Hebreo 10:1-39
10 Ãcõrẽba Moisea diaɗa leyba jũma ne bia Critoɗeba zeiɗebemada jarijaria unubi ɓʉa. Maʉ̃ ne biara leyba diacaa. Maʉ̃ bẽrã poaza Ãcõrẽa animarã babue diaɗe wãbadara leyba poya jipa ɓʉcaa.
2 Leyba ãdjirãra wãrãda jipa ɓʉɗabara, waa animarãra babue diaɗe wãnaẽ́ bacasia. Animarã babue dia panʉneba wãrãda cadjirua neẽ́ panenabara, waa crĩchaɗaẽ́ bacasia idji quĩrãpita beɗeaɗe panʉda.
3 10:3-4 Baribʉrʉ paca dji umaquĩrã oaba, chiwatu oa biɗa cadjiruara poya ãyã ɓʉca bẽrã, poaza animarã babue dia panʉneba quĩrãnebabi ɓʉa ãdjia cadjirua obadada.
4 –
5 Maʉ̃ carea Crito naʉ̃ ẽjũãnaa zesiɗe idjia Ãcõrẽa nãwã jarasia:
Bʉa animarãra bʉ́a babue diaɗida quĩrĩãẽ́ ɓʉa. Ne diaɗi siɗa quĩrĩãẽ́ ɓʉa. Bʉa mʉ̃́a cacua diaɗadrʉ quĩrĩã ɓʉa.
6 Ãdji cadjirua carea animarã babue diabʉdaɗe, ne diabʉdaɗe biɗa bʉra ɓʉsriɗa ɓacaa.
7 Maʉ̃ bẽrã mʉ̃a jarasia: Ãcõrẽ, mʉ̃ra nama ɓʉa bʉa quĩrĩã ɓʉda oi carea.
Bʉ Beɗeaɗe mʉ̃nebemada mãwã ɓʉ́ ɓʉa.*
8 Critoba naãrã jarasia Ãcõrẽba quĩrĩãẽ́ ɓʉda ẽberãrãba ãdji cadjirua carea animarãda idjía babue diaɗida idjaɓa ne diaɗida. Ãcõrẽba Moisea diaɗa leyba mãwã obi ɓʉmĩna, maʉ̃neba Ãcõrẽra ɓʉsriɗa ɓacaaɗa asia.
9 Maʉ̃be Critoba Ãcõrẽa nãwã jarasia: “Mʉ̃ra nama ɓʉa bʉa quĩrĩã ɓʉda oi carea.” Maʉ̃ba cawabi ɓʉa naãrã Ãcõrẽba animarã babue diabi ɓaɗara Critoba ãyã ɓʉsida. Maʉ̃ cacuabari ara idjida idu beabiɗa bẽrã idjidrʉ ɓesia.
10 Ãcõrẽba quĩrĩã ɓʉra Jesucritoba jũma osia. Ara idjida idu beabisia. Ɓarima aɓa mãwã oɗaba dadjirãra ewariza Ãcõrẽ itea bia ɓʉsia.
11 Sacerdoterãba ewariza Ãcõrẽ itea ne obadaa idjaɓa animarãra babue diabadaa. Mãwãmĩna maʉ̃gʉba cadjiruara ãyã ɓʉcaa.
12 Baribʉrʉ Jesucritoba cadjirua carea ara idjida idu beabisia. Ɓarima aɓa mãwã oɗaba jũma cadjiruara ãyã ɓʉsia. Maʉ̃be Ãcõrẽ jʉwa araare chũmesia.
13 Mama jʉ̃ã ɓʉa aɓa Ãcõrẽba jũma idji ume dji quĩrũra idji jʉwaeɗa ɓʉbʉrʉɗaa.*
14 Critoba ara idjida idu beabisia. Mãwã ɓarima aɓa oɗaba jũma Ãcõrẽ itea ɓeara jipa ɓʉsia. Maʉ̃ jipa ɓʉɗara ewariza ɓaya.
15 Ãcõrẽ Jaure biɗa aɓarida dadjirãa cawabi ɓʉa. Naãrã jarasia:
16 Jũmarã Boro Ãcõrẽba nãwã jara ɓʉa: “Nocoarebema ewariɗe mʉ̃a beɗea djiwiɗida israelerã ume nãwã ɓʉya: mʉ̃ leyra ãdjirã crĩchaɗe, ãdjirã soɗe biɗa ɓʉya.”*
17 Maʉ̃are nãwã jarasia:
Ãdjirãba biẽ́ opeɗaɗara mʉ̃a jũma quĩrãdoaya. Ãdjirãba cadjirua opeɗaɗara mʉ̃a waa crĩcha ɓaẽ́a.*
18 Critoɗeba Ãcõrẽba dadjirã cadjiruara jũma quĩrãdoaɗa bẽrã, waa dadjirã cadjirua carea idjía ne diaɗiẽ́ panʉa.
Jesucritoɗeba dadjirãra Ãcõrẽ caita poya wãnia
19 Maʉ̃ bẽrã djabarã, Ãcõrẽ itea biara ɓʉ dejãne eɗa wãbʉda quĩrãca naʉ̃ ewariɗe Jesucrito oaɗeba dadjirãra Ãcõrẽ caita ne wayaa neẽ́ wãnida panʉa.
20 Maʉ̃ dejãne wua eatʉ jira ɓʉ cõãbʉrʉ quĩrãca Jesucritoba idji beuɗaɗeba o djiwiɗida jarisia dadjirã Ãcõrẽ caita poya wãnamãrẽã. Maʉ̃ oɗe wãbʉrʉra ewariza Ãcõrẽ ume zocai ɓaya.
21 Dadjirãba Sacerdote dji Dromada bajãne eropanʉa. Idjia Ãcõrẽ ẽberãrãra jũma carebabaria.
22 Maʉ̃ bẽrã Ãcõrẽ caita wãnadrʉ. Critoba dadjirã crĩcha cadjirua ɓaɗada jipa ɓʉsia dadjirã so idji oaba jĩãpobʉrʉ quĩrãca. Ãcõrẽ quĩrãpita bia ɓʉsia dadjirã cacuara baido pãpãrã quiruba sʉgʉɗa quĩrãca. Maʉ̃ bẽrã crĩcha aɓa panʉneba idjaɓa wãrãda ĩjã panʉneba Ãcõrẽ caita wãnida panʉa.
23 Ãcõrẽra beɗea aɓa ɓʉ bẽrã dadjirãba jʉ̃ã panʉra idjaɓa maʉ̃nebema jũmarãa jara panʉ siɗa ni maãrĩ biɗa quenaɓariɗiẽ́ panʉa.
24 Jʉrʉɗida panʉa sãwã dji carebaɗida biara dji quĩrĩãni carea idjaɓa ne biada oɗi carea.
25 Ãbaa dji jʉrebadara idu ɓʉɗiẽ́ panʉa ʉ̃cʉrʉba idu ɓʉbada quĩrãca. Ãtebʉrʉ dji carebaɗida panʉa biara ĩjãni carea. Dadjirã Boro Ãcõrẽba cawa oi ewarira dãrãẽ́ne zeida cawa panʉ bẽrã biara mãwã oɗida panʉa.
26 Wãrã beɗea cawapeɗaɗacarea ara dadjiareba cadjiruada o pananibʉrʉ, waa neẽ́a Ãcõrẽa diaɗi carea maʉ̃ cadjiruara quĩrãdoamãrẽã.
27 Mãwã o ɓʉba aɓabe ne wayaaɗeba jʉ̃ãida ɓʉa Ãcõrẽba cawa omãrẽã. Maʉ̃ ewariɗe Ãcõrẽba jũma idji ume dji quĩrũra tʉbʉ uruga nũmʉne ɓatabueya ewariza bá nũmamãrẽã.
28 Naẽna aɓaʉba Ãcõrẽba Moisea diaɗa leyda igarasira, maʉ̃ne ẽberã uméba wa ũbeaba jarasiɗara wãrãda mãwã ɓʉda, idjira aɓeɗa quĩrã djuburia neẽ́ beabadjiɗaa.*
29 Maʉ̃ba ¿sãwã crĩcha panʉ? ¿Ãcõrẽba idji Warra igarabadara wetara cawa oẽ́ca? Ãcõrẽba idji Warra oaɗeba beɗea djiwiɗida ɓʉsia dadjirãra idji itea bia ɓʉi carea. Mãwãra Ãcõrẽ Warra oa erozoaɗa siriẽ́ ɓʉda crĩchabadara ¿idjia wetara cawa oẽ́ca? Maʉ̃ awara Ãcõrẽ Jaureba idji biaɗeba dadjirãra careba ɓʉa. Mãwãra Ãcõrẽ Jaure biẽ́ jarabadara ¿idjia wetara cawa oẽ́ca?
30 Dadjirãba cawa panʉa Ãcõrẽba nãwã jarasida: “Mʉ̃abʉrʉ cawa oya. Jũmarãa diaya ãdjirãba opeɗaɗa quĩrãca.”* Idjaɓa nãwã jarasia: “Jũmarã Boro Ãcõrẽba idji ẽberãrãra cawa oya.”*
31 Ãcõrẽ zocai ɓʉba dadjida cawa oibʉrʉ wãrãda bio minijĩchia ɓʉa.
32 Quĩrãnebaɗadua bãrãba naãrã wãrã beɗea cawasiɗaɗe sãwã panasiɗada. Maʉ̃ ewariɗe bãrã bia mĩgapeɗaɗara jũma droasiɗaa.
33 Eɗauɗe jũmarã quĩrãpita Crito carea biẽ́ jarasiɗaa idjaɓa biẽ́ osiɗaa. Eɗauɗe djabarã Crito carea bia mĩga panʉ ume bia mĩgasiɗaa.
34 Crito carea preso ɓʉpeɗaɗara bãrãba quĩrã djuburiasiɗaa. Idjaɓa bãrãba ne eroɓeaɗara ɓʉsriɗa idu jãrĩbisiɗaa, cawa panʉ bẽrã maʉ̃ cãyãbara ne biara ɓʉ jõcada bajãne eropanʉda.
35 Maʉ̃ bẽrã bãrãba Ãcõrẽ ĩjã panʉra igararãnadua. Ĩjã pananibʉrʉ, Ãcõrẽba bajãne ne biada waiɓʉa diaya.
36 Bãrãba jũma droaɗida panʉa. Mãwã Ãcõrẽba quĩrĩã ɓʉda oɗapeɗa idjia diai jaraɗara jũma edaɗia.
37 Ãcõrẽ Beɗeaɗe nãwã ɓʉ́ ɓʉa:
Dji zeida ɓʉra dãrãẽ́ne zeya. Idjira wãrãda dãrãẽ́a.
38 Ẽberã jipa ɓʉra mʉ̃ ĩjã ɓʉɗeba zocai ɓaya. Baribʉrʉ idjia ĩjã ɓʉda igaraibʉrʉ, mʉ̃a idjira bia unuẽ́a.*
39 Ʉ̃cʉrʉba Ãcõrẽ ĩjã panʉra igaraɗapeɗa aduaɗia. Baribʉrʉ dadjirãra maʉ̃ ẽberãrã quĩrãca panʉẽ́a, ãtebʉrʉ Ãcõrẽ ĩjã panʉneba ewariza zocai panania.
