Hebreo 12:1-29
12 Maʉ̃ ẽberãrã zocãrãba unubisiɗaa Ãcõrẽra wãrãda ĩjãsiɗada. Maʉ̃da cawa panʉ bẽrã dadjirã biɗa ara maʉ̃ quĩrãca ĩjã pananida panʉa. Dadjirãa idu ĩjãbicara, cadjiruaba dadjirã bʉrá edabari siɗa ãyã ɓʉɗapeɗa jũma droa panʉneba nocoɗaa wãnadrʉ dadjirã jũẽnida panʉmaa.
2 Jesudrʉ biara crĩchaɗida panʉa. Idjiabʉrʉ carebasia dadjirãba naãrã ĩjãnamãrẽã idjaɓa carebabaria ewariza ĩjã pananamãrẽã. Crĩchaɗadua sãwã idjira cruɗe bia mĩgasida. Maʉ̃ carea peraida ɓaɗamĩna peraẽ́ basía. Idjia cawasia mãwãnacarea bio ɓʉsriɗa ɓaida. Iɗira Ãcõrẽ bugue biya quiru jʉwa araare chũmʉa.
3 Bio crĩchaɗadua ẽberã cadjiruarãba Jesu biẽ́ osiɗaɗe sãwã droasida. Mãwã bãrãra sẽnaẽ́a idjaɓa bãrãba ĩjã panʉra igaraɗida crĩchaɗaẽ́a.
4 Bãrãra cadjirua ume djõ panʉa. Baribʉrʉ waɗibiɗa bãrãra beaɗaẽ́ panʉa Jesu beapeɗaɗa quĩrãca.*
5 Biara ĩjãnamãrẽã Ãcõrẽ Beɗeaɗe ɓʉ́ ɓʉra ¿bãrãba quĩrãdoasiɗaca? Idji warrarãa nãwã jarasia:
Mʉ̃ warra, Jũmarã Boroba quẽãbʉrʉɗe sopuarãdua. Jipa omãrẽã quẽãbʉrʉɗe biẽ́ crĩcharãdua.
6 Jũmarã Boro Ãcõrẽba quĩrĩã ɓʉ ẽberãrãra quẽãbaria jipa oɗamãrẽã.
Idji warrarã ɓeaɗamãrẽã edaɗarãba cadjirua osiɗara idjia ubaria.*
7 Bãrã bia mĩga panʉra droaɗadua Ãcõrẽba maʉ̃gʉɗeba jipa obi ɓʉ bẽrã. Bãrãra idji warrarã bẽrã, Ãcõrẽba mãwã idu bia mĩgabi ɓʉa cawa jipa oɗamãrẽã. ¿Warraba jipa omãrẽã dji zezaba quẽãcaca?
8 Ãcõrẽba idji warrarãra jũma quẽãbaria jipa oɗamãrẽã. Mãwã oẽ́bʉrʉ, bãrãra idji warrarã araẽ́a.
9 Dadjirãba naʉ̃ djaraɗe zezada eropanasiɗaa. Ãdjirãba dadjirãra quẽãbadjiɗaa jipa oɗamãrẽã. Maʉ̃ carea ãdjirãra wayabadjiɗaa. Maʉ̃ba ¿ewariza zocai ɓeaɗi carea dadjirã Zeza bajãnebemara biara wayaɗiẽ́ panʉca?
10 Dadjirã zeza naʉ̃ ẽjũãne zocai panasiɗaɗe dadjirãra quẽãbadjiɗaa jipa oɗamãrẽã ara ãdjia crĩcha panana quĩrãca. Baribʉrʉ Ãcõrẽba mãwã obaria idji quĩrãca cadjirua neẽ́ bia ɓeaɗamãrẽã.
11 Jipa oɗamãrẽã quẽãbʉdaɗe dadjirãra ɓʉsriɗaɗacaa ãtebʉrʉ sopuabadaa. Baribʉrʉ tẽã baɗacarea dji ĩjãpeɗaɗaba jipa obadaa idjaɓa necai ɓeabadaa.
Ãcõrẽra ĩjã pananadua
12 Maʉ̃ carea sẽ panʉmĩna bãrã jʉwa norraɓari ɓeada, bãrã chĩrãboro ureurea ɓea siɗa wayacusa ʉɓʉabibʉda quĩrãca biara ĩjã pananadua.
13 O jipa ɓʉɗe nĩbaɗadua. Mãwã dji sẽ panʉra ãĩ wãnaẽ́a ãtebʉrʉ biara ĩjã panania.*
14 Jũmarã ume necai ɓeaɗadua. Idjaɓa Ãcõrẽ itea bia ɓeaɗadua. Ãcõrẽ itea bia ɓeaẽ́ba idjira poya ununaẽ́a.
15 Quĩrãcuita ɓeaɗadua Ãcõrẽba idji biaɗeba careba ɓʉra ni aɓaʉba igararãnamãrẽã. Idjaɓa quĩrãcuita ɓeaɗadua bãrã tãẽna ni aɓaʉda ne carra asea quĩrãca ɓearãnamãrẽã. Maʉ̃ba djabarãa biẽ́ crĩchabipeɗa ãrĩbaria.
16 Quĩrãcuita ɓeaɗadua bãrã tãẽna ni aɓaʉda auɗua nĩbarãnamãrẽã ni Esaú quĩrãca Ãcõrẽnebemada crĩchaɗaẽ́ ɓearãnamãrẽã. Esaúra warra iwina bẽrã dji zezaba eroɓʉɗebemada waiɓʉara edaida ɓasia. Mãwãmĩna idji djababa ɓarima aɓa ne cobiɗabari idjia edaida ɓaɗara jũma idji djabaa diasia.*
17 Bãrãba cawa panʉa mãwãnacarea Esaúba quĩrĩã ɓasida dji zezaba idjira bia jaraida Ãcõrẽba carebamãrẽã. Mãwãmĩna dji zezaba idjira igarasia. Esaúra jĩãnamĩna idjia naãrã oɗara poya bia ɓʉẽ́ basía.*
18 Bãrã Ãcõrẽmaa zepeɗaɗara israelerã zepeɗaɗa quĩrãca ɓʉẽ́a. Israelerãra Sinai eyaɗaa wãsiɗaa. Maʉ̃ eyara ãdji dauba unusiɗaa.* Maʉ̃ne eyara uruga nũmasia, ewarira pãĩsosoa nũmesia, idjaɓa nãũrãda minijĩchia pua nũmesia.
19 Ãdjirãba cachiru jĩguara, Ãcõrẽba jĩgua beɗeabʉrʉ siɗa ũrĩsiɗaa. Maʉ̃ ũrĩsiɗaɗe ne wayaaba beɗea djuburiasiɗaa Ãcõrẽra waa beɗearãmãrẽã.
20 Bio ne wayasiɗaa Ãcõrẽba nãwã jaraɗa bẽrã: “Baridua ẽberãda, animarã siɗa naʉ̃ eya caita zeibʉrʉ, mõgaraba taɓari beaɗida panʉa wa chaba drʉ beaɗida panʉa.”*
21 Israelerãba unu panʉra bio minijĩchia ɓʉ bẽrã Moiseba nãwã jarasia: “Mʉ̃ra ne wayaaba ure nũmʉa.”*
22 Baribʉrʉ bãrãra Ãcõrẽmaa zesiɗaɗe bajãnebema Sioʉ̃ eyaɗaa, bajãnebema Jerusaleʉ̃naa zesiɗaa. Maʉ̃ purura Ãcõrẽ zocai ɓʉɗea. Mama bajãnebema nezocarãda mil zocãrã ãbaa ɓʉsriɗa dji jʉre duanʉa.
23 Bãrãra Ãcõrẽ warrarã dji jʉre duanʉmaa zesiɗaa. Ãcõrẽmaarã jũmarãda warra iwinaa. Bajãnebema bẽrã ãdji trʉ̃ra mama ɓʉ́ ɓʉa. Bãrãra jũmarã Cawa Obari Ãcõrẽmaa zesiɗaa. Ẽberãrã jipa ɓea Ãcõrẽba bia ɓʉɗamaa zesiɗaa.
24 Bãrãra Jesumaa zesiɗaa. Idjiɗeba Ãcõrẽra ẽberãrã ume beɗea djiwiɗida ɓʉsia. Bãrãra idji oa jĩãpoɗamaa zesiɗaa. Jesu oa erozoaɗaba cawabi ɓʉra Abel oa erozoaɗaba cawabi ɓʉ cãyãbara biara ɓʉa. Jesu oa erozoaɗaba cawabi ɓʉa Ãcõrẽba cadjiruara sʉgʉbarida. Baribʉrʉ Abel oa erozoaɗaba cawabi ɓʉa Ãcõrẽba cadjiruara cawa obarida.*
25 Maʉ̃ carea quĩrãcuita ɓeaɗadua Ãcõrẽba jara ɓʉra igaraɗa amaaba. Idjia Sinai eyaɗe jaraɗa igarapeɗaɗara cawa osiɗe ẽdrʉɗaẽ́ basía. Maʉ̃ bẽrã idjia bajãneba dadjirã soɗe jara ɓʉda igaraɗibʉrʉ ¿ẽdrʉɗica? Ẽdrʉɗaẽ́a.
26 Sinai eyaɗe Ãcõrẽ beɗeasiɗe de uremiada wãsia. Baribʉrʉ naʉ̃ ewariɗe idjia nãwã jara ɓʉa:
Wayacusa mʉ̃a de uremiara wãbiya. Maʉ̃ne aɓabe naʉ̃ ẽjũãda urebiẽ́a, ãtebʉrʉ bajã siɗa urebiya.*
27 Wayacusa urebiyaɗa asiɗe Ãcõrẽba cawabisia ne jũma idjia ocuaɗara urepeɗa jõbida. Maʉ̃ne aɓabe jõcadrʉ ɓeya.*
28 Dadjirãra Ãcõrẽ puru jõcaɗe panani bẽrã idjía bia ɓʉaɗa aɗida panʉa. Bio waya panʉneba idjía bia beɗeaɗida panʉa idjia quĩrĩã ɓʉ quĩrãca.
29 Mãwã wayaɗida panʉa dadji Ãcõrẽba idji ĩjãẽ́ ɓeara cawa oi bẽrã tʉbʉ uruaba jũma bábari quĩrãca.
Beɗea eɗaare
^ 12:4. Bãrãra beaɗaẽ́ panʉa Jesu beapeɗaɗa quĩrãca. Griego beɗeaɗe nãwã ɓʉ́ ɓʉa:
“Waɗibiɗa bãrã oara erozoaẽ́ ɓʉa.”
^ 12:6. Proverbio 3:11-12.
^ 12:13. Griego beɗeaɗe nãwã ɓʉ́ ɓʉa: “O jipa ɓʉɗe nĩbaɗadua dji jĩrũ biẽ́ ɓeara ãĩ tʉgarãnamãrẽã ãtebʉrʉ ãdji jĩrũra biaɗamãrẽã.”
^ 12:16. Genesi 25:27-34.
^ 12:17. Genesi 27:1-41.
^ 12:18. Eyara ãdji dauba unusiɗaa. Griego beɗeaɗe nãwã ɓʉ́ ɓʉa: “Eya dadjia poya tãida ɓʉmaa zesiɗaa.”
^ 12:20. Exodo 19:12-13. Wa chaba drʉ beaɗida panʉa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 12:21. Deuteronomio 9:19.
^ 12:24. Genesi 4:10-11.
^ 12:26. Hageo 2:6.
^ 12:27. Griego beɗeaɗe nãwã ɓʉ́ ɓʉa: “Ne jũma idjia ocuaɗa ureida ɓʉra urepeɗa jõbiya. Maʉ̃ne aɓabe ne jũma urecada ɓeya.”
