Hebreo 1:1-14
1 Naẽnaeɗa Ãcõrẽba dadji drõã naẽnabemarãa ɓarima zocãrã quĩrãtanoaneba beɗeabadjia. Idjiɗeba beɗeabadarãneba mãwã osia.
2 Baribʉrʉ naʉ̃ jĩrũarebema ewariɗe idji Warraɗeba dadjirãa beɗeasia. Idji Warraɗeba Ãcõrẽba ne jũmada osia idjaɓa idjida ɓʉsia ne jũma eroɓamãrẽã.
3 Idji Warraba Ãcõrẽ quĩrãwãrẽã dorrodorroada unubibaria. Idjiabʉrʉ Ãcõrẽra sãwã ɓʉda cawabibaria. Idji beɗea ʉɓʉa ɓʉɗeba ne jũma oɗara ara mãwã ɓʉa. Idjia dadjirã cadjiruara sʉgʉpeɗa Ãcõrẽ dji droma ɓʉ jʉwa araare bajãne chũmesia.
4 Ãcõrẽba idjira bajãnebema nezocarã cãyãbara dji dromaara ɓʉsia. Ãcõrẽba idjira trʉ̃ ɓʉsia “mʉ̃ Warra,” maʉ̃ne ãdjirãra trʉ̃ ɓʉsia “mʉ̃ nezocarã.” Mãwã Ãcõrẽba idji trʉ̃ ɓʉɗara ãdjirã trʉ̃ ɓʉɗa cãyãbara biara ɓʉa.
5 Ãcõrẽba ni aɓaʉ bajãnebema nezocaa nãwã jaraẽ́ basía:
Bʉra mʉ̃ Warraa. Iɗi bʉra mʉ̃ Warraaɗa abʉrʉa.*
Idjaɓa ãdjiɗebemada nãwã jaraẽ́ basía:
Mʉ̃ra idji zeza baya, idjaɓa idjira mʉ̃ warra baya.*
6 Ãcõrẽba idji Warra iwina naʉ̃ ẽjũãnaa diabuebʉrʉɗe nãwã jarasia:
Jũma Ãcõrẽ bajãnebema nezocarãba idjía bia beɗeaɗida panʉa.
7 Bajãnebema nezocarãnebemada Ãcõrẽba nãwã jarasia:
Bajãnebema nezocarãda osia nãũrã quĩrãca ɓeaɗamãrẽã.*
Ãdjirãra osia tʉbʉ urua quĩrãca ɓeaɗamãrẽã.*
8 Baribʉrʉ idji Warraɗebemada Ãcõrẽba nãwã jarasia:
Ãcõrẽ, bʉra ewariza jũmarã boroda ɓaya. Bʉ purura jipa pe eroɓaya.
9 Bʉa biadrʉ quĩrĩãsia. Cadjiruara quĩrãmasia.
Maʉ̃ carea Ãcõrẽ, bʉ Ãcõrẽba jũma bʉ ume panʉ cãyãbara bʉdrʉ dji dromaara ɓʉsia. Mãwã bʉra bio ɓʉsriɗabisia.*
10 Idjaɓa nãwã jarasia:
Jũmarã Boro, naãrãeɗa bʉa naʉ̃ ẽjũãda, bajã siɗa osia.
11 Jũma maʉ̃gʉra jõya baribʉrʉ bʉra ara mãwã ɓaya. Jũma maʉ̃gʉra dji sore baya wua dji sore babari quĩrãca.
12 Wua sore ẽrãpeɗa djiwiɗi jʉ̃bʉrʉ quĩrãca bʉa jũma maʉ̃gʉra ãyã ɓʉpeɗa djiwiɗida oya.
Baribʉrʉ bʉra ara bʉdji ɓʉda ɓaya. Bʉra beucaa.*
13 Ãcõrẽba ni aɓaʉ bajãnebema nezocaa jaraẽ́ basía:
Mʉ̃ jʉwa araare chũmedua aɓa bʉ dji quĩrũra mʉ̃a jũma bʉ jʉwaeɗa ɓʉbʉrʉɗaa.*
14 Jũma bajãnebema nezocarãda Ãcõrẽba zocabaria. Ãcõrẽba ãdjirãra diabuebaria dji ẽdrʉɗirã carebaɗamãrẽã.
Beɗea eɗaare
^ 1:5. Salmo 2:7. Iɗi bʉra mʉ̃ Warraaɗa abʉrʉa. Griego beɗeaɗe ɓʉ́ ɓʉa: “Iɗi mʉ̃a bʉda unusia” wa “iɗi mʉ̃ra bʉ zeza basía.”
^ 1:5. 2 Samuel 7:14.
^ 1:7. Griego beɗeaɗe “nãũrã” idjaɓa “jaure” aɓari beɗeaa. Maʉ̃ carea ʉ̃cʉrʉ traduccioʉ̃ne maʉ̃ versículoɗe nãwã ɓʉ́ ɓʉa: “Idji bajãnebema nezocarãda osia jaureda ɓeaɗamãrẽã.”
^ 1:7. Salmo 104:4.
^ 1:9. Salmo 45:6-7.
^ 1:12. Salmo 102:25-27.
^ 1:13. Salmo 110:1. Bʉ jʉwaeɗa ɓʉbʉrʉɗaa. Griego beɗeaɗe ɓʉ́ ɓʉa: “Bʉ jĩrũ edre ɓʉbʉrʉɗaa.”
