biraɗadua.–
8 Maʉ̃ awara Ãcõrẽba Noéa, dji warrarãa biɗa nãwã jarasia:
9 9:9-10 –Ũrĩnadua, mʉ̃a beɗeada ɓʉya bãrã ume, bãrãneba yõbʉdarã ume biɗa, jũma animarã bãrã ume jãba dromaneba ẽdrʉpeɗaɗa ume biɗa. Animarã daupẽbada, mẽãbema, ĩbana, jũma naʉ̃ ẽjũãne ɓea animarã ume mʉ̃a beɗeada ɓʉya.
11 Mʉ̃a beɗea ɓʉbʉrʉra naʉ̃gʉa: naʉ̃ ẽjũãne zocai ɓeara waa dopapaba jõbiẽ́a. Waa naʉ̃ ẽjũãra ũ wãẽ́a naʉ̃ ẽjũãne ɓea quininamãrẽã. Mʉ̃a beɗea ɓʉɗara wãrãda mãwã ɓaya.–
12 9:12-13 Maʉ̃ awara Ãcõrẽba jarasia:
–Mʉ̃a bãrã ume, bãrãneba yõbʉdarã ume, animarã ume biɗa beɗea ɓʉɗara jõca baya. Maʉ̃ carea mʉ̃a sẽyãda jʉ̃rãrãne jira ɓʉbʉrʉa cawaɗamãrẽã mʉ̃a naʉ̃ ẽjũãne ɓea ume beɗea ɓʉɗara wãrãda mãwã ɓaida. Maʉ̃ sẽyãra eumaa.
14 Mʉ̃a jʉ̃rãrã zebibʉrʉɗe mʉ̃ eumara odjabari baya.
15 Maʉ̃gʉɗeba mʉ̃a quĩrãneba ɓaya mʉ̃a bãrã ume animarã ume biɗa beɗea ɓʉɗara. Waa dopapara wãbiẽ́a naʉ̃ ẽjũãne ɓea quinibi carea.
16 Euma jʉ̃rãrãne jira ɓʉ unubʉrʉɗe mʉ̃a quĩrãneba ɓaya jũma naʉ̃ ẽjũãne zocai ɓea ume beɗea ɓʉɗara. Maʉ̃ra jõca baya.
17 Wãrãda eumaba quĩrãnebabi ɓaya mʉ̃a jũma naʉ̃ ẽjũãne zocai ɓea ume beɗea ɓʉɗara.–
Ãcõrẽba Noéa mãwã jarasia.
Noé warrarãba opeɗaɗa
18 Noé warrarã jãba dromaneba ẽdrʉpeɗaɗara Seʉ̃, Caʉ̃, idjaɓa Jape basía. Caʉ̃ra Canaaʉ̃ zeza basía.
19 Noé warrarãra ũbea panasiɗaa, baribʉrʉ ãdjiɗeba yõpeɗaɗarãba naʉ̃ ẽjũãra wayacusa birasiɗaa.
20 Maʉ̃be Noéba peada opeɗa uvada úsia.
21 Ewari aɓa Noéba uva ɓa aseada do ɓasia. Maʉ̃ba idjira beu ɓesia. Maʉ̃ bẽrã idji dejãne ãcaɗa taɓasia.
22 Mãwã taɓʉɗe dji warra Caʉ̃da eɗa zesia. Caʉ̃ra Canaaʉ̃ zeza basía. Maʉ̃ne Caʉ̃ba idji zeza ãcaɗa taɓʉda unupeɗa idji djabarã dajadaare panʉ́a jaraɗe wãsia.
23 Maʉ̃ carea Seʉ̃ba Jape biɗa boroɓada aɓa edasiɗaa. Maʉ̃ boroɓara ãdji equiaɗe ɓʉɗapeɗa ãdaunaa wãsiɗaa ãdji zezamaa. Maʉ̃be araa acʉɗaẽ́ ãdji zezara ãnẽɓari ɓʉsiɗaa. Mãwã ãdji zeza cacuara ununaẽ́ basía.
24 Noé quĩrã baɗacarea cawasia idji warra tẽãbema Caʉ̃ba oɗara.
25 Maʉ̃ carea jarasia:
Caʉ̃ warra Canaaʉ̃ra mʉ̃a biẽ́ jara ɓʉya. Canaaʉ̃ra idji zeza djabarã nezoca eɗaara ɓʉda ɓaya.
26 Mãwã jaraɗacarea Noéba idji warrarã Seʉ̃ra Jape siɗa nãwã bia jara ɓʉsia:
Mʉ̃ Ãcõrẽba Seʉ̃ra bia ɓʉya. Canaaʉ̃ra Seʉ̃ nezoca baya.
27 Japera Ãcõrẽba dji dromada ɓʉya. Idji djaba Seʉ̃ ume necai ɓaya. Canaaʉ̃ra idji nezoca baya.
28 Dopapa wãnacarea Noéra 350 poa ɓasia.
29 Mãwã 950 poa ɓasiɗe jaiɗasia.
Beɗea eɗaare
^ 9:3. Genesi 1:29.
